Lebaka Leo Ka Lona Re Ka Se Kgonego Go Ikemela

KGOŠI SALOMO wa Isiraeleng ya bogologolo o boletše gore: “Boló ké mola è le ba babedi, e sexo o tee; ké bôná ba tl’o xo boèlwa ké tše botse ka boitapišô. Xe ba ka wa ba tlo tsošana. Yo madi-mabe ké mo-wa-à-nnoši a hlôka motsoši.” (Mmoledi 4:​9, 10) Ka gona molemogi yo yo bohlale wa boitshwaro bja batho o gatelela senyakwa sa rena sa bogwera gotee le bohlokwa bja go se ipee lekatana. Lega go le bjalo, ye e be e se feela kgopolo ya motho. Polelo ya Salomo e be e e-⁠tšwa bohlaleng bja Modimo gomme e buduletšwe ke yena.

Go ipea lekatana ga se ga bohlale. Batho ba a nyakana. Ka moka ga rena re nyaka matla le thušo tšeo re ka kgonago go di hwetša bathong ba bangwe. Seema sa Beibele se re: “Mo-dula-thokô ó ile le boithatêlô; tše byôbana tšohle ó xanana natšô.” (Diema 18:⁠1) Ka gona ga se mo go makatšago gore bo-rathutamahlale ba tša leago ba kgothaletša batho gore e be karolo ya sehlopha le go bontšha kgahlego go ba bangwe.

Gare ga dikeletšo tša gagwe tša mabapi le go tsošološa bophelo bja setšhaba, Moprofesara Robert Putnam o bolela ka “go matlafatša tutuetšo ya tumelo ya go dumela go Modimo.” Dihlatse tša Jehofa di šoma gabotse tabeng ye ka gobane di thabela tšhireletšo yeo e lego ka diphuthegong tšeo di swanago le lapa go dikologa lefase. Ka go dumelelana le mantšu a moapostola Petro, ba “bontšha lerato bakeng sa mokgatlo ka moka wa barwarre,” bao ba nago le poifo ya tlhompho ya ‘go boifa Modimo.’ (1 Petro 2:​17, NW) Dihlatse gape di phema go ipea lekatana gotee le mafelelo a gona a mabe ka gobane mediro e mentši e agago yeo e tswalanago le borapedi bja therešo e di boloka di swaregile go thušeng baagišani ba tšona go ithuta therešo yeo e hwetšwago ka Lentšung la Modimo, Beibele.​—2 Timotheo 2:⁠15.

Lerato le Bogwera di Ile tša Fetola Maphelo a Bona

Dihlatse tša Jehofa di bopa setšhaba seo se kopanego seo go sona setho se sengwe le se sengwe se kgathago karolo ya bohlokwa. Ka mohlala nagana ka taba ya Miguel, Froylán le Alma Ruth, e lego ditho tše tharo tša lapa le tee la ma-Latin America. Ba belegwe ba e-⁠na le tšharakano ya marapo yeo e bakago mohuta o itšego wa bokgopana. Boraro bja bona ba sepela ka ditulo tša digole. Go kopanela le Dihlatse go ile gwa kgoma bjang maphelo a bona?

Miguel o itše: “Ke ile ka lebeletšana le dinako tša mathata, eupša ge ke be ke thoma go kopanela  le batho ba Jehofa, bophelo bja-ka bo ile bja fetoga. Go ipea lekatana go kotsi. Go kopanela le badumedi-gotee dibokeng tša Bokriste le go ba le bona bekeng e nngwe le e nngwe, go ile gwa nthuša kudu gore ke hwetše kgotsofalo.”

Alma Ruth o oketša ka gore: “Ke be ke fela ke e-⁠ba le dinako tša go gateletšega o šoro, gomme ke be ke ikwa ke nyamile kudu. Eupša ka morago ga gore ke ithute ka Jehofa, ke ile ka kwešiša gore nka kgona go ba le tswalano ya kgaufsi le yena. Seo e ile ya ba selo sa bohlokwa kudu go nna bophelong. Lapa la gešo le ile la re thekga kudu, gomme seo se ile sa re dira gore re be ba kopanego le go feta.”

