‘Tšwelang Pele Le Enywa Dienywa Tše Ntši’

“[Tšwelang pele, NW] le enya dienywa tše ntši, Lè e-⁠ba barutiwa ba-ka.”​—Johane 15:⁠8.

1. (a) Ke senyakwa sefe sa go ba morutiwa seo Jesu a ilego a se botša baapostola ba gagwe? (b) Re swanetše go ipotšiša potšišo efe?

E BE e le bošegong bja pele ga lehu la gagwe. Jesu o be a dirišitše nako e ntši a kgothatša baapostola ba gagwe ka go bolela le bona ka go tšwa pelong. Mo nakong ye e swanetše go ba e be e le ka morago ga bošego-gare, eupša Jesu a tutueditšwe ke lerato la go rata bagwera ba gagwe ba kgaufsi, o ile a tšwela pele a bolela. Ke moka, gare ga poledišano ya gagwe, o ile a ba gopotša ka senyakwa se sengwe gape seo ba bego ba swanetše go se fihlelela bakeng sa go dula e le barutiwa ba gagwe. O itše: “Se Tate a tl’o xo rêtwa ka sôna, ké xe Le enya dienywa tše ntši, Lè e-⁠ba barutiwa ba-ka.” (Johane 15:⁠8) Na rena lehono re fihlelela senyakwa se sa go ba morutiwa? Go bolela’ng go “enya dienywa tše ntši”? E le gore re hwetše karabo, a re boeleng poledišanong ya bošegong bjoo.

2. Jesu o anegile seswantšho sefe sa mabapi le seenywa bošegong bja pele ga lehu la gagwe?

² Keletšo ya go enywa dienywa ke karolo ya seswantšho seo Jesu a ilego a se anegela baapostola ba gagwe. O itše: “Ké Nna sehlare sa morara wa makxonthe; molemi ke Tate. Lekala lefe le lefe mo xo Nna le sa enyexo dienywa, ó a le ripa; lefe le lefe le le enyaxo, ó a le thênêla xore le atišê dienywa. Lena Le šetše Le thenetšwe ka Lentšu le ke Le boditšexo lôna. Dulang Lè le mo xo Nna, kè le xo lena. Bo-ka lekala, xe le sa kxone xo enya lè le nnoši, lè sa dule sehlareng sa morara, le xo lena xo tlo ba byalo, xe Le sa dule mo xo Nna. Sehlare sa morara ké Nna, makala ké bô-lena.  . . . Se Tate a tl’o xo rêtwa ka sôna, ké xe Le enya dienywa tše ntši, Lè e-⁠ba barutiwa ba-ka. Ke Le ratile byalo ka xe Tate a nthatile. Dulang Lè le leratong la-ka. Xe Le lôtôla melaô ya-ka, ké xôna Le dulaxo Lè le leratong la-ka.”​—Johane 15:​1-⁠10.

3. Balatedi ba Jesu ba swanetše go dira’ng e le gore ba enywe dienywa?

³ Seswantšhong se Jehofa ke Mobjadi, Jesu ke morara gomme baapostola bao Jesu a bego a bolela le bona ke makala. Ge feela baapostola ba be ba katanela go ‘dula’ le Jesu, ba be ba tla enywa dienywa. Ke moka Jesu o ile a hlalosa kamoo baapostola ba ka atlegago ka gona go bolokeng botee bjo bjo bo lego bohlokwa: “Xe Le lôtôla melaô ya-ka, ké xôna Le dulaxo Lè le leratong la-ka.” Ka morago, moapostola Johane o be a tla ngwalela Bakriste-gotee le yena mantšu a a swanago: “Xe O e-⁠ya ka melaô ya [Kriste], O tlo dula Ò le wa xaxwe.” * (1 Johane 2:​24; 3:​24) Ka gona, ka go boloka melao ya Kriste, balatedi ba gagwe ba dula boteeng le yena, gomme ka morago botee bjoo bo dira gore ba kgone go enywa dienywa. Ke’ng seo se hlaolago seenywa seo re swanetšego go se enywa?

