Theetšang Seo Moya O Se Bolelago!
Theetšang Seo Moya O Se Bolelago!
“E a naxo le tsêbê a a kwê se Môya o se botšaxo diphuthêxô.”—Kutollo 3:22.
1, 2. Ke keletšo efe yeo e boeleditšwego mabapi le melaetša ya Jesu e yago go diphuthego tše šupago tšeo go bolelwago ka tšona go Kutollo?
BAHLANKA ba Jehofa ba swanetše go ela hloko mantšu a buduletšwego a Jesu Kriste ao a yago go diphuthego tše šupago tšeo go bolelwago ka tšona ka pukung ya Beibele ya Kutollo. Ge e le gabotse, o mongwe le o mongwe wa melaetša o na le keletšo ye: “E a naxo le tsêbê a a kwe se Môya o se botšaxo diphuthêxô.”—Kutollo 2:7, 11, 17, 29; 3:6, 13, 22.
2 Re šetše re ahla-ahlile melaetša ya Jesu e yago go barongwa goba balebeledi ba Efeso, Simirina le Peregamo. Re ka holwa bjang ke seo a se boditšego diphuthego tše dingwe tše nne a tutuetšwa ke moya o mokgethwa?
Go Morongwa wa Thiathira
3. Thiathira e be e le kae, gomme e be e tsebja ka setšweletšwa sefe?
3 “Morwa wa Modimo” o reta gotee le go sola phuthego ya Thiathira. (Bala Kutollo 2:18-29.) Thiathira (yeo ga bjale e lego Akhisar) e be e agilwe go bapa le letsha la Noka ya Gediz (e lego Hermus ya bogologolo) ka bodikela bja Asia Minor. Motse o be o tsebja ka go ba le mediro e mentši ya matsogo. Badiri ba taye ba motseng woo ba be ba diriša modu wa sehlare sa madder (mohuta wa sehlare woo o melago dinageng tša Asia le Yuropa ) e le mothopo wa mebala ya bona yeo e ratwago kudu ya bohwibidu bjo bo tagilego goba phepolo. Lidia, yo e bilego Mokriste nakong ya ketelo ya Paulo kua Filipi yeo e lego Gerika, e be e le “morekiši wa purepura [mmala o mophepolo], wa motse wa Tiatira.”—Ditiro 16:12-15.
4. Ke’ng seo phuthego ya Thiathira e ilego ya retwa ka sona?
4 Jesu o reta phuthego ya Thiathira bakeng sa mediro ya yona e mebotse, lerato, tumelo, kgotlelelo le mošomo wa yona bodireding. Ge e le gabotse ‘mediro ya yona ya bjale e be e phala ya kgale.’ Ka gona, gaešita le ge re e-na le botumo bjo bobotse, le ka mohla ga se ra swanela go hlokomologa boitshwaro bja rena.
5-7. (a) “Mosadi yola Isebele” e be e le mang, gomme go be go swanetše go dirwa’ng ka tutuetšo ya gagwe? (b) Molaetša wa Kriste o yago phuthegong ya Thiathira o thuša basadi bao ba boifago Modimo go dira’ng?
5 Phuthego ya Thiathira e be e kgotleletše borapedi bja medimo ya diswantšho, dithuto tša maaka le boitshwaro bjo bo gobogilego bja botona le botshadi. Gare ga bona go be go e-na le “mosadi yola Isebele”—mohlomongwe sehlopha sa basadi bao ba bego ba e-na le mekgwa e swanago le ya Mohumagadi yo kgopo e lego Isebele wa Mmušong wa meloko e lesome ya Isiraele. Diithuti tše dingwe di šišinya gore ‘baporofeta ba basadi’ ba Thiathira ba ile ba leka go goketša Bakriste go rapela medimo le medimogadi ya mokgatlo wa tša kgwebo le go tšea karolo menyanyeng yeo e bego e akaretša dijo tšeo di bego di neelwa medimo ya diswantšho. Anke go se be le moporofeta wa mosadi wa mma-ka-ipea yo a tsomago go goketša ba bangwe ka phuthegong ya Bokriste ya mehleng yeno!
