Diriša ka Bohlale Maemo a Fetogago

Pum, Jan, Dries le Otto e lego bagolo ba bane ba Bakriste bao ba dulago Netherlands, ba na le dilo tše dintši tšeo ba swanago ka tšona. Ka bone bja bona ba nyetše gomme ba na le bana. Go oketša moo, ka moka ga bona ba be ba šoma mešomo ya boiphedišo ya nako e tletšego gomme ba na le magae a manobonobo. Lega go le bjalo, ka moka ga bona ba ile ba kgaotša go šoma mešomo ya boiphedišo gomme ba thoma go neela nako ya bona le matla ka moka bakeng sa go tšwetša pele dikgahlego tša Mmušo. Ba thušitšwe ke eng go dira phetogo ye? Ka bone bja bona ba dirišitše ka bohlale maemo a fetogago.

MAFELELONG maemo a fetogago a re kgoma ka bontši. Diphetogo tše dintši tše bjalo ka go tsena lenyalong, go ba le bana goba go hlokomela batswadi ba ba tšofetšego di tliša boikarabelo bjo bo oketšegilego. Lega go le bjalo, tše dingwe di re lokolla kudu mo re ka kgonago go oketša bodiredi bja rena bja Bokriste. (Mateo 9:​37, 38) Ka mohlala, bana ba rena ba ba godilego ba ka tloga gae goba re ka rola modiro.

Go oketša moo, gaešita le ge e le therešo gore maemo a rena a ka fetoga re rata go ba re sa rate, Bakriste ba bangwe ba ile ba atlega go rulaganyeng diphetogo maemong a bona tšeo di butšego dibaka tša go oketša go tšea ga bona karolo bodireding. Se ke seo se dirilwego ke Pum, Jan, Dries le Otto. Bjang?

Ge Bana ba Tloga Gae

Pum o be a šoma e le mohlokomedi wa dipuku femeng ya ditšweletšwa tša tša kalafo. Yena le mosadi wa gagwe, Anny, ba be ba atiša go hlankela e le badiredi ba babulamadibogo ba go thuša gotee le barwedi ba bona ba babedi. Le gona Pum le Anny ba ile ba rulaganyetša gape le dinako tša go itapološa le ba bangwe bao ba lego bodireding bja bobulamadibogo. Ba anega gore: “Se se ile sa re šireletša mathateng ao mehuta e mengwe ya bogwera e ka bego e re baketše ona.” Ka baka la go tutuetšwa ke mohlala wa batswadi ba bona, barwedi ka bobedi ba ile ba tsenela bobulamadibogo bja nako e tletšego ka morago ga go fetša sekolo se se phagamego.

Ka morago ga gore bana ba bona ba tloge gae, Pum le Anny ba ile ba lemoga gore go fetoga mo ga maemo go ba nea tokologo e oketšegilego le ditšhelete tšeo ba ka di dirišetšago go etela mafelo a kgahlišago goba go thabela mehuta e mengwe ya boitapološo. Lega go le bjalo, banyalani ba ile ba phetha ka go diriša maemo a bona ao a fetogilego bakeng sa go oketša bodiredi bja bona bja Bokriste. Ka gona Pum o ile a kgopela mothwadi wa gagwe tumelelo ya gore a fokotše letšatši le tee go matšatši a gagwe a mošomo bekeng e nngwe le e nngwe. Ka morago ga moo, Pum o ile a dira dithulaganyo tšeo di bego di tla mo thuša gore a thome go šoma ka 7:​00 a.m. go ya go 2:⁠00 p.m. Ke therešo gore go šoma nako e nyenyane go be go bolela go phela ka mogolo wa tlase. Go dutše go le bjalo, ba ile ba atlega, gomme ka 1991 Pum o ile a tlatša mosadi wa gagwe e le mmulamadibogo wa ka mehla.

Se se latelago, Pum o ile a kgopelwa gore e be mothuši wa mohlokomedi wa Holo ya Kopano ya Dihlatse tša Jehofa. Taletšo yeo e ile ya bolela  gore banyalani ba be ba swanetše go tlogela legae leo ba phetšego ka go lona nywaga e 30 gomme ba hudugele ngwakong wa bodulo wa Holo ya Kopano. Ba ile ba hudugela moo. Na go be go le thata? Anny o bolela gore neng le neng ge a be a ikwa a gopotše gae, o be a ipotšiša gore ‘Na ke mosadi wa Lota?’ O ile a gana go ‘boela morago.’​—Genesi 19:​26; Luka 17:⁠32.

