“E-bang Le Sebete Gomme Le Tie Matla!”

“Betang dipelo, xobane lefase le fentšwe ke Nna.”​—Johane 16:⁠33.

1. Ka baka la manaba a matla ao a bego a letetše ba-Isiraele kua Kanana, ke kgothatšo efe yeo ba ilego ba e hwetša?

GE ba-Isiraele ba be ba le kgaufsi le go tshela noka ya Jorodane ba e-⁠ya Nageng ya Kholofetšo, Moše o ile a ba botša gore: “Tiišang, [“e-⁠bang sebete”, NW] Le dirê senna; Le se boifê, Le se ba thšoxê, xobane e a sepelaxo le lena ké Yêna Morêna Modimo wa lena.” Ka morago ga moo, Moše o ile a bitša Jošua yoo a bego a tla eta pele ba-Isiraele go tsena Kanana, gomme a mo eletša ka noši gore a be le sebete. (Doiteronomio 31:​6, 7) Ka morago ga moo, Jehofa ka noši o ile a kgothatša Jošua ka gore: “Tiiša matla O dirê senna . . . fela, tiiša matla O dirê senna.” (Jošua 1:​6, 7, 9) Mantšu ao a be a le nakong. Ba-Isiraele ba be ba tla swanelwa ke go ba le sebete bakeng sa go lebeletšana le manaba a matla ao a bego a ba letetše ka mošola wa noka ya Jorodane.

2. Re ikhwetša re le boemong bofe lehono, le gona re swanetše go ba le eng?

² Lehono, Bakriste ba therešo ba kgaufsi le go tsena lefaseng le lefsa le le holofeditšwego, gomme ka go swana le Jošua, ba swanetše go kgothatšwa. (2 Petro 3:​13; Kutollo 7:​14) Lega go le bjalo, boemo bja rena bo fapane le bja Jošua. Jošua o be a e-⁠lwa ka ditšhoša le marumo. Re lwa ntwa ya moya gomme ga re diriše dibetša tša kgonthe. (Jesaya 2:​2-⁠4; Ba-Efeso 6:​11-17) Go feta moo, Jošua o ile a swanela ke go lwa dintwa tše ntši tše šoro gaešita le ka morago ga go tsena Nageng ya Kholofetšo. Eupša gona bjale re lebeletšane le dintwa tše šoro kudu​—pele re ka tshelela lefaseng le lefsa. Anke re ahla-ahleng maemo a mangwe ao a nyakago gore re be le sebete.

Ke ka Baka La’ng re Swanetše go Katana?

3. Beibele e utolla’ng ka moganetši wa rena yo mogolo?

³ Moapostola Johane o ngwadile gore: “’Na re tseba xore re tšwa Modimong; ’me lefase ka moka le rapaletše bobeng.” (1 Johane 5:​19) Mantšu ao a bontšha lebaka la motheo leo ka lona Bakriste ba swanetšego go katanela go kgomarela potego ya bona. Ge Mokriste a kgomarela potego ya gagwe, o fenya Sathane Diabolo go fihla bokgoleng bjo itšego. Ke ka baka leo Sathane a itshwerego bo-ka “tau e bôpaxo” a leka go tšhoša le go metša Bakriste ba botegago. (1 Petro 5:⁠8) Ka kgonthe, o lwa le Bakriste ba ba tloditšwego le bagwera ba bona. (Kutollo 12:​17) Mo ntweng ye, o diriša batho bao ka go tseba goba ka go se tsebe ba phethagatšago merero ya gagwe. Go nyakega sebete bakeng sa go ganetša ka go tia Sathane le bahlanka ba gagwe.

