“Le Se Kê La Boifa; Le Se Kê La Ba Thšoxa”

“Le se kê la boifa; Le se kê la ba thšoxa. . . . Morêna ó tlo ba le lena.”​—2 KORONIKA 20:⁠17.

1. Botšhošetši bo na le mafelelo afe bathong, gomme ke ka baka la’ng poifo ya bona e kwešišega?

BOTŠHOŠETŠI! Lentšu le ka bolona le a boifiša, le tsoša maikwelo a go se šireletšege le a go itlhoboga. Le tsoša maikwelo a hlakahlakanego a poifo, manyami le pefelo. Le gona ke lentšu leo le hlalosago seo ba bantši ba boifago gore se tla tlaiša batho nywageng e mentši e latelago. Therešo ya gore dinaga tše dingwe di be di dutše di lwantšhana le dibopego tše dintši tša botšhošetši ka nywaga e mentši gomme di sa atlege e nea motheo o kwalago wa poifo e bjalo.

2. Dihlatse tša Jehofa di arabela bjang bothateng bja botšhošetši, gomme se se lebiša dipotšišong dife?

² Lega go le bjalo, go na le lebaka le le kwagalago la go ba le kholofelo. Dihlatse tša Jehofa tšeo ka mafolofolo di bolelago dinageng tše 234 tša lefase, di tloga di na le kholofelo. Go e na le go boifa gore botšhošetši bo ka se fedišwe le ka mohla, di kgodišegile gore bo tla fela​—le gona kgaufsinyana. Na ke mo go kwagalago go ba le boemo bjo bo nepagetšego bja kgopolo bjo bo swanago le bja tšona? Ke mang yoo a ka atlegago go phološa lefase tlaišegong ye, gomme seo se ka direga bjang? Ka ge ka ntle le pelaelo bošoro bo ile bja re kgoma ka moka ga  rena ka tsela le ge e le efe, e tla ba mo go swanetšego go hlahloba motheo wa boemo bjo bjalo bjo bo nepagetšego bja kgopolo.

3. Ke dilo dife tše di lego gona tšeo di bakago poifo, gomme ke’ng seo se boletšwego e sa le pele ka mehla ya rena?

³ Lehono, batho ba a boifa le go tšhoga ka baka la mabaka a fapa-fapanego. Nagana ka bontši bja batho bao ba sa hlwego ba kgona go itlhokomela e le ka baka la botšofadi, batho bao ba gwahlafatšwago ke malwetši a sa alafegego le ka malapa ao a gogago ka kgara ka tša boiphedišo gore a hwetše dinyakwa tša motheo tša bophelo. Ge e le gabotse, nagana ka go se kgonthišege ga bophelo ka bo bjona! Lehu la kapejana leo le bakwago ke kotsi goba masetla-pelo le ka tla motsotsong le ge e le ofe, le itokišeditše go fediša selo se sengwe le se sengwe seo re se ratago. Poifo e bjalo le pelaelo, gotee le mathata le manyami a mmalwa a motho ka noši, di dirile gore mehla ya rena e swane gabotse le yeo moapostola Paulo a e hlalositšego ka gore: “Tseba xore mehleng ya bofêlô xo tlo tla mabaka a mathata. Batho e tlo ba ba xo ithata, . . . E tlo ba ba-hlala-leratô, babatasekxoro, e tlo ba dihwirihwiri, le ba ba sa tsebexo xo ithswara, manaba a tše boló.”​—2 Timotheo 3:​1-⁠3.

4. Ke sebopego sefe se se neago kholofelo seo se hwetšwago boemong bjo bo sa kgahlišego bjo bo bolelwago go 2 Timotheo 3:​1-⁠3?

