Lenyalo le le Bego le sa Letelwa la Boase le Ruthe

SEBOA sa kua kgaufsi le Betlelehema se a ema-ema ka modiro wa lehlabula. E bile letšatši le letelele. Monko wa mabele a gadikilwego o lemoša bašomi bao ba swerego ke tlala gore ke nako ya go ja. Yo mongwe le yo mongwe o tla thabela dienywa tša go šoma ga gagwe ka thata.

Boase, mong wa naga yo a humilego, o a ja le go nwa go fihlela a kgotsofala gomme a khutša kgaufsi le mokgobo o mogolo wa mabele. Ka morago, letšatši la puno le a sobela gomme yo mongwe le yo mongwe o nyaka lefelo le le kaonenyana gore a khutše. Ga bjale Boase a kgotsofetše, o a ikhupetša gomme o a robala.

Kopano ya ka Sephiring

Gare ga mpa ya bošego, Boase o tsoga a tonya e bile a roromela. Se se makatšago ke gore maoto a gagwe a be a apotšwe ka boomo, gomme motho yo mongwe o robetše fao! A sa bone gore ke mang yo a lego lefsifsing, o botšiša gore: “O mang?” Lentšu la mosadi le araba ka gore: “Ké nna Ruthe, molata wa xaxo. Phurolla diphêxô tša xaxo, molata wa xaxo a khutê; ka xobane mohunolodi wa-ka ké wene.”​—Ruthe 3:​1-⁠9.

Ba boledišana ba le noši lefsifsing. Basadi ga ba ke ba hwetšwa seboeng ka tsela ye. (Ruthe 3:​14) Lega go le bjalo, ka taletšo ya Boase, Ruthe o tšwela pele a robetše maotong a gagwe go fihlela ka masa ge a tsoga gomme a sepela, ka go rialo a phema ditatofatšo le ge e le dife tše di se nago motheo.

Na ye e be e le kopano ya lerato? Na monna yo o mogolo yo a lego bohlale o be a gokeditšwe ke Ruthe​—mohlologadi yo mofsa wa modiidi yo a tšwago nageng ya baheitene? Goba na Boase o be a ikhola ka maemo a Ruthe le go lewa ga gagwe ke bodutu bošegong bjoo? Dikarabo tša dipotšišo tšeo di mabapi le go botegela Modimo ka go se kwanantšhe le go mo rata. Le gona ditaba tše di akaretšwago ke tše di kgomago kudu.

Eupša Ruthe ke mang? Boikemišetšo bja gagwe ke bofe? Le gona monna yo wa mohumi e lego Boase, ke mang?

“Mosadi wa Sethakxa”

Nywaga pele ga tiragalo ye, kua Juda go ile gwa wa tlala. Lapa la ditho tše nne la mo-Isiraele​—Elimeleke; mosadi wa gagwe e lego Naomi; le barwa ba bona ba babedi, Mahlone le Kileone⁠—​le ile la hudugela nageng e nonnego ya Moaba. Barwa ba ile ba nyala basadi ba babedi ba ba-Moaba, Ruthe le Oropa. Ka morago ga go hwa ga banna ba bararo kua Moaba, basadi ba bararo ba ile ba kwa gore kua Isiraele maemo a be a le kaone. Ka gona Naomi​—ga bjale e le mohlologadi, a kwele bohloko kudu e bile a se na bana goba ditlogolo​—o ile a phetha ka gore a boele nageng ya gabo.​—Ruthe 1:​1-⁠14.

Ge ba le tseleng ya go boela Isiraele, Naomi o ile a rapeletša Oropa go boela go batho ba gabo. Ke moka Naomi o ile a botša Ruthe gore: “Šuo ngwan’eno ó boêla sethšabeng sa xabo; le wêna a k’O boêlê xaê le ngwan’eno.” Eupša Ruthe o itše: “A k’O se nkôtêlêlê wa re ke Xo tloxêlê . . . ka  xobane mo O yaxo, le nna ke ya xôna; . . . sethšaba sa xeno ke tlo re ke sa xešo; Modimo wa xaxo e tlo ba Modimo wa-ka; Mo O hwaxo, le nna ke tlo hwêla xôna ka bolokwa xôna.” (Ruthe 1:​15-17) Ka gona bahlologadi ba babedi bao ba diilago ba ile ba boela Betlelehema. Lerato la Ruthe le go hlokomela ga gagwe mmatswala’gwe di ile tša kgahliša baagišani ba fao kudu moo e lego gore ba ile ba mo lebelela e le ‘yo kaone go Naomi go fetiša barwa ba šupago.’ Ba bangwe ba ile ba mo hlalosa e le “mosadi wa sethakxa.”​—Ruthe 3:​11; 4:​15, bapiša le NW.

