Bafsa​—jehofa A Ka Se   Lebale Modiro Wa Lena!

“Modimo xa a bebe motho, xa a lebale medirô ya lena, le leratô le Le itapišitšexo ka lôna ’ineng la xaxwe mola Lè dirêla bakxêthwa, Lè ba dirêla le byale.”​—Ba-Hebere 6:⁠10.

1. Dipuku tša Beibele tša Ba-Hebere le Maleaki di bontšha bjang gore Jehofa o leboga tirelo ya gago?

NA O kile wa direla mogwera wa gago tiro e botho gomme a se go leboge? E ka ba mo go kwešago bohloko kudu ge tiro e botho e tšeelwa fase, goba se bohloko le go feta e lebalwa ka mo go feletšego. Lega go le bjalo, ke mo go fapanego gakaakang ge re direla Jehofa tirelo e tšwago pelong! Beibele e re: “Modimo xa a bebe motho, xa a lebale medirô ya lena, le leratô le Le itapišitšexo ka lôna ’ineng la xaxwe mola Lè dirêla bakxêthwa, Lè ba dirêla le byale.” (Ba-Hebere 6:​10) Nagana ka seo se bolelwago ke se. Ge e le gabotse Jehofa o tla lebelela se e le tiro ya go hloka toka​—sebe​—ge e ba a ka lebala seo o mo diretšego sona le seo o tšwelago pele o se dira tirelong ya gagwe. A Modimo yo a nago le tebogo gakaakang!​—Maleaki 3:⁠10.

2. Ke’ng seo se dirago gore go hlankela Jehofa e be mo go kgethegilego e le ka kgonthe?

² O na le sebaka se se kgethegilego sa go rapela le go hlankela Modimo yo a nago le tebogo.  Ka ge go na le batho ba dimilione tše tshelelago feela bao e lego badumedi-gotee le wena ge ba bapetšwa le batho ba dimilione tše dikete tše tshelelago lefaseng ka bophara, tokelo ya gago ke ya moswana-noši. Go oketša moo, taba ya gore o a theetša le go arabela molaetšeng wa ditaba tše dibotse ke bohlatse bja gore Jehofa o na le kgahlego ya motho ka noši ka wena. Go feta moo, Jesu o itše: “Xa xo motho e a kxônaxo xo tla xo Nna, xe a sa xôxwe ke Tate e a nthomilexo.” (Johane 6:​44) Ee, Jehofa o thuša batho ka o tee ka o tee go ikhola ka mehola ya sehlabelo sa Kriste.

Go Bontšha Tebogo Bakeng sa Tokelo ya Gago e Kgolo

3. Barwa ba Kora ba ile ba bontšha bjang tebogo ya bona ya go leboga tokelo ya go hlankela Jehofa?

³ Bjalo ka ge go ahla-ahlilwe sehlogong se se fetilego, o boemong bja moswana-noši bja go thabiša pelo ya Jehofa. (Diema 27:​11) Se ke selo seo le ka mohla o sa swanelago go se tšeela fase. Go e nngwe ya dipsalme tša bona tše di buduletšwego, barwa ba Kora ba ile ba bontšha tebogo ya bona ya go leboga tokelo ya go hlankela Jehofa. Re bala gore: “Letšatši letee rè le malapeng a xaxo, ké lôna le le botse xo matšatši a sekete. Xo êma mojakô Ngwakong wa Modimo wa-ka xo phala xo dula ka ’ntlong tša bakxôpô.”​—Psalme 84:⁠10.

4. (a) Ke’ng seo mohlomongwe se ka dirago gore ba bangwe ba lebelele borapedi bja Jehofa e le bjo bo lekanyetšago tokologo ya bona? (b) Jehofa o ipontšha ka tsela efe e le yo a fagahletšego go lemoga le go putsa bahlanka ba gagwe?