⁴ Gaešita le ge lengwalo le le bolela ka boemo bjo bo sa kgahlišego, le sa dutše le nea kholofelo. Ela hloko gore dinako tše di hlobaetšago di tla ba gona “mehleng ya bofêlô” ya tshepedišo ya gona bjale e kgopo ya dilo ya Sathane. Se se bolela gore kimologo e kgaufsi le gore tshepedišo e kgopo ya lefase e kgaufsi le go tšeelwa legato ke pušo e phethagetšego ya Mmušo wa Modimo, woo Jesu a ilego a ruta balatedi ba gagwe go o rapelela. (Mateo 6:​9, 10) Mmušo woo ke mmušo wa Modimo wa legodimong, wo “o ka se kexo wa šwalalanywa neng le neng” eupša go etša ge moporofeta Daniele a bolela, “o tlo phšatla mebušô e mengwê ka moka [ya batho] wa e fediša; ge e le wôna, o tlo êma xo ya xo ile.”​—Daniele 2:⁠44.

Boema-gare bja Bokriste bo Fapane le Botšhošetši

5. Morago bjale ditšhaba di arabetše bjang go botšhošetši?

⁵ Botšhošetši bo fetile ka maphelo a batho ba bantši nywageng e mentši e fetilego. Go ntšha mahlo dinameng ga lefase ka bophara mabapi le kotsi ye go oketšegile kudu ka morago ga ditlhaselo tša kua New York City le Washington, D.C., ka September 11, 2001. Ka baka la bogolo le go aparela ga botšhošetši lefaseng ka moka, ditšhaba go dikologa lefase di ile tša kitimela go ipopa ngatana e tee go bo lwantšha. Ka mohlala, go ya ka dipego tša mekero ya ditaba, ka December 4, 2001 “ditona tše di tšwago dinageng tše 55 tša Yuropa, Amerika Leboa le Asia Bogareng di ile tša kwana ka leano” leo le bego le reretšwe go dumelelanya maiteko a tšona. Moemedi yo a phagamego wa United States o ile a reta mogato wo ka go bolela gore o tliša “boemo bjo bofsa bja matla” maitekong a go lwantšha botšhošetši. Go se go ye kae, batho ba dimilione tše makgolo ba ile ba tsenya letsogo go seo The New York Times Magazine e se biditšego “mathomo a ntwa e kgolo.” Go tla bonagala pele ge e ba maiteko ao a tla atlega. Lega go le bjalo, ditla-morago tša ntwa e bjalo malebana le tšhošetšo, di tsošitše maikwelo a poifo le pelaelo go ba bantši, eupša e sego go bao ba botilego Jehofa.

6. (a) Ke ka baka la’ng ka dinako tše dingwe ba bangwe ba hwetša go le thata go amogela boema-gare bja Bokriste bjo bo tšewago ke Dihlatse tša Jehofa? (b) Ke mohlala ofe wa mabapi le ditaba tša dipolitiki woo Jesu a o beetšego balatedi ba gagwe?

 ⁶ Dihlatse tša Jehofa di tsebja gabotse ka boema-gare bja tšona dipolitiking. Gaešita le ge batho ba bantši ba ikemišeditše go ba boemong bjo dinakong tša khutšo, ga ba be le boemo bjo bo bulegilego bja kgopolo ge go tšwelela maemo a sa tlwaelegago. Gantši, poifo le go se kgodišege tše di tlišwago ke ntwa di tsoša maikwelo a tseneletšego a botšhaba. Se se ka dira gore go be thata go ba bangwe go kwešiša lebaka leo ka lona go ka bago le motho yo a dika-dikago go thekga masolo a tumilego a setšhaba. Lega go le bjalo, Bakriste ba therešo ba a tseba gore ba swanetše go theetša taelo ya Jesu ya gore e se be “ba lefase.” (Johane 15:​19; 17:​14-16; 18:​36; Jakobo 4:⁠4) Se se nyaka gore ba kgomarele boema-gare ditabeng tša dipolitiki goba tša leago. Jesu ka boyena o beile mohlala o mobotse. Ka baka la bohlale bja gagwe bjo bo phethagetšego le bokgoni bja gagwe bjo bo lemogegago, a ka ba a ile a kaonefatša maemo a batho ba mehleng ya gagwe. Lega go le bjalo, o ile a gana go akaretšwa dipolitiking. Mathomong a bodiredi bja gagwe, o ile a gana ka go tia maiteko a Sathane a gore a be mmuši wa mebušo ya lefase ka moka. Ka morago, o ile a tšhabela maitekelo a go mmea boemong bja boikarabelo bja dipolitiki.​—Mateo 4:​8-10; Johane 6:​14, 15.

