Emang Gomme Le Bone Phološo Ya Jehofa!
Emang Gomme Le Bone Phološo Ya Jehofa!
“Tšeang boemo bja lena, le eme gomme le bone ge Jehofa a le phološa.” —2 Koronika 20:17, Nw.
1, 2. Ke ka baka la’ng tlhaselo e tlago ya “Gogo wa naxa ya Magogo” e e-na le mafelelo a šoro kudu go feta a botšhošetši bja ditšhaba-tšhaba?
BOTŠHOŠETŠI bo hlalositšwe ke ba bangwe e le go hlasela badudi ba lefase, go akaretša le tlhabologo ka boyona. Ka mo go kwagalago, tšhošetšo e bjalo e swanetše go tšeelwa godimo. Ka lehlakoreng le lengwe, go na le tlhaselo e nngwe yeo e nago le mafelelo a šoro kudu yeo badudi ba lefase ba sa e šetšego. Ke efe?
2 Ke tlhaselo ya “Gogo wa naxa ya Magogo,” yeo Beibele e bolelago ka yona go Hesekiele kgaolo 38. Na ke pheteletšo go bolela gore tlhaselo ye e na le mafelelo a šoro go feta a botšhošetši bja ditšhaba-tšhaba? Le gatee, ka gobane tlhaselo ya Gogo ke e kgolo kudu go feta go hlaselwa ga mebušo ya batho. E hlasela mmušo wa Modimo wa legodimong! Lega go le bjalo, ka go fapana le batho bao ba ka bago ba na le katlego e lekaneditšwego ya go lebeletšana ka katlego le ditlhaselo tša tshepedišo ya bona, Mmopi o na le bokgoni bjo bogolo bja go swaragana le tlhaselo e šoro kudu ya Gogo.
Go Hlaselwa ga Mmušo wa Modimo
3. Ke’ng seo babuši ba lefase ba bego ba dutše ba laletšwa go se dira ga e sa le go tloga ka 1914, gomme ba arabetše bjang?
3 Ntwa magareng ga Kgoši yeo ga bjale e bušago ya Modimo le tshepedišo e kgopo ya Sathane e be e dutše e tšwela pele ga e sa le go tloga ge Mmušo wa Modimo o hlongwa magodimong ka 1914. Ka yona nako yeo, babuši ba batho ba ile ba lemošwa gore ba ikokobeletše Mmuši yo a kgethilwego ke Modimo. Eupša ba ganne go dira bjalo, go etša ge go boletšwe e sa le pele gore: “Maxoši a lefase a a tsoxa, le babuši ba lakana xo lwa le Morêna le Motlotšwa w’axwe. Ba re: A re kxaoleng ditlêmô tšé tša bôná, re lahlê dinti tšé tša bôná!” (Psalme 2:1-3) Go gana pušo ya Mmušo ka ntle le pelaelo go tla fihla seremong nakong ya tlhaselo ya Gogo wa Magogo.
4, 5. Batho ba ka lwa bjang le mmušo wa Modimo o sa bonagalego wa legodimong?
4 Re ka ba re ipotšiša gore batho ba ka lwa bjang le mmušo o sa bonagalego wa legodimo. Beibele e utolla gore mmušo wo, o bopilwe ka “ba dikete tše lekxolo le naxo le masome a manê a metšô e menê, ba ba rekolotšwexo lefaseng,” gotee le “Kwana,” e lego Kriste Jesu. (Kutollo 14:1, 3; Johane 1:29) Ka ge e le wa legodimong, mmušo o mofsa o bolelwa e le “maxodimo a mafsa,” mola balata ba wona ba lefaseng ba bitšwa ka mo go swanetšego gore ke “lefase le lefsa.” (Jesaya 65:17; 2 Petro 3:13) Bontši bja ba 144 000 bao e lego babuši-gotee le Kriste ba šetše ba phethile tsela ya bona ya lefaseng ka potego. Ka gona ba itlhatsetše ba swanelegela go tšea dikabelo tša bona tše difsa tša tirelo kua legodimong.
