Bontšhang “Boleta Bjohle Go Batho Ka Moka”
Bontšhang “Boleta Bjohle Go Batho Ka Moka”
“O ba gopotše gore . . . ba be botho, ba laetše boleta bjohle go batho ka moka.”—Tito 3:1, 2, PK.
1. Ke ka baka la’ng go se bonolo ka mehla go bontšha boleta?
MOAPOSTOLA Paulo o ngwadile gore: “Bang baetši ba-ka byalo ka xe nna kè le mo-etša-Kriste.” (1 Ba-Korinthe 11:1) Lehono Bahlanka ba Modimo ka moka ba katanela go kwa keletšo ye. Go tloga go se bonolo e le ka kgonthe, ka gobane re abetše dikganyogo le dimelo tša boithati tšeo di sa dumelelanego le mohlala wa Kriste go tšwa go batswadi ba rena ba pele ba batho. (Ba-Roma 3:23; 7:21-25) Lega go le bjalo, ge go tliwa tabeng ya go bontšha boleta, ka moka ga rena re ka atlega ge e ba re dira boiteko. Eupša go ithekga feela ka maikemišetšo a rena ga se gwa lekana. Go nyakega’ng se se fetago seo?
2. Re ka bontšha bjang “boleta bjohle go batho ka moka”?
2 Boleta bja go boifa Modimo ke karolo ya dienywa tša moya o mokgethwa. Ge re tšwela pele re latela tlhahlo ya matla a šomago a Modimo, ke moo dienywa tša wona di tlago go bonagala. Ke moka, ke gona feela moo re tlago go kgona go bontšha “boleta bjohle” go motho yo mongwe le yo mongwe. (Tito 3:2, mongwalo o sekamego ke wa rena, PK.) Anke re ahla-ahleng kamoo re ka ekišago mohlala wa Jesu gomme re kgone go dira gore bao re tswalanago le bona ba ‘hwetše tapologo.’—Mateo 11:29, bapiša le NW; Ba-Galatia 5:22, 23.
Ka Lapeng
3. Ke boemo bofe bja lapa bjo bo bontšhago moya wa lefase?
3 Karolo e nngwe yeo go yona boleta bo lego bohlokwa ke ka lapeng. Mokgatlo wa Lefase wa tša Maphelo o akanyetša gore bošoro bja ka gae bo tliša kotsi e kgolo kudu ya bophelo bjo bobotse bja basadi go feta dikotsi tša mmileng le bolwetši bja malaria di kopane. Ka mohlala, kua London, Engelane, kotara ya bosenyi bja bošoro bjo bo begilwego ke bja ka gae. Gantši maphodisa a kopana le batho bao ba bontšhago maikwelo a bona ka “mašata le maroxa.” Se bohloko le go feta, banyalani ba bangwe ba dumeletše ‘go befelwa o šoro’ go kgoma tswalano ya bona. Boemo bjo ka moka ke pontšho e nyamišago ya “môya wa lefase” gomme boemo bjo bjalo ga bo nyakege ka malapeng a Bakriste.—Ba-Efeso 4:31, bapiša le NW; 1 Ba-Korinthe 2:12.
4. Boleta bo ka ba le mafelelo afe ka lapeng?
4 Gore re lebeletšane ka katlego le ditshekamelo tša lefase, re hloka moya wa Modimo. “Mo xo lexo Môya wa Morêna, ké mo xo lexo khunoloxô.” (2 Ba-Korinthe 3:17) Lerato, botho, boitshwaro le go se fele pelo di matlafatša botee bja banna le basadi bao ba sa phethagalago. (Ba-Efeso 5:33) Moya o boleta o phadimiša boemo bja ka gae gomme ke selo se se kgahlišago seo se fapanego le dikgoga-kgogano le dingangišano tšeo di senyago malapa a mantši. Seo motho a se bolelago se bohlokwa, eupša ke tsela yeo a se bolelago ka yona yeo e fetišetšago boemo bja gagwe bja kgopolo ka mantšu ao a a bolelago. Matshwenyego le dipelaelo ge di bolelwa ka boleta di okobatša dingangišano. Kgoši Salomo yo bohlale o ngwadile gore: “Phetolô e bolêta e phohliša dipêfêlô; lentšu la xo fêrêlêla le tsoša boxale.”—Diema 15:1.
