‘Le Ratane’

“Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.”​—Johane 13:⁠35.

1. Ke seka sefe seo Jesu a ilego a se gatelela nakwana pele ga lehu la gagwe?

“BANA ba-ka.” (Johane 13:​33) Bošegong bja pele ga lehu la gagwe, Jesu o ile a bitša baapostola ba gagwe ka mantšu ao a borutho. Ga go gona ka dipegong tša Ebangedi moo Jesu le ka mohla a ilego a diriša mantšu a a borutho ge a bolela le bona. Lega go le bjalo, bošegong bjoo bjo bo kgethegilego, o ile a tutueletšega go diriša mantšu a a nago le maikwelo a borutho go bontšha lerato le le tseneletšego leo a bego a rata balatedi ba gagwe ka lona. Ge e le gabotse, bošegong bjoo Jesu o ile a bolela ka lerato ka makga a ka bago 30. Ke ka baka la’ng a ile a gatelela seka se gakaakaa?

2. Ke ka baka la’ng go bontšha lerato go le bohlokwa gakaakaa go Bakriste?

² Jesu o ile a hlalosa lebaka leo ka lona lerato le lego bohlokwa gakaakaa. O itše: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Johane 13:​35; 15:​12, 17) Go ba molatedi wa Kriste go sepedišana le go bontšha lerato la borwarre. Bakriste ba therešo ga ba tsebje ka mohuta o itšego wa moaparo goba ka tsela ya bophelo yeo e sa tlwaelegago, eupša ba tsebja ka lerato le borutho leo ba ratanago ka lona. Go ba le mohuta wo o ikgethilego wa lerato ke senyakwa sa bobedi sa dinyakwa tše tharo tša motheo tša go ba morutiwa wa Kriste tšeo go boletšwego ka tšona mathomong a sehlogo se se fetilego. Ke’ng seo se tlago go re thuša go fihlelela senyakwa se?

“Išang Pele xo ya Botlalong!”

3. Moapostola Paulo o neile keletšo efe mabapi le lerato?

³ Go etša ge go bile bjalo ka balatedi ba Kriste ba lekgolong la pele la nywaga, lerato le le ikgethilego ke leo le bonagalago lehono gare ga barutiwa ba kgonthe ba Kriste. Moapostola Paulo  o ile a ngwalela Bakriste ba lekgolong la pele la nywaga gore: “[Ge] e le tša xo rata bana ba bô-lena, xa se tše Le sa swanêlaxo xo ngwalêlwa, xobane leratanong Le barutwa ba Modimo. Ké tšôna Le di dirêlaxo ba bô-lena ka moka.” Godimo ga seo, Paulo o okeditše ka gore: “Išang pele xo ya botlalong!” (1 Ba-Thesalonika 3:​12; 4:​9, 10) Le rena ka mo go swanago re swanetše go ela hloko keletšo ya Paulo gomme re katanele go bontšhana lerato ka ‘botlalo.’

4. Go ya ka Paulo le Jesu, ke bomang bao re swanetšego go ba hlokomela ka mo go kgethegilego?

⁴ Lengwalong lona leo le le buduletšwego, Paulo o kgothaleditše badumedi-gotee le yena go ‘tsoša ba dipelo tše di tapilego’ le go ‘thekga bafokodi.’ (1 Ba-Thesalonika 5:​14) Lebakeng le lengwe, o ile a gopotša Bakriste gore bao ba ‘tiilego ba kgotlelele mefokolo ya bao ba sa tiago.’ (Ba-Roma 15:⁠1) Jesu le yena o ile a nea ditaelo tša mabapi le go thuša bafokodi. Ka morago ga go bolela e sa le pele gore Petro o be a tlo mo latola bošegong bja go swarwa ga gagwe, Jesu o ile a botša Petro gore: “Xe O sokoloxile O tiišê bana beno.” Ka baka la’ng? Ka gobane le bona ba tla be ba lahlile Jesu gomme ka go rialo ba tla be ba nyaka thušo. (Luka 22:​32; Johane 21:​15-17) Ka gona, Lentšu la Modimo le re laela gore re bontšhe lerato go bao ba fokolago moyeng le go bao ba ka bago ba se sa kopanela le phuthego ya Bokriste. (Ba-Hebere 12:​12) Ke ka baka la’ng re swanetše go dira bjalo? Diswantšho tše pedi tše di kwagalago tšeo di boletšwego ke Jesu di nea karabo.