4. Jesu o ile a nea keletšo efe, eupša Bakriste ba therešo ba bontšhitše seka sefe?

⁴ Ka ge Jesu a be a tseba gore Sathane le bahlankedi ba gagwe ba be ba tla ganetša ditaba tše dibotse o šoro, O ile a lemoša balatedi ba gagwe gore: “Ba tlo Le xafêla tlaišong; ba tlo Le bolaya; Le tlo ba ba xo hloiwa ke dithšaba tšohle ka ’baka la Leina la-ka.” (Mateo 24:⁠9) Mantšu ao a ile a itlhatsela e le a therešo lekgolong la pele  la nywaga gomme le lehono e sa le a therešo. Ka kgonthe, tlaišo yeo ba bangwe ba Dihlatse tša Jehofa tša mehleng yeno ba ilego ba e kgotlelela e bile e šoro bjalo ka yeo e ilego ya ba gona historing ka moka. Go sa dutše go le bjalo, Bakriste ba therešo ba ba le sebete ge ba lebeletšana le kgateletšo e bjalo. Ba a tseba gore “xo boifa batho xo wetša moreong.”​—Diema 29:⁠25.

5, 6. (a) Ke maemo afe ao a nyakago gore re be le sebete? (b) Bakriste ba botegago ba itshwara bjang ge go ba ga bona le sebete go lekwa?

⁵ Go na le mathata a mangwe ntle le go tlaišwa a nyakago gore re be le sebete. Go ba bangwe, go bolela le batho bao ba sa ba tsebego ka ditaba tše dibotse ke bothata. Go ba le sebete ga bana ba bangwe kua sekolong go bewa tekong ge ba bitšwa gore ba opele koša ya setšhaba goba ba holofetše boineelo go naga goba go folaga. Ka ge go opela mo go bjalo ge e le gabotse e le tsela ya bodumedi, bana ba Bakriste ba ile ba rapa sebete go e na le go dira ka tsela yeo e tlago go nyamiša Modimo, ka gona pego ya bona e botse e bile e kgahlišago kudu.

⁶ Re swanetše go ba le sebete ge baganetši ba hlohleletša mekero ya ditaba go phatlalatša maaka ka bahlanka ba Modimo goba ge ba leka go thibela borapedi bja therešo ka go loga maano a go ‘dira bosenyi molao.’ (Psalme 94:​20) Ka mohlala, re swanetše go ikwa bjang ge e ba dipego tša kuranta, radio goba tša thelebišene tša mabapi le Dihlatse tša Jehofa e le tše kgopamego goba e le maaka a matala? Na re swanetše go makala? Aowa. Re letetše dilo tše bjalo. (Psalme 109:⁠2) Le gona ga re makatšwe ke ge ba bangwe ba dumela dipego tše di gatišitšwego tša maaka le ditaba tše di kgopamego, ka ge “lešilo le dumêla ’taba tšohle.” (Diema 14:​15) Go sa le bjalo, Bakriste ba botegago ka go se kwanantšhe ba gana go dumela taba e nngwe le e nngwe yeo e bolelwago ka bana babo bona, gomme ga ba dumelele dipego tša maaka go ba dira gore ba foše diboka tša Bokriste, ba nyefiše tirelong ya tšhemo goba go fokola tumelong ya bona. Go fapana le seo, ba ‘iponagatša e le bahlanka ba Modimo ka go retwa le ka go gobošwa, ka go tumišwa le ka go sebja, ba etša bafori mola ba rereša.’​—2 Ba-Korinthe 6:​4, 8.

7. Ke dipotšišo dife tšeo di fatago maikwelo tšeo re ka ipotšišago tšona?

⁷ Ge Paulo a be a ngwalela Timotheo o ile a re: “Modimo xa a ka a re nea Môya wa boi; ó re file Môya wa matla . . . Ké xôna, O se bê le masêmê xe O hlatsêla Mong wa rena.” (2 Timotheo 1:​7, 8; Mareka 8:​38) Ka go bala mantšu ao, re ka ipotšiša gore: ‘Na tumelo ya-ka e nteša dihlong, goba na ke na le sebete? Ge ke le mošomong (goba sekolong), na ke tsebiša ba ke nago le bona gore ke Hlatse ya Jehofa, goba na ke leka go khuta seo ke lego sona? Na ke lewa ke dihlong tša go ba yo a fapanego le ba bangwe, goba na ke ikgantšha ka go ba yo a fapanego ka baka la tswalano ya-ka le Jehofa?’ Ge e ba motho le ge e le ofe a boifa go ruta ka ditaba tše dibotse goba go hloiwa, a a gopole keletšo yeo Jehofa a e neilego Jošua e rego: “E-ba sebete gomme o tie matla.” O se lebale le ka mohla gore maikwelo a bašomi-gotee goba a bao re tsenago sekolo le bona ga se a bohlokwa, eupša sa bohlokwa ke pono ya Jehofa le Jesu Kriste.​—Ba-Galatia 1:⁠10.

