Botho bjo Lerato bo Bohlokwa Gakaaka’ng?

BEIBELE e re: “Se se kgahlišago ka motho wa lefaseng ke botho bja gagwe bjo lerato.” (Diema 19:​22, NW) Ka kgonthe, ditiro tša botho tšeo di tutuetšwago ke lerato ke tšeo di kgahlišago e le ka kgonthe. Lega go le bjalo, ka Beibeleng polelwana “botho bjo lerato” e šupa go botho bjo bo ka bago bo theilwe tswalanong yeo e bego e dutše e le gona, bjalo ka yeo e theilwego tirong ya nakong e fetilego ya botho yeo e diretšwego motho yo mongwe. Ka go rialo, e akaretša kgopolo ya potego e sa kwanantšhego.

Kgoši Joase wa Juda o ile a palelwa ke go hlagolela seka se se kgahlišago. O be a na le molato o mogolo wa gore a leboge rakgadi’agwe gotee le Joyada yo e lego monna wa rakgadi’agwe. Ge Joase a be a le ka tlase ga ngwaga, makgolo’agwe yo šoro o ile a itira mohumagadi gomme a bolaya bana babo Joase ka moka, bao e bego e le baja-bohwa ba sedulo sa bogoši. Lega go le bjalo, o ile a palelwa ke go bolaya Joase ka gobane rakgadi’agwe le monna wa rakgadi’agwe ba ile ba mo uta ka šedi. Le gona ba ile ba mo ruta Molao wa Modimo. Ge Joase a be a na le nywaga e šupago, monna wa rakgadi’agwe o ile a diriša matla a gagwe a bolaodi e le moperisita yo a phagamego go bolaya mohumagadi yo šoro le go bea Joase go ba kgoši.​—2 Koronika 22:​10–23:⁠15.

Joase yo monyenyane o ile a buša ka tsela e botse e le kgoši go fihla lehung la monna wa rakgadi’agwe, eupša ka morago ga fao o ile a retologela borapeding bja medimo ya diswantšho. Modimo o ile a romela Sakaria, yoo e bego e le morwa wa Joyada gore a lemoše Joase ka bohlanogi bja gagwe. Joase o ile a laela gore Sakaria a thungwe ka mafsika. A tiro e boifišago gakaakang ya go se botegele lapa leo a le kolotago mo gontši kudu!​—2 Koronika 24:​17-⁠21.

Beibele e re: “Kxoši Joase ó be a lebetše tše Joyada tataxo Sekaria a mo diretšexo ka botho, ’me a bolaya morwa wa xaxwe.” Ge a be a e-⁠hwa, Sakaria o itše: “Morêna a a di bônê, a latišê!” Ka go rereša ga mantšu a Sakaria, Joase o ile a babja kudu gomme o ile a bolawa ke bahlanka ba gagwe.​—2 Koronika 24:​17-⁠25.

Go e na le go ba bjalo ka Kgoši Joase, bohle bao ba latelago keletšo ye ba tla ba le bokamoso bjo bo kgahlišago: “A [botho bjo lerato, NW] le therešô di se Xo tloxêlê. . . . Ké mo O tl’o xo hwetša mahlô a Modimo le a batho à Xo lebeletše ka leratô le ka botho.”​—Diema 3:​3, 4.