⁴ Na ye ke tsela yeo o ikwago ka yona ka tokelo ya gago ya go hlankela Tatago wa legodimong? Go ba gona, ka dinako tše dingwe go ka bonagala eka borapedi bja Jehofa bo lekanyetša tokologo ya gago. Ke therešo gore go phela ka go dumelelana le melao ya motheo ya Beibele go nyaka tekanyo e itšego ya boikgafo. Lega go le bjalo, mafelelong, selo le ge e le sefe seo Jehofa a go kgopelago sona ke bakeng sa go go hola. (Psalme 1:​1-⁠3) Go oketša moo, Jehofa o bona maiteko a gago gomme o bontšha tebogo ya gagwe bakeng sa potego ya gago. Ka kgonthe, Paulo o ngwadile gore Jehofa “ba ba Mo nyakaxo ó a ba putsa.” (Ba-Hebere 11:⁠6) Jehofa o nyaka dibaka tša go dira bjalo. Moporofeta wa moloki wa Isiraeleng ya bogologolo o ngwadile gore: “Mahlô a Morêna a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.”​—2 Koronika 16:⁠9.

5. (a) Ke efe e nngwe ya ditsela tše botse kudu yeo ka yona o ka bontšhago gore pelo ya gago e kgomaretše Jehofa? (b) Ke ka baka la’ng go bolela le ba bangwe ka tumelo ya gago go ka bonagala go le thata?

⁵ E nngwe ya ditsela tše botse kudu yeo ka yona o ka bontšhago gore pelo ya gago e kgomaretše Jehofa ke ka go bolela le ba bangwe ka yena. Na o kile wa ba le sebaka sa go bolela le ba bangwe bao o tsenago le bona sekolo mabapi le tumelo ya gago? Mathomong, go dira se go ka bonala e le mo go boifišago, gomme yona kgopolo yeo e ka go dira gore o be le letšhogonyana. O ka botšiša gore: ‘Go thwe’ng ge e ba ba ntshega? Go thwe’ng ge e ba ba nagana gore bodumedi bja-ka ke bjo bo sa tlwaelegago?’ Jesu o ile a dumela gore ga se batho ka moka bao ba tlago  go theetša molaetša wa Mmušo. (Johane 15:​20) Lega go le bjalo, se ga se bolele gore o tla phela bophelo bja go kwerwa le go se amogelwe. Ka mo go fapanego, bafsa ba bantši ba Dihlatse ba ile ba hwetša batho bao ba ba theetšago gaešita le go hlompšha kudu ke dithaka tša bona ka baka la go emela ditumelo tša bona.

“Jehofa o tla go Thuša”

6, 7. (a) Ngwanenyana yo mongwe wa nywaga e 17 o ile a kgona bjang go nea bohlatse go bao a tsenago le bona ka klaseng? (b) O ithutile’ng go tšwa phihlelong ya Jennifer?

⁶ Eupša o ka rapa bjang sebete sa go bolela ka tumelo ya gago? Ke ka baka la’ng o sa ikemišetše go botega le go bolela ka go lebanya ge batho ba go botšiša ka bodumedi bja gago? Ela hloko phihlelo ya Jennifer wa nywaga e 17. O re: “E be e le nako ya matena sekolong. Go ile gwa direga gore banenyana ba ke dutšego le bona tafoleng ba bolele ka bodumedi, gomme yo mongwe wa banenyana o ile a mpotšiša gore bodumedi bja-ka ke bofe.” Na Jennifer o be a tšhogile ge a be a nea karabo? O dumela ka gore: “Ee, ka gobane ke be ke sa kgonthišega ka mohuta wa karabelo yeo ke bego ke tla e hwetša.” Ka gona Jennifer o ile a dira’ng? O tšwela pele gore: “Ke ile ka botša banenyana gore ke yo mongwe wa Dihlatse tša Jehofa. Mathomong ba ile ba bonagala ba maketše. Go bonagala ba be ba na le kgopolo ya gore Dihlatse tša Jehofa ke batho ba sa tlwaelegago. Se se ile sa ba tutueletša go mpotšiša dipotšišo, gomme ke ile ka kgona go lokiša dikgopolo tše dingwe tše fošagetšego tšeo ba bego ba e-⁠na le tšona. Gaešita le ka morago ga letšatši leo, ka dinako tše dingwe ba bangwe ba banenyana ba ile ba fela ba e-⁠tla go nna ka dipotšišo.”

