“Ke Hweditše Sohle Seo ke Bego ke se Nyaka”

GO YA ka pego e tšwago go Mokgatlo wa Lefase wa tša Maphelo, go šišinywa gore ga bjale kgateletšego e kgomile batho ba ka godimo ga ba dimilione tše 120 lefaseng ka bophara. Ngwaga o mongwe le o mongwe, batho ba milione ba a ipolaya gomme ba magareng ga dimilione tše 10 le tše 20 ba leka go ipolaya. Go na le thušo efe bakeng sa bao ba tlaišwago ke kgateletšego? Kalafo ya dihlare e ka fokotša tlaišego, gomme go thekgwa maikwelong go bohlokwa. Go feta moo, ba bangwe bao ba lebeletšanago le maikwelo a bjalo ba ile ba hwetša thušo e oketšegilego yeo e šomago ka dikgatišong tša mokgatlo tše di theilwego Beibeleng tša Dihlatse tša Jehofa, bjalo ka ge lengwalo le le latelago leo le tšwago Fora le bontšha.

“Malobanyana mo, ke be ke sa bone morero wa go tšwela pele ke phela. Ke ile ka rapela Modimo gore a ntumelele gore ke hwe. Go be go le bjalo ka ge eka ke hwile ka gare. Ke ile ka rapela Jehofa ka mo go tseneletšego ke tsoma tlhahlo. Le gona ke ile ka dira phetho ya go bala 2002 Yearbook of Jehovah’s Witnesses gomme ka e fetša ka matšatši a mararo. E ile ya nkgothatša kudu le go matlafatša tumelo ya-ka.

“Ke ile ka dira dinyakišišo ka dimakasineng tša Morokami le Phafoga!, gomme ke ile ka makala kudu! Ke be ke bala dimakasine tše ka mehla ka lebaka la nywaga ya ka godimo ga e 15, eupša le ka mohla ga se ka ka ka lemoga kamoo dihlogo tša tšona e lego tše kgothatšago le tše kgahlišago gakaakaa. Di tletše ka lerato​—seka seo se hlokwago mehleng ye. Ke hweditše sohle seo ke bego ke se nyaka.”

Beibele e re: “Morêna ó kxaufsi le ba ’pelo di rôbexilexo; ó phološa meôya e kxobetsi.” (Psalme 34:​18) Ka ntle le pelaelo, bohle ba ‘dipelo tše di robegilego’ goba ba “meôya e kxobetsi” ba ka hwetša kgothatšo le kholofelo ya bokamoso ka Beibeleng. Dihlatse tša Jehofa di aba dipuku tšeo di theilwego Beibeleng e le go thuša bao ba nyakago thušo mothopong woo o buduletšwego ke Modimo wa khomotšo.