“Modimo Ké Yêna Leratô”

“E a se naxo leratô xa a tsebe Modimo, xobane Modimo ké Yêna leratô.”​—1 Johane 4:⁠8.

1-3. (a) Beibele e bolela’ng ka seka sa Jehofa sa lerato, gomme ke ka tsela efe polelwana ye e lego ya moswana-noši? (b) Ke ka baka la’ng Beibele e re “Modimo ké Yêna leratô”?

DIKA tša Jehofa ka moka ke tše di kgahlišago, di phethagetše e bile di a ipiletša. Eupša lerato ke leo le ipiletšago kudu dikeng tša Jehofa ka moka. Ga go na seo se re gogelago ka matla go Jehofa go swana le lerato la gagwe. Ka mo go thabišago, lerato gape ke seka sa gagwe se segolo. Re tseba bjang seo?

² Beibele e bolela se sengwe ka lerato seo e sa se bolelego ka dika tše dingwe tša Jehofa tše dikgolo. Mangwalo ga a bolele gore Modimo ke matla goba gore Modimo ke toka goba gona gore Modimo ke bohlale. O na le dika tšeo gomme ke yena mothopo o mogolo wa tšona e le tše tharo. Lega go le bjalo, go 1 Johane 4:⁠8 go bolelwa ka selo se sengwe se se tseneletšego mabapi le lerato ge go thwe: “Modimo ké Yêna leratô.” (Mongwalo o sekamego ke wa rena.) Ee, lerato ke leo le tseneletšego go Jehofa. Ke seka sa gagwe se segolo. Ge e le gabotse, re ka nagana ka tsela ye: Matla a Jehofa a mo kgontšha go dira dilo. Toka ya gagwe le bohlale bja gagwe di hlahla tsela yeo a dirago dilo ka yona. Lega go le bjalo, lerato la Jehofa le mo tutueletša go dira dilo. Le gona lerato la gagwe le dula le bontšhwa tseleng yeo a dirišago dika tše dingwe tša gagwe ka yona.

³ Gantši go bolelwa gore Jehofa ke mothofatšo wa lerato. Ka gona, ge e ba re nyaka go ithuta ka lerato, re swanetše go ithuta ka Jehofa. Ka gona, a re ahla-ahleng tše dingwe tša dibopego tša lerato la Jehofa leo le sa bapišwego.

Tiro e Kgolo Kudu ya Lerato

4, 5. (a) Tiro e kgolo kudu ya lerato historing ka moka ke efe? (b) Ke ka baka la’ng re ka re Jehofa le Morwa wa gagwe ba kopantšwe ke tlemo e matla kudu ya lerato yeo e kilego ya dirwa?

⁴ Jehofa o bontšhitše lerato ka ditsela tše dintši, eupša go na le e tee yeo e di fetago ka moka. Ke efe? Ke go romela Morwa wa gagwe gore a tlo tlaišega le go re hwela. Re ka bolela ka bolokologi  gore ye ke tiro e kgolo kudu ya lerato historing ka moka. Ke ka baka la’ng re ka bolela seo?

⁵ Beibele e bitša Jesu “tháka-letswálô yá dibopya tšohle.” (Ba-Kolose 1:​15) Nagana feela​—Morwa wa Jehofa o bile gona pele legohle la kgonthe le e-⁠ba gona. Ka gona, Tate le Morwa ba bile gotee ka lebaka le lekaaka’ng? Bo-rathutamahlale ba bangwe ba akanyetša gore legohle le na le nywaga e dimilione tše dikete tše 13. Lega go le bjalo, gaešita le ge kakanyetšo ye e nepagetše, e ka se be ya botelele bjo bo lekanego go ka emela nako ya bophelo bja Morwa wa Jehofa wa leitšibulo! O be a swaregile ka go dira’ng nywageng yeo ka moka? Morwa o ile a hlankela ka lethabo e le “mošomedi yo a nago le bokgoni” wa Tatagwe. (Diema 8:​30, NW; Johane 1:⁠3) Jehofa le Morwa wa gagwe ba ile ba thušana go hlola dilo tše dingwe ka moka. Ba bile le dinako tše di thabišago gakaakang! Ka gona, ke mang go rena yo a ka thomago go kwešiša matla a tlemo yeo e bego e le gona tekanyong yeo e kgolo kudu ya nako? Go molaleng gore Jehofa Modimo le Morwa wa gagwe ba kopantšwe ke tlemo e matla kudu ya lerato yeo e kilego ya dirwa.