⁷ Na Jennifer o ile a itshola ka baka la ge a ile a diriša sebaka se gore a bolele ka ditumelo tša gagwe? Le gatee! O re: “Ka morago ga nako ya matena, ke ile ka ikwa ke thabile kudu ka seo. Gona bjale banenyana bao ba na le kgopolo e kaone ya mabapi le gore Dihlatse tša Jehofa ge e le gabotse ke bomang.” Bjale keletšo ya Jennifer ke e bonolo: “Ge o hwetša go le thata go nea bohlatse go bao o tsenago le bona ka klaseng goba go barutiši, rapela thapelo e kopana. Jehofa o tla go thuša. O tla thabela gore o dirišitše ka bohlale sebaka sa gago sa go nea bohlatse.”​—1 Petro 3:⁠15.

8. (a) Nehemia o ile a thušwa bjang ke thapelo ge a be a lebeletšane le boemo bjo a bego a sa bo letela? (b) Ke maemong afe a mangwe sekolong ao ka ona o ka swanelwago ke go rapela Jehofa thapelo e kopana ya setu?

⁸ Ela hloko gore Jennifer o kgothaletša ‘go rapela Jehofa thapelo e kopana’ ge sebaka sa go nea bohlatse ka tumelo ya gago se itšweletša. Se ke sona seo Nehemia, motšheledi wa Kgoši ya Peresia e lego Arithasasitha a ilego a se dira ge a be a lebeletšane le boemo bjo a bego a sa bo letela. Nehemia o be a bonagala a gateletšegile ka gobane o be a boditšwe ka boemo bjo bo sa kgahlišego bja ba-Juda gomme o be a tseba gore maboto le dikgoro tša Jerusalema di be di senyegile kudu. Kgoši e ile ya lemoga gore Nehemia o be a bonagala a tshwenyegile, ka gona o ile a botšiša Nehemia gore bothata e be e le eng. Pele a ka araba, Nehemia o ile a rapelela tlhahlo. Ke moka ka sebete o ile a kgopela tumelelo ya go boela Jerusalema go ya go thuša go aga lefsa motse wo o welego. Arithasasitha o ile a nea Nehemia tumelelo. (Nehemia 2:​1-⁠8) Thuto ke efe? Ge e ba o ikwa o tšhogile ge sebaka sa go nea bohlatse mabapi le tumelo ya gago se tšwelela, o se ke wa lebala go rapela ka setu. Petro o ngwadile gore: “Dipelaêlô tša lena ka moka di lahleleng xodimo xa [Jehofa], xobane ké Yêna a Le belaêlêlaxo.”​—1 Petro 5:⁠7; Psalme 55:⁠22.

“Le Dulê lè Loketše xo Ipolêla”

9. Leah wa nywaga e 13 o ile a kgona bjang go sepediša dikopi tše 23 tša puku ya Dipotšišo tša Bafsa?

⁹ Ela hloko phihlelo e nngwe. Leah wa nywaga e 13 o be a bala puku ya Dipotšišo tša Bafsa le Dikarabo tše Šomago * nakong ya gagwe ya matena kua sekolong. O re: “Ba bangwe ba be ba ntebeletše gomme kapejana lešaba le ile la tla la mpokanela. Ba ile ba thoma go mpotšiša gore puku e be e le mabapi le eng.” Ge sekolo se e-⁠tšwa, banenyana ba bane ba ile ba kgopela Leah kopi ya puku ya Dipotšišo tša Bafsa. Go se go ye kae banenyana ba be ba adimana le ba bangwe puku ye, gomme le bona ba ile ba nyaka kopi. Dibekeng tše mmalwa tše latetšego, Leah o ile a sepediša dikopi tše 23 tša puku ya Dipotšišo  tša Bafsa go bao a tsenago le bona sekolo le go bagwera ba bona. Na go be go le bonolo gore Leah a bolele ge mathomong ba be ba botšiša ka puku ye a bego a e bala? Le gatee! O dumela ka gore: “Mathomong ke be ke tšhogile. Lega go le bjalo, ke ile ka rapela gomme ke be ke tseba gore Jehofa o be a e-⁠na le nna.”

10, 11. Ngwanenyana yo monyenyane wa mo-Isiraele o ile a kgona bjang go thuša molaodi wa madira a Siria go ithuta ka Jehofa, gomme ke diphetogo dife tšeo a ilego a di dira ka morago ga moo?

