Go Ithuta Sephiri sa go Kgotsofalela tše re Nago le Tšona

Lengwalong le le kgothatšago leo le yago go Bakriste ba Filipi, moapostola Paulo o ngwadile gore: “Ke ithutile xo kxôlwa ke tše ke naxo le tšôna. . . . Ke tlwaetše tšohle, e ka ba xo hora le xo kwa tlala; e ka ba xo tlalêlwa ke dilô, e ka ba xo di hlôka.”​—Ba-Filipi 4:​11, 12.

Sephiri sa Paulo sa go kgotsofalela tše a nago le tšona e be e le sefe? Ge re nagana ka boemo bja tša boiphedišo bjo bo bitšago tšhelete ya godimo le bjo bo sa tsepamago bja mehleng ya rena, ka ntle le pelaelo e tla ba mo go holago gore Bakriste ba therešo ba ithute go kgotsofalela tše ba nago le tšona e le gore ba ka dula ba lebišitše tlhokomelo tirelong ya bona go Modimo.

PEJANA lengwalong la gagwe, Paulo o ile a bolela ka woo e bego e le modiro wa gagwe o atlegilego. O itše: “Xobane bôná ba rexo ba ka bôta nama, nna ke ba phadile. Ke boloditšwe ka letšatši la seswai; ke wa sethšaba sa Isiraele; ke wa moloko wa Benyamini; ke Mo-Hebere ka letswálô; Mofarisei ka Molaô. Xe ke tlaišitše phuthêxô e be e le xo fišêxêlwa tšôna tšeo; tokong ya Molaô ke be ke sa sôlêxe.” (Ba-Filipi 3:​4-⁠6) Go oketša moo, e le mo-Juda yo a fišegago, Paulo o be a neilwe thomo le thekgo ke baperisita ba bagolo ba kua Jerusalema. Tše ka moka di ile tša mo nea kholofelo ya matla le botumo​—go tša dipolitiki, go tša bodumedi, gomme ka ntle le pelaelo le go tša ditšhelete​—tshepedišong ya Sejuda.​—Ditiro 26:​10, 12.

Lega go le bjalo, ge Paulo a be a fetoga modiredi yo a fišegago wa Mokriste, dilo di ile tša fetoga ka lebelo. E le ka baka la ditaba tše dibotse, ka go rata o ile a tlogela mošomo wa gagwe wo o atlegilego gotee le tšohle tšeo di bego di lebelelwa e le tša bohlokwa nakong e fetilego. (Ba-Filipi 3:​7, 8) Ga bjale o be a tla iphediša bjang? Na o be a tla lefša ka ge e le modiredi? O be a tla hwetša bjang dinyakwa tša gagwe ka noši?

Paulo o ile a dira bodiredi bja gagwe ntle le go lefša. E le gore a se be morwalo go bao a ba hlankelago, o ile a kopanela le Akwila le Perisila go direng ditente ge a be a le kua Korinthe, gomme o ile a ba a dira dilo tše dingwe e le gore a iphediše. (Ditiro 18:​1-⁠3; 1 Ba-Thesalonika 2:⁠9; 2 Ba-Thesalonika 3:​8-10) Paulo o ile a sepela maeto a mararo a matelele a boromiwa, gomme o ile a ba a-⁠ya diphuthegong tšeo di bego di nyaka go etelwa. Ka ge a be a swaregile ka mo go feletšego ka tirelo ya Modimo, o be a e-⁠na le dilo tše sego kae tše di bonagalago. Gantši bana babo ba be ba mo hlokomela. Lega go le bjalo, ka baka la maemo a mabe, ka dinako tše dingwe o be a diila le go hloka. (2 Ba-Korinthe 11:​27; Ba-Filipi 4:​15-18) Lega go le bjalo, Paulo ga se a ka a belaela ka bothata bja gagwe, e bile ga se a ka a duma tšeo ba bangwe ba nago le tšona. Ka go rata le ka lethabo  o ile a šoma ka thata bakeng sa go hola Bakriste-gotee le yena. Ge e le gabotse, ke Paulo a ilego a tsopola mantšu a tsebjago gabotse a Jesu a rego: “Lešexo la monei le phala la monewa.” A mohlala o mobotse gakaakang bakeng sa rena ka moka!​—Ditiro 20:​33-⁠35.

