Ge Boboledi e E-⁠ba Modiro o sa Lebalegego

“Letšatši le fiša tšhiri-tšhiri. Go bonala tsela ya dithabeng e le e telele. Ka morago ga go fenya mapheko a mmalwa, mafelelong re fihlelela pakane ya rena: motsana wo o lego lekatana. Go lapa go fetoga lethabo ge re kokota ntlong ya pele gomme re amogelwa ka borutho. Ge letšatši le sobela, re šetše re sepedišitše dipuku ka moka tšeo re tlilego le tšona gomme re thomile dithuto tše mmalwa tša Beibele. Batho ba fagahlela go ithuta. Ga bjale re swanetše go sepela, eupša re holofetša go boa.”

DIPHIHLELO tše bjalo di tlwaelegile sehlopheng se sengwe sa badiredi ba babulamadibogo ba kua Mexico. Ba ba ikemišeditše go tšea karolo ka phišego go phethagatšeng thomo yeo Jesu Kriste a e neilego barutiwa ba gagwe e rego: “La tlo ba dihlatse tša-ka . . . xo fihla maxomong a lefase.” (Ditiro 1:⁠8) Kua Mexico, masolo a kgethegilego a go dira boboledi​—a bitšwago mašemo ao a abetšwego babulamadibogo​—a rulagantšwe bakeng sa go fihlelela mašemo ao a sa abelwago diphuthego, ka gona ga se ka mehla a hwetšago ditaba tše dibotse tša Mmušo wa Modimo. Gantši a ke mašemo ao a lego lekatana goba ao go lego thata go a fihlelela. Diphuthego tše di lego lekatana tše di nago le tšhemo e kgolo le tšona di a thušwa.

E le gore go ka tsebja gore ke ditikologo dife tša naga tšeo di tlago go šongwa ka masolo a mašemo ao a abetšwego babulamadibogo, ofisi ya lekala ya Dihlatse tša Jehofa e hlahloba dinyakwa tša tšhemo yeo. * Ge se se dirilwe, go abelwa dihlopha tša babulamadibogo ba kgethegilego go ya go šoma tšhemo yeo. Ba newa dikoloi tšeo di swanelegago bakeng sa ditsela tša dithabeng tšeo di sa alwago sekontiri. Le gona dikoloi di šomišwa e le bobolokelo bja dipuku le mafelo a go robala ge e ba go nyakega.

Go Arabela ka go se Dika-dike

Ga e sa le go tloga ka October 1996, go ile gwa fetišetšwa ditaletšo go baboledi ba bangwe ba ditaba tše dibotse go tšea karolo modirong wo, gore ba šome gotee le babulamadibogo ba kgethegilego. Bagoeledi ba mmušo gotee le babulamadibogo ba ka mehla bao ba ikemišeditšego go hlankela moo go nyakegago thušo e kgolo gona, ba ile ba tsenela lesolo dinakong tše di fapa-fapanego. Ba bangwe ba abelwa diphuthegong tše di lego mašemong a abetšwego babulamadibogo e le gore ba hlokomele tšhemo le go hlagolela kgahlego yeo e hweditšwego. Bagoeledi ba bantši ba bafsa le babulamadibogo ba amogetše ditaletšo tše gomme ba humišitšwe ka diphihlelo tše di kgothatšago kudu.

Ka mohlala, Abimael e lego Mokriste yo mofsa yo a bego a šoma mošomo wo o lefago gabotse khamphaning ya megala ya di-cellular, o ile a dira phetho ya go tšea karolo modirong wa boboledi mafelong ao a lego lekatana. Ge bathwadi ba gagwe ba be ba lemoga gore o be a tlo tloga mošomong, ba ile ba ithapela go mo hlatloša le go oketša mogolo wa gagwe. Bašomi-gotee le yena ba ile ba mo gatelela, ba mo phegelela ka gore se e be e le sebaka sa moswana-noši le gore e be e le bošilo gore a se gane. Lega go le bjalo, Abimael o be a ikemišeditše go thekga lesolo le le kgethegilego la modiro wa boboledi ka dikgwedi tše tharo. Ka morago ga go thabela tirelo ye, Abimael o ile a phetha ka go dulela ruri phuthegong yeo e lego lekatana moo go bego go nyakega thušo e kgolo ya bagoeledi ba Mmušo. Ga bjale o na le mošomo wa tlasana gomme o ithutile go nolofatša bophelo bja gagwe.