¹⁰ Phihlelo ya Leah e ka go gopotša ka boemo bjo bo swanago le bjoo ngwanenyana yo monyenyane wa mo-Isiraele yo a bego a išitšwe bothopša kua Siria a ilego a lebeletšana le bjona. Naemane, e lego molaodi wa madira a Siria e be e le molephera. Mosadi wa gagwe a ka be a ile a thoma poledišano yeo e ilego ya tutueletša ngwanenyana yo yo monyenyane go bolela ka tumelo ya gagwe. O itše: “Xe mong wa-ka a ka bê a e-⁠ya xo moporofeta wa Samaria, a ka bê a mo fodiša lephêra lé.”​—2 Dikxoši 5:​1-⁠3.

¹¹ Ka baka la sebete sa ngwanenyana yo yo monyenyane, Naemane o ile a tseba “xe mo lefaseng ka moka xò se’ Modimo xe e se xo Isiraele.” O ile a ba a ikana gore ‘a ka se hlwe a iša didimo medimong e šele, ge e se go Morena.’ (2 Dikxoši 5:​15, 17) Ka ntle le pelaelo Jehofa o ile a šegofatša go ba le sebete ga ngwanenyana yoo yo monyenyane. A ka dira e bile o tla dira se ka mo go  swanago go bafsa ba bangwe lehono. Leah o ile a hwetša seo e le sa therešo. Ge nako e dutše e tšwela pele, ba bangwe ba bao a tsenago le bona sekolo ba ile ba tla go yena gomme ba mmotša gore puku ya Dipotšišo tša Bafsa e be e ba thuša ka boitshwaro bja bona. Leah o re: “Ke be ke thabile ka gobane ke be ke tseba gore ke be ke thuša ba bangwe go ithuta ka mo go oketšegilego ka Jehofa le go ba thuša go fetoša bophelo bja bona.”

12. O ka matlafatšwa bjang go lweleng tumelo ya gago?

¹² O ka ba le diphihlelo tše di swanago le tša Jennifer le Leah. Latela keletšo ya Petro, yoo a ngwadilego gore bjalo ka Mokriste ka mehla o swanetše go ‘dula o loketše go ipolela ka kholofelo ye e lego mo go wena ge o fetola mang le mang e a go sekišago ka yona, o dire seo ka boleta le ka tlhompho e tseneletšego.’ (1 Petro 3:​15, bapiša le NW.) O ka dira seo bjang? Ekiša mokgwa wa Bakriste ba lekgolong la pele la nywaga bao ba ilego ba rapela Jehofa gore a ba thuše go bolela “ka sebete.” (Ditiro 4:​29, NW) Ke moka e ba le sebete sa go bolela le ba bangwe ka ditumelo tša gago. O ka makatšwa ke ditla-morago. Go feta moo, o tla thabiša pelo ya Jehofa.

Dibidio le Mešomo e Kgethegilego

13. Bafsa ba bangwe ba ile ba diriša dibaka dife ka bohlale bakeng sa go nea bohlatse? (Bona mapokisi a lego go matlakala 20 le 21.)

¹³ Bafsa ba bantši ba ile ba hlalosa boemo bja tumelo ya bona go bao ba tsenago le bona sekolo goba go barutiši ba bona ka go diriša dibidio. Ka dinako tše dingwe, mešomo ya sekolo le yona e ile ya bula dibaka tša go tumiša Jehofa. Ka mohlala, bašemane ba babedi ba nywaga e 15 bao bobedi bja bona e lego Dihlatse tša Jehofa, ba ile ba newa mošomo wa sekolo wo o nyakago nyakišišo wa gore ba ngwale pego ka bjo bongwe bja madumedi a lefase, e le karolo ya thuto ya bona ya histori ya lefase. Bobedi bja bona ba ile ba šoma gotee go ngwala pego ka Dihlatse tša Jehofa, ba diriša puku ya Dihlatse tša Jehofa​—Bagoeledi ba Mmušo wa Modimo e le mothopo wa bona. * Le gona ba ile ba swanelwa ke go nea pego ya metsotso e mehlano. Ka morago ga  moo, morutiši le barutwana ba bile le dipotšišo tše dintši kudu moo bašemane ba ilego ba ema ka pele ga klase ka metsotso e 20 e oketšegilego. Dibeke tše mmalwa ka morago ga moo, bao ba tsenago le bona sekolo ba ile ba tšwela pele ba ba botšiša dipotšišo ka Dihlatse tša Jehofa!

14, 15. (a) Ke ka baka la’ng go boifa batho e le moreo? (b) Ke ka baka la’ng o swanetše go ikwa o lokologile go abelana ditumelo tša gago le ba bangwe?