5 Lega go le bjalo, mašaledi a sego kae a ba 144 000 a sa le mo lefaseng. Go ba fetago 15 000 000 ba bilego gona monyanyeng wa Sejo sa Morena sa Mantšiboa ka 2002, ke feela ba 8 760 bao ba bontšhitšego kholofelo ya bona ya go ba bao ba kgethetšwego kabelo ye ya legodimong. Mang le mang yo a lekago go hlasela mašaledi a ao e tlago go ba ditho tša Mmušo o tloga a hlasela Mmušo wa Modimo.—Kutollo 12:17.
Kgoši e Phetha Phenyo ya Yona
6. Jehofa le Kriste ba lebelela bjang kganetšo yeo e lebišitšwego go batho ba Modimo?
6 Karabelo ya Jehofa go kganetšo ya Mmušo wa gagwe o hlomilwego e ile ya bolelwa e sa le pele ka gore: “Mo-dula-maxodimo ó a ba thsêxa, Yêna Mong ’a bohle ó a ba nyatša. O tlo bá a bua nabô’ à befetšwe, ó tlo ba thšoša à xalefile, Nna ya-ka Kxoši ke e beile fá Tsione, fa thabeng e kxêthwa ya-ka.” (Psalme 2:4-6) Ga bjale go fihlile nako ya gore Kriste, ka tlase ga tlhahlo ya Jehofa, ‘a phethe phenyo ya gagwe.’ (Kutollo 6:2, bapiša le NW.) Jehofa o lebelela bjang kganetšo yeo e lebišitšwego go batho ba gagwe nakong ya phenyo ya mafelelo? O e lebelela e le yeo gabotse e lebišitšwego go yena le go Kgoši ya gagwe e bušago. Jehofa o re: ‘E a kgwathago lena o kgwatha thaka ya leihlo la-ka.’ (Sakaria 2:7-9, PK) Le gona Jesu o gateletše gore o lebelela seo batho ba se dirago goba ba palelwago ke go se direla bana babo bao ba tloditšwego e le go mo direla goba go se mo direle.—Mateo 25:40, 45.
7. “Lešaba le lexolo” leo le hlalositšwego go Kutollo 7:9 le lebeletšana le kgalefo ya Gogo ka mabaka afe?
7 Go ba gona, bao ba thekgago ka mafolofolo mašaledi a tloditšwego le bona ba tla lebeletšana le kgalefo ya Gogo. Batho ba ba e tlago go ba ditho tša “lefase le lefsa” la Modimo ke “lešaba le lexolo” leo le tšwago go “dithšaba ka moka, le meloko ka moka, le merafô ka moka, le maleme ka moka.” (Kutollo 7:9) Go bolelwa ka bona e le bao ba ‘emego pele ga sedulo sa bogoši sa Kwana, ba apere dikobo tše ditšhweu.’ Ka gona ke ba amogelwago mahlong a Modimo le Kriste Jesu. Ba swere “mahlare a molala ka diatla tša bôná,” ba tumiša Jehofa e le Mmuši yo a swanetšego wa legohle, yoo bobuši bja gagwe bo emelwago ke go buša ga Kgoši ya gagwe e beilwego sedulong sa bogoši, Jesu Kriste, “Kwana ya Modimo.”—Johane 1:29, 36.
8. Tlhaselo ya Gogo e tla dira gore Kriste a dire’ng, gomme ka mafelelo afe?
8 Tlhaselo ya Gogo e tla dira gore Kgoši ya Modimo e beilwego sedulong sa bogoši e gate mogato wa go thoma ntwa ya Haramagedone. (Kutollo 16:14, 16) Bao ba gannego go ela hloko bogoši bja Jehofa ba tla fedišwa. Ka lehlakoreng le lengwe, bao ba kgotleletšego tlaišo ka baka la go botegela ga bona Mmušo wa Modimo ka go se kwanantšhe, ba tla hwetša kimologo ya sa ruri. Paulo o ngwadile mabapi le bona gore: “Ké bohlatse bya moahlolêlô wa xo loka wa Modimo, wa xore Le hwetšwê Le le ba ba swanêlwaxo ke mmušô wa Modimo wo Le hlokofaletšwaxo wôna. Se se loketšexo Modimo ké xe ba ba Le hlokofatšaxo a tlo ba bušetša thlokofatšô. ’Me lena ba le hlokofatšwaxo le rena ó tlo re lapološa mohla wa kutollô ya Morêna Jesu xe a e-tšwa lexodimong à na le Barongwa ba xaxwe ba matla. Ba ba sa tsebexo Modimo, le ba ba sa kwexo Ebangedi ya Mong wa rena Jesu Kriste, ó tlo ba lefetša ka dikxabo tša mollô.”—2 Ba-Thesalonika 1:5-8.
