O ka Hwetša Kae Ditekanyetšo tša Kgonthe tša Dilo tša Moya?

RODOLPHE o ile a botšiša ka tsela ya kgegeo gore: “Ge e ba o tla latela bodumedi feela ka baka la setšo sa lapa, ke ka baka la’ng o sa kgethe bodumedi bja ma-Celt bjoo bo-rakgolokhukhu ba rena ba bego ba bo latela nywaga e 2 000 e fetilego?” Kgopolo yeo e dira gore mofsa yo a mo theeditšego a myemyele.

Rodolphe o itše: “Tswalano ya-ka le Modimo ke ya bohlokwa kudu go nna. Ke tloga ke ganetšana ka mo go feletšego le kgopolo ya gore ditumelo tša bodumedi di swanetše go gapeletšwa go ya ka setšo sa-ka, e le feela ka gobane ditho tša lapa la gešo tšeo di phetšego nywaga e masome goba gaešita le e makgolo e fetilego e be e le tša bodumedi bjo itšego.” Rodolphe o ile a lebelela dilo ka kelohloko; ga se a ka a tšea taba ye ya bohlokwa e le feela selo seo a se abetšwego.

Gaešita le ge mehleng yeno go neeletšana ka bodumedi go tloga molokong o mongwe go ya go o mongwe go phuhlama, bontši bo sa dutše bo kgomaretše bodumedi bja malapa a gabo bona. Eupša na ke ka mehla moo go nepagetšego go kgomarela ditekanyetšo tša bodumedi tša batswadi? Beibele e re’ng?

Ka morago ga go fetša nywaga e 40 leganateng, Jošua e lego mohlatlami wa Moše o ile a bea kgetho pele ga ba-Isiraele: “Xe Le ka hwetša xo hlankêla Morêna e se’ botse, xôna ikxetheleng lehono yo Le rataxo xo mo hlankêla, e ka ba medimo yela ye bô-tata-weno ba e hlanketšexo mola bà sa le mošola wa noka, xoba e ka ba medimo yé ya Ba-Amoro ba Le dutšexo mo naxeng ya bôná. Xe e le nna le ba lapa la-ka, rena re dirêla Morêna.”​—Jošua 24:⁠15.

Yo mongwe wa bagologolo bao Jošua a bego a bolela ka bona e be e le Thara, tatago Aborahama, yo a bego a dula motseng wa Uri, yeo ka nako yeo e bego e le ka bohlabela bja Noka ya Eforate. Beibele ga e bolele mo gontši ka Thara, ka ntle le taba ya gore o be a rapela medimo e šele. (Jošua 24:⁠2) Gaešita le ge morwa wa gagwe e lego Aborahama a be a se na tsebo e feletšego ka morero wa Modimo, o be a ikemišeditše go tlogela naga ya gabo ge Jehofa a be a mo laela gore a dire bjalo. Ee, Aborahama o ile a kgetha bodumedi bjo bo fapanego le bja tatagwe. Ka baka la ge a ile a dira bjalo, Aborahama o ile a amogela ditšhegofatšo tšeo Modimo a mo holofeditšego tšona gomme a ba motho yoo madumedi a mantši a mo lebelelago e le “tatago bohle bao ba dumelago go Modimo.”​—Ba-Roma 4:​11, Today’s English Version.

Le gona Beibele e bolela ka tsela e kgahlišago pego ya Ruthe, makgolokhukhu wa Jesu Kriste. Ruthe e lego mosadi wa mo-Moaba yo a bego a nyetšwe ke mo-Isiraele, o ile a ba mohlologadi gomme o ile a lebeletšana le kgetho: go dula nageng ya gabo goba go boela Isiraele le mmatswala’gwe. Ka go lemoga mehola e phagamego ya borapedi bja Jehofa ge e bapišwa le borapedi bja medimo e šele yeo e bego e latelwa ke batswadi ba gagwe,  Ruthe o ile a botša mmatswala’gwe gore: “Sethšaba sa xeno ke tlo re ké sa xešo; Modimo wa xaxo e tlo ba Modimo wa-ka.”​—Ruthe 1:​16, 17.