Sebaka sa go Dira Tšwelopele

4. Re ka ithuta’ng ntlheng ya gore Jehofa o “ripa” lekala le lengwe le le lengwe leo le sa enywego dienywa?

⁴ Seswantšhong sa morara, Jehofa o “ripa” lekala ge le sa enywe dienywa. Se se re botša’ng? Ga se re botše feela gore barutiwa ka moka ba swanetše go enywa dienywa eupša se re botša gape le gore bohle ba ka kgona go dira bjalo, go sa šetšwe gore maemo goba mafokodi a bona e ka ba e le afe. Go feta moo, e tla ba mo go fapanego le ditsela tša Jehofa tše lerato go “ripa,” goba go dira gore morutiwa wa Kriste a se swanelege ka baka la go palelwa ke go fihlelela selo se itšego seo a ka se kgonego go se fihlelela.​—Psalme 103:​14; Ba-Kolose 3:​23; 1 Johane 5:⁠3.

5. (a) Seswantšho sa Jesu se bontšha bjang gore re ka dira tšwelopele go enyweng dienywa? (b) Re tla ahla-ahla mehuta efe e mebedi ya dienywa?

⁵ Seswantšho sa Jesu sa morara se bontšha gape gore re swanetše go nyaka sebaka sa go dira tšwelopele medirong ya rena re le barutiwa go fihla moo maemo a rena a dumelago. Ela hloko kamoo Jesu a e beago ka gona: “Lekala lefe le lefe mo xo Nna le sa enyexo dienywa, ó a le ripa; lefe le lefe le le enyaxo, ó a le thênêla xore le atišê dienywa.” (Johane 15:⁠2, mongwalo o sekamego ke wa rena.) Go ya mafelelong a seswantšho sa gagwe, Jesu o ile a kgothaletša balatedi ba gagwe go enywa “dienywa tše ntši.” (Temana 8) Molaetša ke ofe mo? Re le barutiwa, le ka mohla ga se ra swanela go ba bao ba fo go kgotsofala le bao ba se nago taba. (Kutollo 3:​14, 15, 19) Go e na le moo, re swanetše go nyaka ditsela tša go dira tšwelopele go enyweng dienywa. Ke dienywa tša mohuta ofe tšeo re swanetšego go katanela go di enywa ka bontši? Ke (1) “Dienywa tša Môya” le (2) dienywa tša Mmušo.​—Ba-Galatia 5:​22, 23; Mateo 24:⁠14.

Dienywa tša Dika tša Bokriste

6. Jesu Kriste o ile a gatelela bjang bohlokwa bja seenywa sa moya seo se boletšwego pele?

⁶ Lerato le lokeleditšwe pele lelokelelong la “dienywa tša môya.” Moya o mokgethwa wa Modimo o tšweletša lerato go Bakriste, ka gobane ba kwa taelo yeo Jesu a e boletšego nakwana pele ga ge a ka bolela seswantšho sa morara wo o tšweletšago dienywa. O boditše baapostola ba gagwe gore: “Ké Le nea molaô o mofsa, wa xo re Le ratanê.” (Johane 13:​34) Ge e le gabotse, poledišanong ka moka ya bošegong bjoo bja mafelelo bja bophelo bja gagwe bja lefaseng, Jesu o ile a gopotša baapostola ba gagwe leboelela ka go nyakega ga go bontšha seka sa lerato.​—Johane 14:​15, 21, 23, 24; 15:​12, 13, 17.