9, 10. (a) Jehofa o ile a nea bjang Juda phenyo go lenaba le le boifišago? (b) Ke’ng seo Bakriste lehono ba swanetšego go tšwela pele ba se dira?
9 Nakong ya masetla-pelo a magolo a tlago ao a tla felago ka Haramagedone, Kriste o tla lwa le bobe ka moka. Eupša go ka se nyakege gore balatedi ba gagwe ba lwe, go etša ge go be go sa nyakege go badudi ba mebušo ya meloko e mebedi ya Juda nywageng e dikete e fetilego. Ntwa e be e le ya Jehofa, gomme o ile a ba nea phenyo. Pego e balega ka gore: “Ké xe Morêna a šetše a nthšitše ba sekhung, ba lwa le Ba-Amoni le Ba-Moaba le ba dithabeng tša Seire, ba ba bexo ba tlile xo lwa le Juda, ba ba bolaya. Ba-Amoni le Ba-Moaba ba hlanoxêla bála ba dithabeng tša Seire, ba ba bolaya ba ba fediša; ya re xe ba fedišitše ba dithabeng tša Seire, ba senyana seng sa bôná ba bolayana. Ba-Juda xe ba fihla mmotong mo ba bônaxo tša molaleng, ba iša mahlô mo xo bexo xo le mašaba ala, ba bôna ditoto di rapaletše fase, xò se e a phonyokxilexo.”—2 Koronika 20:22-24.
10 Go bile bjalo ka ge Jehofa a ile a bolela e sa le pele gore: “Xa se lena Le tl’o xo hlabana fao.” (2 Koronika 20:17) Se se bea mohlala woo Bakriste ba swanetšego go o latela ge Jesu Kriste a gata mogato wa go ‘phetha phenyo ya gagwe.’ Ga bjale, ba tšwela pele ba lwantšha bobe ka dibetša tša moya, e sego tša nama. Ka go rialo ‘ba fenya bobe ka botse.’—Ba-Roma 6:13; 12:17-21; 13:12; 2 Ba-Korinthe 10:3-5.
Ke Mang a Tlago go Etelela Tlhaselo ya Gogo Pele?
11. (a) Gogo o tla diriša dihlopha dife go etelela pele tlhaselo ya gagwe? (b) Ke’ng seo se akaretšwago go phafogeng moyeng?
11 Gogo wa Magogo o hlaloswa e le Sathane Diabolo a le boemong bja gagwe bjo bo nyatšegago ga e sa le go tloga ka 1914. Ka ge e le sebopiwa sa moya, a ka se kgone go etelela tlhaselo ya gagwe pele ka go lebanya, eupša o tla diriša dihlopha tša batho go dira ditiro tša gagwe. Dihlopha tše tša batho e tla ba bomang? Beibele ga e re nee ditaba ka botlalo, lega go le bjalo e re nea ditšhupetšo tše dingwe tšeo di ka re thušago go tseba gore e tla ba bomang. Ge ditiragalo tša lefase di dutše di tšwela pele go phethagatšeng diporofeto tša Beibele, ganyenyane-ganyenyane re tla ba le pono e botse kudu. Batho ba Jehofa ba phema go phopholetša eupša ba dula ba phafogile moyeng, ba ela hloko ka mo go tletšego ditiragalo tša dipolitiki le tša bodumedi tšeo di bontšhago go phethagatšwa ga diporofeto tša Beibele.
12, 13. Moporofeta Daniele o boletše bjang e sa le pele ka tlhaselo ya mafelelo bathong ba Modimo?