Nku e Timetšego le Šeleng e Timetšego

5, 6. (a) Ke diswantšho dife tše pedi tše kopana tšeo Jesu a di boletšego? (b) Diswantšho tše di utolla’ng ka Jehofa?

⁵ Jesu o boletše diswantšho tše pedi tše kopana bakeng sa go ruta batheetši ba gagwe ka pono ya Jehofa ka bao ba arogilego. Se sengwe se be se le mabapi le modiši. Jesu o itše: “Ké mang motho mo xo lena e a naxo le dinku tše lekxolo; xomme xe a timêlêlwa ke e tee ya tšôna, a ka se kexo a tloxêla tše masome a senyane a metšô e senyane xare xa naxa, a ya a nyaka ye e timetšexo, xo be xo tlê a e hwetšê? Xomme xe a e hweditše, a e bea maxetleng a xaxwe à thabile; Xe a fihla xaê a bitša baxwêra ba xaxwe le baaxišani, a re: Thabang le nna, xobane nku ya-ka e bexo e timetše, ke e bone. Ke a Le botša, ka mokxwa o byalo kwa lexodimong lethabô ka mo-dira-dibe o tee e a sokoloxaxo e tlo ba le le fetaxo la xe xo thabêlwa ba masome a senyane a metšo e senyane ba ba sa nyakexo thsokoloxô.”​—Luka 15:​4-⁠7.

⁶ Seswantšho sa bobedi se be se le mabapi le mosadi. Jesu o itše: “Mosadi ké mang e a naxo le mašeleng a lesome, xe a timêlêlwa ke e nngwê ya tšôna, a ka se kexo a xotetša lebônê; a fsiêla ngwakô, a e tsomeša xa-xolo, xo be xo tlê a e bônê? Xomme xe a e bone, a bitša baxwêra ba xaxwe le baaxišani, a re: Thabang le nna, xobane šeleng yela e bexo e ntimeletše, ke e bone. Ke a Le botša, ka mokxwa o byalo le Barongwa ba Modimo ba thabêla mo-dira-dibe o tee e a sokoloxaxo.”​—Luka 15:​8-⁠10.

7. Ke dithuto dife tše pedi tšeo seswantšho sa nku e timetšego le sa šeleng e timetšego di re swaretšego tšona?

⁷ Re ka ithuta’ng diswantšhong tše tše kopana? Di re bontšha (1) kamoo re swanetšego go ikwa ka gona mabapi le bafokodi le (2) seo re swanetšego go se dira bakeng sa go ba thuša. A re ahla-ahleng dintlha tše.

E Timetše Eupša e Bohlokwa

8. (a) Modiši le mosadi ba ile ba arabela bjang go timelelweng ga bona? (b) Karabelo ya bona e re botša’ng mabapi le tsela yeo ba bego ba lebelela selo se se timetšego ka yona?

⁸ Diswantšhong ka bobedi go na le selo se itšego seo se timetšego, eupša ela hloko karabelo ya beng ba tšona. Modiši ga se a re: ‘Nku e tee ke’ng ge ke sa dutše ke na le tše 99? Nka phela ntle le yona.’ Mosadi ga se a re: ‘Ke ka baka la’ng ke tshwenyega ka šeleng yeo e tee? Ke kgotsofetše ka tše senyane tšeo ke sa dutšego ke na le tšona.’ Go e na le moo, modiši o ile a tsoma nku ya gagwe e timetšego bjalo ka ge eka e be e le yona feela yeo a nago le yona. Le gona mosadi o ile a lemoga go timelelwa ke šeleng ya gagwe bjalo ka ge eka o be a se na mašeleng a mangwe. Mabakeng ka bobedi selo se se timetšego se ile sa dula e le sa bohlokwa monaganong wa mong wa sona. Se se bontšha’ng?

