Sekolo sa Gilead Nywaga e 60 ya Tlwaetšo ya Boromiwa

“KA BAKA la go ithuta ga rena Beibele ka mo go tseneletšego, re ile ra batamela kgaufsi le Jehofa gomme ra ithuta mo go oketšegilego ka mokgatlo wa gagwe. Se se ile sa re lokišeletša go phela kabelong ya nageng e šele.” Ke kamoo sealoga sa sehlopha sa pele se ilego sa hlalosa lelokelelo la dithuto leo se ilego sa le tsenela Sekolong sa Beibele sa Watchtower sa Gilead. Ga e sa le go tloga ge se hlongwa nywageng e 60 e fetilego, Sekolo sa Gilead se be se dutše se romela baromiwa. Ka March 8, 2003, go aloga ga sehlopha sa bo-114 go ile gwa kgatlampana Lefelong la tša Thuto la Watchtower kua Patterson, New York. Ba 6 404 bao ba ilego ba bokana holong le ditikologong tšeo di kgokagantšwego ka sathalaete ba ile ba theetša lenaneo ka kelohloko, leo le bego le bopša ke dipolelo, dipoledišano le poledišano ya sehlopha.

Theodore Jaracz, yo e lego setho sa Sehlopha se Bušago, e be e le modula-setulo. Mantšu a gagwe a go bula a ile a gogela tlhokomelo go batheetši ba tšwago dinageng tše fapa-fapanego, bao ba bego ba bopša ke baeti bao ba tšwago Asia, Caribbean, Amerika Bogareng le Amerika Borwa gotee le Yuropa. A theile ditlhaloso tša gagwe go 2 Timotheo 4:⁠5, Ngwanabo rena Jaracz o ile a gatelela modiro o mogolo wa moromiwa yo a tlwaeditšwego Gilead​—e lego ‘go dira modiro wa segoeledi.’ Baromiwa ba hlatsela therešo ka go ruta batho Beibele.

Barutwana ba Amogela Tlhahlo ya Mafelelo

E le go thoma tšhiedišano ya dipolelo tše kopana, John Larson, e lego setho sa Komiti ya Lekala la United States, o ile a bolela ka taba e tiišago tumelo e rego “Modimo xe a na le Rena, re sa tlo Šiteletšwa ke Mang?” (Ba-Roma 8:​31) Seboledi se ile sa hlalosa motheo wa Beibele wa gore barutwana ba be le kgodišego e feletšego matleng a Jehofa gore a ba thuše go fenya mapheko le ge e le afe ao ba ka lebeletšanago le ona dikabelong tša bona. A diriša Ba-Roma 8:​38, 39, Ngwanabo rena Larson o ile a eletša barutwana gore: “Emang le naganišiše ka matla ao Modimo a a dirišago bakeng sa lena, gomme le gopole gore ga go na selo seo se ka fedišago kgahlego ya Jehofa ka lena.”

Yo a latetšego lenaneong e be e le Guy Pierce, e lego setho sa Sehlopha se Bušago. O ile a kgetha sehlogo se se rego “Bolokang Mahlo a Lena a Thabile!” (Luka 10:​23) O ile a hlalosa gore lethabo la kgonthe le akaretša go tseba Jehofa le go kwešiša merero ya gagwe ya ka mo go sa felego gotee le go bona go phethagatšwa ga boporofeta bja Beibele. Gohle moo ba yago, barutwana ba ka dula ba thabile e le ka kgonthe ka go boloka mahlo a bona a thabile. Ngwanabo rena Pierce o ile a kgothaletša dialoga go naganišiša ka mo go tseneletšego ka go loka ga Jehofa le ka go boloka menagano ya tšona le dipelo di tsepame go direng thato ya Gagwe. (Psalme 77:​12) Ka go boloka boemo bjo bo nepagetšego bja kgopolo, dialoga di ka fenya mathata le ge e le afe ao di ka lebeletšanago le ona.