12 Moporofeta Daniele o hlabiša seetša tabeng ya tlhaselo ya mafelelo malebana le batho ba Modimo ka go ngwala gore: “Ya [kgoši ya leboa] tlo tšwa dirá wa sehloxo ya šwalalanya ba bantši ya ba fediša. Mešaša ya yôna ya boxoši e tlo e hlôma makxatheng a lewatlê le thaba e kxêthwa.”—Daniele 11:44, 45.
13 Go ya ka Beibele, “lewatlê” e be e le Lewatle le Legolo goba Mediterranean, gomme “thaba e kxêthwa” e be e le Tsione, yeo Jehofa a boletšego ka yona gore: “Nna ya-ka Kxoši ke e beile fá Tsione, fa thabeng e kxêthwa ya-ka.” (Psalme 2:6; Jošua 1:4) Ka gona, go ya ka pono ya moya, naga e lego “makxatheng a lewatlê le thaba e kxêthwa” e emela naga e humilego ya moya ya Bakriste ba tloditšwego. Ga ba sa hlaolwa le lewatle la batho bao ba ikarotšego go Modimo, gomme ba lebeletše pele go bušeng le Kriste Jesu Mmušong wa legodimong. Go molaleng gore bahlanka ba Modimo ba tloditšwego, gotee le bagwera ba bona ba botegago ka go se kwanantšhe ba lešaba le legolo, e tla ba bahlaselwa ba kgoši ya leboa ge e thoma tlhaselo ya yona go phethagatšweng ga boporofeta bja Daniele.—Jesaya 57:20; Ba-Hebere 12:22; Kutollo 14:1.
Bahlanka ba Modimo ba tla Arabela Bjang?
14. Ke dilo dife tše tharo tšeo batho ba Modimo ba tlago go di dira ge ba hlaselwa?
14 Go tla letelwa gore bahlanka ba Modimo ba dire’ng gatee-tee ge ba hlaselwa? Le gona mo, karabelo ya setšhaba seo se emelago Modimo sa mehleng ya Josefate e bea mohlala. Ela hloko gore batho ba sona ba be ba laetšwe go dira dilo tše tharo: (1) go tšea boemo bja bona, (2) go ema le go (3) bona phološo ya Jehofa. Batho ba Modimo lehono ba tla gata mogato bjang ka go dumelelana le mantšu a?—2 Koronika 20:17.
15. Go bolela’ng go batho ba Jehofa gore ba tšee boemo bja bona?
15 Go tšea boemo bja bona: Batho ba Modimo ba tla tšwela pele ba kgomaretše boemo bja bona bja go thekga Mmušo wa Modimo ka mafolofolo ba sa šišinyege. Ba tla tšwela pele ba kgomaretše boemo bja bona bja boema-gare bja Bokriste. Ba tla ‘tia matla, ba sa tekeme’ tirelong ya bona ya go botegela Jehofa ka go se kwanantšhe gomme ba tla tšwela pele ba tumiša Jehofa phatlalatša ka baka la botho bja gagwe bjo lerato. (1 Ba-Korinthe 15:58; Psalme 118:28, 29) Ga go na kgateletšego yeo gona bjale goba nakong e tlago e ka ba šikinyago boemong bjo bja go amogelwa ke Modimo.
16. Bahlanka ba Jehofa ba tla ema ka tsela efe?
16 Le eme: Bahlanka ba Jehofa ba ka se leke go iphološa eupša ba tla bota Jehofa ka mo go feletšego. Ke yena feela yo a kgonago go phološa bahlanka ba gagwe tlalelong ya lefase, gomme o holofeditše go dira bjalo. (Jesaya 43:10, 11; 54:15; Dillo tša Jeremia 3:26) Go bota Jehofa go tla akaretša go bota mokero wa mehleng yeno wo o bonagalago woo ka ntle le pelaelo a bego a dutše a o diriša ka nywaga-some bakeng sa go phethagatša merero ya gagwe. Go feta le ge e le neng pele, Bakriste ba therešo ba tla swanela ke go bota barapedi-gotee le bona bao ba laetšwego ke Jehofa le Kgoši ya gagwe e bušago gore ba etelele pele. Banna ba ba botegago ba tla hlahla batho ba Modimo. Go hlokomologa tlhahlo ya bona go ka lebiša masetla-pelong.—Mateo 24:45-47; Ba-Hebere 13:7, 17.