Lebakeng le lengwe, Julissa o ile a swanela ke go sepela diiri tše 22 ka pese e le gore a fihle kabelong  ya gagwe. Karolong ya mafelelo ya leeto la gagwe, o ile a tlogelwa ke pese ya mafelelo. Lega go le bjalo, go be go na le bene yeo e bego e rwala bašomi. Julissa o ile a rapa sebete gomme a ba kgopela gore ba mo tšee kgopu. Ka mo go kwagalago, o be a tšhogile ka ge e be e le yena mosadi a nnoši gare ga banna ba bantši. Ge a be a thoma go bolela le lesogana le lengwe, o ile a lemoga gore e be e le yo mongwe wa Dihlatse tša Jehofa! Julissa o gopola gore: “Ka ntle le fao, mootledi wa bene e be e le mogolo phuthegong ye ke bego ke abetšwe go yona!”

Batšofadi ba Tšea Karolo

Lega go le bjalo, modiro wo ga se wa bafsa feela. Adela e lego kgaetšedi yo a tšofetšego, ka mehla o be a nyaka go neela nako e oketšegilego modirong wa boboledi. O ile a hwetša sebaka ge a be a amogela taletšo ya go tšea karolo modirong wo o kgethegilego wa boboledi. O laodiša ka gore: “Ke ile ka thabela kabelo ya-ka kudu moo ke ilego ka kgopela bagolo ba phuthego go ntumelela gore ke dulele fao sa ruri. Ke thabile ka gobane gaešita le ge ke tšofetše, ke sa dutše nka dirišwa ke Jehofa.”

Ka mo go swanago, a tutueditšwe ke tebogo ya gagwe ya go leboga Jehofa le lerato la gagwe la go rata magagabo, Martha wa nywaga e 60 o ile a itira yo a hwetšagalago bakeng sa go tšea karolo lesolong le. Ka go lemoga gore bokgole bja tšhemo le ditsela tša yona tše di bego di sa sepelege di be di šitiša sehlopha sa gagwe go fihlelela batho ka moka, o ile a rekela babulamadibogo koloi gore ba e diriše. Moneelo wa kgaetšedi yo o dirile gore go kgonege go akaretša tšhemo e oketšegilego gotee le go abelana therešo ya Beibele le batho ba oketšegilego.

Karabelo e Ruthetšago Pelo

Pakane ya bao ba tšeago karolo masolong a a kgethegilego a boboledi ke go ‘dira barutiwa.’ Tabeng ye, mafelelo e bile a mabotse kudu. Batho bao ba dulago lekatana ba amogetše ditherešo tše di tšwago ka Beibeleng tšeo di phološago bophelo. (Mateo 28:​19, 20) Go thomilwe dithuto tša Beibele tše dintši. Tše di swarwa ke bagoeledi ba tikologong yeo goba ke baebangedi bao ba ilego ba dula tšhemong yeo. Mabakeng a mangwe, go ile gwa rulaganywa dihlopha tša bagoeledi, gomme go tše dingwe go ile gwa hlongwa diphuthego tše nyenyane.

Magdaleno le bašomi-gotee le yena ba ile ba diriša dinamelwa tša batho bohle gore ba fihle tšhemong e lego lekatana yeo ba bego ba e abetšwe. Ge ba le tseleng, ba ile ba diriša gabotse sebaka sa go bolela le mootledi. “Monna yo o ile a re botša gore bekeng ya go feta, Dihlatse tše dingwe di be di etetše lapeng la gagwe mola yena a  se gona. Ge a boa, lapa la gagwe le ile la mo anegela tšeo le di kwelego. Re ile ra mmotša gore re be re sa dule moo eupša re tšwa mafelong a mmalwa mo nageng bakeng sa go thekga lesolo le le le kgethegilego la go bolela le gore ka moka ga rena re be re itefeletše ditshenyagalelo tša tsela. A kgahlegile, mootledi o ile a bolela gore o tla thoma thuto ya Beibele gotee le lapa la gagwe yona bekeng yeo. O ile a ba a thekga mošomo ka gore a se ke a re lefiša.”