 Kamoo re ka Hlagolelago go ba le Sebete ka Gona

8, 9. (a) Go ba le sebete ga Bakriste ba pele go ile gwa lekwa bjang tiragalong e nngwe? (b) Petro le Johane ba ile ba arabela bjang ka morago ga gore ba kgalemelwe, gomme bona le bana babo bona ba bile le phihlelo efe?

⁸ Ke bjang re ka hlagolelago go ba le sebete mo go tlago go re thuša go kgomarela potego ya rena dinakong tše tše thata? Go ba gona, Bakriste ba pele ba ile ba hlagolela bjang go ba le sebete? Ela hloko se se diragetšego ge baperisita ba bagolo le banna ba bagolo ba kua Jerusalema ba be ba botša Petro le Johane gore ba kgaotše go ruta ka leina la Jesu. Barutiwa ba ile ba gana go kgaotša gomme ba ile ba kgalengwa ke moka ba lokollwa. Ka morago ga fao, ba ile ba sepela gape le bana babo bona gomme ka moka ga bona ba ile ba rapela gotee ba re: “Morêna, bôna kxalemô tša bôná; ’me bahlanka ba xaxo O ba fê mafolofolo ruri, ba bolêlê ’ntšu la xaxo.” (Ditiro 4:​13-29) Jehofa o ile a arabela ka go ba matlafatša ka moya o mokgethwa, gomme ka morago ga fao baetapele ba ba-Juda ba ile ba bolela gore ba “tladitše motse wa Jerusalêma” ka thuto ya bona.​—Ditiro 5:⁠28.

⁹ Anke re hlahlobeng gore go ile gwa direga’ng tiragalong yeo. Ge barutiwa ba be ba tšhošetšwa ke baetapele ba ba-Juda, ga se ba ka ba ineela kgateletšong yeo. Go e na le moo, barutiwa ba ile ba rapelela sebete sa gore ba tšwele pele ka boboledi. Ka gona ba ile ba dira ka go dumelelana le thapelo ya bona gomme Jehofa o ile a ba matlafatša ka moya wa gagwe. Phihlelo ya bona e bontšha gore seo Paulo a se ngwadilego ka morago nywaga e sego kae ka tlase ga maemo a fapanego, se šoma go Bakriste ge ba tlaišwa. Paulo o itše: “Ke kxôna tšohle ka Eo a mphaxo matla.”​—Ba-Filipi 4:⁠13.

10. Phihlelo ya Jeremia e thuša bjang bao ba nago le dihlong ka tlhago?

¹⁰ Lega go le bjalo, a re tšee gore mohlomongwe motho o na le dihlong ka tlhago. Lega go le bjalo, na a ka kgona go hlankela Jehofa ka sebete ge a lebeletšana le kganetšo? Ruri a ka kgona! Gopola tsela yeo Jeremia a ilego a arabela ka yona ge Jehofa a be a mo kgethela go ba moporofeta. Lesogana le ile la re: “Kè sa le ngwana!” Go molaleng gore o be a ikwa a sa swanelege. Lega go le bjalo, Jehofa o ile a mo kgothatša ka mantšu a: “O se re: Ke sa le ngwana, xobane O tlo ya xohle mo ke Xo romaxo; ’me tšohle tše ke tl’o xo Xo laêla, O tlo di bolêla. Se boifê batho; Nna ke tlo ba le wêna, ka Xo hlakodiša!” (Jeremia 1:​6-10) Jeremia o be a bota Jehofa, gomme ka lebaka la matla a Jehofa o ile a kgona go fenya go dika-dika ga gagwe gomme a ba hlatse yeo e nago le sebete kudu kua Isiraele.

