“Batamelang Kgaufsi Le Modimo, Gomme O Tla Batamela Kgaufsi Le Lena”

Pele le ka Morago—Bophelo bja Gagwe bo Ile bja Fetoga

BOPHELO bo be bo fetogile bjo bo sa thabišego le bjo bo se nago morero gakaakang go Matsepang! E be e le ngwanenyana yo mofsa kua Lesotho, naga yeo e lego bogareng bja Afrika Borwa. Matsepang o godišitšwe e le Mokatholika. Lega go le bjalo, go e na le gore a thušwe go batamela kgaufsi le Modimo, ka nywaga e mentši o ile a swarwa gampe ke baitlami ba basadi bao ba ilego ba diriša tšhelete go mo goketša go dira ditiro tše di gobogilego.

Ka baka leo, Matsepang o ile a nolwa moko ke bodumedi gomme a se sa kgona go dumela go Mmopi yo lerato yo a tlogago a na le taba le tlholo ya gagwe ya batho. Ka baka la go tlaišwa ke go hlokomologwa le go swarwa gampe, Matsepang o be a na le mabadi a maikwelo a tseneletšego le maikwelo a go hloka mohola ka mo go feletšego. O ile a gola go ba yo šoro kudu le yo bogale. Se se ile sa lebiša mokgweng wa bosenyi.

Mafelelong Matsepang o ile a ba karolo ya sehlopha sa disenyi tšeo di bego di utswetša batho dilo ka ditereneng. O ile a swarwa gomme a ahlolelwa go golegwa mo Afrika Borwa. Ka morago, o ile a romelwa nageng ya gabo ya Lesotho moo a ilego a tšwela pele ka bophelo bja bosenyi, botagwa, bošoro le boitshwaro bjo bo gobogilego.

Nakong ya ge a be a gateletšegile kudu bophelong bja gagwe, Matsepang o ile a rapela Modimo bakeng sa thušo a le tlalelong. O ile a holofetša gore: “Modimo, ge e ba nka phela, ke tla dira seo nka se kgonago go go hlankela.”

Go se go ye kae, baromiwa bao e bego e le Dihlatse tša Jehofa ba ile ba boledišana le Matsepang. Ba ile ba ithapela go ithuta Beibele le yena. Go tšwa thutong ya gagwe, o ile a lemoga gore Modimo ga se yo a se nago taba le yo a sa hlokomelego. Ge e le gabotse, o ile a lemoga gore Sathane e lego “rra-xo-moaketši,” o diriša maano a boradia le a goketšago go tsenya ka go ba bangwe maikwelo a gore ga ba na mohola le go ba dira gore ba dumele gore le ka mohla Jehofa a ka se ba hwetše e le bao ba rategago.​—Johane 8:​44; Ba-Efeso 6:⁠11.

Ka mo go fapanego, e be e le mo go homotšago gakaakang go Matsepang ge a be a ithuta gore re ka ba le boitlhompho bjo bo swanetšego ge e ba re sokologa dibeng tša rena tša nakong e fetilego, re nyaka tebalelo ya Modimo gomme re katanela go mo kgahliša! O ile a thušwa go kwešiša gore “e Moxolo ké Modimo, ó feta dipelo tša rena,” gomme o re lebelela ka tsela yeo e ka bago e fapane kudu le yeo re itebelelago ka yona.​—1 Johane 3:​19, 20.

Matsepang o ile a thabišwa ke go bala mantšu a a mopsalme Dafida: “Morêna ó kxaufsi le ba ’pelo di rôbexilexo; ó phološa meôya e kxobetsi.” (Psalme 34:​18) Ka ge e le yo mongwe wa ba “meôya e kxobetsi,” o ile a lemoga gore Jehofa ga a lahle bahlanka ba gagwe, gaešita le ge ba bangwe ba bona ba ka nyama goba ba ikwa ba  se bohlokwa. Go ile gwa ruthetša pelo ya gagwe go ithuta gore Modimo o na le taba le dinku tša gagwe ka moka le go di matlafatša dinakong tše thata. (Psalme 55:​22; 1 Petro 5:​6, 7) O ile a kgongwa ka mo go kgethegilego ke mantšu a rego: “Batamelang kgaufsi le Modimo, gomme o tla batamela kgaufsi le lena.”​—Jakobo 4:⁠8, NW.

Kapejana matla a Lentšu la Modimo e lego Beibele a ile a thoma go bonagala bophelong bja Matsepang. O ile a thoma go ba gona dibokeng tša Bokriste ka mehla gomme a tlogela mekgwa ya gagwe yeo e sego ya mangwalo. Mafelelo e bile afe? Ga a sa ikwa a sa swanelwe ke lerato la Modimo le go amogelwa ke yena. Ga e sa le go tloga ge a kolobetšwa e le yo mongwe wa Dihlatse tša Jehofa, o dirišitše diiri tše dikete bodireding bja Bokriste e le mogoeledi wa ditaba tše dibotse tša Mmušo. Go sa šetšwe mabadi a nakong e fetilego, Matsepang ga bjale o phela bophelo bjo bo thabišago le bjo bo nago le morero. A go bontšhwa mo go kaakang ga matla a Beibele a go kaonefatša maphelo!​—Ba-Hebere 4:⁠12.

[Lepokisi go letlakala 9]

Melao ya Motheo ya Beibele e a Šoma

Melao ya motheo ya Beibele yeo e ilego ya homotša bahlaselwa ba go swarwa gampe e akaretša e latelago:

“Mohla kè xoletšwe ke dipelaêlô ka teng xa-ka, ka bewa pelo ke dikhomotšô tša xaxo [Modimo].” (Psalme 94:​19) “Dikhomotšô” tša Jehofa tšeo di hwetšwago ka Lentšung la gagwe ke mothopo wa kgothatšo e kgolo. Go di ela hloko ge o naganišiša le ge o rapela go tla go thuša go tloša dikgopolo tše di fošagetšego gomme wa aga go bota Modimo e le Mogwera yo a kwešišago.

“[Jehofa] ó fodiša ba dipelo tše’ robexilexo, ó tlêmêlêla ’nthô tša bôná.” (Psalme 147:⁠3) Ge e ba re leboga kgaugelo ya Jehofa le tokišetšo ya gagwe ya go lebalela dibe tša rena ka sehlabelo sa topollo sa Jesu, re ka batamela Modimo ka kgodišego ntle le go ikwa re le molato ka pelong. Se se ka tliša khomotšo e sa lekanywego gotee le khutšo ya monagano.

“Xa xo motho e a kxônaxo xo tla xo Nna [Jesu Kriste], xe a sa xôxwe ke Tate e a nthomilexo; xomme ké Nna ke tl’o xo mo tsoša ka ’tšatši la mafêlêlô.” (Johane 6:​44) Ka moya wa gagwe o mokgethwa le ka modiro wa go bolela ka Mmušo, Jehofa ka boyena o re gogela go Morwa wa gagwe gomme o re nea kholofelo ya bophelo bjo bo sa felego.

[Caption on page 9]

“Modimo, ge e ba nka phela, ke tla dira seo nka se kgonago go go hlankela”