Le gona Magdaleno o be a kgahlišitšwe kudu ke karabelo ya badudi ba dithabeng tša Chiapas. “Nna le mosadi wa-ka re ile ra thabela go abelana molaetša wa Mmušo le sehlopha sa bafsa ba 26 bao ba bego ba tsena Kereke ya Presbyterian. Ka moka ga bona ba ile ba theetša ka kelohloko ka metsotso e 30. Ba ile ba ntšha Dibeibele tša bona, gomme re ile ra kgona go ba nea bohlatse bjo bo tseneletšego ka merero ya Jehofa. Bontši bja batho bo na le Dibeibele tša bona ka leleme la se-Tzeltal.” Go ile gwa thongwa dithuto tša Beibele tše mmalwa tše di tšwelago pele.

Kganetšo e Ile ya Okobala

Setšhaba se sengwe sa kua Chiapas ga se sa ka sa kwa molaetša wa Beibele ka nywaga ya ka godimo ga e mebedi ka baka la kganetšo ya batho ba bangwe. Teresa e lego moebangedi wa nako e tletšego, o ile a lemoga gore Dihlatse tše dingwe di be di boifa go bolela motsaneng woo. “Sa go re makatša ka moka ga rena, batho ba be ba ikemišeditše go theetša. Ka morago ga go fetša boboledi, pula e ile ya thoma go na ka matla. Ka ge re be re nyaka lefelo la go khuta, re ile ra tsena ka ngwakong wa motho yo a ilego a re amogela ka borutho yo leina la gagwe e lego Sebastián, yo a ilego a re dumelela go tsena gomme re šireletšege puleng. Re rile go tsena, ka mmotšiša ge e ba a šetše a ile a etelwa. E rile ge a re aowa, ka thoma go mo nea bohlatse gomme ka thoma thuto ya Beibele ke diriša puku ya Tsebo e Išago Bophelong bjo bo sa Felego. * Ge re feditše, Sebastián o ile a re kgopela ka megokgo gore re boe gape go tla go ithuta le yena.”

Sehlopha se sengwe sa babulamadibogo seo se ilego sa etela Chiapas se bega gore: “Ka thušo ya Jehofa re bile le mafelelo a mabotse. Bekeng ya mathomo re ile ra thoma dithuto tše 27, go ya bobedi re ile ra laletša batho go tla go bona bidio ya The Bible​—Its Power in Your Life. Go bile le batho ba masome-tshela. Yo mongwe le yo mongwe o ile a e rata. Mafelelong, re ile ra šišinya go thoma thuto ya Beibele ya sehlopha. Ka mo go makatšago, go ile gwa thongwa dithuto tša dihlopha tše pedi motsaneng wo.

“Ka morago ga ge re feditše go šoma tšhemo ye re e abetšwego, re ile ra boela go etela motsana woo e le gore re matlafatše batho bao ba thabelago le go bona kamoo dithuto tša Beibele tša dihlopha tše di rulagantšwego di bego di tšwela pele ka gona. Re ile ra ba laletša go tla polelong  ya phatlalatša le Thutong ya Morokami. Lega go le bjalo, go be go se na lefelo le legolo ka mo go lekanego bakeng sa go swarela diboka. Motho yo a bego a butše legae la gagwe bakeng sa sehlopha sa thuto o ile a ba bontšha ka mafuri a ntlo ya gagwe gomme a re: “Diboka di ka swarelwa ka mafuri.’”

Mafelo-bekeng ao babulamadibogo bao ba etilego gotee le batho bao ba thabelago, ka mafolofolo ba ile ba thuša go lokišeletša jarata e le gore e ka dirišwa bakeng sa diboka. Sebokeng sa mathomo go bile le batho ba 103. Ga bjale motsaneng woo go swarwa dithuto tša Beibele tše 40.

“Phihlelo e Kgahlišago Kudu”

Ka ntle le go ba le mafelelo a kgahlišago modirong wa boboledi, bao ba ilego ba tšea karolo modirong wo wa boebangedi ba ile ba ikhola kudu. María yo e lego mmulamadibogo yo mofsa yo a ilego a tšea karolo go le lengwe la masolo a, o bontšha maikwelo a gagwe ka tsela ye: “E bile phihlelo e kgahlišago kudu ka baka la mabaka a mabedi. Lethabo la-ka le ile la oketšega modirong wa boboledi, gomme tswalano ya-ka le Jehofa e ile ya ba ya kgaufsi kudu. Ka nako e nngwe ge re be re namelela thabeng, re ile ra ikwa re lapile kudu. Ka morago ga go kgopela Jehofa gore a re thuše, re ile ra bona go phethagala ga lengwalo la Jesaya 40:​29-31 leo le rego: ‘Baholofedi ba Morêna bôná ba fiwa matla a mafsa.’ Ka gona re ile ra fihla fao gomme ra swara dithuto le batho bao ba ilego ba re amogela ka borutho kudu.”