Ke moka sehlopha se ile sa amogela mantšu a taelano a kgothatšo go tšwa go bahlahli ba babedi bao ba bego ba se ruta letšatši le lengwe le le lengwe. Sehlogong sa polelo ya gagwe Lawrence Bowen o ile a botšiša potšišo e rego “Na le Nyaka Letago?” Batho ba bantši  ba nagana ka letago e le leo le tswalanago le tumišo, kgodišo le go inyakela botumo. Lega go le bjalo, mopsalme Asafa o ile a thoma go kwešiša letago la kgonthe​—e lego lehumo le bohlokwa kudu la tswalano e hlomphegago le Jehofa. (Psalme 73:​24, 25) Barutwana ba dialoga ba ile ba kgothaletšwa go boloka tswalano ya kgaufsi-ufsi le Jehofa ka gore ba tšwele pele ba ithuta Beibele ka mo go tseneletšego. Barongwa ba ‘hlologetšwe go nyarela’ ditabeng ka botlalo tša mabapi le go phethagatšwa ga merero ya Jehofa ka Kriste. (1 Petro 1:​12) Ba nyaka go ithuta mo gontši ka mo go ka kgonegago mabapi le Tatago bona e le gore ba bonagatše letago la gagwe. Ke moka seboledi se ile sa kgothaletša barutwana go tumiša Jehofa dikabelong tša bona tša boromiwa ka go thuša ba bangwe go hwetša lehumo le bohlokwa kudu.

Mongwadiši wa sekolo, Wallace Liverance, o ile a phetha tšhiedišano ya pele ya dipolelo ka sehlogo se se rego “Bolelang Bohlale bja Modimo bjo bo Bego bo Utilwe.” (1 Ba-Korinthe 2:⁠7) Bohlale bja Modimo bjo moapostola Paulo a boletšego ka bjona nakong ya tirelo ya gagwe ya boromiwa ke’ng? Ke bohlale le matla tšeo Jehofa a di dirišago go tliša khutšo le botee legohleng. Bohlale bjo bo theilwe go Jesu. Go e na le go bolela ka ebangedi ya tša leago, Paulo o ile a thuša batho go bona kamoo Modimo a bego a tla bušetša mafelelo a sebe sa Adama sekeng ka gona. (Ba-Efeso 3:​8, 9) Seboledi se ile sa eletša batheetši ba sona  gore: “Dirišang ditokelo tša lena tša tirelo go etša ge Paulo a dirile, yoo a ilego a bona kabelo ya gagwe ya boromiwa e le sebaka sa go thuša batho go bona kamoo Jehofa a bego a tla phethagatša merero ya gagwe.”

Ka morago ga polelo ye, Mark Noumair, mohlahli yo mongwe wa Gilead, o ile a etelela pele poledišano e mafolofolo le barutwana ba mmalwa ba sehlopha. Sehlogo se se rego “Go Ithuta Lentšu la Modimo go Tšweletša Badiredi ba Fišegago” se ile sa gatelela mantšu a Paulo a lego go Ba-Roma 10:​10. Sehlopha se ile sa anega diphihlelo tše dintši tša tirelong ya tšhemo tšeo di se thabetšego ge se be se dutše se tsena sekolo. Diphihlelo tša sona di ile tša bontšha gore ge re ithuta le go naganišiša ka Lentšu la Modimo, dilo tše dibotse tša mabapi le Jehofa Modimo le Mmušo wa gagwe di tla tlatša dipelo tša rena gomme re tla botša ba bangwe ka tšona. Dikgweding tše hlano tšeo ba di feditšego ba dula Lefelong la tša Thuto la Watchtower, barutwana ba ile ba thoma dithuto tše fetago tše 30 tša magae tša Beibele le batho bao ba thabelago gotee le go šoma ditikologong tšeo di šongwago kgafetša tša diphuthego tša kgaufsi.

Bao ba Godilego Tsebong ba Nea Keletšo

Nakong ya ge ba tsena sekolo, barutwana ba ile ba holwa ke go gwerana le ditho tša lapa la Bethele ya United States. Ditho tša bašomi tša lekaleng Robert Ciranko le Robert P. Johnson di ile tša swara poledišano le bahlanka ba botegago ba kgale ba Jehofa, go akaretša le balebeledi ba basepedi bao mo nakong ye ba bego ba amogela tlhahlo e bohlokwa kua Lefelong la tša Thuto la Watchtower. Bohle bao go ilego gwa boledišanwa le bona e be e le dialoga tša Gilead tšeo ka nako e nngwe di ilego tša hlankela e le baromiwa. E be e le mo go beago pelo go barutwana le malapa a gabo bona gotee le bagwera go kwa mantšu a bohlale go tšwa go banna ba ba moya bao ba nago le phihlelo.