Tatago Miguel ka lerato o ile a ruta Miguel go bala le go ngwala. Ke moka Miguel o ile a thuša Froylán le Alma Ruth go dira se se swanago. Se e be e le sa bohlokwa bakeng sa boemo bja bona bja moya. Alma Ruth o re: “Go ithuta go bala go ile gwa re thuša kudu ka gobane re ile ra kgona go fepega moyeng ka go bala Beibele le dikgatišo tše di theilwego Beibeleng.”

Ga bjale, Miguel o hlankela e le mogolo wa Mokriste. Froylán o badile Beibele a ba a e fetša ka makga a senyane. Alma Ruth o okeditše tirelo ya gagwe go Jehofa ka go hlankela e le modiredi wa mmulamadibogo goba mogoeledi wa nako e tletšego wa mmušo ga e sa le go tloga ka 1996. O re: “Ka tšhegofatšo ya Jehofa ke fihleletše pakane ye, ka ge ke e-⁠na le thekgo ya dikgaetšedi tša-ka tšeo di nthušago e sego feela ka go bolela eupša gape le go ruta ka go swara dithuto tša Beibele tše 11 tšeo ke ilego ka kgona go di thoma.”

Mohlala o mongwe o mobotse o beilwe ke Emelia, yoo a ilego a hwetša kotsi yeo e ilego ya dira gore a diriše setulo sa digole ka baka la dikgobalo tša gagwe maotong le lerapong la mokokotlo. Dihlatse tša Jehofa kua Mexico City di ile tša ithuta Beibele le yena, gomme o ile a kolobetšwa ka 1996. Emelia o re: “Pele ga ge ke tseba therešo, ke be ke nyaka go ipolaya; ke be ke se sa nyaka go phela. Ke ile ka ikwa ke nolegile moko kudu, ke lla mosegare le bošego. Eupša ge ke be ke kopanela le batho ba Jehofa, ke ile ka kgongwa ke lerato la borwarre. Kgahlego ya motho ka noši yeo ba mpontšhago yona e ile ya ba kgothatšo. Yo mongwe wa bagolo o be a le bjalo ka ngwanešo goba tate go nna. Yena gotee le bahlanka ba bangwe ba bodiredi ba nkiša dibokeng gotee le modirong wa boboledi ka setulo sa-ka sa digole.”

José, yoo a ilego a kolobetšwa gore e be yo mongwe wa Dihlatse tša Jehofa ka 1992, o dula a nnoši. O na le nywaga e 70, gomme o rotše modiro ka 1990. José o be a e-⁠ba le kgateletšego,  eupša ka morago ga gore Hlatse e bolele le yena, gatee-tee o ile a thoma go ya dibokeng tša Bokriste. O ile a rata seo a bego a se kwa le go se bona moo. Ka mohlala, o ile a hlokomela bogwera bja bana babo rena gomme a kgongwa ke go tshwenyega ga bona ka yena ka noši. Bagolo le bahlanka ba bodiredi phuthegong ya gagwe ga bjale ba a mo hlokomela. (Ba-Filipi 1:⁠1; 1 Petro 5:⁠2) Badumedi-gotee ba bjalo ke “khomotšo” go yena. (Ba-Kolose 4:​11, PK) Ba mo iša ngakeng, ba mo etela legaeng la gagwe gomme ba mo neile thekgo makgeng a mane a ge a be a buiwa. O re: “Ba bontšha go tshwenyega ka nna. E tloga e le bona lapa lešo. Ke thabela bogwera bja bona.”

Go Nea go Tliša Lethabo la Kgonthe

Ge Kgoši Salomo a be a bolela gore “boló ké mola è le ba babedi, e sexo o tee,” o be a sa tšwa go bolela ka go hloka mohola ga gore motho a neele matla a gagwe go hwetšeng mahumo a dilo tše di bonagalago. (Mmoledi 4:​7-⁠9) Seo ke se ba bantši ge e le gabotse ba se phegelelago ka phišego lehono, gaešita le ge se bolela go itima ditswalano le batho bobedi ka ntle le ka gare ga lapa.