11. Bakriste lehono ba thušwa ke’ng go ba le sebete bjalo ka Jeremia?

¹¹ Lehono Bakriste ba tloditšwego ba na le  thomo e swanago le ya Jeremia, gomme ka thekgo ya “lešaba le lexolo” la “dinku tše dingwê,” ba tšwela pele go tsebatša merero ya Jehofa gaešita le ge ba lebeletšane le go ganetšwa, go kwerwa le go tlaišwa. (Kutollo 7:⁠9; Johane 10:​16) Ba kgothatšwa ke mantšu a Jehofa go Jeremia a rego: “Se boifê.” Le ka mohla ga ba lebale gore ba romilwe ke Modimo gomme ba bolela molaetša wa gagwe.​—2 Ba-Korinthe 2:⁠17.

Mehlala ya go ba le Sebete Yeo re Swanetšego go e Ekiša

12. Jesu o ile a nea mohlala ofe o mobotse wa go ba le sebete, gomme o ile a kgothatša barutiwa ba gagwe bjang?

¹² Re ka thušwa maitekong a rena a go hlagolela go ba le sebete ge e ba re naganišiša ka mehlala ya ba bangwe bao ka go swana le Jeremia ba ilego ba ba le sebete. (Psalme 77:​12) Ka mohlala, ge re dutše re hlahloba bodiredi bja Jesu, re kgahlišwa ke go ba ga gagwe le sebete ge a be a lekwa ke Sathane le ge a be a lebeletšana le kganetšo ya baetapele ba ba-Juda. (Luka 4:​1-13; 20:​19-47) Ka matla a Jehofa, Jesu o ile a dula a tsepame, gomme nakwana pele ga lehu la gagwe, o ile a botša barutiwa ba gagwe gore: “Mono lefaseng Le tlo ba tlalelong. Fêla, betang dipelo, xobane lefase le fentšwe ke Nna.” (Johane 16:​33; 17:​16) Ge e ba barutiwa ba Jesu ba ka ba ba ile ba latela mohlala wa gagwe, le bona ka mo go swanago e be e tla ba bafenyi. (1 Johane 2:⁠6; Kutollo 2:​7, 11, 17, 26) Eupša ba be ba tla swanelwa ke gore ba ‘bete dipelo.’

13. Ke kgothatšo efe yeo Paulo a e neilego ba-Filipi?

¹³ Nywaga e sego kae ka morago ga lehu la Jesu, Paulo le Silase ba ile ba lahlelwa kgolegong kua Filipi. Ka morago ga fao, Paulo o ile a kgothatša phuthego ya Filipi go tšwela pele e ‘eme e le ya moya o tee, ya pelo-tee, e tšea kgopu le go hlabanela tumelo ya Ebangedi, e se na mo e kago tšhoga baganetši ba yona.’ Go ba matlafatša tabeng ye, Paulo o ile a re: “Bao xo xanetša xa bôná [go tlaišwa ga Bakriste] e lexo bohlatse bya xore [batlaiši] ba a lahlêxa, xo lena ya ba bohlatse bya phološô, dì e-⁠tšwa xo Modimo. Xobane ka ’baka la Kriste Le tlo ba Le séditšwe ka kxauxêlô, è se ya xo mo dumêla fêla, è le kxauxêlô ya xo tlaišwa ka ’baka la xaxwe.”​—Ba-Filipi 1:​27-⁠29.

14. Mafelelo e bile afe kua Roma ka baka la go ba le sebete ga Paulo?

¹⁴ Ge Paulo a be a ngwalela phuthego ya Filipi, o be a le kgolegong gape, mo nakong ye o be a golegilwe kua Roma. Lega go le bjalo, o ile a tšwela pele go bolela le ba bangwe ka sebete. Mafelelo e bile afe? O ile a ngwala gore: “Mo ngwakong ka moka wa kahlolô, le xo ba bangwê, xwa bá xwa bônala xe ditlêmô tša-ka è le tša xa Kriste. Ba bantši ba bana ba bô-rena Moreneng ba tšea kholofêlô ka ditlêmô tša-ka, ba napa ba tlêma pelo ba tiišetša xo bolêla Lentšu ba sa boife.”​—Ba-Filipi 1:​13, 14.