Pum le Anny ba dumela gore phetho ya bona e ba tlišeditše ditšhegofatšo tše dintši. Gare ga dilo tše dingwe tše dintši, ba thabela tirelo ya bona Holong ya Kopano, ba lokišeletša dikopano tša selete gomme ba kopana le balebeledi ba tikologo (bahlankedi ba basepedi) bao ba neago dipolelo holong. Ba etela diphuthego tše di fapa-fapanego gatee ka morago ga nako e telele ge Pum a hlankela e le moemedi wa molebeledi wa tikologo.

Ke’ng se se dirilego gore banyalani ba ba kgone go oketša tirelo ya bona? Pum o re: “Ge bophelo bja gago bo fetoga, o swanetše go ikemišetša go diriša maemo a gago a mafsa ka tsela e kaone-kaone kamoo o ka kgonago ka gona.”

Go Thoma Bophelo bjo Bonolo

Jan le mosadi wa gagwe, Woth, ba na le bana ba bararo. Go swana le Pum le lapa la gagwe, Jan o dirišitše go fetoga ga maemo a gagwe ka bohlale. Jan o ile a šoma mošomo wo o lefago gabotse ka nywaga e mentši pankeng, gomme o be o dira gore lapa la gagwe le phele bophelo bja manobonobo. Lega go le bjalo, o ile a kwa a na le kganyogo e matla ya go oketša bodiredi bja gagwe. O hlalosa gore: “Bophelong bja-ka, tebogo ya-ka ya go leboga therešo e ile ya gola ka mo go tseneletšego gomme lerato la-ka la go rata Jehofa le ile la gola.” Ka gona ka 1986, Jan o ile a fetoša maemo a gagwe. O re: “Ke ile ka diriša sebaka seo ke ilego ka se hwetša sa go rulaganya ofisi lefsa le go thoma go šoma diiri tše sego kae. Bašomi-gotee le nna bao ba bego ba maketše ba ile ba nnea leina la dikwero la Diwodo ka gobane ke be ke šoma feela ka dinsdag [Labobedi], woensdag [Laboraro] le donderdag [Labone]. Mogolo wa-ka o ile wa fokotšega ka 40 lekgolong. Ke ile ka rekiša ntlo ya rena gomme ka reka seketswana e le gore re ka hlankela moo go nyakegago thušo e kgolo ya bagoeledi ba Mmušo. Ka moragonyana, ke ile ka diriša ka mo go holago sebaka sa go rola modiro e sa le ka pela; mogolo wa-ka o ile wa fokotšega gape ka 20 lekgolong, eupša ka 1993 ke ile ka kgona go thoma go hlankela ke le mmulamadibogo wa ka mehla.”

Lehono, Jan ke setho sa Komiti ya go Hloma Kwano le Dipetlele gomme ka mehla o ile a hlankela e le molebeledi wa kopano. Go sa šetšwe go  fokola ga gagwe ka tša maphelo, Woth o hlankela e le mmulamadibogo wa go thuša kgafetša-kgafetša. Ga bjale bana ka moka ba bararo ba lenyalong, gomme bona gotee le balekane ba bona ke badiredi ba fišegago ba Mmušo.

Jan le Woth ba kgonne bjang go tlwaelana le bophelo bja maemo a tlase? Jan o araba ka gore: “Nakong ya ge re be re sa na le tšhelete, re ile ra kgonthišetša gore re se rate dilo tše di bonagalago ka mo go fetišago. Matšatšing a lehono go ka ba thata go swanelwa ke go leta nakwana pele o ka kgona go hwetša selo se se itšego, eupša ditšhegofatšo tša moya le ditokelo tšeo re di hweditšego di re homotša kudu.”

Go swana le Jan le Woth, Dries le mosadi wa gagwe e lego Jenny, le bona ba tšere phetho ya go boloka maphelo a bona a le bonolo e le gore ba ka neela nako e oketšegilego dikgahlegong tša Mmušo. Dries le Jenny ba hlanketše e le babulamadibogo go fihlela ba e-⁠ba le ngwana. Ka gona, e le gore a ka hlokomela lapa la gagwe, Dries o ile a šoma e le molaodi femeng e kgolo. Bathwadi ba gagwe ba be ba thabela mošomo wa gagwe kudu gomme ba ile ba nyaka go mo hlatloša. Lega go le bjalo, Dries o ile a gana tlhatlošo ka gobane go e amogela go be go tla dira gore a se be le nako e oketšegilego ya go dira mediro ya Bokriste.

