Go Nea Moo Go Kgahlišago Modimo

JESU le barutiwa ba gagwe ba be ba thabela dijo tše bose gotee le bagwera ba paala ba mmalwa kua Bethania, go akaretša Maria, Mareta le Latsaro yo a bego a sa tšwa go tsošwa. Ge Maria a be a ntšha oli ya theko ya godimo kudu ya dikhilograma tše 0,3 gomme a tlotša maoto a Jesu ka yona, Judase Isikariote o ile a befelwa gomme a thoma go ntšha maikwelo a gagwe. O ile a ipelaetša ka gore: “Ké xo re’ng setlôlô seo sè sa ka sa rekišwa ka mašeleng a makxolo a mararo, [mo e ka bago tekanyo ya mogolo wa ngwaga] a newa badiitšana?” Kapejana ba bangwe le bona ba ile ba thoma go belaela ka tsela e swanago.​—Johane 12:​1-⁠6; Mareka 14:​3-⁠5.

Lega go le bjalo, Jesu o arabile ka gore: “Mo leseng! . . . Badiitšana Le na nabô’ ka mehla; xe e le Nna, Le ka se bê le Nna ka mehla.” (Mareka 14:​6-⁠9) Baetapele ba bodumedi ba ba-Juda ba ile ba ruta gore go ntšha meneelo ya go thuša bahloki ga se feela gore ke selo se sebotse eupša gape go ka dira gore o lebalelwe dibe. Ka lehlakoreng le lengwe, Jesu o boletše ka mo go kwagalago gore go nea mo go thabišago Modimo ga se gwa lekanyetšwa feela go ntšheng meneelo ya go thuša badiidi.

Go lebelela ka bokopana tsela yeo go nea go bego go dirwa ka yona phuthegong ya Bakriste ba pele go tla bontšha tše dingwe tša ditsela tše di šomago tšeo ka tšona re ka bontšhago go tshwenyega ga rena gomme ka go rialo ra kgahliša Modimo ka go nea ga rena. Le gona go tla bontšha tsela ya go nea ya moswana-noši yeo e holago kudu.

“Le Hlallêlê Badiidi”

Jesu o ile a kgothaletša barutiwa ba gagwe ka makga a mmalwa gore ba “hlallêlê badiidi.” (Luka 12:​33) Lega go le bjalo, Jesu o ile a lemoša malebana le dipontšho tša bompogeng tšeo di bego di reretšwe feela go tumiša monei go e na le Modimo. O itše: “Xe O dira tša kxauxêlô, O se iteletšê phalafala bo-ka baikaketši xe ba dira diphuthexong le mekxotheng, è le xore ba rêtwê ke batho.” (Mateo 6:​1-⁠4) Ge ba diriša keletšo ye, Bakriste ba pele ba ile ba phema dipontšho tša bompogeng tša baetapele ba fišegelago thoko ba badumedi ba mehleng ya bona gomme ba kgetha go thuša bahloki ka go ba direla ditirelo tša motho ka noši goba go ba nea dimpho ka thoko.

Ka mohlala, go Luka 8:​1-⁠3 re botšwa gore Maria Magdalena, Johana, Susana le ba bangwe ba  ile ba diriša “thotô ya bôná” go direla Jesu le baapostola ba gagwe ka go hloka boikaketši. Gaešita le ge banna ba e be e se bahloki, ba be ba tlogetše mešomo ya bona ya go iphediša bakeng sa go lebiša maiteko a bona ka mo go feletšego bodireding. (Mateo 4:​18-22; Luka 5:​27, 28) Ka go ba thuša go phetha kabelo ya bona yeo ba e neilwego ke Modimo, ge e le gabotse basadi ba ba ile ba tumiša Modimo. Le gona Modimo o ile a bontšha tebogo ya gagwe ka go boloka pego ya go nea ga bona ka kgaugelo ka Beibeleng e le gore e balwe ke meloko ka moka ya nakong e tlago.​—Diema 19:​17; Ba-Hebere 6:⁠10.

Doroka e be e le mosadi yo mongwe yo botho yoo ‘a bego a dira mediro e mentši e mebotse e bile a hlallela badiidi ka kgaugelo.’ O ile a rokela bahlologadi ba bahloki diaparo bao ba bego ba dula toropong ya gabo yeo e lego kgaufsi le lewatle ya Jope. Ga re tsebe ge e ba a be a lefelela mašela ka moka goba a be a ba rokela ka ntle le tefo. Lega go le bjalo, modiro wa gagwe o mobotse o ile wa dira gore a ratwe ke bao a ilego a kgona go ba thuša gotee le ke Modimo, yoo ka kgaugelo a ilego a šegofatša modiro wa gagwe o mobotse.​—Ditiro 9:​36-⁠41.

