Dipotšišo tše Tšwago go Babadi

Ge e ba Mokriste a e-⁠kwa mantšu, na seo se napile se bolela gore o hlasetšwe ke matemona?

Aowa. Gaešita le ge go ile gwa begwa gore matemona a itšweletša ka tsela yeo, batho ba bantši bao ba kwago mantšu goba ba bago le maikwelo a mangwe a makatšago le a tshwenyago, ba ile ba lemoga ka go dira nyakišišo gore ba na le mathata a tša maphelo.

Gaešita le lekgolong la pele la nywaga, go be go tsebja gabotse gore ditlhaselo tša matemona le maemo a tša maphelo ka dinako tše dingwe di be di tšweletša mafelelo a swanago. Go Mateo 17:​14-18, re bala ka mošemane yo a ilego a fodišwa ke Jesu. Gaešita le ge mošemane a be a na le dika tša boemo bjo šoro bja dithunthwane, ge e le gabotse tlaišego ya gagwe e be e bakwa ke matemona. Lega go le bjalo, tiragalong ya pejana ge mašaba a batho ba tlaišegago a be a tlišwa go Jesu bakeng sa gore a fodišwe, gare ga ona go be go akaretšwa “ba meôya e mebe, le maxafa a ngwedi [“ba dithunthwane,” NW].” (Mateo 4:​24, mongwalo o sekamego ke wa rena.) Ka ntle le pelaelo, go ile gwa lemogega gore ba bangwe ba bao ba bego ba na le dithunthwane ba be ba se na matemona. Mathata a bona e be e le a tša maphelo.

Go begwa gore ba bangwe bao ba tlaišwago ke schizophrenia, (tšharakano ya monagano yeo e bonagalago ka go se lebelele dilo ka tsela ya kgonthe) bolwetši bjo gantši bo alafegago ka dihlare, ba kwa mantšu goba ba ba le dika tše dingwe tšeo di ka tšwelelago e le tše sa tlwaelegago. * Maemo a mangwe a maphelo gape a ka baka kgakanego ya monagano mo e lego gore ba bangwe ba ka nagana ka mo go fošagetšego gore e bakwa ke matemona. Ka gona, le ge motho yo a bolelago gore o kwa mantšu goba yo a nago le maikwelo a mangwe a makatšago a ka se nyake go tloša kgopolo ya gore o tshwenywa ke matemona, ruri o swanetše go kgothaletšwa gore a nyakišiše ge e ba go na le tlhaloso ya mabapi le tša maphelo ya seo se mo diragalelago.

[Mengwalo ya ka tlase]