Dictionnaire de la Bible ge e bolela ka bohlokwa bja pego ye ka dipukung tše kgethwa tša Beibele e hlalosa gore pego ye e bontšha “kamoo mosadi yo a belegetšwego nageng e šele, yo a belegwego gare ga baheitene bao e lego manaba le bao ba hloilwego ke Isiraele, . . . ka baka la go rata ga gagwe setšhaba le borapedi bja Jehofa, ka mahlatse a ilego a ba makgolokhukhu wa Kgoši Dafida yo mokgethwa.” Ruthe ga se a ka a dika-dika go kgetha bodumedi bjo bo fapanego le bja batswadi ba gagwe, ka baka la phetho yeo ya gagwe, Modimo o ile a mo šegofatša.

Pego yeo e anegago mathomo a Bokriste ke yeo e kwagalago le yeo e lego molaleng mabapi le mabaka ao barutiwa ba Jesu ba ilego ba tlogela bodumedi bja bo-rakgolokhukhu ba bona. Polelong yeo e phegelelago kudu, moapostola Petro o ile a laletša batheetši ba gagwe gore: “Tlang Le phološwe, Le tšwê molokong o kxopamilexo wó,” ka go sokologa dibeng tša bona le go kolobetšwa leineng la Jesu Kriste. (Ditiro 2:​37-41) O mongwe wa mehlala e kgahlišago kudu e bile wa Saulo, motlaiši wa Bakriste wa mo-Juda. Ge a be a le tseleng ya go ya Damaseko, o ile a bona pono ya Kriste, yeo ka morago ga yona Saulo a ilego a ba Mokriste gomme a tsebja e le moapostola Paulo.​—Ditiro 9:​1-⁠9.

Bontši bja Bakriste ba pele ga se bja ka bja ba le phihlelo e bjalo e kgahlišago kudu. Go sa šetšwe seo, ka moka ga bona ba be ba tla swanela go tlogela bo-Juda goba borapedi bja medimo e fapa-fapanego ya boheitene. Bao ba ilego ba amogela Bokriste ba dirile bjalo ba tseba ditherešo ka mo go feletšego, gantši ka morago ga go swara dipoledišano tše telele tša mabapi le tema ya Jesu e le Mesia. (Ditiro 8:​26-40; 13:​16-43; 17:​22-34) Bakriste bao ba pele ba be ba boditšwe ka mo go kwagalago ka go nyakega ga go dira diphetogo maphelong a bona. Taletšo e be e neilwe bohle, bobedi ba-Juda le bao e sego ba-Juda, eupša molaetša o sa dutše e le o swanago. E le gore ba kgahliše Modimo, go be go le bohlokwa go latela mohuta o mofsa wa borapedi, e lego wa Bokriste.

Kgetho Yeo e Swanago le go Rena

Ka ntle le pelaelo, lekgolong la pele la nywaga go be go nyakega sebete bakeng sa go gana mekgwa ya bodumedi bja lapa​—bo-Juda, borapedi bja mmušiši, borapedi bja medimo e šele ya boheitene​—le go tsenela bodumedi bjo bo bego bo kwerwa ke bobedi ba-Juda le ba-Roma. Go se go ye kae kgetho ye ile ya tliša tlaišo e šoro. Bjalo ka ge Hippolyte Simon yo e lego mopišopo wa Katholika wa kua Clermont-Ferrand a hlalosa ka pukung ya gagwe ya Vers une France païenne? (Na ke Boheitene bja Fora?), lehono go nyakega sebete se swanago gore re gane go “itumelela go ineela le go swarega mokgweng wo o lego gona wa go itshwara ka tsela yeo ba bangwe ba itshwarago ka yona.” Go nyakega sebete go tswalanywa le bodumedi bjo bonyenyane bjoo ka dinako tše dingwe bo ganetšwago, bodumedi bja Dihlatse tša Jehofa.

