Tsela Yeo ka Yona re ka Hlagolelago Lerato la Kgonthe

“Lerato ke sehlare sa bophelo; lerato ke bophelo.”​—Living to Purpose, ka Joseph Johnson, 1871.

MOTHO o ithuta bjang go rata? Na ke ka go ithutela tša monagano? Na ke ka go bala dipuku tšeo go ikhweletšwago thušo go tšona? Na ke ka go bogela dipaesekopo tša marato? Le gatee. Batho ba thoma go ithuta go rata ka mohlala le ka tlwaetšo ya batswadi ba bona. Bana ba tla ithuta seo se bolelwago ke lerato ge e ba, tikologong e lerato le e borutho, ba bona batswadi ba bona ba ba fepa le go ba šireletša, ba boledišana le bona gotee le go ba bontšha kgahlego e tseneletšego ya motho ka noši. Le gona ba ithuta go rata ge batswadi ba bona ba ba ruta go kgomarela melao ya motheo ya se se lokilego le se se fošagetšego.

Lerato la kgonthe le feta maikwelo feela a borutho. Gantši le dira dilo ka go kganyogela ba bangwe tše kaone, gaešita le ge ba sa bone e le ga bohlokwa ka nako yeo, e lego seo gantši se diregago ka bana ge go akaretšwa tayo e lerato. Mohlala o mobotse wa motho yo a bontšhago lerato le le se nago boithati ke Mmopi ka boyena. Moapostola Paulo o ngwadile gore: “Ngwan’a-ka! Se nyatšê thsôlô ya Morêna; O se tsôtê kôtlô ya xaxwe. Xobane Morêna ó sôla moratwa wa xaxwe.”​—Ba-Hebere 12:​5, 6.

Batswadi, le ka ekiša bjang Jehofa tabeng ya go bontšha lapa la lena lerato? Le gona mohlala wo le o beago tswalanong ya lena le le monna le mosadi ke wa bohlokwa gakaaka’ng?

Rutang Lerato ka go Bea Mohlala

Ge e ba o le monna yo a nyetšego, na o tšeela mosadi wa gago godimo goba go mo lebelela e le wa bohlokwa kudu gotee le go mo swara ka kgodišo le tlhompho? Ge e ba o le mosadi yo a nyetšwego, na o bontšha monna wa gago lerato le go mo nea thekgo? Beibele e bolela gore monna le mosadi ba swanetše go ratana gotee le go hlomphana. (Ba-Efeso 5:​28; Tito 2:⁠4) Ge ba dira bjalo, bana ba bona ba iponela ka mahlo ge lerato la Bokriste le šoma. Yeo e ka ba thuto e matla le e bohlokwa gakaakang!

Le gona batswadi ba godiša lerato ka gae ge ba kgomarela ditekanyetšo tša godimo tša lapa mabapi le dilo tše di swanago le boithabišo, boitshwaro le dipakane gotee le dilo tšeo di tlago pele. Lefaseng ka bophara, batho ba hweditše Beibele e le yeo e thušago kudu tabeng ya go bea ditekanyetšo tše bjalo tša lapa, ka go rialo ba nea bohlatse bjo bo ka bonwago bja gore Beibele ka kgonthe ‘ke ma-hebetšwa-ke-Modimo, le gona e hola batho ka go ruta, le ka go kgodiša le go sokolla, le ka go iša tokong.’ (2 Timotheo 3:​16) Ka kgonthe, melao ya motheo ya boitshwaro le tlhahlo ya bophelo tšeo di hwetšwago  Thutong ya Thabeng di lebelelwa e le tše phagamego kudu lefaseng ka bophara.​—Mateo, kgaolo 5 go ya go 7.

Ge lapa ka moka le lebelela go Modimo bakeng sa tlhahlo e bile le kgomarela ditekanyetšo tša gagwe, yo mongwe le yo mongwe a ka ikwa a šireletšegile, gomme bana ba ka kgona go rata le go hlompha batswadi ba bona. Ka mo go fapanego, lapeng leo go nago le ditekanyetšo tše pedi tšeo di fošagetšego goba ditekanyetšo tše di hlephilego, bana ba ka befelwa, ba galefa le go rabela.​—Ba-Roma 2:​21, 22a; Ba-Kolose 3:⁠21.

