“Batho ba Babedi ba Ile ba Kokota Mojakong wa Rena”

“GO ŠETŠE go fetile nywaga e mebedi ka morago ga go lebeletšana le manyami a tseneletšego a go lahlegelwa ke mosetsanyana wa rena.” Ke kamoo go thomago lengwalo leo le gatišitšwego ka kuranteng ya Le Progrès, yeo e gatišitšwego kua Saint-Étienne, Fora.

“Mélissa o be a e-⁠na le dikgwedi tše tharo gomme o be a tlaišwa ke tšharakano e šoro e bitšwago trisomy 18. Le ka mohla ga o homotšege ka mo go feletšego masetlapelong a bjalo ao a bonagalago e le a magolo kudu. Gaešita le ge re godišeditšwe tumelong ya Katholika, re be re tshwenywa ke kgopolo ya gore, ‘Modimo, ge e ba o le gona, ke ka baka la’ng o dumelela dilo tše bjalo di direga?’” Go molaleng gore mma yo a ngwadilego lengwalo leo o be a gateletšegile e bile a itlhobogile. Lengwalo la gagwe le tšwela pele ka gore:

“Kapejana ka morago ga ditiragalo tše, batho ba babedi ba ile ba kokota mojakong wa rena. Gatee-tee ke ile ka lemoga gore ke Dihlatse tša Jehofa. Ke be ke ikemišeditše go ba raka ka botho, eupša ke ile ka lemoga poroutšha yeo ba bego ba e sepediša. E be e le mabapi le lebaka leo ka lona Modimo a dumelelago tlaišego. Ka gona ke ile ka phetha ka gore ke ba dumelele go tsena eupša ka maikemišetšo a go ganetša dipolelo tša bona. Ke ile ka nagana gore ge e le mabapi le tlaišego, lapa la-ka ka kgonthe le tlaišegile go feta tekanyo le gore re šetše re kwele dipolelo tše dintši tšeo di sa kwagalego tše swanago le ‘Modimo o be a re neile yena, gomme Modimo o mo tšere.’ Dihlatse di ile tša dula lebaka la ka godingwana ga iri. Ba ile ba ntheetša ka kwelobohloko e kgolo, gomme ge ba be ba sepela, ke ile ka ikwa ke le kaone kudu moo ke ilego ka ba ka dumela gore ba etele gape. Seo se diregile nywageng e mebedi e fetilego. Ga se ka tšwa ke e-⁠ba yo mongwe wa Dihlatse tša Jehofa, eupša ke thomile go ithuta Beibele le tšona, gomme ke ba gona dibokeng tša tšona gantši kamoo nka kgonago ka gona.”

NA O TLA AMOGELA KETELO?

Gaešita le lefaseng le leo le dubegilego, o ka hwetša lethabo go tšwa tsebong e nepagetšego ya Beibele ka Modimo, Mmušo wa gagwe le morero wa gagwe o kgahlišago bakeng sa batho. Ge e ba o tla rata go amogela tsebišo e oketšegilego goba o tla rata gore motho yo mongwe a go etele legaeng la gago bakeng sa go tla go swara thuto e sa lefelelwego ya Beibele le wena, hle ngwala gomme o romele leina la gago le aterese ya mo o dulago gona go Jehovah’s Witnesses, Private Bag X2067, Krugersdorp, 1740, South Africa, goba o ngwalele atereseng e swanetšego ye e lokeleditšwego go letlakala 2.

www.watchtower.org