9. Ke eng seo se swantšhetšwago ke go tshwenyega mo go bontšhitšwego ke modiši le mosadi?

 ⁹ Ela hloko phetho ya Jesu mabakeng ka bobedi: “Ka mokxwa o byalo kwa lexodimong [go ba le] lethabô ka mo-dira-dibe o tee e a sokoloxaxo” gotee le “ke a Le botša, ka mokxwa o byalo le Barongwa ba Modimo ba thabêla mo-dira-dibe o tee e a sokoloxaxo.” Ka gona, go tshwenyega ga modiši le ga mosadi go bontšha ka tekanyo e nyenyane maikwelo a Jehofa le a dibopiwa tša gagwe tša legodimong. Go etša ge seo se bego se timetše se ile sa dula se le bohlokwa mahlong a modiši le a mosadi, ka gona bao ba arogilego gomme ba se sa kopanela le batho ba Modimo ba dula ba le bohlokwa mahlong a Jehofa. (Jeremia 31:⁠3) Batho ba bjalo ba ka be ba fokola moyeng, eupša ga se gore ke marabele. Go sa šetšwe boemo bja bona bjo bo fokodišitšwego, ba ka ba ba sa fihlelela dinyakwa tša Jehofa go fihla bokgoleng bjo itšego. (Psalme 119:​176; Ditiro 15:​29) Ka gona, go swana le nakong e fetilego, Jehofa o diegiša go “ba fediša.”​—2 Dikxoši 13:⁠23.

10, 11. (a) Re lebelela bjang bao ba arogilego ka phuthegong? (b) Go ya ka diswantšho tša Jesu tše pedi, re ka bontšha bjang go tshwenyega ga rena ka bona?

¹⁰ Ka go swana le Jehofa le Jesu, le rena re swanetše go tshwenyega ka mo go tseneletšego ka bafokodi le bao ba sa bego gona phuthegong ya Bokriste. (Hesekiele 34:​16; Luka 19:​10) Re lebelela motho yo a fokolago moyeng e le nku e timetšego​—e sego motho wa go lahlwa. Ga re bolele gore: ‘Ke ka baka la’ng re swanetše go tshwenyega ka mofokodi? Phuthego e tšwela pele gabotse ka ntle le yena.’ Go e na le moo, ka go swana le Jehofa re lebelela bao ba arogilego eupša ba nyaka go boa e le batho bao ba nago le mohola.

¹¹ Lega go le bjalo, re ka bontšha bjang maikwelo a rena a go tshwenyega? Diswantšho tša Jesu tše pedi di bontšha gore re ka dira bjalo (1) ka go gata mogato wa pele, (2) ka go ba ba botho le (3) ka go ba ba fišegago. A re lebeleleng dibopego tše ka setee ka setee.

Gata Mogato wa Pele

12. Mantšu a rego “a ya a nyaka ye e timetšexo” a re botša’ng ka boemo bja kgopolo bja modiši?

¹² Seswantšhong sa mathomo sa diswantšho tše pedi, Jesu o re modiši o tla “ya a nyaka ye e timetšexo.” Modiši o gata mogato wa pele gomme o dira boiteko bjo bo tseneletšego bja go hwetša nku e timetšego. Ga a thibelwe ke bothata, kotsi le bokgole. Ka mo go fapanego, modiši o phegelela “xo be xo tlê a e hwetšê.”​—Luka 15:⁠4.