5. Boleta bo ka thuša bjang lapeng leo le aroganego ka tumelo?
5 Boleta bo bohlokwa kudu lapeng leo le aroganego ka tumelo. Ge bo akaretša le mediro e mebotse, bo ka thuša go ruela bao ba sekametšego go lokeng ka lehlakoreng la Jehofa. Petro o eleditše basadi ba Bakriste gore: “Bušwang ke banna ba lena, xore xe xo na le ba ba xanaxo xo kwa Lentšu, ba tlê ba ruiwê ka xo bôna tsela ye e swerwexo ke basadi, xò se lentšu le le bolêlwaxo, xe ba lemoxile tsela ya lena è le ya xo boifa le xo ila thšila. A ba lemoxê xore bothšepi bya lena xa se byoo bya ntlê bya xo loxa meriri le xo apara tša xauta le bothakxa bya mašela. Bothšepi e le motho wa xo ikuta wa pelong, bothšepi byo bo sa ônalexo bya môya wa bolêta le leaxô. Ké tšôna tše Modimo a bônaxo è le tše bohlôkwa.”—1 Petro 3:1-4.
6. Go bontšha boleta go ka matlafatša bjang ditswalano magareng ga batswadi le bana?
6 Tswalano magareng ga batswadi le bana e ka ba e sa kgahlišego, kudu-kudu ge lerato la go rata Jehofa le se gona. Eupša malapeng a Bakriste ka moka, go nyakega gore go bontšhwe boleta. Paulo o eleditše bo-tate gore: “Le se kê la befediša bana ba lena; sa lena a e bê xo ba etetša ka xo ba ruta le xo ba eletša tša Morêna.” (Ba-Efeso 6:4) Ge e ba go buša boleta ka lapeng, tswalano ya kgaufsi magareng ga batswadi le bana e a matlafala. Dean, yo e lego yo mongwe wa bana ba bahlano, o boletše ka tatagwe gore: “Tate o be a na le moya o boleta. Ga ke gopole le ka mohla ke e-na le ngangišano le yena—gaešita le nakong ya ge ke be ke le mahlalagading. O be a le boleta kudu ka dinako tšohle, le ge a be a befetšwe. Ka dinako tše dingwe o be a re ke ye ka phapošing ya-ka goba a ntima ditshwanelo tše dingwe, eupša le ka mohla ga se ra ka ra ngangišana. E be e se tate wa rena feela. Le gona e be e le mogwera wa rena, gomme re be re sa nyake go mo nyamiša.” Ka kgonthe boleta bo thuša go matlafatša ditswalano magareng ga batswadi le bana.
Bodireding bja Rena
7, 8. Ke ka baka la’ng go le bohlokwa go bontšha boleta bodireding bja tšhemo?
7 Karolo e nngwe yeo go yona boleta bo lego bohlokwa ke bodireding bja tšhemo. Ge re dutše re abelana le ba bangwe ditaba tše dibotse tša Mmušo, re kopana le batho ba nago le dimelo tše di sa swanego. Ba bangwe ba theeletša ka lethabo molaetša wa kholofelo woo re o tlišago. Ba bangwe ba ka arabela ka go se thabele ka mabaka a fapa-fapanego. Ke gona moo seka sa boleta se re thušago kudu go phethagatšeng thomo ya rena ya go ba dihlatse go fihla magomong a lefase.—Ditiro 1:8; 2 Timotheo 4:5.
8 Moapostola Petro o ngwadile gore: “Morêna Modimo mo ’pelong tša lena Le Mo tsebê xe e le Mokxêthwa; Le dulê Lè loketše xo ipolêla ka kholofêlô ye e lexo mo xo lena xe Le fetola mang le mang e a Le sekišaxo ka yôna.” (1 Petro 3:15) Ka baka la ge re tšeela Kriste godimo e le Mohlala wa rena, re ela hloko gore re bontšhe bobedi boleta le tlhompho ge re nea bohlatse go bao ba bolelago ka bogale. Tsela ye ya boitshwaro gantši e tšweletša mafelelo a mabotse kudu.
9, 10. Anega phihlelo yeo e bontšhago mohola wa boleta bodireding bja tšhemo.
9 Keith o ile a šalela morago ge mosadi wa gagwe a be a araba motho yo a bego a kokota mojako legaeng la bona. Ka go lemoga gore moeng wa bona e be e le yo mongwe wa Dihlatse tša Jehofa, ka bogale mosadi wa Keith o ile a latofatša Hlatse ka go swara bana gampe. Ngwanabo rena o ile a dula a išitše maswafo fase. O ile a bolela ka boleta gore: “Ke go kwela bohloko ka ge o ikwa ka tsela yeo. Na nka go bontšha seo Dihlatse tša Jehofa di se dumelago?” Keith o be a dutše a theeditše poledišano gomme bjale o ile a tla mojako go tla go kgaotša ketelo ya ngwanabo rena.