Seo se Bolelwago ke go Kgotsofalela tše re Nago le Tšona

Lebaka le legolo leo le ilego la dira gore Paulo a thabe le go kgotsofala e bile go kgotsofalela ga gagwe tšeo a nago le tšona. Lega go le bjalo, go bolela’ng go kgotsofalela tšeo o nago le tšona? Ge re e bea gabonolo, go bolela go kgotsofalela dilo tša motheo. Mabapi le se, Paulo o ile a botša Timotheo yo e lego modirišani wa gagwe bodireding gore: “Xomme borapedi ké leruô le lexolo xe bo na le xo kxôlwa ke tše O naxô le tšôna. Xobane mola rè e-⁠tla lefaseng, xa ra ka ra tla le selô; le xo tloxa re ka se kxône xo tloxa le selô. Ké xôna, xe re na le dijô le diaparô, a re kxolweng ke tšôna.”​—1 Timotheo 6:​6-⁠8.

Ela hloko gore Paulo o ile a tswalanya go kgotsofalela tše re nago le tšona le boineelo go Modimo. O ile a lemoga gore lethabo la kgonthe le tlišwa ke boineelo go Modimo, e lego go bea tirelo ya rena go Modimo pele, e sego dilo tše di bonagalago goba mahumo. “Dijô le diaparô” e be e fo ba dilo tšeo di dirago gore a kgone go tšwela pele a phegelela boineelo go Modimo. Ka gona sephiri sa Paulo sa go kgotsofalela tšeo a nago le tšona e be e le go ithekga ka Jehofa, go sa šetšwe gore maemo e ka ba e le afe.

Batho ba bantši lehono ba lebeletšana le pelaelo goba go se thabe ka gobane ba sa lemoge sephiri seo goba ba se hlokomologa. Go e na le gore ba hlagolele go kgotsofalela tšeo ba nago le tšona, ba bona go le kaone go bota tšhelete le seo tšhelete e ka se rekago. Intasteri ya tša papatšo le mekero ya ditaba e dira gore batho ba ikwe ba ka se kgone go thaba ka ntle le ge ba ka ba le ditšweletšwa le didirišwa tša morago bjale tše di bitšago kudu​—gomme ba be le tšona ka yona nako yeo. Ka baka leo, batho ba bantši ba  feleletša ba wela molabeng wa go phegelela tšhelete le dilo tše di bonagalago. Go e na le gore ba hwetše lethabo le kgotsofalo, ba “wêla melekong le mereong; ba ya le dikxanyoxô tše ntši tša bošilo tše di xobošaxo motho tša mo senya, tša mo tekesetša thsenyexong le tahlexong.”​—1 Timotheo 6:​9, 10.

Ba Ithutile Sephiri

Na mo mehleng ye, go tloga go kgonega go phela ka boineelo go Modimo le go kgotsofalela tšeo re nago le tšona gomme re hwetše lethabo le kgotsofalo? Ee, go a kgonega. Ge e le gabotse, dimilione tša batho lehono di dira sona seo. Ba ithutile sephiri sa go thabišwa ke dilo le ge e le dife tše di bonagalago tšeo ba nago le tšona. Ke Dihlatse tša Jehofa, tšeo di ineetšego go Modimo, tšeo di dirago thato ya gagwe le go ruta batho kae le kae ka morero wa gagwe.

Ka mohlala, ela hloko bao ba ilego ba ithapela go tlwaetšwa gomme ba romelwa dinageng tše ba sa di tsebego e le baromiwa go ya go bolela ditaba tše dibotse tša  Mmušo wa Modimo. (Mateo 24:​14) Gantši, maemo a bophelo a dinageng tšeo ba rometšwego go tšona ga se ao a tšwetšego pele ka dilo tše di bonagalago go swana le ao ba bego ba a tlwaetše. Ka mohlala, ge baromiwa ba be ba fihla nageng e nngwe ya Asia mathomong a bo-1947, ditla-morago tša ntwa di be di sa dutše di bonala, gomme e be e le magae a sego kae ao a bego a na le mabone a mohlagase. Dinageng tše dintši, baromiwa ba ile ba hwetša gore diaparo di be di hlatswiwa ka setee ka setee ka lepolanka la go hlatswetša goba mafsikeng ka nokeng go e na le ka motšhene wa go hlatswa wa mohlagase. Eupša ba be ba tletše go ruta batho therešo ya Beibele, ka gona ba ile ba itlwaelanya le maemo a lefelong leo gomme ba swarega bodireding.