Go thwe’ng ka batswadi bao ba se nago balekane? Na ba hlaelelwa kudu tabeng ya go ruta bana ba bona lerato? Ga se gore go bjalo. Gaešita le ge go se na selo seo se ka tšeelago tirišano e botse ya mma le tate sebaka, phihlelo e bontšha gore ditswalano tše di tiilego tša lapa di ka thiba sekgoba sa motswadi yo a sego gona ka tekanyo e itšego. Ge e ba o le motswadi yo a se nago molekane, katanela go diriša melao ya motheo ya Beibele ka lapeng la gago. Ka baka la se, seema se sengwe se re botša gore: “Bô’ta Modimo ka pelo ka moka; O se ké wa ithêkxa ka xo fo re: Ke n’e thlaloxanyô. Ditseleng tša xaxo tšohle tseba Yêna; ké mo Yêna a tl’o xo Xo thulêla tsela”​—go akaretša le tsela ya go ba motswadi.​—Diema 3:​5, 6; Jakobo 1:⁠5.

Bafsa ba bantši ba babotse ba godišeditšwe ditikologong tša motswadi o tee gomme ga bjale ba hlankela Modimo ka potego gotee le diphuthego tše dikete tša Bokriste tša Dihlatse tša Jehofa lefaseng ka bophara. Se ke bohlatse bja gore batswadi bao ba se nago balekane le bona ba ka atlega go ruteng bana ba bona mabapi le lerato.

Kamoo Bohle ba ka Hlagolelago Lerato

Beibele e boletše e sa le pele gore ‘mehla ya bofelo’ e be e tla swawa ka “ba-hlala-leratô,” e lego go hlokega ga ditswalano tša tlhago tšeo gantši di swanetšego go ba gona magareng ga ditho tša lapa. (2 Timotheo 3:​1, 3) Lega go le bjalo, gaešita le bao ba ka bago ba goletše tikologong yeo go yona go se nago maikwelo a borutho ba ka ithuta go hlagolela lerato. Bjang? Ka go ithuta go Jehofa, yo e lego yena Mothopo wa lerato le yoo a bontšhago lerato le maikwelo a borutho go bohle bao ba retologelago go yena ka pelo ka moka. (1 Johane 4:​7, 8) Mopsalme yo mongwe o itše: “Xobane tate le mmê bôná ba ntloxetše; ’me Wêna Morêna O a nkamoxela.”​—Psalme 27:⁠10.

Jehofa o bontšha lerato la gagwe go rena ka ditsela tše dintši tše sa swanego. Tše di akaretša tlhahlo ya botate yeo e hwetšwago ka Beibeleng, thušo ya moya o mokgethwa le thekgo e borutho ya borwarre bja Bokriste. (Psalme 119:​97-105; Luka 11:​13; Ba-Hebere 10:​24, 25) Ela hloko kamoo ditokišetšo tše tše tharo di ka go thušago go rata Modimo le moagišani.

Tlhahlo e Buduletšwego ya Botate

Gore re hlagolele tlemo e borutho le motho yo mongwe, re swanetše go tseba motho yoo gabotse. Ka go itšweletša ka matlakaleng a Beibele, Jehofa o laletša batho gore ba batamele kgaufsi le yena. Lega go le bjalo, go bala Beibele ga se gwa lekana. Re swanetše go diriša dithuto tša yona gomme re bone mehola yeo e tlišwago ke seo. (Psalme 19:​7-10) Jesaya 48:​17 e re: “Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara.” Ee, Jehofa, e lego yena mothofatšo wa lerato, o re ruta tše di re holago​—e sego ka gobane a nyaka go beela tokologo ya rena mellwane ka melao ya motheo le melao e se nago mohola.

