Pego e Kgahlišago ya Leeto la Sekepe

MONYAKIŠIŠI Richard E. Byrd o ile a tšwa masolo a mahlano a go ya Antarctic go tloga ka 1928 go ya go 1956. Ka go boloka pukutšatši le pego e nepagetšego ya leeto la sekepe, yena le sehlopha sa gagwe ba ile ba kgona go tseba moo moya o fokelago gona, go lokišeletša mebapa le go hwetša tsebišo e lekanego mabapi le kontinente ya Antarctica.

Masolo a Byrd a bontšha bohlokwa bja go boloka pego e feletšego ya leeto. Ka pukung ya go ngwala pego ya leeto, go kgoboketšwa pego ya ditaba ka botlalo tša mabapi le leeto la sekepe goba la sefofane. Tsebišo ye e ka dirišwa ka morago bakeng sa go hlahloba seo se diregilego goba go seka-seka tsebišo yeo e ka bago le mohola bakeng sa maeto a tlago.

Mangwalo a re nea pego e kgahlišago ya Meetse-fula a mehleng ya Noage. Meetse-fula ao a lefase ka moka a ile a fetša lebaka la ka godimo ga ngwaga. E le go lokišeletša Meetse-fula, Noage, mosadi wa gagwe le barwa ba bona ba bararo le basadi ba bona ba ile ba fetša nywaga e 50 goba e 60 ba aga areka​—e lego sekepe se segolo sa boima bjo bo ka lekanago di-cubic meter tše 40 000. Morero wa yona e be e le ofe? Go phološa batho ba bangwe le diphoofolo tše dingwe Meetse-fuleng.​—Genesi 7:​1-⁠3.

Ge e le gabotse, puku ya Beibele ya Genesi e na le seo mohlomongwe se ka bitšwago pego ya Noage ya leeto la sekepe leo le diregilego mathomong a Meetse-fula go ba go fihla ge yena le ba lapa la gagwe ba e-⁠tšwa ka arekeng. Na go na le selo sa bohlokwa seo e re swaretšego sona lehono?