Mathomong a puno ya garase kua Betlelehema, Ruthe o ile a re go Naomi: “Lesa ke yê mašemong ke tôpê diakô, ke latêlê e a kaxo ntira ka botho.”​—Ruthe 2:⁠2.

Ka mahlatse o ile a tla mašemong a Boase, wa leloko la rratswala’gwe, Elimeleke. O ile a kgopela tumelelo ya go budutša go molebeledi. Boroto bja gagwe ge a budutša ke bjo bo kgahlišago kudu, gomme molebeledi o reta mošomo wa gagwe go Boase.​—Ruthe 1:​22–2:⁠7.

Mošireletši le Mogaugedi

Boase ke morapedi yo a ineetšego wa Jehofa. Mesong e mengwe le e mengwe, Boase o be a dumediša babuni ba gagwe ka mantšu a: “Morêna a bê le lena!” gomme ba araba ka gore: “Morêna a Xo šexofatšê!” (Ruthe 2:⁠4) Ka morago ga go lemoga boroto bja Ruthe mošomong wa gagwe le go tseba ka go botegela ga gagwe Naomi ka go se kwanantšhe, Boase o ile a direla Ruthe ditokišetšo tše di kgethegilego tša gore a budutše. Ka boripana, o mmotša gore: ‘Dula mašemong a-⁠ka; ga go nyakege gore o ye go a mangwe. O hlwe le basetsana ba-ka, o tla šireletšega ge o e-⁠na le bona. Ke laetše masogana gore a se go tshwenye. Ge o nyorilwe, ba tla go gela meetse.’​—Ruthe 2:​8, 9.

Ruthe o a inama gomme o re: ‘Botho bjo ke bo hwetša bjang mahlong a gago ke le motho wa mohuta o šele?’ Boase o araba ka gore: ‘Ke tsebišitšwe tšohle tšeo o di dirilego mmatswala’go ka morago ga lehu la monna wa gago​—kamoo o tlogetšego tatago, mmago, ba leloko la geno le naga ya geno gore o be gare ga batho bao o bego o sa ba tsebe. Anke Jehofa a go putse ka tše o di dirilego. Anke a go nee moputso o tletšego.’​—Ruthe 2:​10-⁠12.

Boase ga a leke go thopa lerato la gagwe. Theto yeo a e neago ke ya kgonthe. Ruthe o ikokobeditše e le ka kgonthe, o mo reta ka baka la khomotšo ya gagwe e kgodišago. O e lebelela e le e sa swanelago gomme o tšwela pele go šoma ka thata kudu. Ka morago, nakong ya dijo, Boase o bitša Ruthe: ‘Batamela, o je bogobe o ine thatana ya gago motogong.’ O ja go fihlela a kgotsofala gomme o bolokela Naomi dijo tšeo a tla mo išetšago tšona gae.​—Ruthe 2:⁠14.

Ge letšatši le sobela, Ruthe o šetše a ile a budutša mo e ka bago dirotwana tše 20 tša garase. O ile a e tšea gotee le dijo tše di šetšego a boela le tšona gae go Naomi. (Ruthe 2:​15-18) A thabišitšwe ke bontši bja tšona, Naomi o botšiša gore: “O tš’o tôpa kae lehono? . . . A xo šexofatšwê yêna-eo a Xo thakxilexo.” Ka go tseba gore e be e le Boase, Naomi o re: “A a šexofatšwê ke Morêna e a sa hlokišexo ba ba phelaxo le ba ba hwilexo botho bya xaxwe. . . . Monna eo ke moloko wa bô-rena; ké yêna e mongwe wa bahunolodi ba rena.”​—Ruthe 2:​19, 20.