Paul e lego lesogana le le tšwago kua Bastia, Corsica, o godišeditšwe bodumeding bja Katholika, ka dinako tše dingwe o be a tšea karolo medirong ya kereke, e bjalo ka go rekiša dikuku bakeng sa go kgoboketša tšhelete ya mokgatlo wa Katholika wa go hlokomela bahlaki. Ka ge a be a nyaka go ba le kwešišo e kaone ka Beibele, o ile a dumela go ba le poledišano ya ka mehla le Dihlatse tša Jehofa. Ge nako e dutše e tšwela pele, o ile a lemoga gore seo a bego a ithuta sona se be se tla mo tlišetša mehola ya ka mo sa felego. Ka go dumelelana le seo, Paul o ile a dumela mehola ya Beibele ka mo go tletšego gomme a ba yo mongwe wa Dihlatse tša Jehofa. Batswadi ba gagwe ba ile ba hlompha kgetho ya gagwe, yeo e sego ya kgoma tswalano ya bona ya kgaufsi ya lapa.

Amélie o dula ka borwa bja Fora. Ditho tša lapa la gabo e be e le Dihlatse tša Jehofa go tloga melokong e mene. Ke ka baka la’ng a ile a kgetha go amogela ditekanyetšo tša bodumedi tša batswadi ba gagwe? O re: “Ga o be yo mongwe wa Dihlatse tša Jehofa ka gobane batswadi ba gago goba bo-makgolo’ago le bo-rakgolo’ago e le Dihlatse  tša Jehofa goba e be e le tšona. Eupša ka letšatši le lengwe, o ipotša gore, ‘Ke bodumedi bja-ka ka gobane tše ke ditumelo tša-ka.’” Go swana le bafsa ba bangwe ba bantši ba Dihlatse tša Jehofa, Amélie o a tseba gore ditumelo tša gagwe tše di tiilego tša bodumedi di mo nea morero bophelong le gore ke mothopo wa lethabo la ka mo go sa felego.

Lebaka Leo ka Lona re Amogelago Ditekanyetšo tša Modimo

Puku ya Diema kgaolo 6, temana 20, e kgothaletša bao ba nyakago go kgahliša Modimo gore: “Ngwan’a-ka! Boloka ditaêlô tša tat’axo, O se lahlê ’thutô tša mm’axo.” Go e na le go kgothaletša go kwa ka go se kwešiše, keletšo e bjalo e kgothaletša bafsa go amogela ditekanyetšo tša Modimo ka go tiiša tumelo ya bona le ka go emela Modimo. Moapostola Paulo o ile a laletša badirišani gotee le yena go ‘kgonthišega ka dilo tšohle,’ go lebelela ge e ba seo ba bego ba se ruta se be se dumelelana le Lentšu la Modimo le thato ya Gagwe, le ka go dira ka go dumelelana le seo.​—1 Ba-Thesalonika 5:​21, bapiša le NW.

Go sa šetšwe gore di godišeditšwe ka lapeng la Bokriste goba go se bjalo, Dihlatse tša Jehofa tše ka godimo ga dimilione tše tshelelago di dirile phetho e bjalo, bobedi ba banyenyane le ba bagolo. Ka thuto ya Beibele e tseneletšego, ba hweditše dikarabo tše di ka botwago dipotšišong tša bona tša mabapi le morero wa bophelo gomme ba amogetše kwešišo e kwagalago ka thato ya Modimo bakeng sa batho ka moka. Ka morago ga go hwetša tsebo ye, ba amogetše ditekanyetšo tša Modimo gomme ba dira sohle seo ba ka se kgonago go dira thato ya Modimo.

Go sa šetšwe gore o mmadi wa ka mehla wa makasine wo goba go se bjalo, ke ka baka la’ng o sa amogele boithapo bja Dihlatse tša Jehofa bja go go thuša go lebelela ka Beibeleng gomme o hlahlobe ditekanyetšo tša yona tša moya. Ka tsela ye, o tla kgona go ‘leka gomme wa bona gore Morena ke yo bolo’ gomme wa hwetša tsebo yeo ge e ba o e diriša, e tlago go go lebiša bophelong bjo bo sa felego.​—Psalme 34:⁠8; Johane 17:⁠3.

[Caption on page 5]

Meloko e mene ya lapa la Dihlatse tša Jehofa kua Fora

[Caption on page 7]

Ruthe o ile a kgetha go hlankela Jehofa go e na le medimo ya bagologolo ba gagwe