6 Kriste ‘o be a le kgaufsi le go lahlela mosadi yola Isebele dilaong, le bao ba go otswa le yena o tlo ba lahlela tlhokofatšong e kgolo ge ba sa sokologe ba lahla mediro yeo ya gagwe.’ Balebeledi le ka mohla ga se ba swanela go ineela thutong goba tutuetšong e bjalo e kgopo, gomme ga go na Mokriste yo a swanetšego go ineela go direng bootswa bja moya le bja nama goba go tšea karolo borapeding bja medimo ya diswantšho e le gore a lemoge gore “madiba a Sathane” ke a mabe ka mo go feletšego. Ge e ba re ela hloko temošo ya Jesu, ‘re tla swarelela seo re nago le sona,’ gomme sebe se ka se ke sa re fenya. Ka baka la ge ba ile ba gana mekgwa ya go se boife Modimo, dikganyogo le maikemišetšo, batlotšwa ba amogela “matla a xo buša dithšaba” gomme ba tla tlatša Kriste go di pšhatlaganya. Diphuthego tša mehleng yeno di na le dinaledi tša seswantšhetšo, gomme batlotšwa ba tla newa “naledi e phadimaxo ya mesô,” Monyadi e lego Jesu Kriste, ge ba tsošetšwa legodimong.—Kutollo 22:16.
7 Phuthego ya Thiathira e ile ya lemošwa gore e se kgotlelele tutuetšo e mpe ya basadi ba bahlanogi. Molaetša o buduletšwego wa Kriste o yago phuthegong ye o thuša basadi bao ba boifago Modimo go boloka boemo bja bona bjo ba bo neilwego ke Modimo lehono. Ga ba leke go laola banna le go goketša bana babo rena le ge e le bafe bootsweng bja moya goba bja nama. (1 Timotheo 2:12) Go e na le moo, basadi ba bjalo ba bea mohlala medirong e mebotse le tirelong bakeng sa go tumiša Modimo. (Psalme 68:11; 1 Petro 3:1-6) Ge e ba phuthego e hlokomela seo e nago le sona—thuto yeo e sekilego le boitshwaro gotee le tirelo ya Mmušo yeo e tšeelwago godimo—Kriste o tla tliša meputso e kgahlišago, e sego kahlolo.
Go Morongwa wa Sarede
8. (a) Sarede e be e le kae, gomme ditaba tše dingwe tšeo di bolelwago mabapi le yona ke dife? (b) Ke ka baka la’ng phuthego ya Sarede e be e nyaka thušo?
8 Phuthego ya Sarede e be e nyaka thušo ya kapejana ka gobane e be e hwile moyeng. (Bala Kutollo 3:1-6.) Sarede e be e le mo e ka bago dikhilomithara tše 50 ka borwa bja Thiathira, e be e le motse o humilego. Kgwebo, mobu o nonnego wa lefelong leo le go tšweletšwa ga lešela le mebete di ile tša thuša go o dira gore e be motse o humilego woo ka nako e nngwe o bego o e-na le badudi ba ka bago 50 000. Go ya ka radihistori Josephus, Sarede e be e e-na le badudi ba bantši ba ba-Juda lekgolong la pele la nywaga B.C.E. Gare ga mašope a motse woo go na le sinagoge le tempele ya modimogadi wa Efeso e lego Artemis.
9. Re swanetše go dira’ng ge e ba tirelo ya rena e le ya go ithola kgwara?
9 Kriste o ile a botša morongwa wa phuthego ya Sarede gore: “Medirô ya xaxo ke a e tseba. O na le leina la xo re O a phela; xomme O hwile.” Go thwe’ng ge e ba re tsebja re le batho ba phafogilego moyeng eupša re se na taba le ditokelo tša Bokriste e bile mediro ya rena ya tirelo e le ya go ithola kgwara, gomme re le ‘kgaufsi le go hwa’ moyeng? Gona re swanetše go ‘tšwela pele re gopola kamoo re filwego le kamoo re kwelego’ molaetša wa Mmušo, gomme re swanetše go tsošološa maiteko a rena tirelong e kgethwa. Ka ntle le pelaelo re swanetše go thoma go tšea karolo ka pelo ka moka dibokeng tša Bokriste. (Ba-Hebere 10:24, 25) Kriste o ile a lemoša phuthego ya Sarede ka gore: “Xe O sa phakxame, ke tlo tla wa lehodu; ’me nakô ye ke tl’o xo Xo tlêla ka yôna, O ka se kê wa e tseba.” Go thwe’ng ka mehla ya rena? Go se go ye kae re tla swanela ke go ikarabela.