7. Moapostola Petro o bontšhitše bjang gore go enywa dienywa go tswalana le go bontšha dika tše bjalo ka tša Kriste?

⁷ Petro yo a bego a le gona bošegong bjoo, o ile a kwešiša gore lerato le bjalo ka la Kriste le dika tšeo di tswalanago le lona di swanetše go bontšhwa gare ga barutiwa ba kgonthe ba Kriste. Nywaga ka morago, Petro o ile a kgothaletša Bakriste go hlagolela dika tše bjalo ka boitshwaro, maikwelo a borutho a borwarre le lerato. O okeditše ka gore go dira bjalo go re thibela gore ‘re se ke ra dula feela re hloka dienywa.’ (2 Petro 1:​ 5-⁠8) Go sa šetšwe gore maemo a rena ke afe, re ka kgona go tšweletša dienywa tša moya ka go rena. Ka gona, a re kataneleng go bontšha lerato, botho, bonolo le dika tše dingwe tše bjalo ka tša Kriste ka botlalo, ka gobane “tše byalo xa di xanwe ke Molaô,” goba ga di na mollwane. (Ba-Galatia 5:​23) A re enyweng “dienywa tše ntši” e le ka kgonthe. (Mongwalo o sekamego ke wa rena.)

Go Enywa Dienywa tša Mmušo

8. (a) Go na le kgokagano efe magareng ga dienywa tša moya le dienywa tša Mmušo? (b) Ke potšišo efe yeo re swanetšego go e ahla-ahla?

⁸ Dienywa tše di kgahlišago le tše bose di kgabiša sehlare. Lega go le bjalo, mohola wa dienywa tše bjalo o fetiša kgole botse bja tšona. Le gona dienywa di bohlokwa bakeng sa go oketša sehlare ka dipeu tša tšona. Ka mo go swanago, dienywa tša moya di dira mo gontši go feta go kgabiša semelo sa rena sa Bokriste. Le gona, dika tše bjalo ka lerato le tumelo di re tutueletša go phatlalatša molaetša wa Mmušo o bjalo ka peu wo o hwetšwago ka Lentšung la Modimo. Ela hloko kamoo moapostola Paulo a gatelelago kgokagano ye ya bohlokwa. O re: “Le rena re bontšha tumelo [karolo ya dienywa tša moya] gomme ke ka baka leo re bolelago.” (2 Ba-Korinthe 4:​13, NW) Ka tsela ye, Paulo o tšwela pele go hlalosa gore re ‘ipega go Modimo ka sedimo sa theto e lego seenywa sa melomo’​—mohuta wa bobedi wa seenywa seo re swanetšego go se hlagolela. (Ba-Hebere 13:​15) Na go na le sebaka sa go enywa dienywa tše oketšegilego maphelong a rena, ge e le gabotse go enywa “dienywa tše ntši,” re le bagoeledi ba Mmušo wa Modimo?

9. Na go enywa seenywa go lekana le go dira barutiwa? Hlalosa.

⁹ E le gore re nee karabo e nepagetšego, sa pele re swanetše go kwešiša seo se bopago dienywa tša Mmušo. Na e tla ba mo go nepagetšego go phetha ka gore go enywa dienywa go bolela go dira barutiwa? (Mateo 28:​19) Na seenywa seo re tlago go se enywa se tla šupa kudu bathong bao re ba thušago go ba barapedi ba kolobeditšwego ba Jehofa? Aowa. Ge nkabe go be go le bjalo, boemo e be e tla ba bjo bo nolago moko kudu go Dihlatse tše rategago tšeo di bego di dutše di tsebatša ka potego molaetša wa Mmušo ka nywaga e mentši mašemong ao a se nago tšweletšo. Ka kgonthe, ge e ba seenywa sa Mmušo seo re se enywago se emelwa ke barutiwa ba bafsa feela, Dihlatse tše bjalo tše di šomago ka thata di tla ba bjalo ka makala a sa enywego a seswantšhong sa Jesu! Go ba gona, seo ga se bjalo. Ka gona, dienywa tša Mmušo tše kgolo tša bodiredi bja rena ke dife?

Go Enywa Dienywa ka go Phatlalatša Peu ya Mmušo

10. Ke bjang seswantšho sa Jesu sa mobjadi le mehuta e fapanego ya mobu se bontšhago seo dienywa tša Mmušo e lego sona le seo e sego sona?

