Ke Ka Baka La’ng Re Bina Sejo Sa Morena Sa Mantšiboa?

“Se nna ke se filwexo ke Morêna, ké sôna se nna ke Le neetšexo sôna.”​—1 BA-KORINTHE 11:​23.

1, 2. Jesu o ile a dira’ng bošegong bja Paseka ya 33 C.E.?

MORWA wa Jehofa yo a tswetšwego a nnoši o be a le gona. Le banna ba 11 bao ba ilego ba ‘kgotlelela le yena melekong ya gagwe’ ba be ba le gona. (Luka 22:​28) E be e le Labone mantšiboa ka March 31, 33 C.E., gomme go molaleng gore ngwedi o tletšego o be o kgabišitše leratadima la Jerusalema. Jesu Kriste le baapostola ba gagwe ba be ba sa tšwa go bina Paseka. Moeki yo e lego Judase Iskariothe o be a laetšwe go tloga, eupša e be e se nako ya gore ba bangwe ba sepele. Ka baka la’ng? Ka gobane Jesu o be a le kgaufsi le go dira selo sa bohlokwa-hlokwa. E be e le eng?

² Ka ge mongwadi wa Ebangedi yo e lego Mateo a be a le gona moo, anke a re botše. O ngwadile gore: “Jesu a tšea senkxwa, a leboxa, a se ngwathaxanya, a se neêla barutiwa, a re: Tšeang Le jê, ké mmele wa-ka. A tšea senwêlô, a leboxa, a ba neêla sôna, a re: Nwang sôna bohle. Ké madi a-⁠ka a Kxwêranô e mphsa, a thšollwaxo ka ’baka la ba bantši, e bê xo lebalêlwa dibe.” (Mateo 26:​26-28) Na tiragalo ye e be e swanetše go diragala gatee feela? Bohlokwa bja yona e be e le bofe? Na e na le seo e se bolelago go rena lehono?

“Dirang Byalo ka Mehla”

3. Ke ka baka la’ng seo Jesu a se dirilego bošegong bja Nisani 14, 33 C.E., e be e le sa bohlokwa?

³ Mogato woo Jesu Kriste a ilego a o gata bošegong bja Nisani 14, 33 C.E., e be e se selo seo se ilego sa fo itiragalela bophelong bja gagwe. Moapostola Paulo o boletše ka tiragalo ye ge a be a ngwalela Bakriste ba tloditšwego ba kua Korinthe, moo mohlala woo o bego o dutše o latelwa nywaga e 20 ka morago e latetšego. Gaešita le ge Paulo a be a se gona go Jesu le baapostola ba 11 ka 33 C.E., ka ntle le pelaelo o swanetše go ba a ile a kwa go tšwa go baapostola ka seo se diragetšego tiragalong yeo. Go oketša moo, go  molaleng gore Paulo o ile a hwetša kgonthišetšo ya dibopego tša tiragalo yeo ka go utollelwa ka tlase ga pudulelo. Paulo o itše: “Se nna ke se filwexo ke Morêna, ké sôna se nna ke Le neetšexo sôna. Ši-di: Morêna Jesu, bošexo byo a ekilwexo ka byôna ó tšere senkxwa. A re xo se ngwatha a re: Tšeang Le jê; ké mmele wa-ka o newaxo ka ’baka la lena. Dirang byalo e bê xo nkxopola. Ka mokxwa o byalo a tšea le senwêlô ka moraxo xa selalêlô, a re: Senwêlô sé ké Kxwêranô e mphsa mo mading a-⁠ka; dirang byalo ka mehla xe Le se nwa, e bê xo nkxopola.”​—1 Ba-Korinthe 11:​23-⁠25.

4. Ke ka baka la’ng Bakriste ba swanetše go bina Sejo sa Morena sa Mantšiboa?

⁴ Mongwadi wa Ebangedi e lego Luka o tiišetša gore Jesu o laetše gore: “Dirang byalo xore e bê xo nkxopola.” (Luka 22:​19) Ge e le gabotse, tiragalo ye gantši go bolelwa ka yona e le Segopotšo sa lehu la Kriste. Paulo le yena o ile a e bitša Sejo sa Morena sa Mantšiboa​—leina le le swanelago, ka ge tiragalo ye e ile ya hlongwa bošego. (1 Ba-Korinthe 11:​20) Bakriste ba laetšwe go bina Sejo sa Morena sa Mantšiboa. Eupša ke ka baka la’ng tiragalo ye e ile ya hlongwa?