Go godiša bana​—gotee le go hlokomela mmago Jenny yo a babjago​—go ile gwa nyaka nako le matla a oketšegilego a banyalani ba. Go sa le bjalo, ba ile ba tšwela pele ba hlagolela moya wa bobulamadibogo. Ke’ng se se ba thušitšego go dira bjalo? Jenny o hlalosa gore: “Re be re dula le babulamadibogo, re laletša babulamadibogo go tla go ja le rena gomme re amogela balebeledi ba tikologo.” Dries o oketša ka gore: “Re ile ra dira gore maphelo a rena a be bonolo gomme ra phema go ipakela dikoloto. Re ile ra dira phetho ya gore le ka mohla re se ke ra ba le ditirišano tše kgolo tša kgwebo goba go reka ntlo e le gore nakong e tlago re se ke ra swarelelwa ke dilo tše bjalo.”

Phetho ya Dries le Jenny ya go dira maemo ao a tlago go ba dumelela gore ba be le nako e oketšegilego bakeng sa dikgahlego tša Mmušo e ile ya ba le mafelelo a mabotse. Barwa ba bona ka bobedi ba hlankela e le bagolo, gomme yo mongwe wa bona o bula madibogo gotee le mosadi wa gagwe. Dries le Jenny ba ile ba hlankela e le babulamadibogo ba kgethegilego gomme ka morago Jenny o ile a šoma le Dries modirong wa tikologo. Ga bjale ke baithapi Bethele, moo Dries a hlankelago e le setho sa Komiti ya Lekala.

Go Rola Modiro e sa le ka Pela

Go swana le Dries le Jenny, Otto le mosadi wa gagwe Judy, ba ile ba tšea bobulamadibogo pele ba ka ba le barwedi ba bona ba babedi. Ge Judy a be a imile ngwana wa bona wa leitšibolo, Otto o ile a hwetša mošomo wa borutiši.

Ge bana ba dutše ba gola, Otto le Judy ba be ba atiša go laletša babulamadibogo ka legaeng la bona e le gore barwedi ba bona ba ka bona lethabo la badiredi ba nako e tletšego ba Bakriste. Ge nako e dutše e tšwela pele, morwedi wa bona yo  mogolo o ile a tsenela tirelo ya bobulamadibogo. Ka moragonyana, o ile a tsena Sekolo sa Gilead gotee le monna wa gagwe gomme ga bjale o hlankela e le moromiwa nageng ya Afrika. Morwedi wa bona yo monyenyane o thomile go ba mmulamadibogo ka 1987 gomme Judy le yena o ile a mo tlatša.

Ge maemo a fetogago a be a nea Otto sebaka sa go šoma diiri tše di sego kae sekolong, o ile a diriša nako e šetšego bakeng sa go tšea bobulamadibogo. Mafelelong, o ile a rola modiro wa gagwe ka mo go feletšego. Lehono, Otto o diriša bokgoni bja gagwe bja borutiši modirong wa gagwe wa bosepedi bakeng sa go matlafatša diphuthego moyeng.

Keletšo ya Otto ke efe go bao ba rolago modiro wa bona wa boiphedišo e sa le ka pela? “Ge o rola modiro, o se ke wa nyaka go iketla ka lebaka la ngwaga go ba go feta moo. Ga go thata go tlwaela ‘go iketla.’ Go se go ye kae, o tla lebala ka go ba mmulamadibogo. Go e-⁠na le moo, thoma di sa tloga fase mediro ya gago ya bodiredi.”