7, 8. (a) Ke’ng seo se sa bolelwego ke boema-gare bja Dihlatse tša Jehofa ditabeng tša dipolitiki, gomme ka baka la’ng? (b) Ba-Roma 13:​1, 2 e ganetša bjang ditiro tša bošoro kgahlanong le mebušo?

⁷ Boema-gare bjo bo tšewago ke Dihlatse tša Jehofa ga se bja swanela go lebelelwa ka mo go fošagetšego e le go thekga goba go tshediša ditiro tša bošoro mahlo. Go dira ga tšona bjalo go tla ba go ganetšana le boipolelo bja tšona bja go ba bahlanka ba “Modimo wa leratô le moláô.” (2 Ba-Korinthe 13:​11) Di ithutile kamoo Jehofa a ikwago ka gona ka bošoro. Mopsalme o ngwadile gore: “Morêna o šetša ba ba lokilexo le ba babe; xomme ó hloile ba ba rataxo bosenyi.” (Psalme 11:⁠5) Le gona ba lemoga seo Jesu a ilego a se botša moapostola Petro ge a re: “Bušetša thšoša ya xaxo bodulong bya yôna; xobane e a swaraxo thšoša, ó tlo bolawa ka yôna.”​—Mateo 26:⁠52.

⁸ Gaešita le ge histori e bontšha gabotse gore Bakriste ba maaka ba dirišitše “thšoša” ka makga a mantši, seo ga se sa therešo ka Dihlatse tša Jehofa. Ba emela kgole le ditaba tše bjalo ka moka. Dihlatse di theetša ka potego taelo e lego go Ba-Roma 13:​1, 2 e rego: “Batho bohle a ba se xanê xo bušwa ke ba ba filwexo matla a xo buša [babuši]; xobane xa xo na mmušô o sa tšwexo xo Modimo; mmušô wo o lexo xôna o beilwe ke Modimo. Ké xôna, e a nganganaxo le mmušô, ó lwa le molaô wa Modimo; xomme ba ba lwaxo le wôna, ba ôba molato.”

9. Ke ka ditsela dife tše pedi tšeo ka tšona Dihlatse tša Jehofa di lwantšhago botšhošetši?

⁹ Lega go le bjalo, ka ge botšhošetši e le selo se sebe gakaakaa, na Dihlatse tša Jehofa di be di sa swanela go ba di dira se sengwe go thuša go bo lwantšha? Ee di swanetše, gomme di dira seo. Sa pele, tšona ka noši ga di tšee karolo ditirong tše bjalo. Sa bobedi, di ruta batho melao ya motheo ya Bokriste yeo ge e latelwa e fedišago bošoro ka dibopego tša bjona ka moka. * Ngwagola, Dihlatse di feditše diiri tše 1 202 381 302 di thuša batho go ithuta tsela ye ya Bokriste. Se e be e se go senya nako, ka gobane ka baka la modiro wo, batho ba 265 469 ba ile ba kolobetšwa gore e be Dihlatse tša Jehofa, ka go rialo ba ipontšha phatlalatša gore ba gana bošoro ka mo go feletšego.