Lebaka Leo ka Lona se Ilego sa Hlongwa

5, 6. (a) Lebaka le lengwe leo ka lona Jesu a ilego a hloma Segopotšo ke lefe? (b) Nea lebaka le lengwe leo ka lona go ilego gwa hlongwa Sejo sa Morena sa Mantšiboa.

⁵ Lebaka le lengwe la go hlongwa ga Segopotšo le akaretša morero wo o phethilwego ke lehu la Jesu. O hwile e le mogodiši wa bogoši bja Tatagwe wa legodimong. Ka go rialo Kriste o ile a hlatsela go ba moaketši ga Sathane Diabolo yo a ilego a bolela gore batho ba hlankela Modimo go fo ikhola. (Jobo 2:​1-⁠5) Go hwa ga Jesu a botega go ile gwa hlatsela gore polelo ye ke ya maaka gomme gwa thabiša pelo ya Jehofa.​—Diema 27:⁠11.

⁶ Lebaka le lengwe leo ka lona Sejo sa Morena sa Mantšiboa se ilego sa hlongwa e be e le go re gopotša gore ka lehu la gagwe e le motho yo a phethagetšego le yo a se nago sebe, Jesu ‘o neetše bophelo bja gagwe gore e be topollo ya ba bantši.’ (Mateo 20:​28) Ge motho wa pele a be a fošetša Modimo, o ile a lahlegelwa ke bophelo bjo bo phethagetšego le ditebelelo tša bjona ka moka. Lega go le bjalo Jesu o itše: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:​16) Ka kgonthe, “moputsô wa sebe ké lehu; ’me neô ya kxauxêlô ya Modimo ké bophelô byo bo sa felexo ka Jesu Kriste Mong ’a rena.” (Ba-Roma 6:​23) Go binwa ga Sejo sa Morena sa Mantšiboa go re gopotša ka lerato le legolo leo le ilego la bontšhwa ke Jehofa gotee le Morwa wa gagwe mabapi le lehu la Jesu la sehlabelo. A tebogo e kaakang yeo re swanetšego go e bontšha ka lerato leo!

Se Swanetše go Binwa Neng?

7. Ke bjang Bakriste ba tloditšwego ba jago diswantšhetšo tša Segopotšo “ka mehla”?

⁷ Mabapi le Sejo sa Morena sa Mantšiboa, Paulo o itše: “Ka mehla xe Le e-⁠ja senkxwa sé, Lè e-⁠nwa senwêlô sé, Le tsebatšê lehu la Morêna xo fihla xe a e-⁠tla.” (1 Ba-Korinthe 11:​26) Bakriste ka moka ba tloditšwego ba tla tšwela pele go ja diswantšhetšo tša Segopotšo go fihlela ba e-⁠hwa. Ka gona, ba tla tsebatša tumelo ya bona leboelela tokišetšong ya Modimo ya sehlabelo sa Jesu sa topollo ka pele ga Jehofa Modimo le lefase.

8. Sehlopha sa Bakriste ba tloditšwego se be se tla bina Sejo sa Morena sa Mantšiboa go fihlela neng?

⁸ Sehlopha sa Bakriste ba tloditšwego se tla bina Segopotšo sa lehu la Kriste go fihlela neng? Paulo o itše: “Xo fihla xe a e-⁠tla,” go molaleng gore o be a bolela gore go binwa mo go be go tla tšwela pele go fihlela ge Jesu a e-⁠tla go amogela balatedi ba gagwe ba tloditšwego ka go ba tsošetša legodimong nakong ya “maboô” a gagwe. (1 Ba-Thesalonika 4:​14-17) Se se dumelelana le mantšu a Jesu go baapostola ba botegago ba 11 ge a re: “Xe ke ya xo Le lokišetša sebaka, ke tlo boa ka Le tšea, xore mo Nna ke lexo xôna le lena Le bê xôna.”​—Johane 14:⁠3.