10. Ke’ng seo e ka bago sa therešo ka Bakriste ba sego kae gaešita le ge ba le boemong bjo bo swanago le bja Sarede?
10 Gaešita le boemong bjo bo swanago le bja kua Sarede, go ka ba le ba sego kae bao ‘ba sa šilafatšego diaparo tša bona, e bile ba kgona go sepela le Kriste ba apere bošweu ka gobane ba swanelega.’ Ba boloka leswao la bona la Bokriste, ba dula ba se na bosodi, ba sa šilafatšwa ke boitshwaro le bodumedi bja lefase le. (Jakobo 1:27) Ka baka leo, Jesu ‘a ka se ke a tloša maina a bona pukung ya bophelo, eupša o tla a emela pele ga Tatagwe le pele ga barongwa.’ Bjalo ka ge se boletšwe e le seo se swanelegago go sepela le Kriste, sehlopha sa gagwe sa monyadiwa sa batlotšwa se tla apešwa mašela a phadimago, a hlwekilego le a bohlokwa ao a emelago ditiro tša go loka tša bakgethwa ba Modimo. (Kutollo 19:8) Ditokelo tša tirelo tše di kgahlišago tšeo di ba emetšego legodimong di ba kgothaletša go fenya lefase le. Le gona go na le ditšhegofatšo tšeo di beilwego pele ga bao ba tlago go hwetša bophelo bjo bo sa felego lefaseng. Maina a bona le ona a ngwadilwe ka pukung ya bophelo.
11. Re swanetše go dira’ng ge e ba re thoma go otsela moyeng?
11 Ga go le o tee wa rena yo a nyakago go ba boemong bjo bo nyamišago bja moya bja phuthego ya kua Sarede. Eupša go thwe’ng ge e ba re lemoga gore re thoma go otsela moyeng? Re swanetše go gata mogato kapejana e le gore re holege. A re re mohlomongwe re gogetšwe ditseleng tša go se boife Modimo goba re thoma go goga maoto tabeng ya go ba gona dibokeng goba bodireding bja rena. Anke re tsomeng thušo ya Jehofa ka thapelo e tšwago pelong. (Ba-Filipi 4:6, 7, 13) Go bala Beibele ka mehla le go ithuta Mangwalo le dikgatišo tša “molaki e a bôtêxaxo yo bohlale” go tla re thuša go dula re phafogile moyeng. (Luka 12:42-44) Ka gona re tla ba bjalo ka batho ba Sarede bao ba ilego ba amogelwa ke Kriste, gomme re tla ba tšhegofatšo go badumedi-gotee le rena.
Go Morongwa wa Filadelefia
12. O be o ka hlalosa bjang boemo bja bodumedi bja kua Filadelefia ya bogologolo?
12 Jesu o ile a reta phuthego ya Filadelefia. (Bala Kutollo 3:7-13.) Filadelefia (yeo ga bjale e lego Alasehir) e be e le lefelo leo le humilego la go tšweletša beine tikologong ya ka bodikela bja Asia Minor. Ge e le gabotse, modimo wa yona o mogolo e be e le Dionysus, modimo wa beine. Go molaleng gore ba-Juda ba kua Filadelefia ba ile ba palelwa ke go tutuetša Bakriste ba ba-Juda ba fao go kgomarela mekgwa e itšego ya Molao wa Moše goba go boela go yona.
13. Kriste o dirišitše bjang “sekxonyu sa Dafida”?
13 Kriste ‘o swere sekgonyu sa Dafida,’ gomme ka go rialo o neilwe dikgahlego ka moka tša Mmušo le bolaodi bja ngwako wa tumelo. (Jesaya 22:22; Luka 1:32) Jesu o ile a diriša sekgonyu seo go bula dibaka tša Mmušo le ditokelo go Bakriste ba Filadelefia ya bogologolo le mafelong a mangwe. Ga e sa le go tloga ka 1919 o beile pele ga “molaki e a bôtêxaxo” ‘mojako o mogolo’ woo o lebišago go boleleng ka Mmušo woo go se nago baganetši bao ba ka o tswalelago. (1 Ba-Korinthe 16:9; Ba-Kolose 4:2-4) Go ba gona, mojako o lebišago ditokelong tša Mmušo o tswaleletšwe bao ba “phuthêxô ya Sathane,” ka gobane ga se ba-Isiraele ba moya.