6. Ge Jesu a be a kolobetšwa, Jehofa o ile a bontšha bjang maikwelo a gagwe ka Morwa wa Gagwe?

⁶ Lega go le bjalo, Jehofa o ile a romela Morwa wa gagwe lefaseng gore a belegwe e le ngwana yo e lego motho. Go dira bjalo go be go bolela gore ka lebaka la nywaga-some Jehofa o be a swanelwa ke go gafa tswalano e tseneletšego le Morwa wa gagwe yo a ratwago legodimong. Ka kgahlego e tseneletšego, O ile a bogela a le legodimong ge Jesu a le gare a gola gore e be monna yo a phethagetšego. Ge a e-⁠na le nywaga e ka bago 30, Jesu o ile kolobetšwa. Tiragalong yeo Tate o ile a bolela ka noši a le legodimong gore: “Yêna-yó ké Yêna Morwa-moratwa wa-ka, yo ke kxahlwaxo ke Yêna.” (Mateo 3:​17) Ka go bona gore Jesu o be a dirile ka potego tšohle tšeo di bego di porofetilwe, tšohle tšeo a bego a kgopetšwe gore a di dire, Tatagwe o swanetše go ba a ile a thaba kudu!​—Johane 5:​36; 17:⁠4.

7, 8. (a) Jesu o ile a lebeletšana le eng ka Nisani 14, 33 C.E., gomme Tatagwe wa legodimong o ile a kgomega bjang? (b) Ke ka baka la’ng Jehofa a ile a dumelela Morwa wa gagwe go tlaišega le go hwa?

⁷ Lega go le bjalo, Jehofa o ile a ikwa bjang ka Nisani 14, 33 C.E., ge Jesu a be a ekwa gomme  ka morago a swarwa ke lešaba leo le galefilego? Ge Jesu a be a rogakwa, a tshwelwa ka mare gomme a otlwa ka matswele? Ge a be a bethwa, mokokotlo wa gagwe o gagolwa dinama? Ge a be a kokotelwa diatla le maoto koteng le go tlogelwa gore a lekelele moo mola batho ba le gare ba mo rogaka? Tate o ile a ikwa bjang ge Morwa wa gagwe yo a ratwago a be a mo goelela a le bohlokong? Jehofa o ile a ikwa bjang ge Jesu a be a hema la mafelelo, gomme e le ka lekga la mathomo ga e sa le tlholo ka moka e e-⁠ba gona, Morwa wa Gagwe yo a ratwago a se sa le gona?​—Mateo 26:​14-16, 46, 47, 56, 59, 67; 27:​26, 38-44, 46; Johane 19:⁠1.

⁸ Ka ge Jehofa a e-⁠na le maikwelo, bohloko bjoo a ilego a bo kwa ka lehu la Morwa wa gagwe ga re kgone go bo hlalosa. Seo se ka hlaloswago ke maikemišetšo ao ka ona Jehofa a ilego a dumelela se gore se direge. Ke ka baka la’ng Tate a ile a itumelela go kwa bohloko bjo bjalo? Jehofa o utolla selo se sengwe se kgahlišago kudu go Johane 3:16​—e lego temana ya Beibele e bohlokwa kudu moo e lego gore e ile ya bitšwa Ebangedi e nyenyane. E re: “Modimo ó ratile lefase xakaakaa, a bá a le nea Morwa wa xaxwe e à tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” Ka gona maikemišetšo a Jehofa e be e le a: lerato. Ga go na lerato le le fetago le leo le kilego la bontšhwa.

