Bidio Yeo e Hlametšwego go Kgoma Dipelo tša Bafsa

BAFSA ba bantši ba ile ba kgothaletšwa go naganišiša ka boitshwaro bja bona ka morago ga go bogela bidio ya Young People Ask​—How Can I Make Real Friends? * Bidio ye e na le keletšo e kwagalago ya mangwalo, mantšu ao a boletšwego ke bafsa ka bobona le terama e tutuetšago ya mehleng yeno yeo e theilwego pegong ya Beibele ya Dina. (Genesi, kgaolo 34) Ditlhaloso tše di latelago tša mabapi le bidio ye di tšwa Mexico.

Martha o anega ka gore: “Bidio e ile ya nkgoma pelo ya-ka ka mo go tseneletšego. Go bonagala eka e be e diretšwe nna ka mo go kgethegilego. Ke be ke nagana gore ke mo go lekanego gore barutiši ba-ka le bao ke tsenago le bona sekolo ba fo tseba feela gore ke be ke le yo mongwe wa Dihlatse tša Jehofa. Ke ile ka palelwa ke go hlatsela seo ka go ba nea bohlatse. Ke leboga tsebišo ka moka yeo Jehofa a e neago, kudu-kudu ge e re kgoma ka mo go tseneletšego go etša bidio ye.”

Juan Carlos o re: “Bidio ye e tloga e dira gore motho a nagane. Ka ge ke le lesogana, ke ile ka dira diphošo tše dingwe tšeo ke di tswalanyago le ba bangwe ba baanegwa terameng. Nywageng e fetilego, ke be ke phela maphelo a mabedi, eupša ke ile ka lemoga gore bophelo bjo bjalo bo ka tliša mafelelo a mabe. Ka morago ga go bogela bidio ye, ke ikemišeditše go botegela Jehofa.”

Sulem o ipolela ka gore: “Ge ke be ke bogela bidio ye, ke ile ka kgomega maikwelong ka mo go tseneletšego. Nakong e fetilego ke ile ka tlogela go bala Beibele, gomme ke be ke sa rapele Jehofa ka mehla. Ge ke be ke theeditše mantšu a boletšwego ke bafsa bidiong, ke ile ka tutueletšega go thoma go ithuta Beibele gape le go rapela Jehofa.”

Lehono bafsa ba lebeletšana le ditlhohlo tše dintši, gomme kgetho ya bona ya bagwera gantši e tutuetšwa kudu ke tsela yeo ba phelago maphelo a bona ka yona. (Psalme 26:⁠4; Diema 13:​20) Bidio ya Young People Ask​—How Can I Make Real Friends? e thuša ba bantši go dira diphetho tše dibotse tabeng ye.

[Mengwalo ya ka tlase]