9. Mantšu a Jesu a begilwego go Mareka 14:​25 a bolela’ng?

⁹ Ge Jesu a be a hloma Segopotšo, o ile a bolela ka senwelo sa beine gomme a botša baapostola ba gagwe ba botegago gore: “Nka se ke ka hlwa ké e-⁠nwa seenywa sé sa morara, xo fihla mehleng yeo kè tl’o xo buša kè se nwa mmušong  wa Modimo.” (Mareka 14:​25) Ka ge Jesu a be a ka se sa hlwa a e-⁠nwa beine ya kgonthe kua legodimong, go molaleng gore o be a naganne ka lethabo leo ka dinako tše dingwe le swantšhetšwago ke beine. (Psalme 104:​15; Mmoledi 10:​19) Go ba gotee le barutiwa ba gagwe Mmušong e tla ba phihlelo e thabišago yeo yena gotee le balatedi ba gagwe ba e hlologetšego ka phagahlo.​—Ba-Roma 8:​23; 2 Ba-Korinthe 5:⁠2.

10. Segopotšo se swanetše go binwa ga kae?

¹⁰ Na lehu la Jesu le swanetšwe go binwa kgwedi e nngwe le e nngwe, beke e nngwe le e nngwe goba gaešita le letšatši le lengwe le le lengwe? Aowa. Jesu o ile a hloma Sejo sa Morena sa Mantšiboa gomme a bolawa ka Paseka yeo e bego e binwa e le “kgopotšo” ya go lokollwa ga ba-Isiraele bokgobeng bja Egipita ka 1513 B.C.E. (Ekisodo 12:​14, PK) Paseka e be e binwa gatee ka ngwaga, ka letšatši la bo-14 la kgwedi ya Sejuda ya Nisani. (Ekisodo 12:​1-⁠6; Lefitiko 23:⁠5) Se se bontšha gore lehu la Jesu le swanetše go binwa go swana le ge Paseka e be e binwa​—ngwaga o mongwe le o mongwe​—e sego kgwedi e nngwe le e nngwe, beke e nngwe le e nngwe goba letšatši le lengwe le le lengwe.

11, 12. Histori e utolla’ng ka go binwa ga Segopotšo ga lekgolong la pele la nywaga?

¹¹ Ka gona, Segopotšo se swanetše go binwa ngwaga o mongwe le o mongwe ka Nisani 14. Puku e nngwe ya ditšhupetšo e re: “Bakriste ba Asia Minor ba be ba bitšwa gore ke ma-Quartodeciman [Bo-ralesome-nne] ka baka la tlwaelo ya bona ya go bina paseka [Sejo sa Morena sa Mantšiboa] ka matšatši a fapa-fapanego a Nisani 14 . . . Letšatši leo le ka ba ka Labohlano goba letšatšing le ge e le lefe bekeng.”​—The New Schaff-Herzog Encyclopedia of Religious Knowledge, Bolumo IV, letlakala 44.

¹² Radihistori J. L. von Mosheim ge a bolela ka mediro ya lekgolong la bobedi la nywaga C.E., o hlalosa gore ma-Quartodeciman a be a bina Segopotšo ka Nisani 14 ka ge “a be a tšea mohlala wa Kriste e le o tlamago bjalo ka molao.” Rahistori yo mongwe o bolela gore: “Motlwae wa dikereke tša ma-Quartodeciman tša Asia o be o tšwela pele o sepedišana le wa kereke ya Jerusalema. Lekgolong la bo-⁠2 la nywaga dikereke tše Pasekeng ya tšona ka di-14 tša Nisani di binne segopotšo sa topollo yeo e phethilwego ke lehu la Kriste.”​—Studia Patristica, Bolumo V, 1962, letlakala 8.