10 Ka morago, banyalani ba ile ba thoma go itshola gore ba ile ba swara moeng wa bona ka tsela ya makgwakgwa. Mokgwa wa gagwe o boleta o ile wa ba kgoma. Seo se ilego sa ba makatša ke gore ka morago ga beke ngwanabo rena o ile a boa, gomme Keith le mosadi wa gagwe ba ile ba mo dumelela gore a hlalose metheo ya Mangwalo ya seo a se dumelago. Ka morago ba ile ba bolela gore: “Nywageng e mebedi e latetšego re ile ra theeletša kudu seo Dihlatse tše dingwe di bego di se bolela.” Ba ile ba amogela thuto ya Beibele, gomme mafelelong bobedi bja bona ba ile ba kolobetšwa e le leswao la boineelo bja bona go Jehofa. E bile mo go putsago gakaakang go Hlatse yeo e ilego ya etela Keith le mosadi wa gagwe la mathomo! Hlatse e ile ya kopana le banyalani bao nywaga ka morago gomme ya hwetša gore ga bjale e be e le ngwanabo le kgaetšedi ba moya. Boleta bo a fenya.
11. Ke ka tsela efe boleta bo ka thulelago motho tsela ya go amogela therešo ya Bokriste?
11 Diphihlelo tšeo Harold a bilego le tšona ge e be e le lešole di ile tša mo dira gore a be bogale gomme a belaele go ba gona ga Modimo. Seo se ilego sa befiša mathata a gagwe e bile kotsi ya koloi yeo e bakilwego ke mootledi wa setagwa yeo e ilego ya golofatša Harold. Ge Dihlatse tša Jehofa di be di mo etela legaeng la gagwe, Harold o ile a di laela gore di kgaotše go mo etela. Eupša ka letšatši le lengwe, Hlatse ye e bitšwago Bill e be e ikemišeditše go etela motho yo a thabelago yo a bego a dula ntlong ya bobedi go tloga go Harold. Bill o ile a kokota mojakong wa Harold ka phošo. Ge Harold yo a bego a ikokotlela ka dikota tše pedi tša go sepela a be a bula mojako, kapejana Bill o ile a kgopela tshwarelo, a hlalosa gore o be a rerile go etela legae le le lego kgaufsi. Harold o ile a arabela bjang? Le ge Bill a be a sa tsebe, Harold o be a bone ditaba tša thelebišeneng tše di bontšhitšego Dihlatse tšeo di bego di šoma gotee go aga Holo e mpsha ya Mmušo ka nako e kopana kudu. Ka ge a kgahlišitšwe kudu ke go bona batho ba bantši gakaakaa ba šoma ka botee, o be a fetošitše boemo bja gagwe bja kgopolo ka Dihlatse. A kgomilwe ke go kgopela tshwarelo ka botho ga Bill le ke mokgwa o kgahlišago le wa boleta, Harold o ile a dira phetho ya go amogela diketelo tša Dihlatse. O ile a ithuta Beibele, a dira tšwelopele gomme a ba mohlanka wa Jehofa yo a kolobeditšwego.
Ka Phuthegong
12. Ke mekgwa efe ya lefase yeo ditho tša phuthego ya Bokriste di swanetšego go e gana?
12 Karolo ya boraro yeo go yona boleta bo lego bohlokwa ke ka phuthegong ya Bokriste. Dithulano di tlwaelegile lekokong la lehono. Dingangišano le diphapano ke dilo tšeo di tlwaelegilego gare ga bao ba lebelelago bophelo ka tsela ya nama. Ka dinako tše dingwe, mekgwa e bjalo ya lefase e tsena ka phuthegong ya Bokriste ganyenyane-ganyenyane gomme ya feleletša ka dikgohlano le go lwa ka mantšu. Bana babo rena bao ba nago le boikarabelo ba a nyama ge ba swanetše ke gore ba lebeletšane le maemo a. Lega go le bjalo, lerato la go rata Jehofa le bana babo bona le ba tutueletša go leka go rua bao ba fošitšego.—Ba-Galatia 5:25, 26.
13, 14. Go ‘eletša bangangi ka boleta’ go ka feleletša ka eng?
