Sejo Sa Morena Sa Mantšiboa Se Bolela’ng Go Wena?
Sejo Sa Morena Sa Mantšiboa Se Bolela’ng Go Wena?
“Le xôna, mang le mang e a jaxo senkxwa sé, a nwa senwêlô sé à sa swanêla, ó ôba molato mmeleng wa Morêna le mading a xaxwe.”—1 BA-KORINTHE 11:27.
1. Ke tiragalo efe ya bohlokwa kudu yeo e rulaganyeditšwego bakeng sa ngwaga wa 2003, gomme e thomile bjang?
TIRAGALO ya bohlokwa kudu yeo e rulaganyeditšwego bakeng sa ngwaga wa 2003 e tla ba ka April 16 ka morago ga ge letšatši le sobetše. Dihlatse tša Jehofa di tla bokana gotee bakeng sa go bina Segopotšo sa lehu la Jesu Kriste. Bjalo ka ge go bontšhitšwe sehlogong se se fetilego, Jesu o ile a hloma tiragalo ye, yeo e bitšwago gape gore ke Sejo sa Morena sa Mantšiboa, ka morago ga ge yena le baapostola ba gagwe ba binne Paseka ka Nisani 14, 33 C.E. Diswantšhetšo tša Segopotšo tša senkgwa se sa omelwago le beine e khwibidu di swantšhetša mmele wa Kriste wo o se nago sebe le madi a gagwe a tšholotšwego—sehlabelo se nnoši seo se ka lokollago batho sebeng sa leabela le lehung.—Ba-Roma 5:12; 6:23.
2. Ke temošo efe yeo e begilwego go 1 Ba-Korinthe 11:27?
2 Bao ba jago diswantšhetšo tša Segopotšo ba swanetše go dira bjalo ka tsela e swanetšego. Moapostola Paulo o ile a bolela seo ka mo go kwagalago ge a be a ngwalela Bakriste ba Korinthe ya bogologolo, moo Sejo sa Morena sa Mantšiboa se bego se sa binwe ka tsela e swanetšego. (1 Ba-Korinthe 11:20-22) Paulo o ngwadile gore: “Mang le mang e a jaxo senkxwa sé, a nwa senwêlô sé à sa swanêla, ó ôba molato mmeleng wa Morêna le mading a xaxwe.” (1 Ba-Korinthe 11:27) Mantšu ao a bolela’ng?
Ba Bangwe ba Ile ba se Bina ka Tsela e sa Swanelago
3. Bakriste ba bantši ba Korinthe ba be ba itshwara bjang ge go binwa Sejo sa Morena sa Mantšiboa?
3 Bakriste ba bantši ba Korinthe ba ile ba ja diswantšhetšo tša Segopotšo ka tsela e sa swanelago. Go be go na le dikarogano gare ga bona, gomme bonyenyane ka nako e itšego ba bangwe ba ile ba tla le dijo tša bona tša mantšiboa gomme ba ja pele ga ge seboka se thoma, gantši ba e-ja le go nwa ka tsela e feteletšego. Ba be ba se šedi monaganong le moyeng. Se se ile sa ba dira gore ba be “molato mmeleng wa Morêna le mading a xaxwe.” Bao ba bego ba sa ja dijo tša mantšiboa ba be ba swerwe ke tlala gomme ba ile ba šitišega. Ee, ba bantši ba ile ba ja ka ntle le tlhompho le go lemoga ka mo go tletšego bohlokwa bja tiragalo ye. Ga go makatše gore ba ile ba itlišetša kahlolo!—1 Ba-Korinthe 11:27-34.
4, 5. Ke ka baka la’ng go itlhahloba go le bohlokwa go bao ba tlwaetšego go ja diswantšhetšo Segopotšong?
4 Ngwaga o mongwe le o mongwe ge Segopotšo se batamela, go bohlokwa gore bao ba tlwaetšego go ja diswantšhetšo ba itlhahlobe. Gore ba tšee karolo dijong tše tša mohlakanelwa ka tsela e swanetšego, ba swanetše go ba bao ba phetšego gabotse moyeng. Motho le ge e le ofe yo a bontšhago go se hlomphe gaešita le go se kgotsofalele sehlabelo sa Jesu o tla ba kotsing ya go ‘ripša setšhabeng sa batho ba Modimo,’ go swana le mo-Isiraele yo a bego a e-ja dijo tša mohlakanelwa a se a hlweka.—Lefitiko 7:20; Ba-Hebere 10:28-31.