¹⁰ Seswantšho sa Jesu sa mobjadi le mehuta e fapanego ya mobu se nea karabo​—karabo e kgothatšago go bao ba neago bohlatse mašemong ao a se nago tšweletšo. Jesu o itše peu ya molaetša wa Mmušo e hwetšwa ka Lentšung la Modimo, le gore mobu o emela pelo ya motho ya seswantšhetšo. Peu e nngwe e ile ‘ya wela mobung o botse, ya mela gomme ya enywa.’ (Luka 8:⁠8) Ya  enywa seenywa sefe? Ka gona, ka morago ga ge lekgaba la korong le medile gomme la gola, le tšweletša seenywa, e sego makgaba a manyenyane a korong, eupša peu e mpsha. Ka mo go swanago, Mokriste o tšweletša seenywa seo ka mehla e sego barutiwa ba bafsa, eupša e lego peu e mpsha ya Mmušo.

11. Dienywa tša Mmušo di ka hlaloswa bjang?

¹¹ Ka gona, tabeng ye seenywa ga se barutiwa ba bafsa e bile ga se dika tše botse tša Bokriste. Ka ge peu yeo e bjalwago e le lentšu la Mmušo, dienywa e swanetše go ba dipeu tše ntši. Tabeng ye go enywa dienywa go šupa go boleleng ka Mmušo. (Mateo 24:​14) Na go enywa dienywa tše bjalo tša Mmušo​—go tsebatša ditaba tše dibotse tša Mmušo​—go a kgonega, go sa šetšwe gore maemo a rena e ka ba e le afe? Ee, go a kgonega! Sona seswantšhong se, Jesu o hlalosa lebaka.

Go Dira Sohle Seo re ka se Kgonago Bakeng sa go Tumiša Modimo

12. Na go enywa dienywa tša Mmušo ke selo seo se ka fihlelelwago ke Bakriste ka moka? Hlalosa.

¹² Jesu o itše: ‘Ye e bjetšwego mmung o botse e tšweletša tše lekgolo, e nngwe tše masome a selelago gomme e nngwe tše masome a mararo.’ (Mateo 13:​23) Mabele ao a bjetšwego tšhemong a ka tšweletša ka mo go fapanego go ithekgile ka maemo. Ka mo go swanago, seo re ka se dirago modirong wa go tsebatša ditaba tše dibotse se ka fapana go ya ka maemo a rena, gomme Jesu o ile a bontšha gore o lemoga se. Ba bangwe ba ka ba le dibaka tše ntši; ba bangwe ba ka ba le maemo a tša maphelo a kaone le matla a oketšegilego. Ka gona, seo re kgonago go se dira e ka ba se segolo goba se senyenyane go feta seo ba bangwe ba se dirago, eupša ge feela e le sohle seo re ka se  kgonago, Jehofa o a thaba. (Ba-Galatia 6:⁠4) Gaešita le ge botšofadi goba bolwetši bo lekanyetša go ba ga rena le karolo modirong wa boboledi, Tatago rena yo a nago le kwelobohloko Jehofa, ka ntle le pelaelo o re lebelela re le ba bangwe ba bao ba ‘tšwelago pele ba enywa dienywa.’ Ka baka la’ng? Ka gobane re mo nea ‘tšohle tšeo re nago le tšona’​—tirelo ya rena ya moya ka moka. *​—Mareka 12:​43, 44; Luka 10:⁠27.

13. (a) Lebaka le legolo la gore re ‘tšwele pele’ re enywa dienywa tša Mmušo ke lefe? (b) Ke’ng seo se tlago go re thuša go tšwela pele re enywa dienywa mašemong ao a se nago tšweletšo? (Bona lepokisi leo le lego go letlakala 21.)