14. (a) Jesu o holofeditše phuthego ya Filadelefia eng? (b) Re ka ipoloka bjang gore re se ke ra wa “nakong ya molekô”?
14 Jesu o ile a holofetša Bakriste ba Filadelefia ya bogologolo gore: “Ka xobane O lototše Lentšu la-ka la xo re: Kxôtlêlêla,—le Nna ke tlo Xo lôtôla ka Xo hlakodiša nakong ya molekô wo o tl’o xo wêla lešakô ka moka, è le xo leka ba ba axilexo mo lefaseng.” Modiro wa boboledi o nyaka kgotlelelo e swanago le yeo Jesu a e bontšhitšego. Ga se a ka a ineela go manaba eupša o ile a tšwela pele a dira thato ya Tatagwe. Ka go rialo, Kriste o ile a tsošetšwa bophelong bja legodimong bja go se hwe. Ge e ba re swarelela ka go tia phethong ya rena ya go rapela Jehofa gomme re thekga Mmušo ka go bolela ka ditaba tše dibotse, re tla šireletšwa gore re se ke ra wa nakong ye ya teko, “nakong ya molekô.” Re tla ‘swarelela seo re nago le sona’ go tšwa go Kriste ka go katanela go tšwetša pele dikgahlego tšeo tša Mmušo. Go dira se go tla feleletša ka gore batlotšwa ba hwetše mphapahlogo o sa bapišwego wa legodimong gomme bašomi-gotee le bona bao ba botegago ka go se kwanantšhe ba hwetše bophelo bjo bo sa felego mo lefaseng.
15. Go nyakega’ng go bao e tlago go ba ‘dikokwane ntlong-kgethwa ya Modimo’?
15 Kriste o oketša ka gore: “E a fenyaxo ke tlo mo dira kôkwane Ntlong-kxêthwa ya Modimo wa-ka; . . . Ke tlo mo swaya ka leina la Modimo wa-ka le ka Leina la motse wa Jerusalêma o mofsa, wo o tlaxo ò e-tšwa lexodimong xo Modimo wa-ka; ke tlo mo swaya ka Leina la-ka le lefsa.” Balebeledi bao ba tloditšwego ba swanetše go godiša borapedi bja therešo. Ba swanetše go dula ba swanelega e le ditho tša “Jerusalêma o mofsa,” ka go bolela ka Mmušo wa Modimo le ka go dula ba hlwekile moyeng. Se ke sa bohlokwa ge e ba ba nyaka go ba dikokwane tempeleng ya legodimong e tagafaditšwego le ge e ba ba tla ba barwadi ba leina la motse wa Modimo e le badudi ba wona ba legodimong gotee le go bitšwa ka leina la Kriste e le monyadiwa wa gagwe. Le gona ba swanetše go ba le ditsebe tšeo di ‘kwago seo moya o se botšago diphuthego.’
Go Morongwa wa Laoditsea
16. Go na le ditherešo dife tše dingwe mabapi le Laoditsea?
16 Kriste o ile a sola phuthego ya Laoditsea yeo e bego e fo kgotsofala ka seo e nago le sona. (Bala Kutollo 3:14-22.) Laoditsea e be e le mo e ka bago dikhilomithara tše 150 ka bohlabela bja Efeso gomme e le magahlanong a ditsela tše kgolo tša babapatši moeding o nonnego wa Noka ya Lycus, e bile e le motse o humilego kudu ka ditšweletšwa gape e le lefelo la go panka. Diaparo tšeo di bego di dirwa ka wulu e ntsho ya tikologong yeo di be di tumile kudu. Ka ge e be e le lefelo la sekolo se se tumilego sa tša kalafo, ka ntle le pelaelo Laoditsea e ile ya tšweletša sehlare sa mahlo seo se tsebjago e le lerojana la Phrygian. Asclepius e lego modimo wa tša kalafo e be e le yo mongwe wa medimo e megolo ya motse woo. Go bonagala Laoditsea e be e e-na le badudi ba bantši ba ba-Juda, bao ba bangwe ba bona ba bego ba humile kudu.