Seo se Swantšhetšwago ke Senkgwa

13. Jesu o ile a diriša mohuta ofe wa senkgwa ge a be a hloma Sejo sa Morena sa Mantšiboa?

¹³ Ge Jesu a be a hloma Segopotšo, o ile “a tšea senkxwa, a se šexofatša, a se ngwathaxanya, a neêla [baapostola].” (Mareka 14:​22) Senkgwa seo se ilego sa dirišwa tiragalong yeo se be se swana le seo se bego se sa tšwa go dirišwa ka Paseka. (Ekisodo 13:​6-10) Ka ge se be se sa dubja ka komelo, se be se le phaphathi e bile se gwaša gomme se be se swanetše go ngwathaganywa gore se tle se abje. Ge Jesu ka mohlolo a be a oketša senkgwa bakeng sa batho ba dikete, le sona e be e le se se gwašago ka gobane o ile a se ngwathaganya gore se kgone go abja. (Mateo 14:​19; 15:​36) Ka gona, go molaleng gore go ngwathaganywa ga senkgwa sa Segopotšo ga go na seo go se swantšhetšago ka tsela ya moya.

14. (a) Ke ka baka la’ng e le mo go swanetšego gore senkgwa sa Segopotšo se se omelwe? (b) Ke senkgwa sefe seo se ka rekwago goba sa apewa bakeng sa go dirišwa Sejong sa Morena sa Mantšiboa?

¹⁴ Jesu o ile a bolela mabapi le senkgwa seo se ilego sa dirišwa ge go hlongwa Segopotšo ka gore: “Ké mmele wa-ka o newaxo ka ’baka la lena.” (1 Ba-Korinthe 11:​24; Mareka 14:​22) E be e le mo go swanetšego gore senkgwa se be se sa omelwago. Ka baka la’ng? Ka gobane komelo e ka swantšhetša bobe, bokgopo goba sebe. (1 Ba-Korinthe 5:​6-⁠8) Senkgwa se be se emela mmele wa Jesu o phethagetšego wa go se be le sebe, woo ka mo go swanetšego o ilego wa neelwa e le sehlabelo sa topollo. (Ba-Hebere 7:​26; 10:​5-10) Dihlatse tša Jehofa di dula di gopola se gomme di latela mohlala wo o beilwego ke Jesu ka go diriša senkgwa se se sa omelwago ge di bina Segopotšo. Maemong a mangwe, di diriša senkgwa sa Sejuda sa matzos seo se sa omelwago, se se sa tswakwago le metswako e mengwe e bjalo ka eiye goba mae. Ntle le moo, go ka dirwa senkgwa se se sa omelwago ka folouru e nyenyane (ge go kgonega, ka ya korong) e tswakilwego le meetse a manyenyane. Tlhama e swanetše go  pshikološwa go fihlela e e-⁠ba boleta gomme e ka apewa ka paneng yeo e tloditšwego ganyenyane ka makhura go fihlela senkgwa se oma gomme se gwaša.

Seo se Swantšhetšwago ke Beine

15. Go be go na le’ng ka senwelong seo se ilego sa dirišwa ge Kriste a be a hloma Segopotšo sa lehu la gagwe?

¹⁵ Ka morago ga go fetiša senkgwa se se sa omelwago, Jesu o ile a tšea senwelo ‘a leboga, a se neela baapostola ba gagwe, ba nwa ka sona ka moka ga bona.’ Jesu o ile a hlalosa gore: “Ké madi a-⁠ka a kxwêranô e mphsa, a a thšollwaxo ka ’baka la ba bantši.” (Mareka 14:​23, 24) Go be go na le eng ka senwelong? Go be go na le beine ye e bedilego, e sego meetse a morara a sa belago. Ge Mangwalo a bolela ka beine, ga a bolele ka meetse a morara ao a sa belago. Ka mohlala, beine ye e tswakilwego e sego meetse a morara, e be e tla ‘onatša nkgo’ bjalo ka ge Jesu a boletše. Le gona manaba a Kriste a ile a mo latofatša ka gore ke “monwi wa beine.” Yeo e be e tla ba tatofatšo ya go se be le motheo ge e ba beine yeo e be e fo ba meetse a morara. (Mateo 9:​17; 11:​19, PK) Beine e be e nwewa ge go binwa Paseka, gomme Kriste o ile a e diriša ge a be a hloma Segopotšo sa lehu la gagwe.

16, 17. Ke beine ya mohuta ofe yeo e swanetšego go dirišwa bakeng sa go bina Segopotšo, le gona ka baka la’ng?