¹³ Go fihla bokgoleng le ge e le bofe bjoo ka bjona re kgonago go tšweletša dienywa tša Mmušo, re tla tutueletšega go ‘tšwela pele re enywa dienywa’ ge re dula re gopola lebaka leo ka lona re dirago bjalo. (Johane 15:​16) Jesu o ile a bolela lebaka le legolo ka gore: “Se Tate a tl’o xo rêtwa ka sôna, ké xe Le enya dienywa tše ntši.” (Johane 15:⁠8) Ee, modiro wa rena wa boboledi o kgethagatša leina la Jehofa bathong ka moka. (Psalme 109:​30) Honor yo e lego Hlatse ye e botegago yo a lego nywageng ya gagwe ya magareng ga bo-70 o re: “Gaešita le mašemong ao a se nago tšweletšo, ke tokelo go emela yo a Phagamego Kudu.” Ge Claudio yo e bego e dutše e le Hlatse e fišegago ga e sa le go tloga ka 1974, a be a botšišwa gore ke ka baka la’ng a tšwela pele go dira modiro wa boboledi gaešita le ge go arabela ba sego kae tšhemong ya gabo, o ile a tsopola lengwalo la Johane 4:​34, moo re balago mantšu a Jesu a rego: “Sejô sa-ka ké xe ke dira thatô ya E a nthomilexo, xe ke phêtha medirô ya xaxwe.” Claudio o okeditše ka gore: “Ka go swana le Jesu, ga ke nyake feela go thoma eupša ke nyaka gape le go phetha modiro wa-ka wa go ba mogoeledi wa Mmušo.” (Johane 17:⁠4) Lefaseng ka bophara Dihlatse tša Jehofa di dumelelana le seo.​—Bona lepokisi le le rego “Kamoo o ka ‘Enywago Dienywa ka Kgotlelelo,’” go letlakala 21.

Go Bolela le go Ruta

14. (a) Modiro wa Johane Mokolobetši le wa Jesu o bile le morero ofe wo o lego gabedi? (b) O ka hlalosa bjang modiro wa Bokriste lehono?

¹⁴ Mogoeledi wa Mmušo wa mathomo yo go boletšwego ka yena ka Diebangeding ke Johane Mokolobetši. (Mateo 3:​1, 2; Luka 3:​18) Morero wa gagwe o mogolo e be e le “xo ba hlatse,” gomme o dirile bjalo ka tumelo e feletšego le ka kholofelo ya “xore batho ba dumêlê ka yêna.” (Johane 1:​6, 7) Ka kgonthe, ba bangwe ba bao Johane a ilego a bolela le bona ba ile ba fetoga barutiwa ba Kriste. (Johane 1:​35-37) Ka gona, Johane e be e le mmoledi e bile e le modiri wa barutiwa. Jesu le yena e be e le mmoledi e bile e le morutiši. (Mateo 4:​23; 11:⁠1) Ka gona, ga se mo go makatšago gore Jesu ga se a laela balatedi ba gagwe gore ba bolele molaetša wa Mmušo feela eupša o ba laetše gape gore ba thuše batho ba ba o amogelago go ba barutiwa ba gagwe. (Mateo 28:​19, 20) Ka gona, modiro wa rena lehono o kopantše go bolela le go ruta.

15. Ke go swana gofe moo go lego gona go arabeleng modirong wa boboledi wo o dirilwego lekgolong la pele la nywaga C.E. le woo o dirwago lehono?