Kamoo Jehofa a re Kgonthišetšago ka Gona ka Lerato la Gagwe

9. Sathane o nyaka gore re dumele’ng ka pono ya Jehofa ka rena, eupša Jehofa o re kgonthišetša’ng?

⁹ Lega go le bjalo, go rotoga potšišo ya bohlokwa: Na Modimo o a re rata re le motho ka noši? Ba bangwe ba ka dumela gore Modimo o rata batho ka kakaretšo go etša ge Johane 3:​16 e bolela. Eupša ge e le gabotse ba nagana gore ‘Modimo le ka mohla a ka se ka a nthata ke le motho ka noši.’ Therešo ke gore Sathane o kganyoga go re dira gore re dumele gore Jehofa ga a re rate e bile ga a re lebelele re le ba bohlokwa. Ka lehlakoreng le lengwe, go sa šetšwe gore re nagana gore re bao ba sa rategego goba bao ba sego bohlokwa gakaakang, Jehofa o re kgonthišetša gore yo mongwe le yo mongwe wa bahlanka ba gagwe ba botegago ke yo bohlokwa go yena.

10, 11. Seswantšho sa Jesu sa dithaga se bontšha bjang gore re bohlokwa mahlong a Jehofa?

¹⁰ Ka mohlala, ela hloko mantšu a Jesu ao a begilwego go Mateo 10:​29-31. Ge a swantšha go ba bohlokwa ga barutiwa ba gagwe, Jesu o itše: “A dithaxa tše pedi xa di rekwe ka peni? Xomme le e tee ya tšôna e ka se wêle fase xe Tata-weno à sa rate. Ešita le meriri ya dihlôxô tša lena e badilwe ka moka! Ké xôna, se boifeng; Le feta dithaxa è le tše ntši.” Nagana ka seo mantšu ao a ilego a se bolela go batheetši ba Jesu ba lekgolong la pele la nywaga.

¹¹ Mehleng ya Jesu thaga e be e le nonyana e bitšago tšhelete ya tlase kudu go dinonyana ka moka tšeo di bego di rekišwa e le dijo. Moreki o be a hwetša dithaga tše pedi ka tšheletiana ya tlase. Eupša ka morago Jesu o ile a bolela go ya ka Luka 12:​6, 7 gore ge motho a be a diriša ditšheletiana tše pedi, o be a sa hwetše dithaga tše nne, eupša o be a hwetša tše hlano. Nonyana ya bohlano e be e okeletšwa bjalo ka ge eka ga se ya bohlokwa le gatee. Mohlomongwe dinonyana tše bjalo e be e se tša bohlokwa mahlong a batho, eupša Mmopi o be a di lebelela bjang? Jesu o itše: “Xa xo le e tee ya tšôna [gaešita le yeo e okeletšwago] e lebalwaxo ke Modimo.” Bjale re ka thoma go bona ntlha ya Jesu. Ka ge Jehofa a lebelela thaga e tee e le ya bohlokwa gakaalo, gona motho ke yo bohlokwa kudu gakaakang! Go etša ge Jesu a boletše, Jehofa o tseba se sengwe le se sengwe ka rena. Ee, gaešita le meriri ya dihlogo tša rena e badilwe!

12. Ke ka baka la’ng re ka kgonthišega gore Jesu o be a bolela therešo ge a bolela ka gore meriri ya dihlogo tša rena e badilwe?