13. Banna ba botegago ba bogologolo ba ile ba arabela bjang go dinyakwa tša bafokodi, gomme ke bjang re ka ekišago mehlala e bjalo ya Beibele?

¹³ Ka mo go swanago, go thuša motho yo a nyakago kgothatšo gantši go nyaka gore yo a tiilego a gate mogato wa pele. Banna ba botegago ba bogologolo ba ile ba kwešiša se. Ka mohlala, ge morwa wa Kgoši Saulo e lego Jonathane a be a lemoga gore mogwera wa gagwe wa kgaufsi e lego Dafida o be a nyaka kgothatšo, Jonathane o ile “a wêla tsela, a tla xo Dafida à le xôna-moo lesoding, a mo tiiša matla ka Modimo.” (1 Samuele 23:​15, 16) Nywaga-kgolo ka morago, ge Mmušiši Nehemia a bone gore ba bangwe ba bana babo ba ba-Juda ba be ba fokola, le yena o ile a “nanoxa” gomme a ba kgothaletša go ‘tšwela pele ba išitše megopolo go Jehofa.’ (Nehemia 4:​14) Le rena lehono re nyaka go ‘nanogela’​—re gate mogato wa pele​—go matlafatša bafokodi. Eupša ke bomang bao ba swanetšego go dira bjalo ka phuthegong?

14. Ke bomang ka phuthegong ya Bokriste ba swanetšego go thuša bafokodi?

 ¹⁴ Ka mo go kgethegilego, bagolo ba Bakriste ba na le boikarabelo bja go ‘tiiša diatla tše di rephilego le go matlafatša matolo a loka-lokago’ gotee le go ‘botša ba dipelo tše tshesanyane gore, tiišang le se boifeng.’ (Jesaya 35:​3, 4; 1 Petro 5:​1, 2) Lega go le bjalo, ela hloko gore temošo ya Paulo ya go ‘tsoša ba dipelo tše di tapilego’ le go ‘thekga bafokodi’ ga se ya newa bagolo feela. Go e na le moo, mantšu a Paulo a be a lebišitšwe go “phuthêxô [ka moka] ya Ba-Thesalonika.” (1 Ba-Thesalonika 1:⁠1; 5:​14) Ka gona go thuša bafokodi ke boikarabelo bja Bakriste ka moka. Go swana le modiši wa seswantšhong, Mokriste yo mongwe le yo mongwe o swanetše go tutueletšega ‘go nyaka yo a timetšego.’ Ke therešo gore se se dirwa ka katlego kudu ka go dirišana le bagolo. Na o ka gata megato e itšego go thuša mofokodi ka phuthegong ya geno?

E-ba yo Botho

15. Ke ka baka la’ng modiši a ka ba a ile a arabela ka tsela ye a arabetšego ka yona?

¹⁵ Modiši o dira’ng ge mafelelong a hwetša nku e timetšego? O “e bea maxetleng a xaxwe à thabile.” (Luka 15:⁠5) A tiragalo e kgomago le e matla gakaakang! Nku e ka ba e ile ya ralala ka matšatši le mašego a mantši lefelong leo e sa le tsebego, mohlomongwe e bile e le kotsing ya go lewa ke ditau. (Jobo 38:​39, 40) Ka ntle le pelaelo nku e ile ya fokodišwa ke go hloka dijo. E tloga e fokola kudu gore e ka fenya ka matla a yona mapheko ao e tla gahlanago le ona tseleng ya go boela mohlapeng. Ka gona, modiši o a inama, o kuka nku ka botho gomme o e rwala go phatša mapheko ka moka go boela mohlapeng. Re ka ekiša bjang tlhokomelo yeo e bontšhitšwego ke modiši yo?

