Dipotšišo tše Tšwago go Babadi

Na go fošagetše go bolaya seruiwa seo se babjago o šoro goba seo se tšofetšego?

Batho ba bantši ba lebelela diphoofolo tše di fapa-fapanego e le tšeo di kgahlišago le tšeo di tlišago lethabo. Diruiwa tše dingwe e ba bagwera ba ba botse. Ka mohlala, dimpša di tsebja e le tšeo di kwago le tšeo di ratago beng ba tšona. Ka gona, lerato leo batho ba ka ratago seruiwa se bjalo ka lona le a kwešišega, kudu-kudu ge e le seruiwa seo ba bilego le sona ka nywaga e mentši.

Lega go le bjalo, diruiwa tše dintši ga di phele nako e telele kudu. Ka go swana le dikatse, dimpša di ka phela ka nywaga e 10 go ya go 15 goba go feta moo, go ithekgilwe ka mohuta wa tšona. Ge di tšofetše, diruiwa di ka swarwa ke malwetši le magole ao a ka gateletšago beng ba tšona, bao ba di gopolago ge e be e sa le tše dinyenyane le nywageng ya ge di be di sa na le mahlahla. Na e ka ba mo go fošagetšego go khutšiša diphoofolo tše bjalo mohlakong, go di bolaya?

Mokriste o tla nyaka go dira ka go dumelelana le thato ya Modimo ge a dirišana le diphoofolo. Go di tlaiša go tloga go le kgahlanong le thato ya Modimo, ka gobane Lentšu la gagwe le re: “Yo boló ó tseba bophelô bya kxomo ya xaxwe; pelo ya e mobe xa e e xauxele.” (Diema 12:​10) Lega go le bjalo, se ga se bolele gore Modimo o lebelela diphoofolo ka tsela yeo a lebelelago batho ka yona. Ge Modimo a be a bopa batho, o ile a bontšha gore go be go na le phapano e lego molaleng magareng ga bona le diphoofolo. Ka mohlala, o ile a nea batho kholofelo ya bophelo bjo bo sa felego, eupša ga se a ka a nea diphoofolo kholofelo ye. (Ba-Roma 6:​23; 2 Petro 2:​12) Ka ge e le Mmopi, o na le tshwanelo ya go bea tswalano e nepagetšego magareng ga batho le diphoofolo.

Genesi 1:​28 e re botša gore tswalano yeo ke efe. Modimo o ile a botša batho ba mathomo gore: “Le bušê ’hlapi tša lewatlê le ’nonyana tša xodimo, le nyabanyaba yohle ya diphedi mó ’faseng.” Ka mo go swanago, Psalme 8:​6-⁠8 e re: “Tšohle [Modimo o] di bea ka tlase xa ’naô tša [motho]. Dinku le dikxomo; ka moka xa tšôna, le tšôna ’phôôfolô tša naxeng, Le dinonyana tša xodimo, le dihlapi tša lewatlê, tše di thalakanyaxo mawatlê ka mebila.”

Modimo o ile a bolela ka mo go kwagalago gore motho a ka diriša diphoofolo ka mo go swanetšego gotee le go di bolaya. Ka mohlala, letlalo la tšona le ka dirišwa e le diaparo. Le gona, Modimo o neile batho tumelelo ya go ja nama ya diphoofolo ka morago ga Meetse-fula a mehleng ya Noage, bakeng sa go tlaleletša dijong tša bona tša merogo tšeo mathomong ba bego ba di neilwe.​—Genesi 3:​21; 4:⁠4; 9:⁠3.

Se ga se dumelele go bolaya diphoofolo ka tsela e se nago morero bakeng sa dipapadi. Go Genesi 10:⁠9 (bapiša le NW.), Beibele e hlalosa Nimirode e le “motsomi yo matla.” Eupša yona temana yeo e re botša gore seo se ile sa dira gore a be ‘yo a lwantšhanago le Jehofa.’

Ka gona, gaešita le ge motho a laola diphoofolo, ga se a swanela go diriša bolaodi bjoo gampe eupša o swanetše go bo diriša ka go dumelelana le melao ya motheo ya Lentšu la Modimo. Se se ka akaretša go se dire gore seruiwa se tlaišege ka mo go sa nyakegego ka baka la botšofadi, go gobala o šoro goba bolwetši bjo bo sa folego. Tabeng e bjalo, ke boikarabelo bja Mokriste go dira phetho ya seo a swanetšego go se dira. Ge e ba a dira phetho ya gore e tla ba go bontšha kgaugelo go se dumelele seruiwa go tšwela pele se tlaišega ka ntle le kholofelo le ge e le efe ya go ka fola, gona a ka kgetha go se khutšiša.