Dipotšišo tše Tšwago go Babadi

Jehofa o ile a dumelela segadikane gare ga bahlanka ba gagwe ba bogologolo e lego ba-Isiraele, eupša gona bjale ga a sa se dumelela. Na ditekanyetšo tša gagwe di a feto-fetoga?

Jehofa ga se a fetoša pono ya gagwe ka segadikane. (Psalme 19:⁠7; Maleaki 3:⁠6, NW) E be e se karolo ya tokišetšo ya gagwe bakeng sa batho le go tloga mathomong, gomme ga se yona le gona bjale. Ge a be a bopa Efa gore e be mosadi wa Adama, Jehofa o ile a bolela gore tekanyetšo ya Modimo e be e le gore monna a be le mosadi o tee. “Ka baka leo monna ó tlo tloxêla tata’xwê le mma’xwê, a xomarêla mosadi wa xaxwe; xomme ba tlo ba nama e tee.”​—Genesi 2:⁠24.

Ge Jesu Kriste a be a le mo lefaseng, o ile a boeletša boemo bjo ge a be a araba bao ba bego ba botšišitše mabapi le tlhalo le go nyala gape. O itše: “A xa la ka la bala xore, E a ba dirilexo mathomong, ó ba dirile monna le mosadi? A re: Ka ’baka leo monna ó tlo tloxêla tat’axwe le mm’axwe a xomarêla mosadi wa xaxwe; ’me ba babedi bao a re ba tlo ba nama e tee.” Jesu o okeditše ka gore: “Motho e a hlalaxo mosadi wa xaxwe, xe e se ka ’baka la bootswa, ’me a tšea e mongwê, ó dira bootswa; le e a tšeaxo mohlalwa ó dira bootswa.” (Mateo 19:​4-6, 9) Go tšwa go se go molaleng gore go nyala mosadi yo mongwe goba basadi ba oketšegilego le gona ke bohlotlolo.

Ka gona ke ka baka la’ng segadikane se be se dumeletšwe mehleng ya bogologolo? Dula o gopola gore Jehofa ga se a hlama mokgwa wo. Motho wa mathomo yoo a bego a e-⁠na le basadi ba fetago o tee yo go boletšwego ka yena ka Beibeleng e be e le Lamege, setlogolwana sa Kaine. (Genesi 4:​19-24) Ge Jehofa a be a tliša Meetse-fula a mehleng ya Noage, yo mongwe le yo mongwe wa barwa ba Noage o be a nyetše mosadi o tee, go akaretša le Noage ka noši. Batho ka moka bao ba bego ba nyetše segadikane ba ile ba fedišwa Meetse-fuleng.

Nywaga-kgolo ka morago ge Jehofa a be a kgetha ba-Isiraele go ba batho ba gagwe, segadikane se be se šetše se le gona gare ga bona, gaešita le ge go be go bonagala go be go tlwaelegile kudu go ba le mosadi yo a fetago o tee. Modimo ga se a ka a nyaka gore malapa ao a bego a e-⁠na le mosadi yo a fetago o tee a arogane. Go e-⁠na le moo, o ile a laola mokgwa wo ka go tia.​—Ekisodo 21:​10, 11; Doiteronomio 21:​15-⁠17.

Go bontšha gore go kgotlelela segadikane e be e fo ba ga nakwana ga go bonwe feela ka seo Jesu a se boletšego mabapi le tekanyetšo ya Jehofa ya mathomong ka lenyalo eupša go bonwa gape le ka seo moapostola Paulo a se ngwadilego ka tlase ga pudulelo ya moya o mokgethwa wa Modimo. O itše: “E mongwê le e mongwê a bê le mosadi wa xaxwe; mosadi e mongwê le e mongwê a bê le monna wa xaxwe.” (1 Ba-Korinthe 7:⁠2) Le gona Paulo o ile a budulelwa go ngwala gore monna le ge e le mang yo a kgethwago go ba molebeledi goba mohlanka wa bodiredi ka phuthegong ya Bokriste o swanetše go ba “monna wa mosadi o tee.”​—1 Timotheo 3:​2, 12; Tito 1:⁠6.

Ka gona, go kgotlelela ga Jehofa segadikane go fedile ge go be go hlongwa phuthego ya Bokriste nywageng e ka bago 2 000 e fetilego. Ka nako yeo, tekanyetšo ya lenyalo e ile ya boela moo e bego e le gona mathomong a go bopa ga Modimo monna le mosadi: monna yo mongwe le yo mongwe o swanetše go ba le mosadi o tee. Ke tekanyetšo yeo e lego gona gare ga batho ba Modimo lefaseng ka bophara lehono.​—Mareka 10:​11, 12; 1 Ba-Korinthe 6:​9, 10.