16. Ke ka baka la’ng re swanetše go ekiša botho bjoo modiši a bo bontšhitšego go nku e timetšego?

¹⁶ Motho yo a se sa kopanelago le phuthego e ka ba yo a lapilego ka tsela ya moya. Ka go swana le nku yeo e aroganego le modiši, motho yo bjalo a ka ba a ile a ralala ka go hloka maikemišetšo tikologong e šoro ya lefase le. Ka ntle le tšhireletšo ye e newago ke mohlape wo e lego phuthego ya Bokriste, o lebeletšana le ditlhaselo tša Diabolo go feta le ge e le neng pele, yo a “dikoloxa[go] bo-ka tau e bôpaxo; [a] nyaka yo a kaxo mo metša.” (1 Petro 5:⁠8) Go oketša moo, o fokodišwa ke go hloka dijo tša moya. Ka gona, ge a le noši o fokola kudu go ka fenya mapheko ao a tla gahlanago le ona leetong la gagwe la go boela ka phuthegong. Ka gona, ka tsela ya seswantšhetšo re swanetše go inama, re kuke mofokodi ka botho gomme re mo rwale bakeng sa go mmuša. (Ba-Galatia 6:⁠2) Re ka fihlelela bjang seo?

17. Re ka ekiša bjang moapostola Paulo ge re etela mofokodi?

¹⁷ Moapostola Paulo o itše: “Ó kae motho e a fôkôlaxo ’me nna ke se fôkôle naê’?” (2 Ba-Korinthe 11:​29; 1 Ba-Korinthe 9:​22) Paulo o be a kwela batho bohloko, go akaretša le bafokodi. Re nyaka go bontšha bafokodi kwelobohloko e bjalo. Ge o etela Mokriste yo a fokolago moyeng, mo kgonthišetše gore o bohlokwa mahlong a Jehofa le gore Dihlatse-gotee le yena di mo  hlologetše kudu. (1 Ba-Thesalonika 2:​17) Mmotše gore di ikemišeditše go mo thekga le gona di rata go ba ‘bana babo bao ba mo tswaletšwego mohla wa tlalelo.’ (Diema 17:​17; Psalme 34:​18) Mantšu a rena a tšwago pelong a ka mo kuka ganyenyane-ganyenyane le ka botho go fihla ntlheng ya gore a kgone go boela mohlapeng. Ke’ng se se latelago se re swanetšego go se dira? Seswantšho sa mosadi le šeleng e timetšego se re nea tlhahlo.

E-ba yo a Fišegago

18. (a) Ke ka baka la’ng mosadi wa seswantšhong a se a ikwa a se na kholofelo? (b) Ke maiteko afe a phišego ao mosadi a ilego a a dira, gomme ka mafelelo afe?

¹⁸ Mosadi yo a timelelwago ke šeleng o a tseba gore boemo ke bjo thata eupša o na le kholofelo. Ge nkabe šeleng e ile ya wela mašemong a magolo, a sethokgwa goba ka letsheng la leraga, ka ntle le pelaelo o be a tla ineela a tseba gore o be a ka se tsoge a e hweditše. Lega go le bjalo, ka go tseba gore šeleng e swanetše go ba e le felo tsoko ka ngwakong wa gagwe, moo a ka kgonago go e hwetša, o thoma go e tsoma ka mo go tseneletšego le ka phišego. (Luka 15:⁠8) Sa mathomo, o gotetša lebone bakeng sa go edišetša ngwako wa gagwe wo o lego lefsifsi. Ke moka, o fsiela lebato ka lefsielo la gagwe, a holofela go kwa selo se lla. Mafelelong, o tsoma ka kelohloko dikhutlong ka moka go fihlela lebone le bonega šeleng. Boiteko bja phišego bja mosadi bo a putswa!