¹⁵ Gare ga bao lekgolong la pele la nywaga C.E. ba ilego ba kwa Paulo a bolela le go ruta, “ba bangwê ba bôná ba [ile ba] dumêla tše a di boletšexo.” (Ditiro 28:​24) Lehono, karabelo ke ye e swanago. Ka manyami, bontši bja peu ya Mmušo bo wela mobung wo o sa arabelego. Lega go le bjalo, dipeu tše dingwe di sa dutše di wela mobung o botse, tša mela medu gomme tša hloga bjalo ka ge Jesu a ile a bolela e sa le pele. Ge e le gabotse, lefaseng ka bophara palo-moka ya batho ba ka godimo ga ba 5 000 ba fetoga barutiwa ba kgonthe  ba Kriste bekeng e nngwe le e nngwe mo ngwageng! Barutiwa ba ba bafsa ba ‘dumela tše di boletšwego,’ gaešita le ge batho ba bangwe ba bantši ba sa dumele. Ke’ng seo se thušago go dira gore dipelo tša bona di amogele molaetša wa Mmušo? Gantši kgahlego ya motho ka noši yeo e bontšhwago ke Dihlatse​—go nošetša peu yeo e sa tšwago go bjalwa ka tsela ya seswantšhetšo​—e dirile phapano. (1 Ba-Korinthe 3:⁠6) Ela hloko mehlala e mebedi feela ya ye mentši yeo e lego gona.

Kgahlego ya Motho ka Noši e Dira Phapano

16, 17. Ke ka baka la’ng e le ga bohlokwa go bontšha kgahlego ya motho ka noši go bao re gahlanago le bona bodireding bja rena?

¹⁶ Karolien, mofsa wa Hlatse wa kua Belgium, o ile a etela mokgekolo yo a ilego a se bontšhe kgahlego molaetšeng wa Mmušo. Ka ge letsogo la mosadi le be le tlemilwe ka panteši, Karolien le mogwera wa gagwe ba ile ba ithapela go mo thuša, eupša mosadi o ile a gana. Matšatši a mabedi ka morago Dihlatse tšona tšeo di ile tša boela legaeng la mosadi gomme tša mmotšiša gore o ikwa bjang. Karolien o itše: “Se se ile sa dira phapano. O ile a makatšwa ke go bona gore re be re tloga re e-⁠na le kgahlego ka yena. O ile a re laletša go tsena ka ntlong, gomme thuto ya Beibele e ile ya thongwa.”

¹⁷ Sandi, Hlatse ya kua United States, le yena o ile a bontšha kgahlego ya motho ka noši go bao a bego a bolela le bona. O lebelela dipego tša matswalo kuranteng ya lefelong leo ke moka a etele batswadi ba bafsa a swere Puku Ya-ka ya Ditaba tša Beibele. * Ka ge gantši mma a le gona gae gomme a thabela go bontšha baeng ngwana wa gagwe, gantši go thoma poledišano. Sandi o hlalosa gore: “Ke boledišana le batswadi ka bohlokwa bja go tlamagana le lesea ka go bala. Ka morago ke bolela ka ditlhohlo tša go godiša bana lekokong la lehono.” Ka baka la ketelo e bjalo, morago bjale mma le bana ba bararo ba ile ba thoma go hlankela Jehofa. Go gata mogato wa pele le go bontšha kgahlego ya motho ka noši go ka lebiša mafelelong a bjalo a thabišago bodireding bja rena.

18. (a) Ke ka baka la’ng ka moka ga rena re ka kgona go fihlelela senyakwa sa go ‘enywa dienywa tše ntši’? (b) Ke dinyakwa dife tše tharo tša go ba morutiwa tšeo di boletšwego Ebangeding ya Johane tšeo o ikemišeditšego go di fihlelela?

¹⁸ Ke mo go kgothatšago gakaakang go tseba gore re ka kgona go fihlelela senyakwa sa go ‘tšwela pele re enywa dienywa tše ntši.’ Go sa šetšwe gore re ba banyenyane goba ba bagolo, go sa šetšwe gore re phetše gabotse goba re a fokola, go sa šetšwe gore re bolela mašemong ao a nago le dienywa goba ao a se nago dienywa, ka moka ga rena re kgona go enywa dienywa tše ntši. Bjang? Ka go bontšha dienywa tša moya ka botlalo le ka go phatlalatša molaetša wa Mmušo wa Modimo kudu kamoo re ka kgonago ka gona. Ka nako e swanago, re katanela go ‘dula lentšung la Jesu’ le go ‘ratana.’ Ee, ka go fihlelela dinyakwa tše tše tharo tša bohlokwa tša go ba morutiwa tše di boletšwego ka Ebangeding ya Johane, re hlatsela gore re “barutiwa ba [Kriste] ka xo rereša.”​—Johane 8:​31; 13:⁠35.