5 Paulo o ile a swantšha Segopotšo le sejo sa mohlakanelwa sa kua Isiraeleng ya bogologolo. O ile a bolela ka go ba selo setee ga batšea-karolo le Kriste gomme a re: “Le ka se kxône xo nwa senwêlô sa Morêna, la tla la nwa le senwêlô sa diriti, Le ka se kxône xo ba ba xo abêlwa moxopo wa Morêna, la tla la abêlwa le moxopo wa diriti.” (1 Ba-Korinthe 10:16-21) Ge e ba motho yo a tlwaetšego go ja diswantšhetšo tša Segopotšo a dira sebe se segolo, o swanetše go ipolela sebe se go Jehofa gomme a tsome thušo ya moya go bagolo ka phuthegong. (Diema 28:13; Jakobo 5:13-16) Ge e ba a itshola e le ka kgonthe gomme a bontšha dienywa tše di swanelago tshokologo, o tla swanelega go ja.—Luka 3:8.
Go ba Gona re le Babogedi Bao ba Hlomphago
6. Modimo o boloketše bomang tokelo ya go ja Sejong sa Morena sa Mantšiboa?
6 Na bao gona bjale ba direlago mašaledi a bana babo Kriste ba 144 000 dilo tše dibotse ga se ba swanela go ja Sejong sa Morena sa Mantšiboa? (Mateo 25:31-40; Kutollo 14:1) Aowa. Modimo o beetše tokelo yeo ka thoko bakeng sa batho bao a ba tloditšego ka moya o mokgethwa gore e be “ba xo ja bohwa le Kriste.” (Ba-Roma 8:14-18; 1 Johane 2:20) Ka gona, bao ba nago le kholofelo ya go phela ka mo go sa felego mo lefaseng la paradeise ka tlase ga pušo ya Mmušo ba boemong bofe? (Luka 23:43; Kutollo 21:3, 4) Ka ge e se baja-bohwa gotee le Jesu ka kholofelo ya go phela legodimong, ba ba gona Segopotšong e le babogedi bao ba hlomphago.—Ba-Roma 6:3-5.
7. Ke ka baka la’ng Bakriste ba lekgolong la pele la nywaga ba ile ba tseba gore ba swanetše go ja diswantšhetšo tša Segopotšo?
7 Bakriste ba therešo ba lekgolong la pele la nywaga ba be ba tloditšwe ka moya o mokgethwa. Ba bantši ba bona ba be ba kgona go diriša e tee goba go feta moo ya dimpho tša mohlolo tša moya, e bjalo ka go bolela ka maleme. Ka gona, go be go ka se be thata gore batho ba bjalo ba tsebe gore ba tloditšwe ka moya gomme ba swanetše go ja diswantšhetšo tša Segopotšo. Lega go le bjalo, mehleng ya rena se se ka bonwa motheong wa mantšu a buduletšwego a bjalo ka a: “Bana ba Modimo ké bao bohle ba ba išwaxo ke Môya wa Modimo. Xobane xa L’a ka la fiwa môya wa bohlanka wa xore Le boêlê Le boifê; Le filwe môya wa xo ba bana, woo, xe re na le wôna, ra hlaboša mantšu ra re: Baba! Tata!”—Ba-Roma 8:14, 15.
8. Ke bomang bao ba emelwago ke “mabêlê” le “mefoka” yeo go boletšwego ka yona go Mateo kgaolo 13?
8 Go theoša le nywaga-kgolo, batlotšwa ba kgonthe ba ile ba mela bjalo ka “mabêlê” tšhemong ya “mefoka,” goba Bakriste ba maaka. (Mateo 13:24-30, 36-43) Ga e sa le go tloga ka bo-1870, “mabêlê” a ile a bonagala kudu, gomme nywaga ka morago balebeledi ba tloditšwego ba Bakriste ba ile ba botšwa gore: “Bagolo . . . ba swanetše go botša bao ba bokanago gotee [bakeng sa Segopotšo] maemo a,—(1) gore ba be le tumelo mading [a Kriste]; le (2) go ineela tirelong ya Morena gaešita le go fihla lehung. Ke moka ba swanetše go laletša bohle bao ba nago le tshekamelo yeo gomme ba ineetše gore ba tšee karolo go bineng lehu la Morena.”—Studies in the Scriptures, Tlhatlamano VI, The New Creation, letlakala 473. *
Go Tsoma “Dinku tše Dingwê”
9. Go hlaolwa ga “lešaba le lexolo” go ile gwa lokišwa bjang ka 1935, gomme se se ile sa kgoma bjang ba bangwe ba bao ba bego ba e-ja diswantšhetšo tša Segopotšo?