Moya woo wa megabaru le boithati o dirile gore ba bantši ba ikarole. Se ga se sa ba tlišetša lethabo goba kgotsofalo bophelong, ka gobane go gakanega le go hloka kholofelo ke tšeo di tlwaelegilego gare ga bao ba ineelago moyeng o bjalo. Ka mo go fapanego, dipego tšeo di sa tšwago go bolelwa di bontšha mafelelo a mabotse a go kopanela le bao ba hlankelago Jehofa le bao ba tutuetšwago ke lerato la go mo rata le la go rata baagišani ba bona. Go ba gona ka mehla dibokeng tša Bokriste, thekgo le go tshwenyega ga Bakriste-gotee le go ba mafolofolo bodireding e be e le mabaka a bohlokwa go thušeng batho ba go fenya maikwelo a fošagetšego ao a tswalanago le go ipea lekatana.​—Diema 17:​17; Ba-Hebere 10:​24, 25.

Ka ge re ithekgile ka ba bangwe, ke ga tlhago gore go direla ba bangwe dilo go tšweletša kgotsofalo. Albert Einstein, yoo modiro wa gagwe o hotšego ba bangwe, o itše: “Bohlokwa bja motho . . . bo swanetše go bonwa go seo a se neago e sego go seo a ka se amogelago.” Se se dumelelana le mantšu a a Morena wa rena Jesu Kriste a rego: “Lešexo la monei le phala la monewa.” (Ditiro 20:​35) Ka gona, gaešita le ge e le mo go botse go amogela lerato, ke mo go swanetšego kudu go bontšha lerato go ba bangwe.

Molebeledi wa mosepedi yoo ka nywaga e mentši a ilego a etela diphuthego bakeng sa go nea thušo ya moya le yoo a ilego a thuša go aga mafelo a diboka bakeng sa Bakriste bao ba diilago o bolela maikwelo a gagwe ka tsela ye: “Lethabo la go hlankela bana bešo le go bona difahlego tša bona di tletše tebogo le ntšhušumeletša gore ke tšwele pele ke nyaka dibaka tša go thuša. Phihlelo ya-ka e bile gore go bontšha kgahlego ya motho ka noši go ba bangwe ke senotlelo se išago lethabong. Le gona ke a tseba gore re le bagolo, re swanetše go ba ‘bjalo ka tšhireletšo phefong . . . , bjalo ka noka ya meetse nageng e omilego, le bjalo ka moriti wa lefsika le legolo nageng e nyorilwego.’”​—Jesaya 32:​2, PK.

Ke mo go Thabišago Gakaakang go Dula Gotee ka Kwano!

Ka ntle le pelaelo go thuša ba bangwe le go nyaka bogwera le bao ba hlankelago Jehofa go na le mohola o mogolo le lethabo la kgonthe. Mopsalme o ile a bolela gore: “A botse le thatêxô!  xe bana ba motho bà dula ba kwana!” (Psalme 133:⁠1) Kwano ya lapa ke ya bohlokwa tabeng ya go thekgana, bjalo ka ge go bontšhitšwe tabeng ya Miguel, Froylán le Alma Ruth. Le gona ke tšhegofatšo e kgolo gakaakang go ba ba kopanego borapeding bja therešo! Ka morago ga go nea keletšo go banna le basadi ba Bakriste bao ba nyalanego, moapostola Petro o ngwadile gore: “Ké moka, bang ba kxopolô e tee ka moka xa lena, Le kwêlanê bohloko, Le ratanê le bana ba bô-lêna, Le bê ba bonôlô le ba botho.”​—1 Petro 3:⁠8.

Bogwera bja kgonthe bo tliša mehola e megolo, bobedi maikwelong le moyeng. Ge a bolela le bao e lego bagwera tumelong, moapostola Paulo o kgothatša ka gore: “Le tsošê ba dipelo tše di tapilexo; Le thekxetšê bafokodi; Le se kê la fêlêla motho pelo. . . . ka mehla Le ôtêlêlê xo dirana xabotse le xo dira bohle xa-botse.”​—1 Ba-Thesalonika 5:​14, 15.