17. Ke ka baka la’ng ba-Laoditsea ba ile ba solwa?
17 Ge a be a bolela le phuthego ya Laoditsea ka “morongwa” wa yona, Jesu o bolela ka tsela ya bolaodi e le “Hlatse ye e bôtêxaxo, Morereši, Yêna Mo-thôma-hlôlô-ya-Modimo.” (Ba-Kolose 1:13-16) Ba-Laoditsea ba ile ba solwa ka baka la ge ‘ba be ba sa tonye e bile ba sa fiše’ moyeng. Ka ge ba be ba le bololo, Kriste o be a tlo ba tshwa. Ba be ba sa swanela go thatafalelwa ke go kwešiša ntlha yeo. Hierapolis ya kgaufsi e be e na le methopo ya meetse a go fiša, gomme Kolose e be e na le meetse a go tonya. Lega go le bjalo, ka ge meetse a yago Laoditsea a be a swanelwa ke go sepedišwa ka diphaephe ka lebaka le letelele, go bonagala a be a fihla motseng woo a le bololo. Seripa se sengwe sa wona se be se sepedišwa ka mokero. Ge a be a batamela Laoditsea a be a feta maswikeng ao a betlilwego ao a kopantšwego ka samente.
18, 19. Bakriste ba mehleng yeno ba ka thušwa bjang ka go swana le ba kua Laoditsea?
18 Batho bao ba swanago le ba-Laoditsea lehono ke bao ba sa fišego kudu goba bao ba sa tonyego ka tsela e lapološago. Ka go swana le meetse a bololo, ba tlo tshwewa! Jesu ga a nyake gore e be baboleledi ba gagwe, bjalo ka ‘batseta ba tloditšwego ba Kriste.’ (2 Ba-Korinthe 5:20) Ka ntle le ge e ba ba itshola, ba tla lahlegelwa ke tokelo ya bona ya go ba bagoeledi ba Mmušo. Ba-Laoditsea ba be ba nyaka mahumo a lefaseng gomme ‘ba be ba sa tsebe gore ke ba madi-mabe, ba a nyamiša, ba a diila, ke difofu e bile ba hlobotše.’ Bakeng sa go fediša bodiidi bja bona bja moya, bofofu le go hlobola, motho le ge e le ofe yo a swanago le bona lehono o swanetše go reka go tšwa go Kriste “xauta ye e tšwaxo meubeng” ya tumelo yeo e lekilwego, “’aparô tše dithšweu” tša toka le “sehlare sa xo tlotša mahlô” seo se kaonefatšago go bona moyeng. Balebeledi ba Bakriste ba thabela go ba thuša go ela hloko senyakwa sa bona sa moya e le gore e be “bahumi tumelong.” (Jakobo 2:5; Mateo 5:3) Go oketša moo, balebeledi ba swanetše go ba thuša go diriša “sehlare sa xo tlotša mahlô” sa moya—go amogela le go itumelelanya le thuto ya Jesu, keletšo, mohlala le boemo bja gagwe bja kgopolo. Se ke sehlare seo se fodišago “kxanyoxô ya nama, le kxanyoxô ya mahlô, le xo phela ka xo ikxoxomoša.”—1 Johane 2:15-17.
19 Jesu o reta le go sola bohle bao a ba ratago. Balebeledi bao ba lego ka tlase ga gagwe ba swanetše go dira se se swanago ka botho. (Ditiro 20:28, 29) Ba-Laoditsea ba be ba swanetše go ‘phafoga e bile ba sokologe,’ ba dire diphetogo tseleng ya bona ya go nagana le ya go phela. Ge e le gabotse, na ba bangwe ba rena ba wetše tseleng ya bophelo yeo e theošetšago tirelo ya rena e kgethwa go Modimo maemong a tlasana bophelong? Gona a re ‘rekeng sehlare sa go tlotša mahlo go Jesu’ e le gore re kgone go bona bohlokwa bja go tsoma Mmušo pele ka mafolofolo.—Mateo 6:33.
20, 21. Ke bomang bao lehono ba arabelago gabotse go ‘opa-openg’ ga Jesu, gomme ditebelelo tša bona ke dife?
20 Kriste o re: “O tsebê xore ke eme mojakô, ke a ôpa-ôpa. Xe motho a e-kwa Lentšu la-ka a bula mojakô, ke tlo tsêna xo yêna ka lalêla naê’, yêna a lalêla le Nna.” Gantši Jesu o be a nea tlhahlo ya moya ge a be a le dijong. (Luka 5:29-39; 7:36-50; 14:1-24) Ga bjale o kokota mojakong wa phuthego e swanago le ya Laoditsea. Na ditho tša yona di tla arabela, tša tsošološa lerato la tšona la go mo rata, tša mo amogela gare ga tšona gomme tša mo dumelela gore a di rute? Ge e ba go le bjalo, Kriste o tla ba le tšona monyanyeng e le gore di holege kudu moyeng.
