Dulang Le Tiile, Gore le Fenye Lebelo la Bophelo

GE E ba o be o tla swanela ke go sesa lewatleng leo le nago le madimo, o be o tla diriša sekepe sa mohuta mang? Na o be o ka rata go diriša seketswana goba sekepe se segolo seo se agilwego gabotse? Ka ntle le pelaelo o be o tla kgetha sekepe se segolo, ka ge se ka kgona go sesa gabotse maphotong a matla.

Ge re dutše re feta tshepedišong ye ya dilo ya madimo le e kotsi, re lebeletšana le ditlhohlo tše thata. Ka mohlala, ka dinako tše dingwe bafsa ba ka ikwa ba gakanegile e bile ba sa šireletšega gare ga dikgopolo le ditshekamelo tša lefase le tšeo di gakantšhago. Batho bao ba sa tšwago go thoma go ba Bakriste ba ka ba ba sa dutše ba e-⁠na le maikwelo a go se kgonthišege. Gaešita le ba bangwe ba tiilego bao ba bego ba dutše ba botega tirelong ya Modimo ka nywaga e mentši ba ka ba ba lebeletšane le teko ka gobane ditebelelo tša bona di sa phethagatšwa ka mo go feletšego.

Maikwelo a bjalo ga se a mafsa. Bahlanka ba Jehofa ba botegago ba bjalo ka Moše, Jobo le Dafida, ka dinako tše dingwe ba ile ba ikwa ba gakanegile. (Numeri 11:​14, 15; Jobo 3:​1-⁠4; Psalme 55:⁠4) Lega go le bjalo, tsela ya bona ya bophelo e be e bonagala ka boineelo bja bona bjo bo feletšego go Jehofa. Mohlala wa bona o mobotse o re kgothaletša go ema re tiile, eupša Sathane Diabolo o nyaka go re aroša lebelong la rena la bophelo bjo bo sa felego. (Luka 22:​31) Ka gona re ka dula bjang re tsepame, re “tiile tumelong”? (1 Petro 5:⁠9) Le gona re ka matlafatša bjang badumedi-gotee le rena?

Jehofa o Nyaka Gore re Tie

Ge e ba re botegela Jehofa, ka mehla o tla re thuša go dula re tiile. Mopsalme Dafida o ile a lebeletšana le maemo a mantši a thata, eupša o ile a holofela Modimo gomme ka go rialo o ile a opela gore: “[Jehofa a] nnthša moleteng o šiišaxo, leraxeng le thšileng, a emiša ’naô tša-ka mo lwaleng, ka xata setia.”​—Psalme 40:⁠2.

Jehofa o re matlafaletša go hlabana “thlabanô e botse ya tumêlô,” e le gore re ka ‘thopa bophelo bjo bo sa felego.’ (1 Timotheo 6:​12) Le gona o re thuša go dula re tsepame gore re fenye ntweng ya rena ya moya. Moapostola Paulo o ile a kgothaletša Bakriste-gotee le yena go ‘tia Moreneng le thateng ya matla a gagwe’ le gore ba ‘apare ditlhamo tšohle tša Modimo, gore ba kgone go fenya dipogo tša Diabolo.’ (Ba-Efeso 6:​10-17) Eupša ke’ng seo se ka šitišago go tia ga rena? Le gona re ka lebeletšana bjang le ditutuetšo tše bjalo tše kotsi?

Hlokomelang Dilo Tšeo di Dirago Gore re se Tsepame

Ke ga bohlale gore re gopole ntlha ye e bohlokwa: Diphetho tšeo re di dirago mafelelong di kgoma go tia ga rena ga Bokriste ka tsela e kgahlišago goba e sa kgahlišego. Bafsa ba lebeletšane le diphetho ditabeng tše bjalo ka mošomo, thuto e oketšegilego le lenyalo. Batho ba bagolo  ba ka swanelwa ke go dira phetho ya ge e ba ba tla hudugela lefelong le lengwe goba ba tla nyaka go šoma mošomo wa ka thoko. Letšatši le lengwe le le lengwe re dira diphetho tša mabapi le go diriša nako le ditabeng tše dingwe tše dintši. Ke’ng seo se tla re thušago go dira diphetho tše bohlale tšeo di tlago go kaonefatša go tia ga rena re le bahlanka ba Modimo? Mokriste yo mongwe yo a hlanketšego ka nako e telele o itše: “Ke kgopela thušo ya Jehofa ge ke dira diphetho. Ke dumela gore ke ga bohlokwa go amogela le go diriša keletšo yeo e neilwego ka Beibeleng, dibokeng tša Bokriste, ka bagolo le ka dikgatišo tšeo di theilwego Beibeleng.”

Ge re dira diphetho, re tla dira gabotse ge re ka ipotšiša gore: ‘Nywaga e mehlano goba e lesome go tloga gona bjale, na ke tla ba ke sa thabile ka diphetho tšeo ke di dirago lehono, goba na ke tla itshola ka baka la tšona? Na ke katanela go kgonthišetša gore diphetho tša-ka di ka se šitiše go tsepama ga-ka moyeng eupša gore di tla oketša tšwelopele ya-ka ya moya?’​—Ba-Filipi 3:⁠16.