 Go Hwetša “Bokhutšô”

A kganyoga go hweletša ngwetši ya gagwe “bokhutšô” goba legae, Naomi o ile a diriša sebaka seo go rulaganya go kgopela molopolodi, ka go dumelelana le Molao wa Modimo. (Lefitiko 25:​25; Doiteronomio 25:​5, 6) Ga bjale Naomi o eletša Ruthe ka tsela e atlegago kudu, gaešita le yeo e kgahlišago ka tsela e itšego mabapi le seo se swanetšego go dirwa​—tsela ya go tanya kgahlego ya Boase. Ruthe a itokišeditše e bile a lailwe gabotse, o ile a tsena seboeng sa Boase ka lefsifsi. O mo hwetša a robetše. O apola maoto a gagwe gomme o letela gore a tsoge.​—Ruthe 3:​1-⁠7.

Ge Boase a tsoga, tiro ya Ruthe ya go bontšha lerato ka ntle le pelaelo e mo thuša go lemoga seo se bolelwago ke kgopelo ya gagwe ya gore a ‘phurolle diphego tša gagwe gore molata wa gagwe a khute.’ Tiro ya Ruthe e dira gore mo-Juda yo a tšofetšego a lemoge tlamo ya gagwe ya go ba molopolodi, ka ge e be e le setho sa lapa labo monna wa Ruthe yo a hlokofetšego, Mahlone.​—Ruthe 3:⁠9.

Ketelo ya Ruthe ya bošego e be e sa letelwa. Lega go le bjalo, karabelo ya Boase e šišinya gore boipolelo bja Ruthe bja go lopollwa ga se gore bo be bo sa letelwa ka mo go feletšego. Boase o be a ikemišeditše go dira ka go dumelelana le kgopelo ya Ruthe.

Lentšu la Ruthe le swanetše go ba le ile la bontšha pelaelo e itšego, a gapeletša Boase go mo kgonthišetša ka gore: “Byale, ngwan’a-ka, O se kê wa boifa! Tše O di boletšexo ke tlo Xo dira tšôna; ka xobane motse ka moka wa selete sa xešo o tseba xe O le mosadi wa sethakxa.”​—Ruthe 3:⁠11.

Taba ya gore Boase o ile a tšea ditiro tša Ruthe e le tša kgonthe ka mo go feletšego e bonwa mantšung a gagwe a rego: “A Morêna a Xo šexofatšê, ngwan’a-ka. Leratô la xaxo la byale le phadiša la pele.” (Ruthe 3:​10) Tiragalong ya mathomo, Ruthe o ile a bontšha botho bjo lerato goba lerato le le sa kwanantšhego go Naomi. Tiragalong ya mafelelo ke ge ka go hloka boithati a itsebiša go Boase, monna yo a tšofetšego, ka gobane e be e le molopolodi. O be a ikemišeditše go godiša bana ka leina la Mahlone, e lego monna wa gagwe yo a hwilego le bakeng sa Naomi.

Molopolodi o Gogela Morago

Mesong e latelago, Boase o ile a laela wa leloko wa kgaufsi, yo a bolelwago e le “Se-mang-mang,” yo a tswalanago le Naomi kgaufsi go feta Boase. Boase o ile a bolela ka pele ga badudi le banna ba bagolo gore: ‘Ke swanetše go go nea tshwanelo ya gago ya gore o reke serapa sa Naomi, karolo ya naga yeo e bego e le ya monna wa gagwe Elimeleke, ka gobane o swanetše go e rekiša.’ Boase o tšwela pele ka gore: ‘Na o tla rata go e hunolla? Ge e ba o sa rate, o mpotše ke tsebe go e hunolla.’ Ka morago ga moo Se-mang-mang o ile a bolela gore o tla hunolla.​—Ruthe 4:​1-⁠4.

Eupša Se-mang-mang o be a le kgaufsi le go tlabega! Ga bjale Boase o botša dihlatse ka moka gore: “Xe O rêka thšemo yeo ya Naomi, O nyala Ruthe mosadi yola wa xa Moaba wa mohlôlôxadi. O tlo mo tšea xore mohu yola O mo tsošetše leina mo bohweng bya xaxwe.” A boifa gore a ka  senya bohwa bja gagwe, wa leloko wa kgaufsi o ile a gana tshwanelo ya gagwe ya go hunolla gomme a re: “Nna di a mpalêla.”​—Ruthe 4:​5, 6.