 ¹² Ba bangwe ba ka nagana gore Jesu o be a feteletša tabeng ye. Lega go le bjalo, anke o nagane ka tsogo. Jehofa o swanetše go re tseba ka mo go tseneletšego gakaakang e le gore a ka re bopa gape! O re lebelela re le ba bohlokwa kudu moo e lego gore o gopola se sengwe le se sengwe ka rena, go akaretša le thulaganyo ya rena e raraganego ya dikarolwana tša leabela le dikgopolo le diphihlelo tšeo re bilego le tšona nywageng ka moka ya rena. Go tseba palo ya meriri ya rena​—yeo hlogo e tlwaelegilego e nago le e ka bago e 100 000​—e be e tla ba tiro e nyenyane ge e bapišwa. Mantšu a Jesu a re kgonthišetša ka tsela e botse gakaakang gore Jehofa o a re hlokomela re le motho ka o tee ka o tee!

13. Taba ya Kgoši Josafate e bontšha bjang gore Jehofa o lebelela dika tše dibotse go rena gaešita le ge re sa phethagala?

¹³ Beibele e utolla selo se sengwe gape seo se re kgonthišetšago ka lerato la Jehofa. O lebelela dika tše dibotse tšeo re nago le tšona le go di tšeela godimo. Tšea ka mohlala Kgoši ya go loka Josafate. Ge kgoši e be e dirile tiro ya bošilo, moporofeta wa Jehofa o ile a e botša gore: “Byale O tlo tlêlwa ke kxalefô ya Morêna.” A kgopolo e dirago gore motho a naganišiše gakaakang! Eupša molaetša wa Jehofa ga wa ka wa felela moo. O tšwetše pele ka gore: “Fêla, xo sa hweditšwe bothakxa xo wene.” (2 Koronika 19:​1-⁠3) Ka gona kgalefo ya Jehofa ya go loka ga se ya mo foufaletša “bothakxa” bja Josafate. Na ga se mo go homotšago go tseba gore Modimo o lebelela dika tše dibotse go rena gaešita le ge re sa phethagala?

Modimo yo a ‘Ikemišeditšego go Lebalela’

14. Ge re dirile sebe, re ka ikwa re e-⁠na le maikwelo afe a imelago, eupša re ka holwa bjang ke tebalelo ya Jehofa?

¹⁴ Ge re dira sebe, go nyama, go lewa ke dihlong le go ikwa re le molato tšeo re di kwago di ka dira gore re nagane gore le ka mohla re ka se swanelwe ke go hlankela Jehofa. Lega go le bjalo, gopola gore Jehofa o “ikemišeditše go lebalela.” (Psalme 86:⁠5, NW) Ee, ge e ba re itsholela dibe tša rena gomme re katana ka matla gore re se ke ra di bušeletša, re ka holwa ke tebalelo ya Jehofa. Ela hloko kamoo Beibele e hlalosago sebopego se seo se kgahlišago sa lerato la Jehofa.

15. Jehofa o bea dibe tša rena kgole gakaaka’ng?

¹⁵ Mopsalme Dafida o ile a diriša polelwana e matla bakeng sa go hlalosa tebalelo ya Jehofa: “’Karoxô tša rena ó di tloša mo xo rena a di iša kxolê, kxolê bo-ka Bohlabêla bò le kxolê le Bodikêla.” (Psalme 103:​12, mongwalo o sekamego ke wa rena.) Bohlabela bo kgole gakaaka’ng le bodikela? Ka kgopolo e itšego, ka mehla bohlabela bo kgole-kgole le bodikela; mahlakore ao a mabedi a ka se ke a gahlana le ka mohla. Seithuti se sengwe se bolela gore polelwana ye e bolela “bokgole bjo bogolo kudu; go feta kamoo re ka naganago ka gona.” Mantšu a Dafida ao a buduletšwego a re botša gore ge Jehofa a lebalela, o beela dibe tša rena kgole kudu go feta kamoo re ka naganago.

16. Ge Jehofa a re lebalela dibe tša rena, ke ka baka la’ng re ka ikwa re kgonthišegile gore o re lebelela re hlwekile ka morago ga moo?