¹⁶ Beine e khwibidu ke yona feela e lego leswao le le swanelago la seo se swantšhetšwago ke seo se bego se tšhetšwe ka senwelong, e lego madi a Jesu a tšholotšwego. Yena ka noši o ile a re: “Ké madi a-⁠ka a kxwêranô e mphsa, a a thšollwaxo ka ’baka la ba bantši.” Ka gona moapostola Petro o itše: “[Bakriste ba tloditšwego] le tsebê xore, tseleng yeo ya lena ya lefêla, ye Le e tšerexo xo bô-tataweno, xa La ka la hunollwa ka tše di fêlêlaxo bo-ka xauta le silifêra, le hunolotšwe ka madi a thêkô e kxolo a Kriste, a Yêna Kwana e se naxo senyalô le bosodi.”​—1 Petro 1:​18, 19.

¹⁷ Ga go na pelaelo gore Jesu o ile a diriša beine e khwibidu ya go dirwa ka morara ge a be a hloma Segopotšo. Lega go le bjalo, dibeine tše dingwe tše khwibidu tša mehleng yeno ga di swanelege ka gobane di tswakilwe ka digala-gala goba ka merogo le metswako. Madi a Jesu a be a swanelega ka mo go feletšego, a be a sa nyake selo seo a ka tswakwago ka sona. Ke ka baka leo dibeine tše bjalo ka port, sherry le vermouth di ka se swanelegego. Senwelo sa Segopotšo se swanetše go ba le beine e khwibidu e se nago swikiri le ye e sa tswakwago. Go ka dirišwa beine ya morara o mo khwibidu yeo e se nago swikiri yeo e itiretšwego le dibeine tše di swanago le red burgundy le claret.

18. Ke ka baka la’ng Jesu a se a ka a dira mohlolo mabapi le senkgwa le beine ya Segopotšo?

¹⁸ Ge a be a hloma sejo se, Jesu ga se a dira mohlolo ka go fetoša diswantšhetšo gore e be nama le madi a gagwe a kgonthe. Go ja nama ya motho le go nwa madi a gagwe e be e tla ba bokgema, go tshela molao wa Modimo. (Genesi 9:​3, 4; Lefitiko 17:​10) Jesu o be a sa dutše a e-⁠na le mmele wa gagwe wa nama wo o feletšego le madi a gagwe ka moka. Mmele wa gagwe o ile wa neelwa e le sehlabelo se se phethagetšego, gomme madi a gagwe a ile a tšhollwa mantšiboeng a latelago a lona letšatši leo la Sejuda la Nisani 14. Ka gona, senkgwa le beine tša Segopotšo ke tša seswantšhetšo, di emela nama le madi a Kriste. *

 Segopotšo​—Sejo sa Mohlakanelwa

19. Ke ka baka la’ng go ka dirišwa sebjana le senwelo se se fetago setee ge go binwa Sejo sa Morena sa Mantšiboa?

¹⁹ Ge Jesu a be a hloma Segopotšo, o ile a laletša baapostola ba gagwe ba botegago go nwa ka senwelong setee. Ebangedi ya Mateo e re: “[Jesu] a tšea senwêlô, a leboxa, a ba neêla sôna, a re: Nwang sôna bohle.” (Mateo 26:​27) Go diriša “senwêlô” setee feela, e sego dinwelo tše dintši ga se gwa baka bothata, ka ge tiragalong yeo go bile le ba 11 feela bao ba ilego ba jela tafoleng e tee gomme ba be ba ka kgona go fetišetšana senwelo seo. Lenyaga, ba dimilione ba tla bokana gotee bakeng sa go bina Sejo sa Morena sa Mantšiboa diphuthegong tša ka godimo ga tše 94 000 tša Dihlatse tša Jehofa lefaseng ka bophara. Ka ge go tla ba le ba bantši gakaakaa bao ba tlago bokana gotee bakeng sa tiragalo ye bošegong botee, go ka se kgonege gore go dirišwe senwelo setee feela bakeng sa bona ka moka. Eupša molao wa motheo wa senwelo seo se emelago madi a Jesu a sehlabelo o sa dutše o dirišwa diphuthegong tše kgolo ka go dirišwa ga dinwelo tše sego kae e le gore di ka fetišetšwa go batheetši ka moka ka nako e sa fetšego pelo. Ka mo go swanago, go ka dirišwa sebjana se fetago setee bakeng sa senkgwa. Ga go gona ka Mangwalong moo go bontšhago gore senwelo goba sebjana e swanetše go ba sa mohuta o itšego. Lega go le bjalo, senwelo le sebjana di swanetše go bontšha seriti sa tiragalo ye. Ke ga bohlale go phema go tlatša senwelo kudu moo beine e ka tšhologago ge se dutše se fetišwa.