9 Ge nako e tšwela pele, mokgatlo wa Jehofa o ile wa thoma go lebiša tlhokomelo go ba bangwe ba tlago go tlaleletša balatedi ba Kriste ba tloditšwego. Tiragalo e kgahlišago tabeng ye e ile ya direga magareng ga bo-1930. Pele ga fao, batho ba Modimo ba be ba lebelela “lešaba le lexolo” la Kutollo 7:9 e le sehlopha sa bobedi sa moya seo se tla kopanago le batlotšwa ba 144 000 bao ba tsošeditšwego legodimong—bjalo ka bagwera ba monyadi goba bagwera ba monyadiwa wa Kriste. (Psalme 45:14, 15; Kutollo 7:4; 21:2, 9) Eupša ka May 31, 1935, polelong yeo e ilego ya newa kopanong ya Dihlatse tša Jehofa kua Washington, D.C., U.S.A., go ile gwa hlaloswa go tšwa ka Mangwalong gore “lešaba le lexolo” le šupa go “dinku tše dingwê” tšeo di phelago mehleng ya bofelo. (Johane 10:16) Ka morago ga kopano yeo, ba bangwe ba bao ba bego ba e-ja diswantšhetšo tša Segopotšo ba ile ba tlogela go ja ka gobane ba ile ba lemoga gore kholofelo ya bona e be e le ya go phela lefaseng, e sego legodimong.
10. O ka hlalosa bjang kholofelo le boikarabelo bja “dinku tše dingwê” tša mehleng yeno?
10 Ga e sa le go tloga ka 1935 ka mo go kgethegilego go ile gwa ba le go tsongwa ga bao e bago “dinku tše dingwê,” bao ba nago le tumelo go topollo, ba ineela go Modimo gomme ba thekga “mohlatswana o monyenyane” modirong wa go bolela ka Mmušo. (Luka 12:32) Dinku tše tše dingwe di holofela go phela ka mo go sa felego mo lefaseng, eupša dibopegong tše dingwe ka moka, di swana le mašaledi a mehleng yeno a baja-bohwa ba Mmušo. Go swana le badiiledi ba Isiraeleng ya bogologolo bao ba bego ba rapela Jehofa gomme ba e-kwa Molao, lehono dinku tše dingwe di amogela boikarabelo bja Bakriste, bjo bjalo ka go bolela ditaba tše dibotse gotee le ditho tša Isiraele ya moya. (Ba-Galatia 6:16) Lega go le bjalo, ka ge go be go ka se be le modiiledi yo a bego a ka ba kgoši goba moperisita wa Isiraele, ga go le o tee wa dinku tše tše dingwe yo a ka bušago Mmušong wa legodimong goba go hlankela e le moperisita.—Doiteronomio 17:15.
11. Ke ka baka la’ng letšatši la motho la go [kolobetšwa] le na le seo le se bolelago mabapi le ge e ba motho ke karolo ya mašaledi a batlotšwa?
11 Ke moka, ka bo-1930 go ile gwa thoma go ba molaleng gore ka kakaretšo sehlopha sa legodimong se šetše se kgethilwe. Ka nywaga-some ga bjale, go be go dutše go tsongwa dinku tše dingwe, tšeo di nago le kholofelo ya go phela lefaseng. Ge e ba motlotšwa a sa botege, mohlomongwe motho yo e lego kgale a hlankela Modimo ka potego e le yo mongwe wa dinku tše dingwe o tla kgethelwa go tlatša sekgoba seo se bulegilego go ba 144 000.
