“E Tswaletše Sekgoba Seo se Bego se Bulegile Pelong Ya-ka”

“KE LE leboga ka go tšwa pelong bakeng sa mpho ye e botse ya puku ya Batamela Kgaufsi le Jehofa. E tswaletše sekgoba seo se bego se bulegile pelong ya-ka​—senyakwa sa go ikwa ke ratwa le go tšeelwa godimo ke Jehofa. Ga bjale ke ikwa ke le kgaufsi kudu le Jehofa le Morwa wa gagwe yo a rategago. Ke nyaka go botša yo mongwe le yo mongwe ka puku ye le go nea bohle bao ke ba ratago kopi ya yona.” Ye ke tsela yeo yo mongwe wa Dihlatse tša Jehofa a ilego a ikwa ka yona ka puku ya matlakala a 320 yeo e lokolotšwego Dikopanong tša Selete tša “Bagoeledi ba Mmušo ba Fišegago” tšeo di ilego tša swarwa ka 2002/03. Anke re ahla-ahleng tše dingwe tša dibopego tša puku ye e mpsha le lebaka leo ka lona e ilego ya gatišwa.

Dibopego tše Dingwe tša Puku ye e Mpsha

Puku ye e mpsha e hupere’ng? Tsebišo ka moka yeo e ahla-ahlilwego dihlogong tše pedi tšeo di ithutwago tokollong ye​—le tsebišo e nngwe e oketšegilego! Puku ye e na le dikgaolo tše 31, tšeo e nngwe le e nngwe ya tšona e ka bago ya botelele bja go lekana le sehlogo seo se ithutwago sa Morokami. Ka morago ga matseno le dikgaolo tše tharo tša mathomo, puku e arotšwe ka dikarolo tše nne, tšeo e nngwe le e nngwe ya tšona e ahla-ahlago seka se tee sa dika tša Jehofa tše dikgolo. Karolo e nngwe le e nngwe e thoma ka go nea kakaretšo ya seka seo se ahla-ahlwago. Dikgaolo tše sego kae tše latelago di ahla-ahla kamoo Jehofa a bonagatšago seka seo. Karolo e nngwe le e nngwe e na le kgaolo yeo e bolelago ka Jesu. Ka baka la’ng? Ee, Jesu o itše: “E a bonexo Nna ó bone Tate.” (Johane 14:⁠9) Ka go bonagatša Jehofa ka mo go phethagetšego, Jesu o re nea mehlala e bonagalago gabotse ya go šoma ga dika tša Modimo. Karolo e nngwe le e nngwe e phetha ka kgaolo yeo e re rutago kamoo re ka ekišago Jehofa go bonagatšeng seka seo se ahla-ahlwago. Ge e ahla-ahla dika tša Jehofa, puku ye e mpsha e dira tšhupetšo pukung e nngwe le e nngwe ya Beibele.

Le gona, puku ya Batamela Kgaufsi le Jehofa e na le dibopego tše dingwe tše di kgethegilego. Go thoma ka kgaolo 2, kgaolo e nngwe le e nngwe e na le lepokisi le le nago le sehlogo se se rego “Dipotšišo Bakeng sa go Naganišiša.” Mangwalo le dipotšišo tšeo di lego ka lepokising ga se tša rerelwa go dira e le pušeletšo ya kgaolo. Go e na le moo, di reretšwe go go thuša go diriša Beibele bakeng sa go naganišiša ka mo go tseneletšego ka taba. Go kgothaletšwa gore o bale ditemana tša Lengwalo le lengwe le le lengwe ka šedi. Ke moka o naganišiše ka potšišo, gomme o katanele go e diriša ka noši. Go naganišiša mo go bjalo go ka tutuetša pelo ya gago, gwa go thuša go batamela kgaufsi-ufsi le Jehofa.​—Psalme 19:⁠14.

Diswantšho tša ka pukung ya Batamela Kgaufsi le Jehofa di ile tša nyakišišwa ka šedi le go lokišetšwa bakeng sa go ruta le go nea tutuetšo. Dikgaolo tše lesome-šupa di na le diswantšho tše dibotse tša go tlala letlakala tša ditiragalo tša ka Beibeleng.

Ke ka Baka La’ng e Ile ya Gatišwa?

Ke ka baka la’ng puku ya Batamela Kgaufsi le Jehofa e ile ya gatišwa? Morero o mogolo wa kgatišo ye e mpsha ke go re thuša go tseba Jehofa gakaone e le gore re ka aga tswalano e matla kudu ya motho ka noši le Modimo wa rena.

Na o ka nagana ka motho yo mongwe yo a ka holwago ke puku ya Batamela Kgaufsi le Jehofa, mohlomongwe morutwana wa Beibele goba gaešita le ngwanabo rena goba kgaetšedi wa Mokriste yo a tapilego? Go thwe’ng ka wena​—na o šetše o thomile go bala puku ye e mpsha? Ge e ba go se bjalo, ke ka baka la’ng o sa rulaganye nako ya go thoma kapejana kamoo go ka kgonegago? Iphe nako ya go naganišiša ka seo o se balago. Eka kgatišo ye e ka go thuša go batamela kgaufsi kudu le Jehofa Modimo, e le gore o tle o bolele ditaba tše dibotse tša Mmušo wa gagwe ka lethabo le legolo le ka phišego!