¹⁴ Bjalo ka ge diphihlelo tše di fetilego di bontšha, o ka hwetša ditšhegofatšo tše kgolo ka go botša ba bangwe ka ditumelo tša gago bjalo ka yo mongwe wa Dihlatse tša Jehofa. O se ke wa dumelela go boifa batho go go thibela go ba le tokelo le lethabo la go thuša ba bangwe go tseba Jehofa. Beibele e re: “Xo boifa batho xo wetša moreong; xo pholoxa e a bôʹtaxo Morêna.”​—Diema 29:⁠25.

¹⁵ Gopola gore bjalo ka mofsa wa Mokriste, o na le selo seo dithaka tša gago di se nyakago ka mahlo a mahwibidu​—tsela e kaone kudu ya bophelo gona bjale le kholofetšo ya bophelo bjo bo sa felego nakong e tlago. (1 Timotheo 4:⁠8) Ka mo go kgahlišago, kua United States​—moo o ka naganago gore batho ga ba na taba goba ba inaganela ka noši​—nyakišišo e nngwe e utollotše gore bonyenyane seripa-gare sa bafsa se tšeela bodumedi godimo, le gore kotara e bolela gore tumelo ya bodumedi ke “tutuetšo ya bohlokwa-hlokwa” maphelong a bona. Go bonagala boemo e le bjo bo swanago dikarolong tše dingwe tše dintši tša lefase. Ka gona, go na le kgonagalo e kgolo ya gore dithaka tša gago sekolong di tla thabela go theetša seo o tla se bolelago ka Beibele.

Bjalo ka ge o le Mofsa, Batamela Kgaufsi le Jehofa

16. Ka ntle le go bolela ka yena, ke’ng seo o ka se dirago go thabiša Jehofa?

¹⁶ Ke therešo gore go thabiša pelo ya Jehofa go akaretša go feta go fo bolela ka yena. Le gona o swanetše go dumelelanya boitshwaro bja gago le ditekanyetšo tša gagwe. Moapostola Johane o ngwadile gore: “Leratô la xo rata Modimo ké xe re e-⁠ya ka melaô ya xaxwe; xomme melaô ya xaxwe xa se e thata.” (1 Johane 5:⁠3) O tla hwetša se e le sa therešo ge e ba o batamela kgaufsi le Jehofa. O ka dira seo bjang?

17. O ka batamela bjang kgaufsi le Jehofa?

¹⁷ Iphe nako ya go bala Beibele le dikgatišo tše di theilwego Beibeleng. Ge o dutše o ithuta ka Jehofa, o tla hwetša go le bonolo go mo kwa le go botša ba bangwe ka yena. Jesu o itše: “Motho yo botse ó tšweletša tse botse dì e-⁠tšwa lehumong le le botse la pelo . . . xobane molomo wa xaxwe o bolêla tše pelo e di falatšaxo.” (Luka 6:​45) Ka gona tlatša pelo ya gago ka dilo tše botse. Ke ka baka la’ng o sa bee dipakane tabeng ye? Mohlomongwe o ka kaonefatša tabeng ya go lokišeletša diboka tša phuthego bekeng e tlago. Pakane ya gago e latelago e ka ba go tšea karolo ka go nea karabo e kopana yeo e tšwago pelong. Go ba gona, go bohlokwa go diriša dilo tšeo o ithutago tšona.​—Ba-Filipi 4:⁠9.

18. Gaešita le ge o lebeletšana le tlaišo, o ka kgodišega ka eng?

¹⁸ Ditšhegofatšo tše di tlišwago ke go hlankela Jehofa ke tše di swarelelago​—ke tša ka mo go sa felego e le ka kgonthe. Ke therešo gore ka dinako tše dingwe o ka lebeletšana le tekanyo e itšego ya kganetšo goba go kwerwa ka baka la go ba yo mongwe wa Dihlatse tša Jehofa. Eupša nagana ka Moše. Beibele e re ‘o be a lebeletše moputso wo a tlogo o bona.’ (Ba-Hebere 11:​24-26) Le wena o ka kgodišega gore Jehofa o tla go putsa bakeng sa maiteko ao o a dirago a go ithuta ka yena le go bolela ka yena. Ka kgonthe, le ka mohla a ka se ke a ‘lebala modiro wa gago, le lerato le o itapišitšego ka lona leineng la gagwe.’​—Ba-Hebere 6:⁠10.