13 Lekgolong la pele la nywaga, Paulo le modirišani wa gagwe e lego Timotheo ba ile ba lebeletšana le mathata go tšwa go batho ba bangwe ka phuthegong. Paulo o ile a lemoša Timotheo ka bana babo rena bao ba bego ba swantšhetša dibjana “tša xo nyatšêxa.” Paulo o itše: “Mohlanka wa Morêna xa a swanêlwa ke dintwa. Se se mo swanetšexo ké xe bohle a ba dira ka botho, xe e le mo-rata-batho, mo-kxôtlêlêla-bošula. Bangangi ó ba eletša ka bolêta.” Ge e ba re dula re le boleta gaešita le ge re hlohlwa, gantši dinganga di tutueletšega go lebeledišiša lefsa dikganetšo tša tšona. Ka morago ga moo, ka ge Paulo a ile a tšwela pele a ngwala, Jehofa a ka ‘ba nea tshokologo gore ba tle ba lemoge therešo.’ (2 Timotheo 2:20, 21, 24, 25) Ela hloko gore boleta Paulo o bo tswalanya le bonolo le boitshwaro.
14 Paulo o be a diriša seo a bego a se ruta. Ge a be a dirišana le ‘baapostola ba baipei’ kua phuthegong ya Korinthe, o ile a kgothaletša bana babo gore: “Byalo nna Paulo yó, ke Le rapêla ka bônôlo le ka botho bya Kriste, nna yo ba rexo: Ke moikokobetši rè lebane difahloxô, xe ke fulere ya ba xôna ke xalefaxo.” (2 Ba-Korinthe 10:1; 11:5) Paulo o ile a ekiša Kriste e le ka kgonthe. Ela hloko gore o ile a dira boipiletšo bjo go bana ba babo rena “ka bônôlo” bja Kriste. Ka go rialo o ile a phema bonkgwete, boemo bja kgopolo bja bobuša-noši. Ka ntle le pelaelo keletšo ya gagwe e ile ya ipiletša go bao ka phuthegong ba bego ba na le dipelo tše di arabelago. O ile a lokiša ditswalano tše di senyegilego gomme a thea motheo wa khutšo le botee ka phuthegong. Na ye ga se tsela yeo ka moka ga rena re swanetšego go e ekiša? Bagolo ke bona bao ka mo go kgethegilego ba swanetšego go ekiša ditiro tša Kriste le tša Paulo.
15. Ke ka baka la’ng boleta bo le bohlokwa ge go newa keletšo?
15 Boikarabelo bja go thuša ba bangwe bo tloga bo sa swanela go bontšhwa feela dinakong tša ge khutšo le botee bja phuthego di le kotsing. Bana babo rena ba nyaka tlhahlo e lerato, nako e telele pele ga ge ditswalano di senyega. Paulo o kgothaditše ka gore: “Bana bešo, xe motho a thšoxa à wetše molatong, lena ba Le lexo ba Môya, Le mo tsošê.” Eupša bjang? “Ka môya o bonôlô; xomme le lena Le itôtê, xore Le se wêlê molekong.” (Ba-Galatia 6:1) Ga se ka mehla go lego bonolo go boloka “môya o bonôlô,” kudu-kudu ka gobane Bakriste ka moka go akaretša le banna bao ba kgethilwego, ba kgongwa ke ditshekamelo tša sebe. Lega go le bjalo, go ba boleta ga yo a neago keletšo go tla thuša gore go be bonolo go mofoši go dira diphošollo tše di nyakegago.
16, 17. Ke’ng seo se ka thušago go thibela go dika-dika le ge e le gofe ga go diriša keletšo?
16 Segerikeng sa setlogo, lentšu le le fetoletšwego e le ‘tsoša’ le ka šupa gape go go beakanya lefsa marapo a robegilego, e lego mogato o bohloko. Ngaka e kgonthišetšago yeo e beakanyago marapo a robegilego e bolela gabotse ka mehola ya mogato. Mokgwa wa gagwe wa go ba bonolo ke o homotšago. Mantšu a gagwe a mmalwa a bolelwago e sa le pele a thuša go okobatša bohloko bjo bogolo kudu. Ka mo go swanago, go beakanywa lefsa ga moya e ka ba go bohloko kudu. Eupša boleta bo ka dira gore go amogelege gabonolo, ka go rialo gwa bušetša ditswalano tše di kgahlišago gomme gwa bula tsela ya gore mofoši a fetoše tsela ya gagwe. Gaešita le ge mathomong keletšo e ka ganwa, go ba boleta ga yo a neago keletšo go tla thuša go thibela go dika-dika le ge e le gofe ga gore go latelwe keletšo e kwagalago ya Mangwalo.—Diema 25:15.
