Na Bodiidi Bo Tla Ka Bja Fela?

KGOŠI Salomo yo bohlale wa Isiraele ya bogologolo o itše: “Ka bôna mexôkxô ya bahlaki, bà se n’e mohomotši. Ka bôna bahlakiši ba bôná bà na le matla, bôná bà se n’e mohomotši.” (Mmoledi 4:⁠1) Ka ntle le pelaelo, bontši bja bao ba bego ba gateletšwe bao a bego a naganne ka bona le bona e be e le badiidi.

Bodiidi bo ka se ke bja lekanywa feela ka tša ditšhelete. Go ya ka pego yeo e neilwego ke World Bank ka June 2002, “go lekanyeditšwe gore ka 1998 batho ba dibilione tše 1,2 ba be ba diriša tšhelete ya ka tlase ga $1 ka letšatši . . . gomme ba dibilione tše 2,8 ba be ba phela ka tšhelete ya ka tlase ga $2 ka letšatši.” Go ile gwa lemogwa gore gaešita le ge dipalo tšeo di be di le ka tlase ga tšeo di bego di lekanyeditšwe pele, “di sa dutše di le godimo kudu ge go bapetšwa le go tlaišega ga batho.”

Na bodiidi bo tla ka bja fela? Jesu Kriste o boditše barutiwa ba gagwe gore: “Badiitšana Le na nabô’ ka mehla.” (Johane 12:⁠8) Eupša na se se bolela gore bodiidi le ditla-morago tša bjona tše šoro di tla tšwela pele ka dinako ka moka? Aowa, ka gobane gaešita le ge Jesu a se a holofetša balatedi ba gagwe gore ka moka ga bona ba be ba tla huma, ga se ra swanela go phetha go tšwa mantšung a gagwe gore ga go na kholofelo ka badiidi.

Go sa šetšwe maiteko a batho le taba ya gore dikholofetšo tša go fediša bodiidi gantši di paletšwe, Lentšu la Modimo e lego Beibele le re kgonthišetša gore kgaufsinyana badiidi ba ka se sa ba gona. Ge e le gabotse, Jesu o tsebaditše ‘ditaba tše dibotse go babotlana.’ (Luka 4:​18) Ditaba tše tše dibotse di akaretša kholofetšo ya gore bodiidi bo tla fedišwa. Se se tla direga ge Mmušo wa Modimo o tliša maemo a toko mo lefaseng.

Leo e tla ba lefase le le fapanego gakaakang! Jesu Kriste e lego Kgoši ya legodimong “ó tlo xauxêla mosenyi le mohloki; meôya ya bahumanexi ó tlo e phološa.” Ka kgonthe “meôya ya bôná ó tlo e lokolla mohlakong, bošorong.”​—Psalme 72:​13, 14.

Mabapi le nako yeo, Mika 4:⁠4 e re: “Motho ó tlo dula meriting ya morara w’axwe, le mo moriting wa moxó wa xaxwe, xò se e a ba thšošaxo; ka xobane xo boletše molomo wa Morêna wa mašaba.” Mmušo wa Modimo o tla rarolla mathata ka moka ao a tshwenyago batho, gaešita le go fediša bolwetši le lehu. Modimo “lehu ó tlo le tloša ka xo sa felexo; Mong ’a bohle Morêna ó tlo phomola mexôkxô mahlong ohle.”​—Jesaya 25:⁠8.

O ka bota dikholofetšo tše ka gobane di buduletšwe ke Modimo ka boyena. Ke ka baka la’ng o sa ahla-ahle bohlatse bjo bo bontšhago gore diporofeto tša Beibele ke tšeo di ka botwago?

[Caption on page 32]

FAO photo/M. Marzot