Letšatši la Bohlokwa Kudu

E BILE letšatši leo le ilego la fetoša bokamoso bja batho e le gore ba be le tebelelo ya ditšhegofatšo tša ka mo go sa felego. Ga go na letšatši le lengwe historing ya batho leo le ilego la kgoma bokamoso bja batho ka tsela ye. E bile letšatši leo ka lona Jesu a ilego a phetha tšohle tšeo a bego a tletše go di dira mo lefaseng. A kokotetšwe koteng ya tlhokofatšo, o ile a buša moya la mafelelo gomme a goelela a re: “Xo phethexile!” (Johane 19:​30) Jesu o be a tletše morero ofe?

Beibele e re: ‘Morwa-motho ga se a tlela go direlwa, o tletše go direla, le go neela bophelo bja gagwe gore e be topollo ya ba bantši.’ (Mateo 20:​28) Jesu o neetše moya goba bophelo bja gagwe bakeng sa gore batho ba ka phološwa sebeng le lehung tša leabela. Ee, “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:​16) Sehlabelo sa Jesu ke tokišetšo e botse gakaakang!

Go na le lebaka le lengwe gape le le dirago gore letšatši la lehu la Jesu e be la bohlokwa kudu. Lona letšatšing leo, Morwa wa Modimo o ile a ruta baapostola ba gagwe dithuto tša bohlokwa tšeo di bego di tla ba thuša go dula ba botega. Mantšu a gagwe a mafelelo a swanetše go ba a ile a kgoma dipelo tša barutiwa bao ba gagwe gakaakang! Dithuto tša gagwe e be e le dife? Re ka holwa bjang ke seo Jesu a ilego a ba ruta sona? Dipotšišo tše di tla ahla-ahlwa sehlogong se se latelago.