‘Le Be Le Letswalo Le Lebotse’

BATHO ba bantši ba dumela gore ba swanetše go latela letswalo la bona ge ba dira diphetho. Eupša gore letswalo la rena e be tlhahlo e ka botwago, le swanetše go tlwaetšwa go tseba botse le bobe, gomme re swanetše go le theetša.

Nagana ka phihlelo ya monna yo a bitšwago Sakeo, go etša ge e begilwe ka Beibeleng. Sakeo yo a bego a dula Jeriko e be e le letona la balekgetho e bile e le mohumi. O be a dumela ka noši gore o kgobokeditše mahumo a gagwe ka bomenetša​—mokgwa woo ruri o bego o kweša ba bangwe bohloko. Na letswalo la Sakeo le ile la mo tshwenya ka baka la mediro ya gagwe ya go hloka toka? Ge e ba go bile bjalo, go molaleng gore o be a le hlokomologa.​—Luka 19:​1-⁠7.

Lega go le bjalo, go ile gwa ba le tiragalo yeo e ilego ya dira gore Sakeo a naganišiše lefsa ka tsela ya gagwe. Jesu o ile a tla Jeriko. Sakeo wa kgopana o be a nyaka go mmona, eupša a paledišwa ke lešaba. Ka gona o ile a kitimela pele gomme a namela sehlare gore a kgone go mmona gabotse. A kgahlišitšwe ke kgahlego e tseneletšego ya Sakeo, Jesu o ile a mmotša gore o be a tla mo etela ngwakong wa gagwe. Sakeo o ile a thabela go amogela moeng wa gagwe yo a kgethegilego ka borutho.

Seo Sakeo a se bonego le seo a se kwelego ge a be a na le Jesu se ile sa mo kgoma pelo gomme sa mo tutueletša go fetoša ditsela tša gagwe. O ile a bolela gore: “Morêna’ O k’O bônê; maruô a-⁠ka ke a arolêla bahloki ka boxare; xomme xe ke forile motho, ke mo lefêla xa-ne.”​—Luka 19:⁠8.

Letswalo la Sakeo le be le hlabišeditšwe seetša, gomme o ile a le theetša gomme a arabela go lona. Ditla-morago e bile tše dibotse kudu. Nagana kamoo Sakeo a ilego a ikwa ka gona ge Jesu a be a mmotša gore: “Lehono ngwakô wó o tletšwe ke phološô.”​—Luka 19:⁠9.

A mohlala o kgothatšago gakaakang! O bontšha gore re ka fetoša tsela le ge e le efe yeo re bego re phela ka yona nakong e fetilego. Go etša Sakeo, re ka theetša mantšu a Jesu​—a begilwego ka Beibeleng​—gomme ra tlwaetša maikwelo a rena ka se se nepagetšego le se se fošagetšego. Ka gona, go etša ge moapostola Petro a eleditše, re ka kgona go ba ‘le letswalo le lebotse.’ Re ka theetša letswalo la rena le lebotse gomme ra dira se se nepagetšego.​—1 Petro 3:​16, PK.