¹⁶ Na o kile wa leka go tloša sepatso seaparong sa mmala o tagilego? Mohlomongwe go sa šetšwe maiteko a gago a kaone ao o a dirilego, sepatso se ile sa no šala se bonala. Ela hloko kamoo Jehofa a hlalosago bogolo bja tebalelo ya gagwe ka gona: “Le xe dibe tša lena di hubetše bo-ka madi, di tlo šweufala wa leswêla; le xe di hubetše wa letsoku, di tlo etša bôya bya dinku.” (Jesaya 1:​18, mongwalo o sekamego ke wa rena.) Lentšu “madi” le šupa mmala o tagilego o mohwibidu. * Mmala wa “letsoku” e be e le o mongwe wa mebala e tseneletšego ya mašela ao a tailwego. Le ka mohla re ka se ke ra tloša sepatso sa sebe ka maiteko a rena. Lega go le bjalo, Jehofa a ka tloša dibe tšeo di swanago le madi le letsoku ka mmala gomme a di šweufatša bjalo ka leswela goba boya bjo bo sa taiwago. Ka gona ge Jehofa a re lebalela dibe tša rena, ga se ra swanela go nagana gore re rwala sepatso sa dibe tše bjalo bophelo bja rena ka moka.

17. Ke ka kgopolo efe Jehofa a lahlelago dibe tša rena ka morago ga gagwe?

¹⁷ Kopelong yeo e kgomago pelo ya tebogo yeo Hiskia a e hlamilego ka morago ga ge a phološitšwe bolwetšing bjo bo bolayago, o ile a re  go Jehofa: “Dibe tša-ka ka moka o di lahletše ka morago ga gago.” (Jesaya 38:​17, PK, mongwalo o sekamego ke wa rena.) Jehofa mo o hlaloswa e le yo a tšeago dibe tša mofoši yo a sokologago gomme a di lahlela ka morago ga Gagwe moo A sa di bonego goba go di gopola gape. Go ya ka puku e nngwe ya ditšhupetšo, kgopolo yeo e fetišetšwago mo e ka hlaloswa e le: “O dirile gore [dibe tša-ka] di be bjalo ka ge eka ga se tša ka tša direga.” Na seo ga se se kgothatšago?

18. Moporofeta Mika o bontšha bjang gore ge Jehofa a lebalela, O tlošetša dibe tša rena sa ruri?

¹⁸ Kholofetšong ya tsošološo, moporofeta Mika o ile a bolela kgodišego ya gagwe ya gore Jehofa o be a tla lebalela batho ba gagwe bao ba itsholago: “O kae Modimo a etšaxo Wene . . . Mo-feta-dikaroxô tša sethšaba s’axo . . . dibe tša rena tšohle ó tlo di lahlêla bodibeng bya lewatlê.” (Mika 7:​18, 19, mongwalo o sekamego ke wa rena.) Akanya ka seo mantšu ao a bego a se bolela go batho bao ba bego ba phela mehleng ya Beibele. Na go be go e-⁠na le kgonagalo le ge e le efe ya go ka buša selo seo se bego se lahletšwe “bodibeng bya lewatlê”? Ka gona mantšu a Mika a bontšha gore ge Jehofa a lebalela, o tlošetša dibe tša rena sa ruri.

“Kwelobohloko e Lerato ya Modimo wa Rena”

19, 20. (a) Ke’ng seo se bolelwago ke lediri la Sehebere leo le fetoletšwego e le “go bontšha kgaugelo” goba “go ba le lešoko”? (b) Beibele e diriša bjang maikwelo ao mma a nago le ona bakeng sa ngwana wa gagwe go re ruta ka kwelobohloko ya Jehofa?

¹⁹ Kwelobohloko ke sebopego se sengwe sa lerato la Jehofa. Kwelobohloko ke’ng? Ka Beibeleng, go na le tswalano ya kgaufsi magareng ga kwelobohloko le kgaugelo. Mantšu a mantši a Sehebere le a Segerika a fetišetša kgopolo ya kwelobohloko. Ka mohlala, lediri la Sehebere e lego ra·chamʹ gantši le fetolelwa e le “go bontšha kgaugelo” goba “go ba le lešoko.” Lentšu le la Sehebere, leo Jehofa a le dirišago go yena le tswalana le lentšu leo le dirišwago bakeng sa “popelo” gomme le ka hlaloswa e le “kwelobohloko ya bomma.”