Maikemišetšo a Nepagetšego a Bohlokwa

Ke’ng seo se ilego sa tutuetša batho ba gore ba nee? E be e se feela kwelobohloko yeo e tlišwago ke kganyogo ya go rata go thuša. Ba ile ba ikwa ba swanetše ke gore ka mehla ba dire seo ba ka se kgonago go thuša bao ba lebeletšanego le bodiidi, ditlaišego, bolwetši goba mathata a mangwe. (Diema 3:​27, 28; Jakobo 2:​15, 16) Wo ke mohuta wa go nea woo o kgahlago Modimo. O tutuetšwa kudu ke lerato le le tseneletšego la go rata Modimo le kganyogo ya go ekiša semelo sa gagwe sa kgaugelo le sa go nea kudu.​—Mateo 5:​44, 45; Jakobo 1:⁠17.

Moapostola Johane o ile a gatelela sebopego se sa bohlokwa sa go nea ge a be a botšiša gore: “Xe motho a ruile tša bophelô bya lefase, ’me a bôna ngwan’abo à hlôka, a tla a mo tswalêlêla pelo ya xaxwe, xo yêna leratô la Modimo le ka dula bya’ng?” (1 Johane 3:​17) Karabo e molaleng. Lerato la go rata Modimo le šušumeletša batho gore e be bao ba neago kudu. Modimo o tšeela godimo le go putsa bao ka go swana le yena, ba bontšhago moya wa go nea kudu. (Diema 22:⁠9; 2 Ba-Korinthe 9:​6-11) Na lehono re bona mohuta wo wa go nea kudu? Ela hloko seo se sa tšwago go direga ka phuthegong ya Dihlatse tša Jehofa.

Legae la mokgekolo yo mongwe wa Mokriste le be le tloga le nyaka go mpshafatšwa. O be a dula a nnoši gomme o be a se na ba lapa bao ba bego ba ka mo thuša. Go theoša le nywaga, legae la gagwe le be le dutše le buletšwe go swara diboka tša Bokriste, gomme gantši o be a abelana dijo le motho le ge e le ofe yo a ka amogelago taletšo ya gagwe. (Ditiro 16:​14, 15, 40) Ka go bona bothata bja gagwe, ditho tša phuthego di ile tša tšwa lesolo la go mo thuša. Ba bangwe ba ile ba neela ka tšhelete, ba bangwe ba ile ba ithapela go šoma. Ka morago ga mafelo-beke a sego kae, baithapi ba ile ba rulela lefsa, ba aga lefelo le lefsa la bohlapelo, go poleisetera le go penta lebato la pele gotee le go tsenya diraka tše difsa tša ka khitšhing. Go nea ga bona ga se gwa fo kgotsofatša dinyakwa tša mosadi feela eupša go ile gwa  ba gwa dira gore phuthego e momagane gomme gwa kgahliša baagišani e le mohlala wa go nea ga kgonthe ga Bokriste.

Go na le ditsela tše dintši kudu tšeo ka tšona rena ka noši re ka thušago ba bangwe. Na re ka fetša nako le sešuana? Na re ka yela mohlologadi yo a tšofetšego yoo re mo tsebago mabenkeleng goba ra mo rokela? Na re ka apeela mohloki goba ra lefelela ditshenyagalelo tša gagwe? Ga go hlokege gore re be bahumi e le gore re thuše. Moapostola Paulo o ngwadile gore: “Xe thatô e botse è le xôna, xo tlo thabêlwa se motho a se swerexo; xe a hlaêlwa, xa xo taba.” (2 Ba-Korinthe 8:​12) Lega go le bjalo, na go nea mo go bjalo ka tsela ya go lebanya ke gona go nea go nnoši moo Modimo a tlago go go šegofatša? Aowa.

Go Thwe’ng ka Modiro wa Tlhakodišo wo o Rulagantšwego?

Ka dinako tše dingwe maiteko a motho ka noši ga se a lekanego. Ge e le gabotse, Jesu le baapostola ba gagwe ba ile ba swara sekhwama sa go thuša badiidi, gomme ba ile ba amogela meneelo go tšwa go batho bao ba nago le taba bao ba bego ba kopana le bona modirong wa bona. (Johane 12:⁠6; 13:​29) Ka mo go swanago, diphuthego tša lekgolong la pele la nywaga di ile tša kgoboketša meneelo ge go be go nyakega gomme di ile tša rulaganya modiro o mogolo wa tlhakodišo.​—Ditiro 2:​44, 45; 6:​1-⁠3; 1 Timotheo 5:​9, 10.

Tiragalo e nngwe e bjalo e ile ya tšwelela mo e ka bago ka 55 C.E. Diphuthego tša kua Judea di ile tša lebeletšana le bodiidi, mohlomongwe e le ka baka la tlala e kgolo yeo e bego e sa tšwa go wa. (Ditiro 11:​27-30) Ka ge ka mehla moapostola Paulo a be a dula a tshwenyegile ka badiidi, o ile a dira lelokelelo la go thuša diphuthego tša bokgoleng bja go fihla Matsedonia. Yena ka noši o ile a rulaganya meneelo gomme a diriša banna bao ba kgethilwego go e aba. (1 Ba-Korinthe 16:​1-⁠4; Ba-Galatia 2:​10) Yena gotee le ba bangwe ga se ba ka ba lefša bakeng sa tirelo yeo ba bego ba e dira.​—2 Ba-Korinthe 8:​20, 21.