17 Ge re phošolla ba bangwe, ka mehla go na le kotsi ya gore keletšo e ka tšewa e le kganetšo. Mongwadi yo mongwe o e bea ka tsela ye: “Ga go le ka mohla mo re lego kotsing e kgolo ya boikgodišo bjo bo sa hlokagalego go swana le ge re phošolla ba bangwe, ka go rialo re nyaka boleta kudu.” Go hlagolela boleta bjoo bo theilwego go boikokobetšo go tla thuša moeletši wa Mokriste go phema kotsi ye.
“Go Batho ka Moka”
18, 19. (a) Ke ka baka la’ng Bakriste ba ka hwetša go le thata go bontšha boleta ge ba dirišana le babuši ba lefase? (b) Ke’ng seo se tla thušago Bakriste go bontšha boleta go balaodi, gomme ka kgonagalo ya mafelelo afe?
18 Karolo e nngwe yeo go yona ba bantši ba hwetšago go le thata go bontšha boleta ke go dirišaneng le babuši ba lefase. Ke therešo gore tsela yeo ba bangwe ba babuši ba itshwarago ka yona e bontšha bogale le go hloka kwelobohloko. (Mmoledi 4:1; 8:9) Lega go le bjalo, lerato la rena la go rata Jehofa le tla re thuša go lemoga bobuši bja gagwe bjo bo phagamego gomme ra nea balaodi ba mmušo boikokobetšo bjo bo lekanyeditšwego bjoo bo ba swanetšego. (Ba-Roma 13:1, 4; 1 Timotheo 2:1, 2) Gaešita le ge bao ba lego maemong a phagamego ba nyaka go lekanyetša boipolelo bja rena bja phatlalatša ka borapedi bja rena go Jehofa, ka lethabo re nyaka ditsela tšeo di sa bulegilego tša go nea sehlabelo sa rena sa theto.—Ba-Hebere 13:15.
19 Ga go na boemo le ge e le bofe bjo bo ka dirago gore re be ba šoro. Re katanela go ba ba leka-lekanego mola le ka mohla re sa kwanantšhe ditekanyetšo tša go loka. Ka tsela ye, bana babo rena ba a atlega go tšwetšeng pele bodiredi bja bona dinageng tše 234 go dikologa lefase. Re ela hloko keletšo ya Paulo ya gore re ‘ipee ka tlase ga marena le magoši, re be ba ba kwago, ba itokišeditšego mediro e mebotse ka moka, re sa roge motho, re sa lwe, re le ba botho, re laetša boleta bjohle go batho ka moka.’—Tito 3:1, 2, PK.
20. Go na le meputso efe bakeng sa bao ba bontšhago boleta?
20 Ditšhegofatšo tše dintši di boloketšwe bohle bao ba bontšhago boleta. Jesu o itše: “Ba lehlôxônôlô ké ba bolêta, xobane bôná-bao ba tlo tšea lefase ya ba kabêlô ya bôná.” (Mateo 5:5) Go bana babo Kriste bao ba tloditšwego ka moya, go kgomarela boleta go kgonthišetša lethabo la bona le tokelo ya go buša tikologong ya lefaseng ya Mmušo. Ge e le mabapi le “lešaba le lexolo” la “dinku tše dingwê,” le tšwela pele go bontšha boleta le go lebelela pele go phela Paradeiseng mo lefaseng. (Kutollo 7:9; Johane 10:16; Psalme 37:11) A ditebelelo tše di kgahlišago gakaakang tšeo di lego ka pele! Ka gona, le ka mohla anke re se ke ra hlokomologa keletšo yeo Paulo a e neilego Bakriste ba kua Efeso e rego: “Ke a Le rapêla-xê nna moxôlexwa Moreneng, ke re swarang ka tsela ye e swanetšexo se Le bileditšwexo sôna, Le yê ka xo ikokobetša-moka, le ka bolêta.” (Mongwalo o sekamego ke wa rena.)—Ba-Efeso 4:1, 2.
[Dipotšišo tša Thuto]
[Caption on page 21]
Boleta bo bohlokwa ka mo go kgethegilego lapeng leo le aroganego tumelong
[Caption on page 21]
Boleta bo matlafatša ditswalano tša lapa
[Caption on page 23]
Iphemele ka boleta le ka tlhompho
[Caption on page 24]
Boleta bja moeletši bo ka thuša mofoši
E le go Boeletša
• Ke ditšhegofatšo dife tšeo di tlišwago ke go bontšha boleta
• ka lapeng?
• bodireding bja tšhemo?
• ka phuthegong?
• Ke meputso efe yeo e holofeditšwego bao ba nago le moya o boleta?