²⁰ Beibele e diriša maikwelo ao mma a nago le wona go ngwana wa gagwe bakeng sa go re ruta mabapi le seo se bolelwago ke kwelobohloko ya Jehofa. Jesaya 49:​15 e re: “A fa mosadi a ka lebala leseanyana l’axwe, a lesa xo šôkêlwa [ra·chamʹ] ngwana yo a mmelexexo?​—Le xe yêna a ka lebala, Nna nka se Xo lebale.” Go thata go akanya gore mma o be a ka lebala go fepa le go hlokomela ngwana wa gagwe yo a anyago. Go ba gona, ngwana ga a kgone go itirela selo; bošego le mosegare ngwana o nyaka tlhokomelo ya mmagwe. Lega go le bjalo, ka manyami, gantši go kwewa ka bo-mma bao ba hlokomologago bana ba bona, kudu-kudu mo ‘dinakong tše tše hlobaetšago.’ (2 Timotheo 3:​1, 3, bapiša le NW.) Jehofa o tsebatša gore: “Nna nka se Xo lebale.” Kwelobohloko e lerato yeo Jehofa a nago le yona bakeng sa bahlanka ba gagwe ke e matla ka mo go sa lekanywego go feta maikwelo a lerato kudu a tlhago  ao re ka naganago ka ona​—kwelobohloko yeo mma gantši a bago le yona bakeng sa lesea la gagwe.

21, 22. Ba-Isiraele ba ile ba lebeletšana le eng kua Egipita ya bogologolo, gomme Jehofa o ile a arabela bjang dillong tša bona?

²¹ Jehofa o bontšha kwelobohloko bjang bjalo ka motswadi yo lerato? Seka se se bonagala gabotse tseleng yeo a ilego a dirišana ka yona le Isiraele ya kgale. Bofelong bja lekgolo la bo-16 la nywaga B.C.E., ba-Isiraele ba dimilione ba be ba dirilwe makgoba kua Egipita, moo ba bego ba gateletšwe o šoro. (Ekisodo 1:​11, 14) Tlalelong ya bona, ba-Isiraele ba ile ba hlabela Jehofa mokgoši. Modimo wa kwelobohloko o ile a arabela bjang?

²² Pelo ya Jehofa e ile ya kgomega. O itše: “Mahloko a sethšaba sa-ka se se lexo kwa Egipita ke a bone; ke ba kwile xe ba xôlôla . . . ditlaišêxô tša bôná ke a di tseba.” (Ekisodo 3:⁠7) Jehofa o be a ka se bone ditlaišego tša batho ba gagwe le go kwa go golola ga bona ka ntle le go ba kwela bohloko. Jehofa ke Modimo yo a ipeago maemong a ba bangwe. Le gona go ipea maemong a ba bangwe​—bokgoni bja go kwa bohloko bja ba bangwe​—go tswalana kgaufsi le kwelobohloko. Lega go le bjalo, Jehofa o be a sa kwele feela batho ba gagwe bohloko; o ile a tutueletšega go gata mogato legatong la bona. Jesaya 63:⁠9 e re: “A ba lokolola ka leratô la xaxwe le ka xo ba hlômôxêla pelo.” Ka “seatla se matla,” Jehofa o ile a lopolla ba-Isiraele Egipita. (Doiteronomio 4:​34) Ka morago ga moo, o ile a ba nea dijo tša mohlolo gomme a ba iša nageng ya bona e enywago kudu.

23. (a) Mantšu a mopsalme a re kgonthišetša bjang gore Jehofa o tloga a tshwenyegile ka rena re le motho ka o tee ka o tee? (b) Jehofa o re thuša ka ditsela dife?