Keletšo ya bona e be e akaretša: “Dulang le swaregile ka mo go ka kgonegago bodireding le phuthegong.” “Le se ke la ikgodiša. Dulang le tsepamišeditše megopolo ya lena morerong wa lena le le baromiwa, gomme le dire dikabelo tša lena go ba magae a lena.” Ditlhaloso tše dingwe tše di holago di ile tša bontšha tsela yeo ka yona tlhahlo ya Gilead e hlamago modiredi bakeng sa mediro e mebotse, go sa šetšwe moo a abetšwego gona. Tše dingwe tša tšona ke tše: “Re ile ra ithuta go swarišana le go šoma gotee.” “Sekolo se re thušitše go amogela ditšo tše dingwe.” “Re ile ra rutwa go diriša Mangwalo ka kwešišo e mpsha.”

John E. Barr, e lego setho sa nako e telele sa Sehlopha se Bušago, o ile a nea polelo ya thwadi ya lenaneo. Sehlogo sa gagwe se se tšwago Mangwalong se be se re “Kxowane ya Tšôna e Tšwetše Lefase ka Moka.” (Ba-Roma 10:​18) O ile a rotoša potšišo e rego, Na batho ba Modimo ba kgonne go fihlelela tlhohlo ye mehleng yeno? Ee, go bjalo! Ga e sa le go tloga morago ka 1881, babadi ba makasine wa Watchtower ba ile ba botšišwa gore: “Na le dira modiro wa boboledi?” Ke moka seboledi se ile sa gopotša batheetši ka moka ka kgoeletšo ya histori kua kopanong ya 1922 ye e bego e swaretšwe Cedar Point, Ohio, U.S.A. e rego: “Tsebatšang Kgoši le Mmušo wa Yona!” Ge nako e dutše e e-⁠ya, phišego ya bahlanka ba Modimo ba botegago e ile ya ba dira gore ba bolele ditherešo tše kgahlišago tša Mmušo ditšhabeng ka moka. Ka go diriša dipuku tšeo di gatišitšwego le lentšu la molomo, go bolelwa ga ditaba tše dibotse go fihlile magomong a lefase ka moka leo le agilwego​—ka moka di dirwa bakeng sa go iša tumišo le theto go Jehofa. Phethong yeo e tutuetšago ya polelo, Ngwanabo rena Barr o ile a kgothatša dialoga gore di ele hloko ditšhegofatšo tša tšona, ka gore: “Letšatšing le lengwe le le lengwe, ge le rapela Jehofa le le dikabelong tša lena, mo lebogeng go tšwa dipelong bakeng sa karolo yeo le e tšeago phethagatšong ya mantšu a rego, ‘Kxowane ya tšôna e tšwetše lefase ka moka.’”

Ka morago ga polelo ye, ditumedišo di ile tša balwa, gomme modula-setulo o ile a nea sealoga se sengwe le se sengwe diploma. Ke moka, maikwelong a kopanego a lethabo le manyami a ge ba tloga sekolong seo se rategago, moemedi wa sehlopha o ile a bala setlamo se se tšwago pelong seo se bego se lebišitšwe go Sehlopha se Bušago le lapa la Bethele, seo se hlalosago boikemišetšo bja dialoga bja go tumiša Jehofa “xo tloxa byale le xo ya xo ile.”​—Psalme 115:⁠18.

Re rapela gore dialoga tše di tla itlwaelanya le magae a tšona a mafsa gomme di tla thuša go tšwetšeng pele modiro wa boboledi lefaseng ka bophara go etša ge bao ba sepetšego pele ga bona ba dirile bjalo ka nywaga e 60.

[Caption on page 23]

DIPALO-PALO TŠA SEHLOPHA

Palo ya dinaga tšeo di emetšwego: 12

Palo ya dinaga tšeo ba abetšwego go tšona: 16

Palo ya barutwana: 48

Palogare ya nywaga: 34,4

Palogare ya nywaga therešong: 17,6

Palogare ya nywaga bodireding bja nako e tletšego: 13,5

[Caption on page 24]

Sehlopha se se Alogago sa bo-114 sa Sekolo sa Beibele sa Watchtower sa Gilead

Lelokelelong leo le lego ka mo tlase, methaladi e balwa go tloga ka pele go ya ka morago gomme maina a lokeleditšwe go tloga go le letshadi go ya go le letona mothalading o mongwe le o mongwe.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martinez, L.; Millar, D.; Festré, Y.; Nutter, S. (3) Martinez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.