‘Salomo ga se a ka a Apara Bjalo ka le Lengwe la Ona’

MATŠOBA a nageng a swanago le ao o a bonago mo ke ao a tlwaetšwego go bonwa ka mathoko a ditsela tša ka borwa bja Afrika. A bitšwa di-cosmos gomme a hwetšwa kua melatšatšing ya Amerika. Matšoba a bjalo a mabotse kudu a ka re gopotša ka thuto yeo e rutilwego ke Jesu. Bontši bja batheetši ba gagwe bo be bo diila, gomme bo be bo belaela ka dinyakwa tša bona tša nama, e lego dijo le diaparo.

Jesu o ile a botšiša gore: “Le diaparô Le di belaêlêla’ng? Šetšang matšobana a naxa, ka mo a melaxo à sa dire, à sa ohle. ’Me ke a Le botša, le Salomo letaxong la xaxwe ka moka, xa a ka a apara byalo ka le lengwê la ôna.”​—Mateo 6:​28, 29.

Go ile gwa bolelwa ditšhišinyo tše di fapa-fapanego tša mabapi le mohuta o itšego wa matšoba a naga ao Jesu a bego a naganne ka ona. Lega go le bjalo, Jesu o ile a tšwela pele go a bapiša le dibjalo tše di tlwaelegilego ka gore: “Byale, ešita le byang bya mohla o tee wa lehono, xe byôna Modimo a bo apeša ka mokxwa woo, a ka lesa bya’ng xo dirêla lena tše di fetišaxo? Lena ba-hlaya-tumêlo!”​—Mateo 6:⁠30.

Gaešita le ge di-cosmos di sa hwetšwe kua Isiraele, ka ntle le pelaelo di thekga thuto yeo Jesu a bego a e ruta. Go sa šetšwe gore o di bona o le kgole goba o le kgaufsi kudu, ke tše botse kudu gomme di ratwa kudu ke batšei ba diswantšho le bo-rabokgabo. Ka kgonthe, Jesu o be a sa feteletše ge a be a re, “le Salomo letaxong la xaxwe ka moka, xa a ka a apara byalo ka le lengwê la ôna.”

Re ka ithuta thuto efe lehono? Bao ba hlankelago Modimo ba ka kgonthišega gore o tla ba thuša go hwetša dinyakwa tša motheo gaešita le dinakong tše thata. Jesu o hlalositše gore: “Tsoma mmušô wa Modimo; ké mo Le tl’o xo ekeletšwa ka tšeo ka moka [tše bjalo ka dijo le diaparo tšeo re di nyakago].” (Luka 12:​31) Ee, mehola ya kgonthe e tlišwa ke go tsoma Mmušo wa Modimo. Eupša na o tseba se Mmušo wa Modimo o lego sona le gore ke’ng seo o tlago go se direla batho? Dihlatse tša Jehofa di tla thabela go go thuša go hwetša dikarabo ka Beibeleng.