10. Go na le ditebelelo dife tša go fediša bošoro lefaseng la mehleng yeno?

¹⁰ Go oketša moo, Dihlatse tša Jehofa di a tseba gore tšona ka noši di ka se tsoge di fedišitše bobe lefaseng. Ke ka baka leo di botilego ka mo go feletšego yo a ka kgonago seo​—Jehofa Modimo. (Psalme 83:​19, PK) Go sa šetšwe maiteko a batho a kgonthe, ba ka se kgone go fediša bošoro. Mongwadi yo a buduletšwego wa Beibele o re lemoša e sa le pele mabapi le mehla ya rena, e lego ‘mehla ya bofelo’ ka gore: “Batho ba babe le baaroši, bobe bya bôná bo tlo fêla bò xola bò  e-⁠ya, bà fora ba bangwê, le bôná bà forwa.” (2 Timotheo 3:​1, 13) Ka go di lebelela ka tsela ye, ditebelelo tša batho tša go fenya ntwa malebana le bobe ga di holofetše. Ka lehlakoreng le lengwe, re ka ithekga ka Jehofa go tlošeng bošoro ka mo go feletšego le ka mo go sa felego.​—Psalme 37:​1, 2, 9-11; Diema 24:​19, 20; Jesaya 60:⁠18.

Go se Boife go sa Šetšwe Tlhaselo e Tlago

11. Ke megato efe yeo Jehofa a šetšego a e gatile bakeng sa go fediša bošoro?

¹¹ Ka ge Modimo wa khutšo a hloile bošoro, re ka kwešiša lebaka leo ka lona a gatilego megato ya pele ya go fediša modu wa bjona, e lego Sathane Diabolo. Ge e le gabotse, O šetše a dirile gore Sathane a fenywe gabohloko ke morongwa yo mogolo e lego Mikaele​—Kgoši ya Modimo e sa tšwago go bewa sedulong sa bogoši, Kriste Jesu. Beibele e e hlalosa ka tsela ye: “Kwa lexodimong xwa tsoxa ntwa ya xe Mikaele le Barongwa ba xaxwe bà e-⁠lwa le Nôxa, ’me Nôxa è e-⁠lwa è na le Barongwa ba yôna. Nôxa ya se kê ya fenya; kwa lexodimong xwa se kê xwa hlwa xò e-⁠ba le madulô a yôna. Nôxa e kxolo yeo ya rakwa; yôna ye ba rexo ké Diabolo le Sathane, motimetši wa lefase ka moka la batho. Ya lahlêlwa lefaseng; le Barongwa ba yôna ba lahlwa le yôna.”​—Kutollo 12:​7-⁠9.

12, 13. (a) Ke’ng seo e lego sa bohlokwa ka ngwaga wa 1914? (b) Ke’ng seo boporofeta bja Hesekiele bo se bolelago e sa le pele ka bao ba thekgago Mmušo wa Modimo?

¹² Tatelano ya mabaka ya Beibele gotee le ditiragalo tša lefase di dumelelana ka go šupa ngwaga wa 1914 e le nako yeo ka yona ntwa e ilego ya tsoga kua legodimong. Ga e sa le go tloga ka nako yeo, maemo a lefase a ile a mpefala ganyenyane-ganyenyane. Kutollo 12:​12 e hlalosa lebaka ka go bolela gore: “Thabang-xê, lena Maxodimo, le ba ba axilexo xôna. Ba madi-mabe ké lena ba Le axilexo lefaseng le lewatleng, xobane Diabolo ó theoxetše xo lena à tuka boxale ka kudu; ó tseba xe a sa šaletšwe ke lebakanyana fêla.”

¹³ Ka mo go kwagalago, bogale bja Diabolo bo lebišitšwe kudu go barapedi ba ba tloditšwego ba Modimo le bagwera ba bona e lego “dinku tše dingwê.” (Johane 10:​16; Kutollo 12:​17) Kganetšo ye e tla fihla seremong sa yona ge Diabolo a thoma tlhaselo e šoro malebana le bohle bao ba thekgago Mmušo o hlomilwego wa Modimo le bao ba o botago. Tlhaselo ye e kgolo go bolelwa ka yona go Hesekiele kgaolo 38 e le tlhaselo ya “Gogo wa naxa ya Magogo.”