17. Ke ka baka la’ng bahlanka ba Modimo ba botegago ba tlago go bona phološo ya Jehofa?
17 Le bone phološo ya Jehofa: Phološo e tla ba moputso wa bohle bao ba kgomarelago boemo bja bona bja potego ya Bokriste le bao ba holofelago gore Jehofa o tla ba lokolla. Go fihlela iring ya mafelelo—le go fihla bokgoleng bjoo ba ka bo kgonago—ba tla goeletša go tla ga letšatši la Jehofa la kahlolo. Dibopiwa ka moka di swanetše go tseba gore Jehofa ke Modimo wa therešo le gore o na le bahlanka ba botegago mo lefaseng. Le ka mohla go ka se ke gwa nyakega gore go be le kgang e tšeago lebaka le letelele ya mabapi le tshwanelo ya Jehofa ya go buša.—Hesekiele 33:33; 36:23.
18, 19. (a) Koša ya phenyo e lego go Ekisodo kgaolo 15 e bontšha bjang maikwelo a bao ba tlago go phologa tlhaselo ya Gogo? (b) Ke’ng seo batho ba Modimo ba swanetšego go se dira gona bjale?
18 Ba e-na le matla a tsošološitšwego, batho ba Modimo ba tla tsena lefaseng le lefsa, ba fagahletše go opela koša ya phenyo, go etša ge go dirile ba-Isiraele ba bogologolo ka morago ga gore ba lokollwe ka go tshela Lewatle le Lehwibidu. Ka ge ba leboga Jehofa ka dinako tšohle bakeng sa tšhireletšo ya gagwe, e le motho ka o tee ka o tee goba e le sehlopha, ba tla gopola mantšu a bogologolo a rego: “A nke ke binêlê Morêna, ka xobane ó tsoxile a phaxama. . . . Morêna Moxale dintweng, Mong wa ’ina leo la “Morêna”! . . . Morêna, letsôxô la xaxo le taxa ka matla a lôna; Morêna, letsôxô la xaxo le rôba manaba. Barumodi ba xaxo O ba uša ka boxolo Ò phaxame; O tuka boxale wa ba fiša byalo ka mahlaka. . . . Xomme sethšaba sa baphološwa ba xaxo, O se etetša ka botho, Ka matla a xaxo O se iša kua felô xokxêthwa xa xaxo. . . . O tlo ba xôrôša, O tlo ba hlôma ’thabeng tša naxa ya xaxo, Felômo Wêna Morêna O tl’o xo axa xôna, Sekxethweng se Wêna Mong’a rena O tl’o xo se thêa ka ’atla sa xaxo. Kxoši neng le neng, ka mehla le mehla, ké Yêna Morêna.”—Ekisodo 15:1-19.
19 Ga bjale ka ge tebelelo ya bophelo bjo bo sa felego e phadima go feta le ge e le neng pele, ke sebaka se sebotse gakaakang go bahlanka ba Modimo go bontšha boineelo bja bona go Jehofa le go tsošološa maikemišetšo a bona a go mo hlankela e le Kgoši ya bona!—1 Koronika 29:11-13.
[Dipotšišo tša Thuto]
Na o ka Hlalosa?
• Ke ka baka la’ng tlhaselo ya Gogo e tla ba e lebišitšwe go batlotšwa le go dinku tše dingwe?
• Ke bjang batho ba Modimo ba tlago go tšea boemo bja bona?
• Go ema go bolela’ng?
• Batho ba Modimo ba tla bona bjang phološo ya Jehofa?
[Caption on page 18]
Jehofa o ile a nea Josafate le batho ba gagwe phenyo, go sa nyakege gore bona ba lwe
[Caption on page 20]
Batlotšwa le dinku tše dingwe ba tšea karolo go godišeng bogoši bja Jehofa
[Caption on page 22]
Go swana le ba-Isiraele ba bogologolo, go se go ye kae batho ba Modimo ba tla ba ba opela koša ya phenyo