Dipotšišo tše Tšwago go Babadi

Ke ka baka la’ng Jesaya 30:​21 e bolela ka lentšu la Jehofa e le leo le tšwago ka “nthaxo xa lena,” mola temana e fetilego e bea Jehofa ka pele ka go bolela gore, “mahlô a lena a tlo mmôna, Molai wa lena”?

Jesaya 30:​20, 21 e balega ka gore: “Le xe Mong ’a bohle à Le fa dijô tša mahlomola a Le noša meetse a mahloko, Molai wa lena a ka se hlwê à iphihla; mahlô a lena a tlo mmôna, Molai wa lena. Ditsêbê tša lena di tlo kwa ka nthaxo xa lena xe xo thwe: Tsela šé! Tšeang ka yôna! Le se fapoxêlê ka xo le letona le xe e le xo la ntsôxôšô!”

Ge mmadi a tšea temana ka tsela e lebanyago, o bona Jehofa yo e lego Mohlahli yo Mogolo a le ka pele ga gagwe eupša o kwa lentšu la Gagwe le e-⁠tšwa ka nthago. Lega go le bjalo, mantšu a ke a seswantšhetšo gomme a swanetše go kwešišwa ka tsela yeo.

Seka-polelo seo temana ya 20 e se tlišago ka kgopolong ke sa mohlanka yo a ikemišeditšego go hlankela mong wa gagwe, yo a dulago a loketše go latela ditaelo tša mong wa gagwe. Go swana le mohlanka yo a lebeledišišago seatla sa mong wa gagwe e le gore a kwešiše seo se bolelwago ke thato ya gagwe, batho ba Jehofa lehono ba lebelela ka kelohloko ditaelong tšeo di theilwego Beibeleng tše di tšwelago pele tšeo Jehofa a di neago ka mokgatlo wa gagwe wa lefaseng. (Psalme 123:​1, 2) Ee, ba gata megato ka go dumelelana le tlhahlo ya gagwe, ba dula ba phafogetše selo le ge e le sefe seo Jehofa a se bolelago ka “molaki e a bôtêxaxo yo bohlale.”​—Mateo 24:​45-⁠47.

Ka gona, go thwe’ng ka lentšu leo mohlanka wa gagwe a le kwago go tšwa ka nthago? Ke mo go kwagalago go phetha ka gore lentšu leo le tšwago ka nthago ke lentšu la Modimo leo le boletšwego nakong e fetilego, a le bolela ka Lentšu la gagwe leo le ngwadilwego ka ge le hlaloswa ka “molaki e a bôtêxaxo.” (Luka 12:​42) Bahlanka ba Modimo ba mehleng yeno ba kwa lentšu la gagwe ka go ithuta Beibele ka mafolofolo le ka go diriša melao ya yona ya motheo maphelong a bona ka thušo ya dikgatišo tšeo di lokišeleditšwego ke “molaki e a bôtêxaxo yo bohlale,” “molaki e a bôtêxaxo.” Ka go ithekga le ka go ela hloko taelo e lego nakong yeo Mohlahli yo Mogolo a e neago le ka go ithuta Lentšu la Modimo leo le ngwadilwego nywaga e dikete e fetilego, ka tsela ya seswantšhetšo bahlanka ba gagwe ba mmona ka pele ga bona le go kwa lentšu la gagwe ka nthago ga bona.​—Ba-Roma 15:⁠4.