Lehono Dihlatse tša Jehofa di dula di loketše go thuša ge go tšwelela masetla-pelo. Ka mohlala, selemong sa 2001, madimo a matla a ile a baka mafula kua Houston, Texas, U.S.A. Ka kakaretšo, magae a 723 a Dihlatse a ile a senywa go fihla bokgoleng bjo itšego, a mantši a ona a be a tloga a senyegile kudu. Komiti ya tša tlhakodišo yeo e bopilwego ke bagolo ba Bakriste bao ba swanelegago kapejana e ile ya hlongwa bakeng sa go lebelela dinyakwa tša batho le go kgoboketša ditšhelete tša tlhakodišo bakeng sa go thuša Dihlatse tša lefelong leo go lebeletšana le boemo gotee le go lokiša magae a tšona. Baithapi bao ba ratago go tšwa diphuthegong tša kgaufsi ba ile ba dira modiro ka moka. Hlatse e nngwe e ile ya leboga thušo kudu moo e lego gore ge e be e hwetša tšhelete go tšwa khamphaning ya yona ya inšuranse bakeng sa go lokiša ntlo ya yona, kapejana e ile ya e neela sekhwameng sa tlhakodišo e le gore e ka thuša ba bangwe bao ba e nyakago.

Lega go le bjalo, ge go tliwa tabeng ya go ntšha meneelo e yago go mekgatlo e rulagantšwego ya  go thuša bahloki, re swanetše go ba šedi ge re lebeledišiša dikgopelo tše dintši tšeo re di hwetšago. Mekgatlo e mengwe ya go thuša bahloki e ntšha ditšhelete tše dintši kudu bakeng sa bašomedi ba yona goba ditshenyagalelo tša tša papatšo tšeo di dirišwago go kgothaletša batho go nea, gomme ya tlogela tšhelete e nyenyane feela bakeng sa morero wa yona wa go thuša bahloki. Diema 14:​15 e re: “Lešilo le dumêla ’taba tšohle; mohlale ó hlatha dikxatô.” Ka gona ke ga bohlale go hlahlobišiša ditaba ka botlalo.

Go Nea mo go Holago Kudu

Go na le mohuta wa go nea woo o lego bohlokwa kudu go feta mekgatlo ya go thuša bahloki. Jesu o ile a bolela ka wona ge mmuši yo mofsa yo a humilego a be a mmotšiša gore o swanetše go dira eng gore a hwetše bophelo bjo bo sa felego. Jesu o ile a mmotša gore: “Xe O rata xo ba yo bolo-ka-tlalô, xôna yaa O rekišê tše O naxo natšô’, O di abêlê bahloki, ’me O tlê O ntatêlê.” (Mateo 19:​16-22) Ela hloko gore Jesu ga se a fo re, ‘Nea bahloki gomme o tla hwetša bophelo.’ Go e na le moo, o okeditše ka gore, “O tlê O ntatêlê.” Ka mantšu a mangwe, ka ge ditiro tša go thuša bahloki e le tšeo di retegago le tšeo di holago, go dira ga Bakriste barutiwa go akaretša mo go oketšegilego.

Kgahlego ya Jesu e kgolo kudu e be e le go thuša ba bangwe moyeng. Ka bokopana, pele ga lehu la gagwe o ile a botša Pilato gore: “Ké se ke se tswáletšwexo; ke tletše sôna lefaseng xore ke bê hlatse ya therešô.” (Johane 18:​37) Le ge Jesu a be a etelela pele ka go thuša badiidi, go fodiša balwetši le go fepa bao ba swerwego ke tlala, selo se segolo seo a bego a se dira e be e le go tlwaetša barutiwa ba gagwe modirong wa boboledi. (Mateo 10:​7, 8) Ge e le gabotse, gare ga ditaelo tša gagwe tša mafelelo e bile taelo e rego: “Ké xôna yang Le dirê dithšaba ka moka barutiwa.”​—Mateo 28:​19, 20.

Ke therešo gore modiro wa boboledi o ka se rarolle mathata ka moka a lefase. Lega go le bjalo, go abelana ditaba tše dibotse tša Mmušo wa Modimo le batho ba mehuta ka moka go tumiša Modimo ka gobane modiro wa boboledi o phethagatša thato ya Modimo e bile o bula tsela ya go hwetša mehola ya sa ruri bakeng sa bao ba amogelago molaetša wa Modimo. (Johane 17:⁠3; 1 Timotheo 2:​3, 4) Ke ka baka la’ng o sa theetše seo Dihlatse tša Jehofa di nyakago go go botša sona nakong e tlago ge di go etela? Di tliša mpho ya moya. Le gona di a tseba gore ye ke tsela e kaone kudu yeo di ka go neago ka yona.

[Caption on page 6]

Go na le ditsela tše dintši tša go bontšha gore re na le taba

[Caption on page 7]

Go bolela ga rena ditaba tše dibotse go kgahliša Modimo gomme go bula tsela ya go hwetša mehola ya sa ruri