14. Ke maiteko afe a tšhireletšo ao Dihlatse tša Jehofa di ilego tša a thabela nakong e fetilego, gomme na seo se tla dula se le bjalo?

¹⁴ Ga e sa le go tloga go rakweng ga Sathane legodimong, batho ba Modimo ka dinako tše dingwe ba ile ba šireletšwa ditlhaselong tša Sathane ke dihlopha tše itšego tša dipolitiki, tšeo go boletšwego ka tšona ka tsela ya seswantšhetšo go Kutollo 12:​15, 16. Ka mo go fapanego, Beibele e bontšha gore nakong ya tlhaselo ya mafelelo ya Sathane, ga go na baemedi ba batho bao ba tlago go šireletša batho bao ba botago Jehofa. Na se se swanetše go dira gore Bakriste ba boife goba ba tšhoge? Le gatee!

15, 16. (a) Mantšu a Jehofa a kgonthišetšago go batho ba gagwe mehleng ya Josefate a nea Bakriste lebaka lefe la go ba le boemo bjo bo nepagetšego bja kgopolo lehono? (b) Ke mohlala ofe woo Josefate le batho ba gagwe ba ilego ba o beela bahlanka ba Modimo lehono?

¹⁵ Ka ntle le pelaelo Modimo o tla thekga  batho ba gagwe go fo swana le ge a ile a thekga setšhaba sa gagwe mehleng ya Kgoši Josefate. Re bala gore: “Lena Ba-Juda ka moka, le baaxi ba Jerusalêma, le wene kxoši Josafate, theetšang! Morêna ó bolêla le lena ó re: Le se kê la boifa mašaba a makaakaa á; Le se kê la a thšoxa; xobane ntwa xa se ya lena, ké ya Modimo. . . . Xa se lena Le tl’o xo hlabana fao. Le batamèlê Le êmê, Le bônê xe Morêna a phološa, à na le lena, Juda le Jerusalêma. Le se kê la boifa; Le se kê la ba thšoxa. Ka moswana Le ba tšwêlê; Morêna ó tlo ba le lena.”​—2 Koronika 20:​15-⁠17.

¹⁶ Batho ba Juda ba ile ba kgonthišetšwa gore go ka se hlokagale gore ba lwe. Ka mo go swanago, ge batho ba Modimo ba hlaselwa ke Gogo wa Magogo, ba ka se tšee dibetša tša go itwela. Go e na le moo, ba tla ‘ema gomme ba bone ge Jehofa a ba phološa.’ Ke therešo gore go ema ga go bolele go se dire selo ka mo go feletšego, go etša ge batho ba Modimo mehleng ya Josefate e se gore ba be ba sa dire selo ka mo go feletšego. Re bala gore: “Josafate a inama a khunama xomme Ba-Juda ka moka le baaxi ba Jerusalêma ba khunama ba rapêla Morêna . . . Ya re xe [Josefate] a lakane le ba madirá, a beêla Morêna baopedi xore ba rêtê bà apere tše kxêthwa tša bothšephi, ba êtê bahlabani pele, ba xobêlê ba re: Leboxang Morêna, xobane ké yo botse, yo botho bya neng le neng!” (2 Koronika 20:​18-21) Ee, gaešita le ge ba be ba lebeletšane le tlhaselo, batho ba ile ba tšwela pele ka mafolofolo ba tumiša Jehofa. Se se beela Dihlatse tša Jehofa mohlala woo di tlago go o latela ge Gogo a thoma go di hlasela.

17, 18. (a) Ke boemo bofe bjo bo nepagetšego bja kgopolo bjo Dihlatse tša Jehofa di nago le bjona mabapi le tlhaselo ya Gogo? (b) Ke kgopotšo efe yeo morago bjale e neilwego bafsa ba Bakriste?