Go ya ka setšo, monna yo a bego a gana go hunolla o be a swanetše go rola seeta sa gagwe gomme a se nee wa gabo. Ka gona ge molopolodi a re go Boase, “Ithêkêlê wêna,” o tšwela pele ka go rola seeta sa gagwe. Ke moka Boase o botša banna ba bagolo le batho ka moka gore: “Lena Le dihlatse lehono tša xore, tše e bexo e le tša Elimeleke le tša Kileoni le tša Mahlone, ke di rekile xo Naomi. Le Ruthe mosadi yola wa xa Moaba ke a mo tšea, xore mohu yola ke mo tsošetšê leina bohweng bya xaxwe, . . . Le dihlatse lehono.”​—Ruthe 4:​7-⁠10.

Batho ka moka bao ba bego ba le kgorong ba re go Boase: “A Morêna a dirê xore mosadi eo a tsênaxo lapeng la xaxo a etšê Ragele le Lea, ba babedi bao ba bathei ba sethšaba sa Isiraele. Baa senatla mono Efuratha, O bê le leina mono Betlehêma.”​—Ruthe 4:​11, 12.

Ka tšhegofatšo ya batho, Boase o tšea Ruthe go ba mosadi wa gagwe. O mmelegela morwa yo a bitšwago Obede, gomme ka go rialo Ruthe le Boase e ba bagologolo ba Kgoši Dafida gomme mafelelong ba Jesu Kriste.​—Ruthe 4:​13-17; Mateo 1:​5, 6, 16.

“Moputsô o Tletšexo”

Pegong ka moka, go tloga go tumedišo ya gagwe ya mathomo e botho ya go dumediša bašomi go ya go go amogela boikarabelo bja go boloka lapa la Elimeleke, Boase o bontšha go ba monna wa moswana-noši​—monna wa go gata mogato le yo a nago le matla a bolaodi. Ka nako e swanago, e be e le monna yo a nago le boitshwaro, tumelo le potego. Le gona Boase o be a fana kudu, e le yo botho le yo a hlwekilego boitshwarong, le gona a e-⁠kwa ditaelo tša Jehofa ka mo go tletšego.

Ruthe o hlaolwa kudu ka lerato la gagwe la go rata Jehofa, ka lerato la gagwe la go se kwanantšhe la go rata Naomi gotee le ka boroto bja gagwe le boikokobetšo. Ga go makatše gore batho ba be ba mo lebelela e le “mosadi wa sethakxa.” Ga se a ka a ja “bušwa bya bobodu,” gomme ka baka la go šoma ga gagwe ka thata, ka mehla o be a na le selo se itšego seo a ka se abelanago le mmatswala’gwe wa mohloki. (Diema 31:​27, 31) Ka go rwala boikarabelo bja go hlokomela Naomi, Ruthe o swanetše go ba a ile a ikwa a thabile ka baka la mafelelo a tlišwago ke go nea.​—Ditiro 20:​35; 1 Timotheo 5:​4, 8.

A mehlala e mebotse gakaakang yeo re e hwetšago ka pukung ya Ruthe! Naomi o gopolwa ke Jehofa. Ruthe o amogela “moputsô o tletšexo” e le makgolokhukhu wa Jesu Kriste. Boase o šegofatšwa ka “mosadi wa sethakxa.” Ge e le rena, re hwetša mehlala ya tumelo bathong ba bjalo.

[Lepokisi go letlakala 26]

Tlhasenyana ya Kholofelo

Ge e ba ka mohla o mongwe o ikwa gore o phela mehleng e sa thabišego, pego ya Ruthe e ka go nea tlhase ya kholofelo. E tšwelela e le mafelelo a bohlokwa a puku ya Baahlodi. Puku ya Ruthe e re botša kamoo Jehofa a ilego a diriša mohlologadi yo a ikokobeditšego yo a tšwago setšhabeng se šele sa Moaba go tšweletša kgoši bakeng sa batho ba gagwe. Ka tsela yeo puku ya Baahlodi e beilwego ka gona, tumelo ya Ruthe e phadima bjalo ka lebone la mehla yeo.

Ka go bala pego ya Ruthe, o ka kgonthišega gore go sa šetšwe gore dinako e ka ba tše di hlobaetšago gakaakang, ka mehla Modimo o hlokomela batho ba gagwe gomme o phethagatša merero ya gagwe.