19. Re ka ithuta dithuto dife ditirong tša mosadi wa seswantšhong sa šeleng e timetšego bakeng sa go thuša bafokodi?

¹⁹ Bjalo ka ge ntlha ye ya seswantšho e re gopotša, tlamo ya Mangwalo ya go thuša Mokriste yo a fokolago ga se selo seo se ka re palelago. Ka nako e swanago, re lemoga gore go nyaka boiteko. Ka godimo ga fao, moapostola Paulo o boditše bagolo ba Efeso gore: “Le bonthšitše mokxwa wa xo re motho a itapišê, xore a hwetšê sa xo hlatlola bafokodi.” (Ditiro 20:​35a) Dula o gopola gore mosadi ga a hwetše šeleng ka go tsoma ka go se šetše ka ngwakong wa gagwe, ka go fo lebelela mo le mola. Aowa, o atlega ka gobane a tsoma ka lenaneo “xo be xo tlê a e bônê.” Ka mo go swanago, ge re katanela go rua motho yo a fokolago moyeng, mokgwa wa rena e swanetše go ba wa phišego le wo o nago le morero. Re ka dira’ng?

20. Go ka dirwa’ng bakeng sa go thuša bafokodi?

²⁰ Re ka thuša bjang mofokodi go aga tumelo le tebogo? Go ka nyakega thuto ya Beibele ya motho ka noši ka kgatišo e swanetšego ya Bokriste. Ka kgonthe, go swara thuto ya Beibele le mofokodi go re nea sebaka sa go mo thuša ka mehla le ka tsela e tseneletšego. Ke mo go tlwaelegilego gore molebeledi wa tirelo o tla dira phetho e kaone ya gore ke mang yo a ka neago thušo e nyakegago. A ka šišinya gore ke ditaba dife tšeo di ka ithutwago le gore ke kgatišo efe yeo e tla thušago kudu. Bjalo ka ge mosadi wa seswantšhong a diriša ditlabakelo tše di thušago go phetha modiro wa gagwe, ka mo go swanago lehono re na le ditlabakelo tšeo di re thušago go phetha boikarabelo bja rena bjo re  bo neilwego ke Modimo bja go thuša bafokodi. Ditlabakelo goba dikgatišo tša rena tše pedi tše difsa, e tla ba tšeo di thušago kudu tabeng ye. Ke puku ya Rapela Modimo a Nnoši wa Therešo le ya Batamela Kgaufsi le Jehofa. *

21. Go thuša bafokodi go tliša bjang ditšhegofatšo go bohle?

²¹ Go thuša bafokodi go tlišetša bohle ditšhegofatšo. Yo a thušwago o thabela lethabo la go boelanywa le bagwera ba kgonthe. Re ba le lethabo le le tšwago pelong leo le tlišwago feela ke go nea. (Luka 15:​6, 9; Ditiro 20:​35b) Phuthego ka moka e tlala ka borutho ge setho se sengwe le se sengwe se e-⁠ba le kgahlego e lerato ka ba bangwe. Le gona ka godimo ga tšohle, kgodišo e ya go Badiši ba rena bao ba nago le taba e lego Jehofa le Jesu, ge kganyogo ya bona ya go thekga bafokodi e bontšhwa ke bahlanka ba bona ba mo lefaseng. (Psalme 72:​12-14; Mateo 11:​28-30; 1 Ba-Korinthe 11:⁠1; Ba-Efeso 5:⁠1) Ka gona, re na le lebaka le lebotse gakaakang la go tšwela pele re ‘ratana’!

[Mengwalo ya ka tlase]

[Dipotšišo tša Thuto]

Na o ka Hlalosa?

• Ke ka baka la’ng go bontšha lerato go le bohlokwa bakeng sa yo mongwe le yo mongwe wa rena?

• Ke ka baka la’ng re swanetše go bontšha bafokodi lerato?

• Seswantšho sa nku e timetšego le sa šeleng e timetšego di re ruta’ng?

• Ke megato efe e šomago yeo re ka e gatago bakeng sa go thuša mofokodi?

[Caption on page 16]

Ge re thuša bafokodi, re gata mogato wa pele le go ba ba botho gotee le go ba bao ba nago le phišego

[Caption on page 17]

Go thuša bafokodi go tlišetša bohle ditšhegofatšo