Go ineela ditekong goba gore ba nyakile go roba melao ya Modimo go dirile gore batho ba bangwe bao ba kolobeditšwego ba phele maphelo a sa tsepamago. Ba sego kae bao ba ilego ba kgaolwa ka phuthegong ka baka la go phegelela tsela ya sebe ka go se itshole ba ile ba šoma ka thata gore ba bušetšwe, ke moka ba kgaolwa gape​—ka dinako tše dingwe kapejana ka morago ga moo​—ka baka la tiro e swanago ya bobe. Na e ka ba e le gore ga se ba rapelela thušo ya Modimo gore ba ‘hloye bobe gomme ba kgomarele botse’? (Ba-Roma 12:⁠9; Psalme 97:​10) Ka moka ga rena re swanetše go ‘wetša maoto a rena tseleng ya go loka.’ (Ba-Hebere 12:​13) Ka go rialo anke re eleng hloko dintlha tše dingwe tšeo di ka re thušago go dula re tiile moyeng.

Dulang le Tiile ka Modiro wa Bokriste

Tsela e nngwe ya gore re dule re kitima ka monabo o swanetšego lebelong la rena la bophelo ke ka gore re dire mo gontši modirong wa go bolela ka Mmušo. Ee, bodiredi bja rena bja Bokriste ke thušo e bohlokwa ya go boloka dipelo le menagano ya rena e lebišitše tlhokomelo go direng thato ya Modimo gomme re tsepamišitše dikgopolo moputsong wa bophelo bjo bo sa felego. Paulo o kgothaditše Bakriste tabeng ye gore: “Lena Bana bešo baratwa! Tiang matla, Le se kê la têkêma, Le tiêlêlê modirong wa Morêna mo xo fêla, Lè tseba xore xo itapiša xa lena xa se xa lefêla Moreneng.” (1 Ba-Korinthe 15:​58) Go ‘tia’ go bolela ‘go se šišinyege.’ ‘Go se tekeme’ go ka bolela ‘go itshwareletša ka go tia gomme o se ke wa tlogela maitshwareletšo a gago.’ Ka gona, go swarega bodireding bja rena go ka re tiiša tseleng ya rena ya Bokriste. Go thuša batho ba bangwe go tseba Jehofa go nea maphelo a rena morero gomme go re tlišetša lethabo.​—Ditiro 20:⁠35.

Pauline, Mokriste yo a feditšego nywaga ya ka godimo ga e 30 e le moromiwa e bile a le modirong o mongwe wa nako e tletšego o re: “Bodiredi ke tšhireletšo ka gobane go nea bohlatse go ba bangwe go tiišetša gore ke na le therešo.” Le gona kgodišego e swanago e feleletša ka gore re tšee karolo ka mehla medirong e mengwe ya Bokriste, e bjalo ka go ba gona dibokeng tša borapedi le go dira thuto ya motho ka noši ya Beibele yeo e tseneletšego.

Go Tiišwa ke Borwarre bjo Lerato

Go ba karolo ya mokgatlo wa lefase ka bophara wa barapedi ba therešo go ka re tiiša kudu. Ke tšhegofatšo e kaakang go kopanela le borwarre bjo lerato bja lefaseng ka bophara! (1 Petro 2:​17) Le gona re ka ba bao ba tiišago badumedi-gotee le rena.

Nagana ka ditiro tše holago tša monna yo a lokilego e lego Jobo. Gaešita le mohomotši wa maaka e lego Elifase o ile a gapeletšega go dumela gore: “Ba ba waxo wa ba thêkxa ka xo bua nabô’, wa tiiša ba matôlô a xo lapa.” (Jobo 4:⁠4) Re šoma bjang ntlheng ye? Re le motho ka o tee ka o tee re na le boikarabelo bja go thuša bana babo rena le dikgaetšedi tša moya go kgotlelela tirelong ya Modimo. Ge re dirišana le bona, re ka dira ka go dumelelana le kgopolo ya mantšu a rego: “Tiišang diatla tše di bexo di rephile, matôlô a xo lôka-lôka a bê le matla.” (Jesaya 35:⁠3) Ka gona ke ka baka la’ng o sa itirele pakane ya go matlafatša le go kgothatša Mokriste-gotee le wena o tee goba ba babedi nako e nngwe le e nngwe ge o kopana le bona? (Ba-Hebere 10:​24, 25) Mantšu a kgothatšago a theto le a tebogo bakeng sa maiteko  a bona a go tšwela pele ba kgahliša Jehofa a ka tloga a ba thuša go dula ba tiile ka kgopolo ya go fenya lebelo la bophelo.