Tsebo e nepagetšego ya Beibele e re thuša gape gore re rate magagabo rena. Se ke ka gobane therešo ya Beibele e re ruta pono ya Modimo  ka batho gomme e re bontšha melao ya motheo yeo e swanetšego go laola tsela yeo re dirišanago ka yona. Ka tsebišo e bjalo, re na le motheo o tiilego wa go hlagolela lerato la go rata moagišani. Moapostola Paulo o itše: “Xomme se ke se kxopêlaxo ké xore leratô la lena le fêlê lè tlala lè e-⁠ya lè na le tsebô [e nepagetšego, NW] le temoxô ya ruri.” (Mongwalo o sekamego ke wa rena.)​—Ba-Filipi 1:⁠9.

E le go bontšha kamoo lerato le ka laolwago ka mo go swanetšego ke “tsebo e nepagetšego,” nagana ka therešo ya motheo yeo go boletšwego ka yona go Ditiro 10:​34, 35 e rego: “Modimo xa a bebe motho. Anthe dithšabeng ka moka ó kxahlwa ke ba ba mmoifaxo, xe ba dira tše di lokilexo.” Ge e ba Modimo a ahlola batho go ya ka mediro ya bona ya go loka le poifo ya go boifa Modimo, e sego ka setšhaba goba morafe, na rena ga se ra swanela go lebelela magagabo rena ka tsela e swanago ya go se bebe sefahlego?​—Ditiro 17:​26, 27; 1 Johane 4:​7-11, 20, 21.

Lerato​—Seenywa sa Moya wa Modimo

Go swana le ge pula yeo e nago ka nako e swanetšego serapeng sa dienywa e tlaleletša punong e botse, moya wa Modimo o ka tšweletša dika tšeo Beibele e di hlalosago e le “dienywa tša môya” bathong bao ba o amogelago. (Ba-Galatia 5:​22, 23) Sa bohlokwa gare ga dienywa tše ke lerato. (1 Ba-Korinthe 13:​13) Eupša re ka hwetša bjang moya wa Modimo? Tsela e bohlokwa ke ka thapelo. Ge e ba re rapelela moya wa Modimo, gona o tla re nea wona. (Luka 11:​9-13) Na o ‘tšwela pele’ o rapelela moya o mokgethwa? Ge e ba o dira bjalo, gona dienywa tša wona tše bohlokwa, go akaretša le lerato, di swanetše go bonagala ka mo go oketšegilego bophelong bja gago.

Lega go le bjalo, go na le mohuta o mongwe wa moya wo o šomago kgahlanong le moya wa Modimo. Beibele e o bitša “môya wa lefase.” (1 Ba-Korinthe 2:​12; Ba-Efeso 2:⁠2) Ke tutuetšo e mpe, gomme mothopo wa yona ga se o mongwe ge e se Sathane Diabolo, e lego “mmuši wa lefase” la batho bao ba ikarotšego go Modimo. (Johane 12:​31) Go etša phefo yeo e fehlago lerole le ditlakala, “môya wa lefase” o fehla dikganyogo tše kotsi tšeo di fedišago lerato e bile o kgotsofatša mafokodi a nama.​—Ba-Galatia 5:​19-⁠21.

Batho ba gamola moya woo o mobe ge ba rata dilo tše di bonagalago, kgopolo ya nna-pele, boemo bjo bošoro bja kgopolo le pono e sekamego le yeo gantši e kgopamišitšwego ya lerato yeo e tlwaelegilego kudu lefaseng. Ge e ba o nyaka go ba le lerato la kgonthe, o swanetše go ganetša moya wa lefase ka go tia. (Jakobo 4:⁠7) Lega go le bjalo, o se ke wa bota matla a gago ka noši, kgopela thušo go Jehofa. Moya wa gagwe​—e lego matla a magolo kudu legohleng​—o ka go matlafatša le go go atlegiša.​—Psalme 121:⁠2.

Ithuteng Lerato go Borwarre bja Bokriste

Go swana le ge bana ba ithuta go bontšha lerato ka go le bona ka gae, ka moka ga rena​—ba banyenyane le ba bagolo​—re ka ba le lerato ka go gwerana le Bakriste ba bangwe. (Johane 13:​34, 35) Ge e le gabotse, morero o mongwe o mogolo wa phuthego ya Bokriste ke go tšweletša tikologo yeo go yona batho ka o tee ka o tee ba ka  kgonago go ‘išana leratong le medirong e botse.’​—Ba-Hebere 10:⁠24.

