Ke ka Baka La’ng Batho ba Tlaišetšwa Bodumedi bja Bona?

 NA O nagana gore batho ba swanetše go tlaišetšwa bodumedi bja bona? Mohlomongwe ga go bjalo​—bonyenyane e sego ge ba sa šitišane le ditshwanelo tša ba bangwe. Lega go le bjalo, tlaišo ya bodumedi e na le histori e telele gomme e sa dutše e le gona. Ka mohlala, bontši bja Dihlatse tša Jehofa kua Yuropa le dikarolong tše dingwe tša lefase di ile tša ganwa leboelela ka ditshwanelo tša tšona le go tlaišwa o šoro lekgolong la nywaga la bo-⁠20.

Nakong yeo, Dihlatse tša Jehofa di ile tša tlaišwa o šoro ka tsela ye e rulagantšwego, gomme tlaišo yeo e ile ya tšea lebaka le letelele ka tlase ga mebušo e mebedi e megolo ya bonkgwete kua Yuropa. Phihlelo ya tšona e re ruta’ng ka tlaišo ya bodumedi? Le gona re ka ithuta’ng tseleng yeo di ilego tša arabela ka yona tlaišong?

“Xa se ba Lefase”

Dihlatse tša Jehofa di katanela go ba batho bao ba kwago molao, bao ba nago le khutšo le bao ba tsepamego boitshwarong. Ga di ganetše mebušo goba go tsoma go thulana le yona, le gona ga di hlohleletše tlaišo ka baka la gore di nyaka go ba bahwela-tumelo. Bakriste ba ga ba tšee lehlakore dipolitiking. Se se dumelelana le mantšu a Jesu a rego: “[Balatedi ba-ka] xa se ba lefase, byalo ka Nna kè se wa lefase.” (Johane 17:​16) Mebušo e mentši e lemoga boemo bja go se tšee lehlakore bja Dihlatse. Eupša babuši ba mebušo ya bonkgwete ga ba hlomphe senyakwa sa Beibele sa gore Bakriste ga se ba swanela go ba karolo ya lefase.

Lebaka la se le ile la hlaloswa nakong ya kopano kua Yunibesithing ya Heidelberg, Jeremane ka November 2000. Kopano e be e na le sehlogo se se rego “Kgatelelo le Pono ya Motho ka Noši: Dihlatse tša Jehofa ka Tlase ga Dipušo tša Bogateledi tša Bosošalise bja Setšhaba le Bokomanisi.” Dr. Clemens Vollnhals wa Mokgatlo wa Hannah-Arendt wa Nyakišišo Pušong ya Bonkgwete o itše: “Mebušo ya Bonkgwete ga e lekanyetše mediro ya yona dipolitiking. E nyaka boineelo bja motho ka moka.”

Bakriste ba therešo ba ka se kgone go neela “boineelo bja motho ka moka” mebušong ya batho, ka ge ba ikanne go botegela Jehofa Modimo a nnoši ka go se kwanantšhe. Dihlatse tšeo di ilego tša phela ka tlase ga mebušo ya bonkgwete di ile tša hwetša gore ka dinako tše dingwe dinyakwa tša Mmušo le tša tumelo ya tšona di a thulana. Di ile tša dira’ng ge di be di lebeletšane le dithulano tše bjalo? Go ya ka histori, Dihlatse tša Jehofa di ile tša diriša molao wa motheo wo o ilego wa bolelwa ke barutiwa ba Jesu Kriste maphelong a tšona: “Mo xo batho le Modimo, wa xo kwešešwa ke Modimo.”​—Ditiro 5:⁠29.

Dihlatse tše dikete di ile tša dula di botega ka go se kwanantšhe tumelong ya tšona gomme tša dula di sa tšee lehlakore ditabeng tša dipolitiki, gaešita le ge di lebeletšane le tlaišo e šoro kudu. Di be di ka kgotlelela bjang? Di hweditše kae matla a go dira bjalo? Anke di ikarabele. Le gona anke re bone seo batho ka moka bao e lego Dihlatse le bao e sego Dihlatse, ba ka ithutago sona diphihlelong tša tšona.

 [Ntlhakgolo go letlakala 4]

Dihlatse tša Jehofa kua Jeremane di ile tša tlaišwa o šoro ka lebaka le letelele ka tlase ga mebušo ka bobedi ya bonkgwete ya lekgolong la nywaga la bo-⁠20

[Ntlhakgolo go letlakala 4]

“Mebušo ya Bonkgwete ga e lekanyetše mediro ya yona dipolitiking. E nyaka boineelo bja motho ka moka.”​—Dr. Clemens Vollnhals

[Caption on page 4]

Lapa la ga Kusserow le ile la ganwa ka tokologo ka baka la gore le be le ka se kwanantšhe tumelo ya lona

[Caption on page 4]

Johannes Harms o ile a bolaelwa kua kgolegong ya Nazi ka baka la ditumelo tša gagwe