Lebaka Leo ka Lona ba Bangwe ba Naganago ka Phošo Gore ke Batlotšwa
12. Ke ka tlase ga maemo afe moo motho a swanetšego go kgaotša go ja diswantšhetšo tša Segopotšo, gomme ka baka la’ng?
12 Bakriste ba tloditšwego ba kgodišegile gore ba bileditšwe go phela legodimong. Eupša go thwe’ng ge e ba batho ba bangwe bao ba sa hwetšago pitšo ye ba be ba dutše ba e-ja diswantšhetšo tša Segopotšo? Ga bjale ka ge ba lemoga gore ga ba na kholofelo ya go phela legodimong, ka ntle le pelaelo matswalo a bona a tla ba gapeletša go tlogela go ja. Modimo a ka se ke a amogela motho le ge e le ofe yo a itebelelago a bileditšwe go ba kgoši le moperisita legodimong mola a tseba gore o tloga a sa amogela pitšo yeo. (Ba-Roma 9:16; Kutollo 20:6) Jehofa o ile a ahlola Kora wa mo-Lefi ka baka la ge a ile a tsoma ka boikgogomošo boperisita bja Arone. (Ekisodo 28:1; Numeri 16:4-11, 31-35) Ge e ba Mokriste le ge e le ofe a lemoga gore o ile a ja diswantšhetšo tša Segopotšo ka phošo, o swanetše go kgaotša go ja gomme ka boikokobetšo a rapelele tebalelo go Jehofa.—Psalme 19:13.
13, 14. Ke ka baka la’ng ba bangwe ba ka nagana ka phošo gore ba bileditšwe legodimong?
13 Ke ka baka la’ng ba bangwe ba ka nagana ka phošo gore ba bileditšwe legodimong? Lehu la molekane goba masetla-pelo a mangwe a ka dira gore motho a lahlegelwe ke kgahlego ya go phela lefaseng. Goba mohlomongwe ba ka kganyoga gore le bona ba phele legodimong bjalo ka mogwera wa kgaufsi yo a ipolelago gore ke Mokriste yo a tloditšwego. Ke therešo gore Modimo ga se a kgetha motho yo mongwe gore a kgothaletše ba bangwe tokelong ye. Le gona ga a tlotše baja-bohwa ba Mmušo ka go dira gore ba kwe mantšu ka melaetša yeo e kgonthišetšago seo.
14 Kgopolo ya bodumedi ya maaka ya gore batho ba ba lokilego ka moka ba ya legodimong e ka dira gore ba bangwe ba nagane gore ba bileditšwe legodimong. Ka gona, re swanetše go itiša malebana le go tutuetšwa ke dipono tše fošagetšego tša nakong e fetilego goba mabaka a mangwe. Ka mohlala, ba bangwe ba ka ipotšiša gore: ‘Na ke diriša dihlare tšeo di kgomago maikwelo a-ka? Na ke na le tshekamelo ya go ba le maikwelo a tseneletšego moo nka naganago ka phošo gore ke yo mongwe wa batlotšwa?’
15, 16. Ke ka baka la’ng ba sego kae ba ka phetha ka mo go fošagetšego gore ke batlotšwa?
15 Ba bangwe ba ka ipotšiša gore: ‘Na ke nyaka go tuma? Na ke duma go ba molaodi ga bjale goba moja-bohwa gotee le Kriste wa nakong e tlago?’ Ge baja-bohwa ba Mmušo ba be ba bitšwa lekgolong la pele la nywaga, ga se bohle bao ba bego ba na le maemo a boikarabelo ka phuthegong. Batho bao ba bileditšwego legodimong ga ba tsome botumo goba go ikgantšha ka go ba batlotšwa. Ba bontšha boikokobetšo bjoo bo letetšwego go bao ba nago le “kelêlô ya Kriste.”—1 Ba-Korinthe 2:16.
16 Ba bangwe ba ka ba ba phethile ka gore ba bileditšwe legodimong ka lebaka la ge ba na le tsebo e ntši ka Beibele. Eupša go tlotšwa ka moya ga go tliše kwešišo e sa tlwaelegago, ka gobane Paulo o ile a swanelwa ke go ruta le go eletša batlotšwa ba itšego. (1 Ba-Korinthe 3:1-3; Ba-Hebere 5:11-14) Modimo o na le tokišetšo ya go abela batho ba gagwe ka moka dijo tša moya. (Mateo 24:45-47) Ka gona ga go na motho yo a swanetšego go nagana gore go ba Mokriste yo a tloditšwego go nea motho bohlale bjo bo phagamego kudu go feta bja bao ba nago le kholofelo ya go phela mo lefaseng. Go tlotšwa ka moya ga go bontšhwe ka go ba le bokgoni bja go araba dipotšišo tša Mangwalo, go nea bohlatse goba go nea dipolelo tša Beibele. Bakriste bao ba nago le kholofelo ya go phela lefaseng le bona ba dira gabotse dibopegong tše.