Bao ba ka bago ba be ba “lapile, bà lahlexile” lefaseng le le re dikologilego leo le se nago lerato ba lebelela lerato le bjalo e le la bohlokwa kudu. (Mateo 9:​36) Phihlelo e bontšhitše gore ditswalano tše lerato bathong ba bagolo di ka thuša go fenya mafelelo a mantši a mabe a ge ba ile ba tingwa lerato bjaneng. Ka gona, ke ga bohlokwa gakaakang gore Bakriste bohle bao ba ineetšego ba bontšhe kamogelo ya kgonthe e tšwago pelong go ba bafsa bao ba thomago go kopanela le bona!

“Leratô xa le Fele Neng le Neng”

Beibele e bolela gore “leratô xa le fele neng le neng.” (1 Ba-Korinthe 13:⁠8) Seo se bjalo bjang? Moapostola Paulo o re botša gore: “Leratô xa le fêle pelo. Leratô ké le botho. Leratô xa le tsebe moná; xa le na xo ikxanthša, xa le ikxoxomoše. Xa le dire tša dihlong; xa le tsome xo ikhola; xa le hlohloletšexe; xa le loxe manô mabé.” (1 Ba-Korinthe 13:​4, 5) Go molaleng gore lerato le ga se selo sa go fo inaganelwa goba go fo tšeega maikwelo. Ka mo go fapanego​—bao ba le bontšhago ba a lemoga gotee le go amogela manyami le mahloko a bophelo, eupša ga ba a dumelele gore a fediše lerato la bona la go rata magagabo bona. Lerato le bjalo ka kgonthe ke “tlêmô ya botlalô.”​—Ba-Kolose 3:​12-⁠14.

Nagana ka mohlala wa ngwanenyana wa Mokriste wa nywaga e 17 wa Korea. Ge a be a thoma go hlankela Jehofa Modimo, lapa la gabo le ile la ganetšana le seo gomme a swanelwa ke go tloga gae. Lega go le bjalo, go e na le gore a galefe, o ile a rapela mabapi le taba ye, a dumelela Lentšu la Modimo le moya wa gagwe gore di hlahle tsela ya gagwe ya go nagana. Ka morago ga moo, o ile a ngwalela lapa la gabo nako le nako, a tlatša mangwalo a gagwe ka mantšu a nago le maikwelo a borutho a tšwago pelong ao a bego a e-⁠na le ona ka bona. Mafelelo e bile gore bo-mogolw’agwe ba babedi ba ile ba thoma go ithuta Beibele gomme ga bjale ke Bakriste ba ineetšego. Mmagwe le moratho wa gagwe le bona ba amogetše ditherešo tša Beibele. Mafelelong, tatagwe yo a bego a ganetša o šoro, o ile a fetola boemo bja gagwe bja kgopolo. Ngwanenyana wa Hlatse o ngwala gore: “Ka moka ga rena re ile ra nyalana le Bakriste-gotee le rena, gomme ga bjale palogare ya lapa lešo leo le kopanego borapeding ke 23.” A phenyo e kgolo gakaakang ya lerato!

Na o nyaka go hlagolela lerato la kgonthe le go thuša ba bangwe go dira se se swanago? Gona retologela go Jehofa, e lego Mothopo wa seka seo se bohlokwa. Ee, naganišiša ka Lentšu la gagwe, rapelela moya o mokgethwa gomme ka mehla o kopanele le barwarre ba Bokriste. (Jesaya 11:⁠9; Mateo 5:⁠5) Ke mo go ruthetšago pelo gakaakang go tseba gore go se go ye kae e mobe o tla be a fedišitšwe, gomme gwa šala feela bao ba bontšhago lerato la kgonthe la Bokriste! Ka kgonthe lerato ke senotlelo se išago lethabong le bophelong.​—Psalme 37:​10, 11; 1 Johane 3:⁠14.

[Caption on page 6]

Thapelo le go bala Lentšu la Modimo di tla re thuša go hlagolela lerato la kgonthe