Ba bangwe ba ile ba tsenela bodiredi ka nako e tletšego goba ba ile ba hudugela mafelong ao a bego a sa ka a hwetša ditaba tše dibotse. Adulfo o ile a hlankela e le modiredi wa nako e tletše ka nywaga e fetago e 50 dikarolong tše di fapa-fapanego tša Mexico. O re: “Ka go swana le moapostola Paulo, nna le mosadi wa-ka re ithutile go itlwaelanya le maemo. Ka mohlala, e nngwe ya diphuthego tšeo re ilego ra di etela e be e le kgole kudu le motse goba mmaraka le ge e le ofe. Nakong e nngwe le e nngwe ya dijo, bana babo rena ba be ba kgotsofalela go ja tortilla e tee feela yeo e nago le makhura a manyenyane a kolobe le letswai gotee le komiki e tee ya kofi. Se ke sona feela seo ba bego ba swanetše go se ja​—di-tortilla tše tharo ka letšatši. Ka gona re ile ra ithuta go phela go swana le bana babo rena. Nywageng e 54 ya ge ke be ke dutše ke hlankela Jehofa ka nako e tletšego ke ile ka thabela diphihlelo tše dintši tše di swanago le tše.”

Florentino o gopola kamoo yena le lapa la gagwe ba ilego ba swanela ke go tlwaelana le maemo a thata ka gona. Ge a gopola nywageng ya ge a be a sa le yo monyenyane, o re: “Tate e be e le mmapatši yo a humilego kudu. O be a na le meago e mentši. Ke sa dutše ke gopola khaonthara ya lebenkele la dijo leo re bego re e-⁠na le lona. Go be go e-⁠na le laiki ya bophara bja disenthimithara tše 50 gomme e iša fase ka disenthimithara tše 20, le gona e be e e-⁠na le dikarolwana tše nne. Re be re tsenya tšhelete ya letšatši ka moo. Ge letšatši le sobela, e be e phela e tletše ka ditšhelete tša tšhipi le tša pampiri.

“Ka ponyo ya leihlo, re ile ra ba le bothata bja tša ditšhelete gomme ra tloga bohuming ra ya bodiiding. Re ile ra lahlegelwa ke dilo tšohle ka ntle le legae la rena. Go feta moo, yo mongwe wa bana bešo o ile a hwetša kotsi gomme a feleletša a golofetše. Dilo di be di fetogile. Ke ile ka rekiša dienywa le nama ka lebakanyana. Le gona ke ile ka buna leokodi, morara le lesereng, gomme ke be ke bile ke nošetša mašemo. Batho ba bangwe ba be ba mpitša makgona-tšohle. Gantši mma o be a re homotša ka gore re na le therešo, lehumo la moya leo e lego ba sego kae feela bao ba nago le lona. Ka gona ke ile ka ithuta go ba le mo gontši le go ba le mo go nyenyane goba go se be le selo. Gona bjale ka ge ke hlanketše Jehofa ka nako e tletšego ka nywaga e ka bago 25, nka bolela gore ka mehla ke ile ka bona tšhegofatšo ya go tseba gore ke kgethile tsela e kaone kudu ya bophelo​—go hlankela Jehofa ka nako e tletšego.”

Beibele e gatelela gore “sebopêxô sa lefase leno se a lôba.” Ka lebaka le, e re kgothaletša gape gore: “Ba ba thabaxo ba etšê ba ba sa thabexo. Ba ba rêkaxo ba etšê ba ba hlôkaxo. Ba ba phelaxo ka tša lefase ba etšê ba ba sa phelexo ka tšôna.”​—1 Ba-Korinthe 7:​29-⁠31.

Ka gona, ga bjale ke nako ya go lebeledišiša tsela ya gago ya bophelo. Ge e ba o le ka tlase ga maemo a lekanyeditšwego, itiše malebana le go ba le lehloyo, gaešita le go befelwa gotee le go ba le mona. Ka lehlakoreng le lengwe, go sa šetšwe dilo le ge e le dife tše di bonagalago tšeo o nago le tšona, e tla ba ga bohlale go di lebelela ka tsela e nepagetšego e le gore di se ke tša go laola. Bjalo ka ge moapostola Paulo a eleditše, leka ka mo go ka kgonegago gore o se bee kholofelo ya gago ‘lehumong la go tla le go tloga; o holofele Modimo e a phelago, e a re fago tšohle gore di re natefele.’ Ge e ba o dira seo, gona le wena o ka bolela gore o ithutile sephiri sa go kgotsofalela tšeo o nago le tšona.​—1 Timotheo 6:​17-⁠19.

[Caption on page 9]

Paulo o ile a šoma ka diatla tša gagwe gore a se be morwalo go ba bangwe

[Caption on page 10]

Ba dikete ba hwetša lethabo bophelong bja ‘borapedi bja go kgotsofalela tše ba nago le tšona’