20, 21. Ke ka baka la’ng re ka bolela gore Segopotšo ke sejo sa mohlakanelwa?

²⁰ Gaešita le ge go ka dirišwa sebjana sa senkgwa le senwelo sa beine se se fetago setee, Segopotšo ke sejo sa mohlakanelwa. Isiraeleng ya bogologolo, monna o be a ka nea sejo sa mohlakanelwa ka go tliša phoofolo sekgethweng sa Modimo, moo e bego e bolaelwa gona. Seripa sa phoofolo se be se fišwa aletareng, seripa se sengwe se e-⁠ya go moperisita yo a hlankelago gomme seripa se sengwe se be se e-⁠ya go barwa ba Arone ba baperisita, gomme yo a neelago sehlabelo le ba lapa la gagwe ba be ba e-⁠ja gotee. (Lefitiko 3:​1-16; 7:​28-36) Segopotšo le sona ke sejo sa mohlakanelwa ka gobane se akaretša go abelana.

²¹ Jehofa o a akaretšwa sejong se sa mohlakanelwa ka ge e le Mohlami wa tokišetšo ye. Jesu ke sehlabelo, gomme Bakriste ba tloditšwego ba abelana go jeng diswantšhetšo ka ge e le batšea-karolo. Go jela tafoleng ya Jehofa go bontšha gore baji ba na le khutšo le yena. Ka go dumelelana le se, Paulo o ngwadile gore: “Senwêlô sa thšexofatšô se re se šexofatšaxo, a xa se kôpanô ya madi a Kriste? Senkxwa se re se ngwathaxo, a xa se kôpanô ya mmele wa Kriste? Senkxwa è le se tee, rena ba re lexo ba bantši re ba mmele o tee; xobane senkxwa re ja se tee ka moka xa rena.”​—1 Ba-Korinthe 10:​16, 17.

22. Ke dipotšišo dife tša mabapi le Segopotšo tšeo re swanetšego go di ahla-ahla?

²² Sejo sa Morena sa Mantšiboa ke tiragalo e nnoši ya ngwaga le ngwaga ya bodumedi yeo e binwago ke Dihlatse tša Jehofa. Se ke seo se swanetšego ka gobane Jesu o laetše balatedi ba gagwe gore: “Dirang byalo e bê xo nkxopola.” Segopotšong, re gopola lehu la Jesu, lehu leo le godišitšego bogoši bja Jehofa. Bjalo ka ge re bone, sejong se sa mohlakanelwa, senkgwa se swantšhetša mmele wa Kriste wa nama woo o dirilwego sehlabelo gomme beine e swantšhetša madi a gagwe a tšholotšwego. Lega go le bjalo, ke ba sego kae bao ba jago senkgwa le beine tša seswantšhetšo. Ke ka baka la’ng go le bjalo? Na Segopotšo se na le morero go ba dimilione bao ba sa jego? Ge e le gabotse, Sejo sa Morena sa Mantšiboa se swanetše go bolela’ng go wena?

[Mengwalo ya ka tlase]

[Dipotšišo tša Thuto]

[Caption on page 15]

Jesu o ile a hloma Sejo sa Morena sa Mantšiboa

Dikarabo tša Gago ke Dife?

• Ke ka baka la’ng Jesu a ile a hloma Sejo sa Morena sa Mantšiboa?

• Segopotšo se swanetše go binwa ga kae?

• Senkgwa se se sa omelwago sa Segopotšo se swantšhetša’ng?

• Beine ya Segopotšo e swantšhetša’ng?