Go Dumela go Modimo yo re ka Bago re sa mo Tsebe

BATHO ba babedi go ba bararo kua Jeremane ba dumela go Modimo. Eupša, ge batho ba ka godimo ga ba sekete ba be ba kgopelwa gore ba hlalose Modimo yo ba mo dumelago, mo e ka bago yo mongwe le yo mongwe o ile a nea karabo e fapanego. Makasine wa ditaba wa FOCUS o bega gore: “Batho ba kua Jeremane ba na le dikgopolo tše di fapa-fapanego ka Modimo tšeo di fapanego go swana le batho ka bobona.” Gaešita le ge go dumela go Modimo e le selo se sebotse, na ga go kweše bohloko go dumela go yena ntle le go tseba gore ke Modimo wa mohuta mang?

Go se kgonthišege mo mabapi le semelo goba mohuta wa motho yo Modimo a lego yena ga go hwetšwe Jeremane feela; go hwetšwa le mafelong a mangwe kua Yuropa. Nyakišišo yeo e dirilwego kua Austria, Brithania le Netherlands e utollotše go dumelelana mo go phatlaletšego ka gore Modimo “ke matla a magolo kudu goba sephiri seo se sa hlalosegego.” Ke selo seo se sa kwešišegego kudu-kudu go bafsa, gaešita le go bao ba dumelago go yena.

Na o Tseba Modimo e le ka Kgonthe?

Go na le phapano e kgolo magareng ga go tseba ka motho le go mo tseba e le ka kgonthe. Go tseba ka motho​—mmuši yo a sa hwetšagalego, ramabelo yo a tšwago pele goba naletšana ya dipaesekopo​—ke feela go dumela gore o gona. Lega go le bjalo, go tseba motho e le ka kgonthe, go bolela mo gontši kudu. Go akaretša go tlwaelana le semelo sa motho yoo, boitshwaro, maikwelo, dilo tše a di ratago le tše a sa di ratego le maikemišetšo a gagwe ka bokamoso. Go tseba motho e le ka kgonthe go bula tsela ya go ba le tswalano ya kgaufsi le yena.

Batho ba dikete tše makgolo ba phethile ka gore go ba le kgopolo e sa kwagalego gabotse ka Modimo​—goba go fo mo tseba​—ga gwa lekana. Ba tšwetše pele ka go tseba Modimo kgaufsi. Na ba hweditše e le mo go holago? Monna yo a bitšwago Paul, yo a dulago ka leboa la Jeremane le yoo ka nako e nngwe a bego a dumela ka tsela e tlwaelegilego go Modimo, o ile a dira phetho ya go tlwaelana ga kaone le Yena e le ka kgonthe. Paul o hlalosa gore: “Go tseba Modimo gabotse go nyaka nako le boiteko, eupša ke mo go holago kudu. Go ba le tswalano ya kgaufsi le Mmopi go dira gore bophelo bja letšatši le letšatši e be bjo bokaone kudu.”

Na go tseba Modimo kgaufsi ke mo go swanelwago ke nako le boiteko tše di nyakegago? Hle bala sehlogo se se latelago.

[Caption on page 3]

Go na le phapano e kgolo magareng ga go tseba ka motho le go mo tseba e le ka kgonthe