[Mengwalo ya ka tlase]

[Dipotšišo tša Thuto]

[Caption on page 18]

Bao ba nago le phihlelo ba ka thuša go tlwaetša bafsa go hlankela Jehofa

Na o a Gopola?

• Ke ka baka la’ng o ka kgodišega gore Jehofa o tšeela tirelo ya gago godimo?

• Ke mehuta efe ya go nea bohlatse sekolong yeo ba bangwe ba ilego ba hwetša e le e atlegago?

• O ka matlafatšwa bjang bakeng sa go nea bohlatse go bao o tsenago le bona ka klaseng?

• O ka batamela bjang kgaufsi le Jehofa?

[Lepokisi/Diswantšho go letlakala 20]

Gaešita le ba Banyenyane ba Tumiša Jehofa!

Gaešita le bana ba banyenyane ba ile ba kgona go nea bohlatse sekolong. Ela hloko diphihlelo tše.

Klase ya grade 5 ya Amber wa nywaga e lesome e be e bala puku ya mabapi le go tlaiša ga ma-Nazi ba-Juda nakong ya Ntwa ya II ya Lefase. Amber o ile a dira phetho ya go tlišetša morutiši wa gagwe bidio ya Purple Triangles. Morutiši o ile a makatšwa ke go tseba gore Dihlatse tša Jehofa le tšona di ile tša tlaišwa ka tlase ga mmušo wa Nazi. Morutiši o ile a bontšha klase ka moka bidio yeo.

Ge a e-⁠na le nywaga e seswai, Alexa o ile a ngwalela klase ya gagwe lengwalo a hlalosa lebaka leo ka lona a ka se kgonego go tšea karolo go bineng ga bona Keresemose. Morutiši wa gagwe o be a kgahlegile kudu moo a ilego a kgopela Alexa go balela klase ya gagwe lengwalo ka go hlaboša le go le balela le diklase tše dingwe tše pedi! Go ya mafelelong a lona o itše: “Ke rutilwe go hlompha ba bangwe bao ditumelo tša bona di sa swanego le tša-ka, gomme ke a le leboga ka go hlompha phetho ya-ka ya go se bine Keresemose.”

Kapejana ka morago ga go thoma grade 1, Eric o ile a ya le Puku Ya-ka ya Ditaba tša Beibele sekolong gomme a kgopela tumelelo ya go e bontšha bao a tsenago le bona ka klaseng. Morutiši wa gagwe o itše: “Ke na le tšhišinyo e kaone. Ke ka baka la’ng o sa balele klase kanegelo e nngwe?” Eric o ile a dira bjalo. Ka morago, o ile a kgopela bohle bao ba bego ba nyaka kopi ya puku gore ba emiše matsogo. Barutwana ba lesome-seswai​—go akaretša le morutiši​—ba ile ba dira bjalo! Ga bjale Eric o ikwa gore o na le tšhemo ya gagwe e kgethegilego.

Whitney wa nywaga e senyane o kgahlišwa ke poroutšha ya Dihlatse tša Jehofa le Thuto. * O re: “Gantši mma o nea barutiši ba-ka poroutšha ye ngwaga le ngwaga, eupša lenyaga ba neilwe ke nna. Ka thušo ya poroutšha yeo, morutiši wa-ka o ile a nkgetha go ba ‘morutwana yo kaone-kaone wa beke.’”

[Mengwalo ya ka tlase]

[Lepokisi/Diswantšho go letlakala 21]

Maemo ao go Wona ba Bangwe ba Ilego ba a Dirišetša go Botša ba Bangwe ka Tumelo ya Bona

Ba bangwe ge ba be ba abetšwe pego goba mošomo wa sekolong, ba ile ba kgetha sehlogo seo se ba dumeletšego go nea bohlatse

Bafsa ba mmalwa ba ile ba nea morutiši wa bona bidio goba kgatišo yeo e lego mabapi le taba yeo e ahla-ahlwago ka klaseng

Ge bafsa ba bangwe ba be ba bala Beibele goba kgatišo yeo e theilwego Beibeleng nakong ya go khutša ba ile ba batamelwa ke bafsa ba itšego bao ba ilego ba ba botšiša dipotšišo