Ka gona, nyaka ditsela tšeo di šomago tša go dira ba bangwe gabotse. “A re direng botse; re bo direlê batho bohle, xa-xolo re bo dirêlê batho ba-bô-rena ba tumêlô,” ka gobane se se tla tlaleletša morerong wa kgonthe wa bophelo bja gago gotee le go tlaleletša kgotsofalong ya gago. (Ba-Galatia 6:​9, 10) Jakobo yo e lego moapostola wa Jesu o ngwadile gore: “Xe ngwan’eno, le xe e le kxaetšedi, e ka ba ó hlobotše, a hlôka dijô tša mohla woo, ’me e mongwê wa lena xe a ka tla a re: Sepelang ka khutšô, Le y’o apara, Le y’o hora! ’me la lesa xo ba fa se se hlôkwaxo ke mebele ya bôná, xo ka be xo ba hola’ng?” (Jakobo 2:​15, 16) Karabo ya potšišo yeo e molaleng. Re swanetše go ‘šetša, e sego feela tša go ikhola, eupša gape le tša go hola ba bangwe.’​—Ba-Filipi 2:⁠4.

Go oketša go thušeng ba bangwe ka dilo tše di bonagalago ge go e-⁠na le senyakwa se se kgethegilego goba ge kotsi e tšwelela, Dihlatse tša Jehofa di swaregile ka go hola magagabo bona ka tsela ya bohlokwa kudu​—ka go bolela ditaba tše dibotse tša Mmušo wa Modimo. (Mateo 24:​14) Go tšea karolo ga Dihlatse tša ka godimo ga 6 000 000 go tsebatšeng molaetša wo wa kholofelo le khomotšo go hlatsela kgahlego ya bona ya kgonthe e lerato ya go kgahlegela ba bangwe. Eupša go nea thušo e tšwago Mangwalong a Makgethwa le gona go thuša go fihlelela senyakwa se sengwe sa batho. Ke sefe seo?

Go Kgotsofatša Senyakwa sa Bohlokwa

E le gore re thabele lethabo la kgonthe, re swanetše go ba le tswalano e swanetšego le Modimo. Go boletšwe gore: “Taba ya gore motho, gohle ka dinako tšohle, go tloga mathomong go fihla ga bjale, o bile le kganyogo ya go bolela le selo seo a bego a nagana gore se phagame le gore se na le matla a magolo kudu go feta a gagwe, e bontšha gore bodumedi ke bja tlhago le gore bo swanetše go amogelwa go ya ka thutamahlale. . . . Re swanetše go ba le poifo, go makala le tlhompho ge re bona batho lefaseng ka moka ba tsoma gotee le go dumela go motho yo a phagamego.”​—Man Does Not Stand Alone, ka A. Cressy Morrison.

Jesu Kriste o itše: “Ba lehlôxônôlô ké ba ba humanexilexo mo moyeng.” (Mateo 5:⁠3) Batho ga ba phele gabotse ge ba ikarotše ka nako e telele bathong ba bangwe. Lega go le bjalo, go ikarola go Mmopi wa rena go kotsi le go feta. (Kutollo 4:​11) Go hwetša le go diriša ‘tsebo ya Modimo’ e swanetše go ba karolo ya bohlokwa maphelong a rena. (Diema 2:​1-⁠5) Ka kgonthe, re swanetše go ikemišetša go kgotsofatša senyakwa sa rena sa moya, ka gobane re ka se kgone go ikemela ka ntle le Modimo. Bophelo bja lethabo le bjo bo putsago e le ka kgonthe bo ithekgile ka tswalano e botse le Jehofa, “Yo-xodimodimo Kukama-lefase.”​—Psalme 83:⁠18.

[Caption on page 4]

“Boló ké mola è le ba babedi, e sexo o tee . . . Xe ba ka wa ba tlo tsošana.”​—Kgoši Salomo

[Caption on page 5]

Miguel: “Ke ile ka lebeletšana le dinako tša mathata, eupša ge ke be ke thoma go kopanela le batho ba Jehofa, bophelo bja-ka bo ile bja fetoga”

[Caption on page 5]

Alma Ruth: “Ka morago ga gore ke ithute ka Jehofa, ke ile ka kwešiša gore nka kgona go ba le tswalano ya kgaufsi le yena”

[Caption on page 6]

Emelia: “Pele ga ge ke tseba therešo, . . . Ke ile ka ikwa ke nolegile moko kudu”

[Caption on page 7]

Go kopanela le barapedi ba therešo go thuša go kgotsofatša senyakwa sa rena sa moya