²³ Jehofa ga a bontšhe kwelobohloko feela bathong ba gagwe e le sehlopha. Modimo wa rena yo lerato o tshwenyegile kudu ka rena re le batho ka o tee ka o tee. O bona e le ka kgonthe tlaišego le ge e le efe yeo re ka bago re lebeletšane le yona. Mopsalme o itše: “Mahlô a Morêna a bôna baloki; ’tsêbê tša xaxwe di kwa xe ba lla. Morêna ó kxaufsi le ba ’pelo di rôbexilexo; ó phološa meôya e kxobetsi.” (Psalme 34:​15, 18) Jehofa o re thuša bjang re le motho ka o tee ka o tee? Ga se gore o tloša seo se re bakelago go tlaišega. Eupša o dirile ditokišetšo tše dintši kudu bakeng sa bao ba kgopelago thušo go yena. Lentšu la gagwe le nea keletšo e šomago yeo e ka bago le mafelelo a lemogegago. Ka phuthegong, o nea balebeledi bao ba swanelegago moyeng, bao ba katanelago go bontšha kwelobohloko ya gagwe ge ba thuša ba bangwe. (Jakobo 5:​14, 15) Ka ge e le “Mokwi wa dithapêlô,” Jehofa “ba ba Mo kxopêlaxo ó ba nea Môya o mokxêthwa.” (Psalme 65:⁠2; Luka 11:​13) Ditokišetšo tše bjalo ka moka ke dipontšho tša “pelo-thšôkwa ya Modimo wa rena.”​—Luka 1:⁠78.

24. O tla arabela bjang leratong la Jehofa?

²⁴ Na ga se mo go thabišago go naganišiša ka lerato la Tatago rena wa legodimong? Sehlogong se se fetilego re ile ra gopotšwa gore Jehofa o bontšhitše matla a gagwe, toka le bohlale ka ditsela tše lerato bakeng sa go re hola. Le gona sehlogong se re bone kamoo Jehofa a bontšhago lerato la gagwe la go rata batho ka go lebanya​—le go rena re le motho ka o tee ka o tee​—ka ditsela tše di lemogegago kudu. Ga bjale, yo mongwe le yo mongwe wa rena o swanetše go ipotšiša gore, ‘Ke tla arabela bjang leratong la Jehofa?’ Eka o ka arabela ka go mo rata ka pelo ya gago ka moka, monagano, moya le matla. (Mareka 12:​29, 30) Anke ka mehla tsela yeo o phelago bophelo bja gago ka yona e bontšhe kganyogo ya gago e tšwago pelong ya go batamela kgaufsi-ufsi le Jehofa. Le gona eka Jehofa, Modimo yo e lego lerato, a ka batamela kgaufsi-ufsi le wena​—go ya ka mo go sa felego!​—Jakobo 4:⁠8, NW.

[Mengwalo ya ka tlase]

[Dipotšišo tša Thuto]

[Caption on page 15]

‘Modimo o neetše Morwa wa gagwe e a tswetšwego a nnoši’

[Caption on page 16]

© J. Heidecker/VIREO

[Caption on page 16]

“Le feta dithaxa è le tše ntši”

[Caption on page 18]

Maikwelo a mma ka ngwana wa gagwe a ka re ruta ka kwelobohloko ya Jehofa

[Caption on page 19]

Na o a Gopola

• Re tseba bjang gore lerato ke seka se segolo sa Jehofa?

• Ke ka baka la’ng go ka thwe go romela ga Jehofa Morwa wa gagwe gore a tle a tlaišege le go re hwela ke tiro e kgolo kudu ya lerato e kilego ya dirwa?

• Jehofa o re kgonthišetša bjang gore o re rata re le motho ka o tee ka o tee?

• Beibele e hlalosa tebalelo ya Jehofa ka ditsela dife tše di kgahlišago?