¹⁷ Go fihla nakong yeo​—gaešita le ka morago ga go thoma ga tlhaselo ya Gogo​—Dihlatse tša Jehofa di tla tšwela pele di thekga Mmušo wa Modimo. Di tla tšwela pele di hwetša matla le tšhireletšo ge di dirišana le diphuthego tše fetago 94 600 go dikologa lefase. (Jesaya 26:​20) A sebaka se sebotse gakaakang sa go tumiša Jehofa ka sebete! Ka ntle le pelaelo, go phela di tseba ka tlhaselo e tlago ya Gogo ga go di dire gore di boele morago ka poifo. Go e na le moo, go di dira gore di katanele go oketša sehlabelo sa tšona sa tumišo go fihla bokgoleng bjoo di ka bo kgonago.​—Psalme 146:⁠2.

¹⁸ Boemo bjo bjo bo nepagetšego bja kgopolo bo bontšhwa gabotse ke bafsa ba dikete go dikologa lefase bao ba tsenetšego bodiredi bja nako e tletšego. Go gatelela bohlokwa bja go  kgetha tsela e bjalo ya bophelo, dikopanong tša selete tša 2002 go ile gwa lokollwa pampišana e rego Bafsa​—Le tla Dira’ng ka Bophelo bja Lena? Bakriste ba bafsa le ba bagolo, ba thabišwa ke dikgopotšo tše bjalo tše di lego nakong.​—Psalme 119:​14, 24, 99, 119, 129, 146.

19, 20. (a) Ke ka baka la’ng Bakriste ba sa swanela go boifa goba go tšhoga? (b) Sehlogo se se latelago se tla re thuša gore re dire’ng?

¹⁹ Go sa šetšwe maemo a lefase, Bakriste ga se ba swanela go boifa goba go tšhoga. Ba a tseba gore go se go ye kae Mmušo wa Jehofa o tla fediša bošoro ka dibopego ka moka tša bjona ka mo go sa felego. Le gona ba homotšwa ke go tseba gore tsogo e tla bušetša bophelong ba bantši bao ba lahlegetšwego ke maphelo a bona ka baka la bošoro. Le ge se se tla nea ba bangwe sebaka sa pele sa gore ba ithute ka Jehofa, se tla dumelela ba bangwe go tšwetša pele tsela ya boineelo go yena.​—Ditiro 24:⁠15.

²⁰ Re le Bakriste ba therešo, re kwešiša go nyakega ga go boloka boema-gare bja Bokriste gomme re ikemišeditše go dira bjalo. Re nyaka go swarelela tebelelong e kgahlišago ya go kgona go ‘ema gomme re bone phološo ya Jehofa.’ Sehlogo se se latelago se tla matlafatša tumelo ya rena ka go re dira gore re lemoge ditiragalo tša gona bjale tše di tšwelago pele di nea temogo e oketšegilego go phethagatšweng ga boporofeta bja Beibele.

[Mengwalo ya ka tlase]

[Dipotšišo tša Thuto]

[Caption on page 12]

UN PHOTO 186226/M. Grafman

[Caption on page 13]

Jesu o beile mohlala o mobotse wa boema-gare bja Bokriste

[Caption on page 16]

Bafsa ba dikete ba Dihlatse ba tsenetše bodiredi bja nako e tletšego ka lethabo

[Caption on page 16]

Bafsa​—Le tla Dira’ng ka Bophelo bja Lena?

Na o ka Hlalosa?

• Ke ka baka la’ng batho ba bantši lehono ba se na kholofelo?

• Ke ka baka la’ng Dihlatse tša Jehofa di na le kholofelo ka bokamoso?

• Ke’ng seo Jehofa a šetšego a se dirile ka modu wa bošoro ka moka?

• Ke ka baka la’ng re se na lebaka la go boifa tlhaselo ya Gogo?