15. Re ka hwetša kae mehlala e mebotse ya tumelo yeo e tlago go matlafatša maikemišetšo a rena a go ba le sebete?

¹⁵ Mohlala wa Paulo o a re kgothatša. Re kgothatšwa gape le ke mehlala e mebotse ya Bakriste ba mehleng yeno bao ba ilego ba kgotlelela tlaišo dinageng tše di bušwago ke mebušo ya puša-noši goba baruti. Diphihlelo tše dintši tša bona di begilwe ka dimakasineng tša Morokami le Phafoga! le ka go di-Yearbook of Jehovah’s Witnesses. Ge o dutše o bala diphihlelo tšeo, gopola gore batho bao diphihlelo tša bona di anegwago e be e le batho ba go swana le rena; eupša ge ba be ba lebeletšane le maemo a thata kudu, Jehofa o ile a ba nea matla a fetišago  a tlwaelegilego gomme ba ile ba kgotlelela. Re ka kgonthišega gore le rena o tla re matlafatša ka mo go swanago ge e ba go nyakega.

Go ba ga Rena le Sebete go Kgahliša Jehofa le go mo Tumiša

16, 17. Ke bjang rena lehono re ka hlagolelago boemo bja kgopolo bja go ba le sebete?

¹⁶ Ge e ba motho a emela therešo le go loka ka go tia, motho yoo o na le sebete. Ge e ba motho a dira bjalo gaešita le ge a boifa, motho yoo o na le sebete kudu. Ka kgonthe, Mokriste le ge e le ofe a ka ba le sebete ge e ba a tloga a nyaka go dira thato ya Jehofa, ge e ba a ikemišeditše go dula a botega, ge e ba a ithekga ka Modimo ka mehla le ge e ba a dula a gopola gore Jehofa o ile a matlafatša batho ba bantši ba swanago le yena nakong e fetilego. Go feta fao, ge re lemoga gore go ba ga rena le sebete go kgahliša Jehofa le go mo tumiša, re ikemišetša ka matla gore re se ke ra fokola. Re ikemišeditše go kgotlelela go kwerwa goba go feta fao ka gobane re mo rata ka mo go tseneletšego.​—1 Johane 2:⁠5; 4:⁠18.

¹⁷ Le ka mohla o se ke wa lebala gore ge re tlaišetšwa tumelo ya rena, ga go bolele gore re dirile sebe. (1 Petro 3:​17) Re tlaišetšwa go hlompha bogoši bja Jehofa, go dira se se botse le go se be karolo ya lefase. Ka baka leo, moapostola Paulo o itše: “Xe Le kxôtlêlêla dithlokofatšô Lè le ba xo dira botse, xôna e ba mahlatse pele xa Modimo.” Le gona Petro o itše: “Ba ba hlokofatšwaxo xe xo iwa ka thatô ya Modimo, a ba xafêlê meôya ya bôná Yêna Mmopi Mmotexi, bà fêla ba dira xa-botse.” (1 Petro 2:​20; 4:​19) Ee, tumelo ya rena e kgahliša Modimo wa rena yo lerato Jehofa, gomme e mo tlišetša tumišo. A lebaka le matla gakaakang la go ba le sebete!

Go Bolela le Babuši

18, 19. Ge re e-⁠ba le sebete ka pele ga moahlodi, ge e le gabotse re fetišetša molaetša ofe?