21 “Dinku tše dingwê” tša lehono di amogela Jesu ka tsela ya seswantšhetšo, gomme tiro e bjalo e lebiša bophelong bjo bo sa felego. (Johane 10:16; Mateo 25:34-40, 46) Kriste o tla nea motlotšwa yo mongwe le yo mongwe wa mofenyi tokelo ya go ‘dula le yena sedulong sa gagwe sa bogoši, bjalo ka ge le yena a fentše a dula le Tatagwe sedulong sa Gagwe sa bogoši.’ Ee, Jesu o holofetša batlotšwa ba bafenyi moputso o mogolo wa go buša le yena ka letsogong le letona la Tatagwe kua legodimong. Le gona dinku tše dingwe tše di fentšego di lebeletše pele lefelong le lebotse lefaseng ka tlase ga pušo ya Mmušo.
Dithuto Bakeng sa Rena ka Moka
22, 23. (a) Bakriste ka moka ba ka holwa bjang ke mantšu a Jesu a yago go diphuthego tše šupago? (b) Maikemišetšo a rena e swanetše go ba afe?
22 Ga go na pelaelo gore Bakriste ka moka ba ka holwa kudu ke mantšu a Jesu a yago go diphuthego tše šupago tša kua Asia Minor. Ka mohlala, ka go lemoga gore Kriste o ile a nea theto e swanetšego, bagolo ba Bakriste bao ba nago le lerato ba tutueletšega go reta batho bao ba tšwelago pele gabotse moyeng ka phuthegong. Moo go nago le bofokodi, bagolo ba thuša badumedi-gotee le bona go diriša dihlare tša Mangwalo. Ka moka ga rena re ka tšwela pele re holwa ke dibopego tše di fapa-fapanego tša keletšo yeo Kriste a e neilego diphuthego tše šupago, ge feela re e diriša ka thapelo le ka go se dika-dike. *
23 Mehla ye ya bofelo ga se nako ya go fo kgotsofalela seo re nago le sona, ya go phegelela dilo tše di bonagalago goba selo le ge e le sefe seo se ka dirago gore re direle Modimo ka go fo ithola kgwara. Ka gona, anke diphuthego ka moka di dule di phadima kudu e le dihloma-pone tše Jesu a di beilego lefelong la tšona. Bjalo ka Bakriste ba botegago, anke ka mehla re ikemišetše go ela hloko ge Kriste a bolela gomme re theetše seo moya o se bolelago. Ke moka re tla ipshina ka mo go sa felego re le barwadi ba seetša bakeng sa go tumiša Jehofa.
[Mengwalo ya ka tlase]
^ ser. 22 Kutollo 2:1–3:22 e ahla-ahlilwe gape go dikgaolo 7 go ya go 13 tša puku ya Seremo se Segolo sa Kutollo se Batametše!, e gatišitšwego ke Dihlatse tša Jehofa.
[Dipotšišo tša Thuto]
[Caption on page 16]
Ditsela tše mpe tša “mosadi yola Isebele” di swanetše go phengwa
[Caption on page 18]
Jesu o beile ka pele ga balatedi ba gagwe ‘mojako o mogolo’ o lebišago ditokelong tša Mmušo
[Caption on page 20]
Na o amogela Jesu gotee le go mo theetša?
O tla Araba Bjang?
• “Mosadi yola Isebele” e be e le mang, gomme ke ka baka la’ng basadi bao ba boifago Modimo ba sa swanela go mo ekiša?
• Ke maemo afe ao a bego a le gona ka phuthegong ya Sarede, gomme re ka dira’ng e le gore re pheme go swana le bontši bja Bakriste bao ba bego ba phela moo?
• Jesu o ile a nea phuthego ya Filadelefia dikholofetšo dife, gomme di šoma bjang lehono?
• Ke ka baka la’ng ba-Laoditsea ba ile ba solwa, eupša ke ditebelelo dife tšeo di beilwego ka pele ga Bakriste ba fišegago?