17. Go tlotšwa ka moya go ithekgile ka eng le gona ka mang?
17 Ge e ba modumedi-gotee a botšiša ka go biletšwa legodimong, mogolo goba Mokriste yo mongwe yo a godilego tsebong a ka ahla-ahla taba ye le yena. Lega go le bjalo, ga go motho yo a ka direlago yo mongwe phetho tabeng ye. Motho yo a tlogago a hweditše pitšo ye ga go hlokege gore a botšiše ba bangwe ge e ba a e-na le kholofelo e bjalo. Batlotšwa ke “ba ba tswetšwexo xapê ka peu e sexo yela e senyêxaxo, è le peu ye e sa senyêxexo ya Lentšu la Modimo le le phelaxo, le le tl’o xo dula lè le xôna neng le neng.” (1 Petro 1:23) Ka moya wa gagwe le ka Lentšu la gagwe, Modimo o bjala “peu” yeo e dirago gore motho e be “mmopya e mofsa,” yo a nago le kholofelo ya go phela legodimong. (2 Ba-Korinthe 5:17) Le gona Jehofa o dira kgetho. Go tlotšwa “xa [go] diatleng tša motho e a rexo: ke a rata, xoba: ke a kitimêla; [go] diatleng tša Modimo.” (Ba-Roma 9:16) Ka gona motho a ka kgonthišega bjang gore o bileditšwe legodimong?
Lebaka Leo ka Lona ba Kgodišegilego
18. Moya wa Modimo o hlatselana bjang le moya wa batlotšwa?
18 Go hlatselwa ke moya wa Modimo go kgonthišetša Bakriste ba tloditšwego gore ba na le dikholofelo tša go phela legodimong. Paulo o ngwadile gore: “Le filwe môya wa xo ba bana, woo, xe re na le wôna, ra hlaboša mantšu ra re: Baba! Tata! Môya-mokxêthwa Yêna mong ké hlatse ya xo kwana le môya wa rena, hlatse ya xo re re bana ba Modimo. Byale, xe re le bana, xôna re baji ba bohwa, baji ba bohwa ba Modimo, ba xo ja bohwa le Kriste; xobane re tlo ba rè tlaišexile le Yêna, ra tlo kxôna xo fiwa letaxô le Yêna.” (Ba-Roma 8:15-17) Ka tlase ga tutuetšo ya moya o mokgethwa, moya goba boemo bja kgopolo bjo bo laolago bja batlotšwa, bo ba tutueletša go amogela seo Mangwalo a se bolelago ka bana ba Jehofa ba moya e le seo se šomago go bona. (1 Johane 3:2) Moya wa Modimo o ba nea maikwelo a go ba barwa ba gagwe le go bjala ka go bona kholofelo ya moswana-noši. (Ba-Galatia 4:6, 7) Ee, bophelo bja ka mo go sa felego mo lefaseng e le batho ba phethagetšego ba e-na le ditho tša lapa le bagwera e tla ba selo se se kgahlišago, eupša yeo ga se kholofelo yeo ba e neilwego ke Modimo. Ka moya wa gagwe, Modimo o tšweleditše ka go bona kholofelo e bjalo e matla ya go phela legodimong moo e lego gore ba ikemišeditše go neela dilo ka moka le ditebelelo tša lefaseng.—2 Ba-Korinthe 5:1-5, 8; 2 Petro 1:13, 14.
19. Kgwerano e mpsha e kgatha tema efe bophelong bja Mokriste yo a tloditšwego?
19 Bakriste ba tloditšwego ba kgodišegile ka kholofelo ya bona ya legodimong, ya go tsenywa ga bona kgweranong e mpsha. Jesu o ile a bolela ka yona ge a be a hloma Segopotšo gomme a re: “Senwêlô sé ké kxwêranô e mphsa mading a-ka a a thšollwaxo ka ’baka la lena.” (Luka 22:20) Modimo le batlotšwa ke batšea-karolo kgweranong e mpsha. (Jeremia 31:31-34; Ba-Hebere 12:22-24) Jesu ke mmoelanyi. Ka ge e dirwa ke madi a Kriste a tšholotšwego gore e šome, kgwerano e mpsha e ntšhitše batho ba leina la Jehofa e sego feela go ba-Juda eupša gape le ditšhabeng, gomme ya ba dira karolo ya “peu” ya Aborahama. (Ba-Galatia 3:26-29; Ditiro 15:14) “Kxwêranô [ye] ya neng le neng” e dira gore ba-Isiraele ba moya ka moka ba tsošetšwe bophelong bja go se hwe bja legodimong.—Ba-Hebere 13:20.