¹⁸ Ge Jesu a be a botša balatedi ba gagwe gore ba tla tlaišwa, o ile a ba botša gape le gore: “[Batho] ba tlo Le sekiša dikxorong, ’me ba tlo Le ôtla mo diphuthexong tša bôná. Ba tlo Le bexa xo babuši le dikxoši ka ’baka la-ka, ya tlo ba bohlatse xo bôná le xo ba dithšaba.” (Mateo 10:​17, 18) Go tšwelela ka pele ga moahlodi goba mmuši ka baka la ditatofatšo tša maaka go tloga go nyaka sebete. Lega go le bjalo, ge e ba ka sebete re diriša dibaka tše bjalo bakeng sa go nea bohlatse go batho bao, re fetoša boemo bjo thata go bo diriša ka mo go holago bakeng sa go phethagatša selo se itšego sa bohlokwa. Ge e le gabotse, re fetišetša mantšu a Jehofa a begilwego go Psalme ya bo-⁠2 go bao ba re ahlolago: “Byalo-xê, lena Maxoši, hlalefang! Ba-buša-mafase, êlêtšang. Le hlankêle Morêna Le boifa.” (Psalme 2:​10, 11) Gantši ge Dihlatse tša Jehofa di ile tša latofatšwa ka maaka kgorong ya tsheko, baahlodi ba ile ba ba ba nea tokologo ya borapedi, gomme re leboga seo. Lega go le bjalo, baahlodi ba bangwe ba ile ba dumelela gore ba hlohleletšwe ke baganetši. Go ba bjalo, Mangwalo a re: “Hlalefang!”

¹⁹ Baahlodi ba swanetše go lemoga gore molao  o phagamego kudu ke wa Jehofa Modimo. Ba swanetše go gopola gore batho ka moka, go akaretša le baahlodi, ba ikarabela go Jehofa Modimo le go Jesu Kriste. (Ba-Roma 14:​10) Ge e le rena, go sa šetšwe gore baahlodi ba batho ba re ahlola ka toka goba go se bjalo, re na le mabaka ka moka a go ba le sebete ka gobane Jehofa o a re thekga. Beibele e re: “Ba lehlôxônôlô ké ba ba mmotilexo.”​—Psalme 2:⁠12.

20. Ke ka baka la’ng re swanetše go thaba ge e ba re swanelwa ke go kgotlela tlaišo le boradia?

²⁰ Thutong ya Thabeng Jesu o itše: “Ba lehlôxônôlô ké bô-lena, xe ba Le roxa, ba Le tlaiša, ba Le phara ka bobe ka moka ka maaká ka ’baka la-ka. Thabang Le hlalalê, xobane moputsô wa lena ké o moxolo maxodimong. Hleng le baporofeta ba Le etilexo pele, ba ba tlaišitše ka mokxwa woo.” (Mateo 5:​11, 12) Go ba gona, tlaišo ga se selo se kgahlišago, eupša go ema ga rena ka go tia go sa šetšwe tlaišo, go akaretša le dipego tša boradia ka mekero ya ditaba, go swanetše go re nea lebaka la go thaba. Go bolela gore re kgahliša Jehofa gomme re tla hwetša moputso. Go ba ga rena le sebete go bontšha gore re na le tumelo ya kgonthe gomme go re kgonthišetša gore re amogelwa ke Modimo. Ka kgonthe, go bontšha gore re bota Jehofa ka mo go feletšego. Go bota mo go bjalo go bohlokwa go Mokriste, bjalo ka ge sehlogo se se latelago se tla bontšha.

[Dipotšišo tša Thuto]

[Caption on page 9]

Simone Arnold (yoo ga bjale e lego wa ga Liebster) kua Jeremane, Widdas Madona kua Malawi le Lydia le Oleksii Kurdas kua Ukraine ba ile ba bontšha go ba le sebete gomme ba ganetša yo mobe

[Caption on page 10]

Ga re lešwe dihlong ke ditaba tše dibotse

[Caption on page 11]

Go ba le sebete ga Paulo ge a be a le kgolegong go ile gwa fihlelela mo gontši ditabeng tše dibotse

[Caption on page 12]

Ge e ba re hlalosetša moahlodi boemo bja rena bja Mangwalo ka sebete, re tsebatša molaetša wa bohlokwa

O Ithutile’ng?

• Ke maemo afe ao lehono a nyakago gore re be le sebete?

• Re ka hlagolela bjang seka sa go ba le sebete?

• Ke bomang ba bangwe bao e lego mehlala e mebotse ya go ba le sebete?

• Ke ka baka la’ng re kganyoga go ba le sebete?