[Mengwalo ya ka tlase]

[Dipotšišo tša Thuto]

Dipotšišo tša Poeletšo

• Ke dienywa tša mohuta ofe tšeo re swanetšego go di enywa ka bontši kudu?

• Ke ka baka la’ng re ka kgona go fihlelela pakane ya go ‘enywa dienywa tše ntši’?

• Re ahla-ahlile dinyakwa dife tše tharo tša go ba morutiwa tšeo di boletšwego ka Ebangeding ya Johane?

[Lepokisi/Seswantšho go letlakala 21]

“Kamoo O Ka ‘Enywago Dienywa Ka Kgotlelelo’”

KE’NG seo se go thušago go tšwela pele o bolela molaetša wa Mmušo ka mafolofolo mašemong ao a sa tšweletšego? Tše dingwe tša dikarabo tše thušago potšišong ye ke tše latelago.

“Go tseba gore re na le thekgo ya Jesu e tletšego go nea kholofelo le kgotlelelo, go sa šetšwe karabelo ya tšhemong.”​—Harry wa nywaga e 72, o kolobeditšwe ka 1946.

“Lengwalo la 2 Ba-Korinthe 2:​17 ka mehla le a nkgothatša. Le bolela gore re tšea karolo bodireding ‘re boledišwa ke Modimo re le ba Kriste.’ Ge ke le bodireding, ke thabela go ba gotee le bagwera ba-ka ba paala.”​—Claudio wa nywaga e 43, o kolobeditšwe ka 1974.

“Go bolela therešo, modiro wa boboledi o a nthatafalela. Lega go le bjalo, ke thabela therešo ya mantšu a hwetšwago go Psalme 18:​29 ao a rego: “Xe ke na le Modimo wa-ka, nka sela morakô.”​—Gerard wa nywaga e 79, o kolobeditšwe ka 1955.

“Ge nka bala lengwalo letee feela bodireding, go a nkgotsofatša go tseba gore pelo ya motho yo a itšego e hlahlobilwe ke Beibele.”​—Eleanor wa nywaga e 26, o kolobeditšwe ka 1989.

“Ke tšwela pele ke leka matseno a fapanego. Go na le matseno a mantši a fapanego ao nka se kgonego go a diriša ka moka ga ona nywageng yeo ke sa dutšego ke tlo e phela.”​—Paul wa nywaga e 79, o kolobeditšwe ka 1940.

“Ga ke kgopišwe ke batho bao ba sa thabelego. Ke leka go boledišana le batho ka tsela ya bogwera le go theetša dikgopolo tša bona.”​—Daniel wa nywaga e 75, o kolobeditšwe ka 1946.

“Ke ile ka kopana le bao ba sa tšwago go kolobetšwa gomme ba mpotša gore modiro wa-ka wa boboledi o kgathile tema e bohlokwa go beng ga bona Dihlatse. Motho yo mongwe ka morago o ile a ithuta Beibele le bona ke sa tsebe gomme a ba thuša go tšwela pele. Go a nthabiša go tseba gore bodiredi bja rena ke modiro wa sehlopha.”​—Joan wa nywaga e 66, o kolobeditšwe ka 1954.

Ke’ng seo se go thušago go ‘enywa dienywa ka kgotlelelo’?​—Luka 8:​15.

[Caption on page 20]

Re enywa dienywa tše ntši ka go bontšha dienywa tša moya le ka go tsebatša molaetša wa Mmušo

[Caption on page 23]

Jesu o be a bolela’ng ge a be a botša baapostola ba gagwe gore: ‘Tšwelang pele le enywa dienywa tše ntši’?