20. Batlotšwa ba tsenywa kgweranong efe le Kriste?
20 Batlotšwa ba kgonthišegile ka kholofelo ya bona. Ba tsentšwe kgweranong e oketšegilego, kgwerano ya Mmušo. Mabapi le go ba selo setee ga bona le Kriste, Jesu o itše: “Ba ba kxotleletšexo le Nna melekong ya-ka ké bô-lena. Xomme ke Le bea mmušô [“ke dira kgwerano le lena,” NW], byalo ka xe Tate a mpeile mmušô.” (Luka 22:28-30) Kgwerano ye ya magareng ga Kriste le dikgoši-gotee le yena ke yeo e tlago šoma ka mo go sa felego.—Kutollo 22:5.
Sehla sa Segopotšo—Nako Yeo e Šegofaditšwego
21. Re ka holega kudu bjang sehleng sa Segopotšo?
21 Go na le ditšhegofatšo tše dintši sehleng sa Segopotšo. Re ka holega mmalong wa Beibele wo o rulaganyeditšwego bakeng sa nako ye. Le gona ke nako e botse bakeng sa go rapela, go naganišiša ka bophelo bja Jesu bja lefaseng le lehu la gagwe gotee le go tšea karolo modirong wa go bolela ka Mmušo. (Psalme 77:12; Ba-Filipi 4:6, 7) Tiragalo ka boyona e re gopotša ka lerato leo le bontšhitšwego ke Modimo le Kriste mabapi le sehlabelo sa topollo sa Jesu. (Mateo 20:28; Johane 3:16) Tokišetšo ye e re nea kholofelo le khomotšo gomme e swanetše go matlafatša boikemišetšo bja rena bja go phegelela tsela e swanago le ya Kriste. (Ekisodo 34:6; Ba-Hebere 12:3) Le gona, Segopotšo se swanetše go re matlafaletša go phethagatša boineelo bja rena re le bahlanka ba Modimo le go ba balatedi ba botegago ka go se kwanantšhe ba Morwa wa gagwe yo a rategago.
22. Ke mpho efe e kgolo kudu yeo Modimo a e neilego batho, gomme ke tsela efe e nngwe yeo re ka bontšhago go e leboga?
22 A dimpho tše dibotse gakaakang tšeo Jehofa a re neago tšona! (Jakobo 1:17) Re hwetša tlhahlo ka Lentšu la gagwe, thušo ya moya wa gagwe le kholofelo ya bophelo bjo bo sa felego. Mpho e kgolo kudu ya Modimo ke sehlabelo sa Jesu bakeng sa dibe tša batlotšwa le tša ba bangwe ka moka bao ba bontšhago tumelo. (1 Johane 2:1, 2) Ka gona lehu la Jesu le bolela’ng go wena? Na o tla ba gare ga bao ba bontšhago tebogo bakeng sa lona ka go bokana gotee ka morago ga ge letšatši le sobetše ka April 16, 2003, bakeng sa go bina Sejo sa Morena sa Mantšiboa?
[Mengwalo ya ka tlase]
^ ser. 8 E gatišitšwe ke Dihlatse tša Jehofa eupša ga bjale ga e sa gatišwa.
[Dipotšišo tša Thuto]
[Caption on page 18]
Na lenyaga o tla ba gona Sejong sa Morena sa Mantšiboa?
[Caption on page 21]
Sehla sa Segopotšo ke nako e botse bakeng sa go bala Beibele ka mo go oketšegilego le go tšea karolo modirong wa go bolela ka Mmušo
Dikarabo tša Gago ke Dife?
• Ke bomang bao ba swanetšego go ja diswantšhetšo sa Segopotšo?
• Ke ka baka la’ng “dinku tše dingwê” di e-ba gona Sejong sa Morena sa Mantšiboa e le feela babogedi bao ba hlomphago?
• Bakriste ba tloditšwego ba tseba bjang gore ba swanetše go ja senkgwa le go nwa beine Segopotšong sa lehu la Kriste?
• Sehla sa Segopotšo ke nako e botse bakeng sa eng?
[Kerafo/Diswantšho go letlakala 18]
Palo ya Bao ba Bilego Gona Segopotšong
[Caption on page 18]
KA BA DIMILIONE
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002