Khomotšo Bakeng sa Bao ba Nyakago Thušo
Khomotšo Bakeng sa Bao ba Nyakago Thušo
BEIBELE ga se puku ya bophelo bjo bobotse bja tša monagano. Lega go le bjalo, e re nea khomotšo e bile e re thuša go thabela bophelo go sa šetšwe mathata ao re lebeletšanago le ona. Ka mo go kwagalago, Mangwalo a re: “Motho e a belexwexo ke mosadi, matšatši a xaxwe xa se a makae, ’me ó hoše tapišexo.” (Jobo 14:1) Tše dingwe tša diteko tša rena di bakwa ke go se phethagale ga rena ka noši. Eupša ge e le gabotse ke mang yoo a ikarabelago kudu ka go tlaišega ga batho?
Beibele e šupa motho yoo e le moya o kgopo wo o bitšwago Diabolo le Sathane. Ke “motimetši wa lefase ka moka la batho” le gona o baka bontši bja mathata ao a welago batho. Lega go le bjalo, Beibele e re botša gape gore nako ya gagwe e a fela. (Kutollo 12:9, 12) Kgaufsinyane mathata ka moka ao Sathane a a tlišeditšego badudi ba lefaseng a tla fedišwa ke go tsena ga Modimo ditaba gare. Go ya ka Beibele, lefase le lefsa leo le holofeditšwego la Modimo la go loka le tla fediša go hloka kholofelo le go nolega moko.—2 Petro 3:13.
Ke mo go homotšago gakaakang go tseba gore go tlaišega ga batho ke ga lebakanyana! Go hloka toka le go tlaišega di tla fela ka tlase ga pušo ya Mmušo wa Modimo wa legodimong diatleng tša Jesu Kriste. Mangwalo a bolela mabapi le Kgoši e hlomilwego ya Modimo gore: “Ó tlo hlakodiša modiitšana xe a lla, le mohlaki xe a hlôka monamodi. Ó tlo xauxêla mosenyi le mohloki; meôya ya bahumanexi ó tlo e phološa. Meôya ya bôná ó tlo e lokolla mohlakong, bošorong; ’me madi a bôná ó tlo a sema selô se bohlôkwa.”—Psalme 72:12-14.
Nako ya gore mantšu a a boporofeta a phethagale e kgaufsi kudu. Re tla thabela bophelo bjo bo sa felego lefaseng la paradeise ka tlase ga maemo a kgahlišago. (Luka 23:43; Johane 17:3) Go ba le tsebo ka dikholofetšo tše tše di homotšago tša Mangwalo go nea kholofelo le khomotšo go bao ba nyakago thušo.
Depressed girl: Photo ILO/J. Maillard
NA O TLA AMOGELA KETELO?
Gaešita le lefaseng le leo le dubegilego, o ka hwetša lethabo go tšwa tsebong e nepagetšego ya Beibele ka Modimo, Mmušo wa gagwe le morero wa gagwe o kgahlišago bakeng sa batho. Ge e ba o tla rata go amogela tsebišo e oketšegilego goba o tla rata gore motho yo mongwe a go etele legaeng la gago bakeng sa go tla go swara thuto e sa lefelelwego ya Beibele le wena, hle ngwala gomme o romele leina la gago le aterese ya mo o dulago gona go Jehovah’s Witnesses, Private Bag X2067, Krugersdorp, 1740, South Africa, goba o ngwalele atereseng e swanetšego ye e lokeleditšwego go letlakala 2.
www.watchtower.org