Go Diriša Phihlelo ya Gago

Ka ntle le pelaelo, bana babo rena ba go swana le Pum, Jan, Dries le Otto gona bjale ga ba sa na matla le bokgoni tšeo ba bego ba na le tšona bofseng. Eupša ba godile moyeng, ba na le phihlelo gotee le bohlale. (Diema 20:​29) Ba tseba gabotse gore go bolela’ng go ba botate gomme ka go šoma le basadi ba bona, ba a kwešiša gore go ba mma go bolela’ng. Bona gotee le basadi ba bona, ba ile ba rarolla mathata a lapa gomme ba beela bana ba bona dipakane tša moya. Otto o re: “Ge ke nea keletšo bjalo ka molebeledi wa tikologo ditabeng tša lapa, go a thuša gore nna ka noši ke ile ka godiša bana.” Ka mo go swanago, phihlelo ya Dries ya go ba tate ga bjale e mo dira setho seo se nago le mohola Lapeng la Bethele leo le tletšego ka bafsa ba bantši.

Ee, tsebo ya motho ka noši e thuša bana babo rena ba bjalo go hlokomela dinyakwa tša go fapa-fapana ka phuthegong. Ka tsela ya seswantšhetšo re ka re phihlelo ya bona e louditše ditlabakelo tšeo ba di dirišago bakeng sa gore di ka diriša matla a tšona ka mo go holago kudu. (Mmoledi 10:​10) Ge e le gabotse, ka nako e itšego, gantši ba ka fihlelela mo go oketšegilego go feta bao ba lego matla nameng eupša ba hlaela phihlelo.

Bana babo rena ba bjalo gotee le basadi ba bona, ke mehlala e mebotse go bafsa bao ba lego gare ga batho ba Jehofa. Bafsa ba lemoga gore banyalani ba bjalo ka ba ba ile ba lebeletšana le ditlhohlo tše dintši le ditšhegofatšo tšeo di begilwego ka dikgatišong tša rena tša Bokriste. Ke mo go kgothatšago go bona banna le basadi bao ba bontšhago moya o bjalo ka wa Kalebe yoo gaešita le ge a be a godile, a ilego a kgopela kabelo e hlohlago.​—Jošua 14:​10-⁠12.

Ekiša Tumelo ya Bona

Na mohlomongwe o ka ekiša tumelo le ditiro tša banyalani bao go boletšwego ka bona mo sehlogong se? Gopola gore ba ile ba dira therešo tsela ya bona ya bophelo. Ba ile ba bjala kganyogo ya go tšea bobulamadibogo baneng ba bona. Bjalo ka ge Jan a bolela, ba dirile bjalo “ka go bea mohlala go rateng Jehofa le mokgatlo wa gagwe, ka go dira ditokišetšo tša bogwera bjo bobotse le ka go ruta bana ba bona gore ba kgone go itlhokomela ka tša ditšhelete.” Le gona ba be ba šoma le go bapala gotee e le lapa. Pum o gopola gore: “Nakong ya maikhutšo, gantši lapa ka moka le be le e-⁠ya modirong wa boboledi mesong gomme mantšibua le thabela nako ya boitapološo le le gotee.”

Go oketša moo, Bakriste ba ba ile ba rulaganyetša pele, e le gore ge maemo a bona a fetoga, ba be ba ikemišeditše go diriša boemo bjo bofsa ka mo go holago. Ba ile ba bea dipakane gomme ba dira diphetho tšeo di ilego tša ba thuša go fihlelela dipakane tša bona kapejana. Ba ile ba nyaka ditsela tšeo ka tšona ba ka šomago mošomo wa boiphedišo ka nako e nyenyane gomme ba be ba ikemišeditše go phela ka mogolo wa tlase. (Ba-Filipi 1:​10) Basadi ba ile ba nea banna ba bona thekgo ya kgonthe. Ba le gotee, ba be ba na le kganyogo e tseneletšego ya go tsena ka ‘mojako o mogolo o išago modirong,’ gomme e le mafelelo a seo, ba thabela ditšhegofatšo tše humilego go tšwa go Jehofa.​—1 Ba-Korinthe 16:⁠9, bapiša le NW; Diema 10:⁠22.

Na le wena ka mo go swanago o na le kganyogo ya go katološa go tšea ga gago karolo bodireding? Ge e ba go le bjalo, go diriša ka bohlale maemo a fetogago go ka itlhatsela e le senotlelo sa go dira bjalo.

[Caption on page 20]

Pum le Anny ba hlokometše Holo ya Kopano

[Caption on page 20]

Jan le Worth ba tšea karolo modirong wa boboledi

[Caption on page 21]

Dries le Jenny ba hlankela Bethele

[Caption on page 21]

Otto le Judy ba lokišeletša go etela phuthego e latelago