Bagolo ba Bakriste ba ka dira mo gontši ka go kgothatša bao ba sa tšwago go thoma go kopanela. Se se ka kgonega ka go ithapela go nea ditšhišinyo tše di thušago le keletšo e kwagalago ya Mangwalo gotee le ka go šoma le bona bodireding bja tšhemo. Ka mehla moapostola Paulo o be a diriša dibaka ka mo go holago bakeng sa go matlafatša ba bangwe. O be a hlologetše go bona Bakriste ba kua Roma e le gore a ka thuša go ba tiiša moyeng. (Ba-Roma 1:​11) O ile a lebelela bana babo ba rategago le dikgaetšedi tša kua Filipi e le ‘lethabo le mphapahlogo’ wa gagwe gomme a ba kgothatša ka gore “êmang le tiê Moreneng ka mokxwa woo.” (Ba-Filipi 4:⁠1) Ka morago ga go kwa ka mathata a bana babo ba kua Thesalonika, Paulo o ile a romela Timotheo gore ‘a ba tiiše le go ba eletša ka tša tumelo gore go se ke gwa ba le e a kago šišinyega ditlaišegong tšeo.’​—1 Ba-Thesalonika 3:​1-⁠3.

Moapostola Paulo le moapostola Petro ba ile ba lemoga le go tšeela godimo maiteko a potego a barapedi-gotee le bona. (Ba-Kolose 2:⁠5; 1 Ba-Thesalonika 3:​7, 8; 2 Petro 1:​12) Anke le rena ka mo go swanago re se lebiše tlhokomelo mafokoding a bana babo rena, eupša re e lebiše dikeng tša bona tše dibotse le ntweng ya bona e atlegago ya gore ba dule ba tiile gomme ba godiša Jehofa.

Ge e ba re e-⁠na le boemo bja kgopolo bjo bo fošagetšego goba re swaya diphošo, re ka tloga re thatafaletša ba bangwe go dula ba tiile tumelong re sa lemoge. Ke mo go swanetšego gakaakang go gopola gore tshepedišong ye ya dilo bana babo rena ba ‘lapile e bile ba lahlegile’! (Mateo 9:​36) Ba swanetše go letela go hwetša khomotšo le tapološo ka phuthegong ya Bokriste. Ka gona, eka ka moka ga rena re ka dira seo re ka se kgonago tabeng ya go aga badumedi-gotee le rena le go ba thuša gore ba dule ba tiile.

Ka dinako tše dingwe ba bangwe ba ka dirišana le rena ka tsela yeo e ka fokodišago go tia ga rena. Na re tla dumelela dipolelo tše bogale goba tiro e sego botho e dira gore re goge maoto tirelong ya rena go Jehofa? Anke le ka mohla re se dumelele motho le ge e le ofe go re aroša go tiieng ga rena!​—2 Petro 3:⁠17.

Dikholofetšo tša Modimo​—Tutuetšo e Tiišago

Dikholofetšo tša Jehofa tša bokamoso bjo bo kgahlišago ka tlase ga pušo ya Mmušo di re nea kholofelo yeo e re thušago go dula re tiile. (Ba-Hebere 6:​19) Le gona kgodišego ya gore ka mehla Modimo o phethagatša dikholofetšo tša gagwe e re tutueletša go ‘dula re phakgame e bile re eme tumelong.’ (1 Ba-Korinthe 16:​13; Ba-Hebere 3:⁠6) Selo se se ka bonagalago e le go diega ga go phethagatšwa ga tše dingwe tša dikholofetšo tša Modimo se ka leka tumelo ya rena. Ka gona ke ga bohlokwa kudu gore re dule re phafogetše go arošwa ke dithuto tša maaka gomme ra fapošwa kholofelong ya rena.​—Ba-Kolose 1:​23; Ba-Hebere 13:⁠9.

Mohlala o mobe wa ba-Isiraele bao ba ilego ba fedišwa ka baka la go se be le tumelo dikholofetšong tša Jehofa o swanetše go ba temošo go rena. (Psalme 78:​37) Go e na le gore re swane le bona, anke re duleng re tiile, re hlankele Modimo ka maikwelo a go akgofa ga nako mehleng ye ya bofelo. Mogolo yo mongwe yo a nago le phihlelo o itše: “Ke phela letšatši le lengwe le le lengwe bjalo ka ge eka  letšatši la Jehofa le tla tla ka moso.”​—Joele 1:⁠15.

Ee, letšatši le legolo la Jehofa le kgaufsi kudu. Lega go le bjalo, ga go na selo se re ka se boifago ge feela re dula kgaufsi le Modimo. Ge e ba re kgomarela ditekanyetšo tša go loka ka go tia gomme re dula re tsepame, re ka kitima lebelo la bophelo bjo bo sa felego ka katlego!​—Diema 11:​19; 1 Timotheo 6:​12, 17-⁠19.

[Caption on page 21]

The Complete Encyclopedia of Illustration/J. G. Heck

[Caption on page 23]

Na o dira sohle seo o ka se kgonago go thuša Bakriste-gotee le wena go dula ba tiile?