Dipotšišo tše Tšwago go Babadi

Ke ka baka la’ng Morokami wa April 1, 2002 go letlakala 11, serapa 7 o bolela gore kolobetšo ya meetseng ya badumedi ba bafsa ba ba-Juda ka Pentekoste ya 33 C.E. e be e le pontšho “ya boineelo bja bona bja motho ka noši go Modimo ka Kriste,” mola e le gore pono ya nakong e fetilego e be e le ya gore go inwa meetseng ga ba-Juda go tloga ka 33 C.E. go fihla ka 36 C.E. go be go sa nyake boineelo bjo bjalo bja motho ka noši?

Ka 1513 B.C.E., Jehofa Modimo o neile ba-Isiraele sebaka sa go ba setšhaba sa gagwe se sekgethwa ge feela ba ‘theetša se a se bolelago gomme ba hlokomela kgwerano ya gagwe.’ Ba ile ba araba ka gore: “Tšohle tše Morêna a di boletšexo re tlo di dira.”​—Ekisodo 19:​3-⁠8; 24:​1-⁠8.

Ka go dumela go boloka kgwerano ya Molao wa Moše, ba-Isiraele ba ile ba ineela go Modimo. Meloko e latetšego ya ba-Juda e ile ya belegelwa setšhabeng se se ineetšego. Lega go le bjalo, kolobetšo ya ba-Juda bao e bilego balatedi ba Jesu Kriste go tloga ka Pentekoste ya 33 C.E. go ya pele e be e akaretša se se fetago go ineela go Modimo e le ditho tša setšhaba se se ineetšego. E be e bontšha boineelo bja bona go Jehofa Modimo tswalanong e mpsha le yena ka Jesu Kriste. Seo se bile bjalo bjang?

Ka morago ga go tšhollelwa ga moya o mokgethwa godimo ga barutiwa ba ka bago 120 bao ba bego ba bokane ka phapošing ya ka godimo kua Jerusalema ka Pentekoste ya 33 C.E., moapostola Petro o ile a ema gomme a thoma go bolela le mašaba a ba-Juda le basokologi bao ba bego ba bokane go tlo bona seo se diragetšego. Ka morago ga go nea bohlatse bjo bo tseneletšego, o ile a botša ba-Juda bao ba bego ba tshwenywa ke matswalo gore: “Sokoloxang; ka moka Le kolobetšwê Leineng la Jesu Kriste, e bê xôna xo lebalêlwa dibe.” Ka go arabela kgothatšong ya Petro e tšwelago pele, “ba ba dumetšexo polêlô ya xaxwe ka xo rata, ba tlile ba kolobetšwa; mohla woo xwa amoxêlwa batho ba e nyakilexo xo ba ba dikete tše tharo.”​—Ditiro 2:​1-⁠41.

Na ba-Juda bao ba ilego ba kolobetšwa ka morago ga kgothatšo ya Petro e be e šetše e le ditho tša setšhaba se se ineetšego? Na ba be ba sa thabele tswalano ya go ineela go Modimo? Aowa. Moapostola Paulo o ngwadile gore ‘Modimo o phumotše Molao ka go o kokotela koteng ya tlhokofatšo.’ (Ba-Kolose 2:​14, bapiša le NW.) Ka lehu la Kriste ka 33 C.E., Jehofa Modimo o ile a tloša kgwerano ya Molao​—wona motheo wa go tliša ba-Isiraele tswalanong ya go ineela go Yena. Setšhaba seo se ilego sa gana Morwa  wa Modimo ga bjale se be se ganwa ke Modimo ka boyena. ‘Bao e bego e le ba-Isiraele ba go tswalwa’ ba be ba ka se sa ipolela gore ke setšhaba seo se ineetšego go Modimo.​—1 Ba-Korinthe 10:​18; Mateo 21:⁠43.

Kgwerano ya Molao e ile ya fedišwa ka 33 C.E., eupša lebaka la Modimo la kgaugelo e kgethegilego le go lebiša tlhokomelo go ba-Juda ga se la felela ka nako yeo. * Lebaka leo le ile la tšwela pele go fihlela ka 36 C.E., ge Petro a be a bolela le Koronelio e lego Motaliana yo a ineetšego le ba lapa la gagwe gotee le ba-Ntle ba bangwe. (Ditiro 10:​1-48) Motheo wa go katološwa ga kgaugelo ye e be e le ofe?

Daniele 9:​27 (PK) e re: “[Mesia] o tlo tiišetša ba bantši kgwerano ka beke e tee.” Kgwerano yeo e ilego ya šoma ka nywaga e šupago goba ka “beke e tee,” go tloga kolobetšong ya Jesu le mathomong a bodiredi bja Mesia bja phatlalatša ka 29 C.E. e be e le kgwerano ya Aborahama. E le gore motho a be tswalanong yeo ya kgwerano, o be a swanetše feela ke go ba yo mongwe wa ditlogolwana tša Aborahama tša ba-Hebere. Kgwerano yeo e bego e sekametše ka lehlakoreng le tee ga se ya ka ya nea motho tswalano ya go ineela go Jehofa. Ka gona, badumedi ba ba-Juda bao ba bego ba kolobetšwa ka morago ga polelo ya Petro ka Pentekoste ya 33 C.E., ba be ba ka se ipolele gore ba tswalanong ya go ineela go Modimo ka morago ga ge kgwerano ya Molao e šetše e tlošitšwe, gaešita le ge e be e le baamogedi ba tlhokomelo e kgethegilego bjalo ka ba-Juda ba tlhago. Bona ka noši ba be ba swanetše go ineela go Modimo.

Go ineela ka noši ga ba-Juda le basokologi ge ba be ba kolobetšwa letšatšing la Pentekoste ya 33 C.E. go be go le bohlokwa ka lebaka le lengwe gape. Moapostola Petro o ile a kgothaletša batheetši ba gagwe go sokologa gomme ba kolobetšwe leineng la Jesu. Go dira bjalo go ile gwa nyaka gore ba tlogele tsela ya lefase gomme ba dumele Jesu e le Morena le Mesia, e le Moperisita yo a Phagamego le yo a dutšego ka letsogong le letona la Modimo legodimong. Ba ile ba swanela ke go bitša leina la Jehofa Modimo bakeng sa phološo ka Kriste Jesu, e lego seo se bego se akaretša go bontšha tumelo go Kriste le go mo tšea e le Moetapele wa bona. Motheo ka moka wa go ba le tswalano le Modimo le go lebalelwa dibe o be o fetogile. E le motho ka o tee ka o tee, ba-Juda bao ba dumelago ba ile ba swanelwa ke go amogela tokišetšo ye e mpsha. Bjang? Ka go ineela go Modimo le ka go ipolela phatlalatša e le bao ba dirilego bjalo ka go inwa meetseng ka leina la Jesu Kriste. Kolobetšo ya meetseng e be e le leswao la boineelo bja bona go Modimo, e ba tliša tswalanong e mpsha le yena ka Jesu Kriste.​—Ditiro 2:​21, 33-36; 3:​19-23.

[Mengwalo ya ka tlase]