Mmulamadibogo yo mongwe yo mofsa e lego Claudia wa nywaga e 17 o re botša gore: “Ke holegile kudu. Ke ithutile go ba le bokgoni bjo bo oketšegilego bodireding, e lego seo se nneilego lethabo le legolo kudu, gomme se se ile sa lebiša go ipeeleng dipakane tša moya. Le gona ke godile moyeng. Mma o be a ntirela selo se sengwe le se sengwe ka gae. Ga bjale ka ge ke na le phihlelo e oketšegilego, ke na le boikarabelo kudu. Ka mohlala, ke be ke tlwaetše go kgetha kudu dilo tšeo ke di jago. Eupša ga bjale ke ile ka swanelwa ke go itumelelanya le maemo a fapa-fapanego, ga ke sa ngongorega ka dijo. Mohuta wo wa tirelo o nthušitše go hlagolela ditswalano tše dibotse kudu. Re abelana selo se sengwe le se sengwe seo re nago le sona e bile re a thušana.”

Puno e Thabišago

Mafelelo a boiteko bjo bjo bo kgethegilego ke afe? Mathomong a 2002, babulamadibogo ba ka bago 28 300 ba bile le karolo masolong a a mašemo a abetšwego babulamadibogo. Ba ile ba swara dithuto tša Beibele tša ka godimo ga 140 000, ba neela diiri tša ka godimo ga tše dimilione tše pedi modirong wa boboledi. E le gore ba thuše batho go ithuta therešo ya Beibele, ba ile ba sepediša dipuku tše ka bago 121 000 le dimakasine tše ka bago 730 000. Ga se mo go sa tlwaelegago go babulamadibogo ba bangwe go swara dithuto tša Beibele tše 20 goba ka godimo ga tšeo.

Baamogedi ba tiro ye e botho ba tloga ba leboga ka go tšwa pelong bakeng sa maiteko a oketšegilego ao a dirwago go ba fihlelela ka molaetša wa Beibele. Go sa šetšwe bodiidi bja bona, ba bantši ba gapeletša gore bagoeledi ba amogele meneelo ya bona. Mokgekolo yo a diilago wa nywaga e 70 ka mehla o be a nea babulamadibogo ba ba mo etelago se sengwenyana. Ge e ba ba gana go se amogela, o be a lla. Lapa leo le bego le itlhokela le botša baebangedi ba nako e tletšego gore sethole se ba beeletše mae ka mo go kgethegilego, gomme le ba gapeletša go a tšea.

Sa bohlokwa kudu, batho bao ba botegago ba bontšha tebogo ya kgonthe ya go leboga dilo tša moya. Ka mohlala, mosadi yo mofsa o sepela a nnoši diiri tše tharo le seripa go ya dibokeng tša Bokriste, ga a foše le setee sa tšona. Go sa šetšwe bothata bja gagwe bja matolo, mokgekolo yo a thabelago o ile a sepela diiri tše pedi bakeng sa go amogela tlhahlo e tšwago ka Beibeleng nakong ya ketelo ya molebeledi wa mosepedi. Ba bangwe bao ba bego ba sa kgone go bala le go ngwala ba ile ba nyaka go ithuta go bala le go ngwala e le gore ba kgone go holwa ka mo go oketšegilego ke thuto ya Beibele. Maiteko a bona a ile a šegofatšwa ka mo go humilego.

Ka pukung ya Ditiro, Luka o hlalosa pono yeo moapostola Paulo a ilego a e bona ka gore: “A bôna monna wa Matsedonia à eme à mo rapêla a re: Selêla Matsedonia O re hlakodišê.” Paulo o ile a amogela taletšo yeo ka go rata. Lehono, ditikologong tšeo di lego lekatana tša Mexico, ba bantši ba arabetše ka moya o swanago, ba itira bao ba hwetšagalago bakeng sa go tsebatša ditaba tše dibotse “xo fihla maxomong a lefase.”​—Ditiro 1:⁠8; 16:​9, 10.

[Mengwalo ya ka tlase]

[Caption on page 9]

Dihlatse tše dintši tša Mexico di ile tša tšea karolo masolong a kgethegilego a boboledi