Go Ekiša Modimo wa Therešo
Go Ekiša Modimo wa Therešo
“Bang baetši ba Modimo byalo ka bana ba ba ratêxaxo.”—Ba-Efeso 5:1.
1. Ke’ng seo ba bangwe ba se dumelago mabapi le therešo, gomme ke ka baka la’ng kgopolo ya bona e fošagetše?
“THEREŠÔ ké eng?” (Johane 18:38) Potšišo ye yeo e botšišitšwego ke Pontio Pilato ka lenyatšo mo e nyakilego go ba nywaga e 2 000 e fetilego, e bontšha gore ga go bonolo go kwešiša therešo. Ba bantši lehono ba tla dumelelana le se. Tsela yeo therešo e lego ka yona e ka tlase ga tlhaselo. O ka ba o kwele go bolelwa gore motho yo mongwe le yo mongwe o itirela therešo ya gagwe, goba gore therešo ga se ya kgonthe goba gore therešo ke yeo e fetogago ka mehla. Kgopolo e bjalo e fošagetše. Pakane e kgolo ya nyakišišo le thuto ke go ithuta ditaba ka botlalo, therešo mabapi le lefase leo re phelago go lona. Therešo ga se taba ya kgopolo ya motho ka noši. Ka mohlala, moya wa motho o a hwa goba ga o hwe. Sathane o gona goba ga a gona. Go na le morero bophelong goba ga o gona. Tabeng e nngwe le e nngwe, go na le karabo e tee feela yeo e nepagetšego. E nngwe ke therešo gomme e nngwe ke maaka; e ka se be therešo ka bobedi ga tšona.
2. Ke ka ditsela dife Jehofa e lego Modimo wa therešo, gomme ke dipotšišo dife tšeo ga bjale di tlago go ahla-ahlwa?
2 Sehlogong se se fetilego, re ahla-ahlile gore Jehofa ke Modimo wa therešo. O tseba therešo dilong ka moka. Ka mo go fapanego kudu le lenaba la gagwe la mofori e lego Sathane Diabolo, ka mehla Jehofa o a rereša. Go oketša moo, Jehofa o utollela ba bangwe therešo ka bolokologi. Moapostola Paulo o ile a kgothaletša Bakriste-gotee le yena gore: “Bang baetši ba Modimo byalo ka bana ba ba ratêxaxo.” (Ba-Efeso 5:1) Ka ge re le Dihlatse tša Jehofa, re ka mo ekiša bjang ka go bolela le ka go phela ka go dumelelana le therešo? Ke ka baka la’ng go le bohlokwa go dira bjalo? Le gona re na le kgonthišetšo efe ya gore Jehofa o amogela bao ba sepelago ka tsela ya go rereša? Anke re boneng.
3, 4. Moapostola Paulo le moapostola Petro ba ile ba hlalosa bjang seo se bego se tla direga “mehleng ya bofêlô”?
3 Re phela mehleng yeo go yona maaka a bodumedi a atilego. Bjalo ka ge moapostola Paulo a ile a bolela e sa le pele ka tlase ga pudulelo ya Modimo, batho ba bantši mo ‘mehleng ye ya bofelo’ ba na le sebopego sa boineelo go Modimo eupša matla a bjona ga ba a dumele. Ba bangwe ba gana therešo, e ba bao ba “senyexilexo kxopolô.” Go oketša moo, “batho ba babe le baaroši, bobe bya bôná bo . . . xola bò e-ya, bà fora ba bangwê, le bôná bà forwa.” Gaešita le ge batho ba bjalo ba phela ba ithuta, le ka mohla ga ba fihlelele “tsebô ya therešô.”—2 Timotheo 3:1, 5, 7, 8, 13.
4 Moapostola Petro le yena o ile a budulelwa go ngwala mabapi le mehla ya bofelo. Bjalo ka ge a ile a porofeta, batho ga ba gane therešo feela eupša ba bile ba kwera Lentšu la Modimo gotee le bao ba tsebatšago therešo ya lona. “Go ya ka kganyogo ya bona,” bakweri ba bjalo ba hlokomologa taba ya gore lefase la mehleng ya Noage le ile la apešwa ka meetse, e le mohlala wa letšatši la nakong e tlago la kahlolo. Kganyogo ya bona e tla bolela kotsi go bona ge nako ya Modimo ya go fediša bao ba sa boifego Modimo e fihla.—2 Petro 3:3-7, NW.
Bahlanka ba Jehofa ba Tseba Therešo
5. Go ya ka moporofeta Daniele, ke’ng seo se bego se tla direga ‘lebakeng la bofelo,’ gomme boporofeta bjo bo phethagaditšwe bjang?
5 Ge a be a hlalosa ka “lebaka la bofêlô,” moporofeta Daniele o ile a bolela e sa le pele ka koketšego e fapanego kudu gare ga batho ba Modimo—tsošološo ya therešo ya bodumedi. O ngwadile gore: “E tlo latišišwa ke ba bantši, ’me xwa ata yôna tsebô.” (Daniele 12:4) Batho ba Jehofa ga se ba gakantšhwa goba go foufatšwa ke Mofori yo mogolo. Ka go lebelela ka Beibeleng, ba hweditše tsebo ya therešo. Jesu o ile a hlabišetša barutiwa ba gagwe seetša lekgolong la pele la nywaga. O ile a “ba bulêla tsebô, xore ba kwešišê mangwalô.” (Luka 24:45) Jehofa o dirile ka mo go swanago mo mehleng ya rena. Ka Lentšu la gagwe, moya wa gagwe le ka mokgatlo wa gagwe, o dirile gore ba dimilione lefaseng ka bophara ba kwešiše seo a šetšego a se tseba—therešo.
6. Batho ba Modimo lehono ba kwešiša ditherešo dife tša Beibele?
6 Ka ge re le batho ba Modimo, re kwešiša dilo tše dintši tšeo nkabego re se ra di tseba. Re tseba dikarabo tša dipotšišo tšeo batho bao ba lego bohlale ka tsela ya lefase ba katanego le tšona ka nywaga-kete. Ka mohlala, re tseba lebaka leo ka lona tlaišego e lego gona, lebaka leo ka lona batho ba hwago le lebaka leo ka lona batho ba ka se kgonego go fihlelela khutšo le botee bja lefaseng ka bophara. Le gona re šegofaditšwe ka pono ya seo bokamoso bo se huperego—Mmušo wa Modimo, lefase la paradeise le bophelo bjo bo sa felego re phethagetše. Re tseba Jehofa, Yo a Phagamego. Re ithutile ka semelo sa gagwe seo se gogelago gotee le seo re swanetšego go se dira e le gore re thabele ditšhegofatšo tša gagwe. Go tseba therešo go dira gore re kgone go lemoga maaka. Go tseba therešo go re šireletša medirong yeo e se nago mohola, go re dira gore re hwetše se se kaone bophelong gomme go re nea kholofelo e kgahlišago ka bokamoso.
7. Ditherešo tša Beibele di hwetšagala go bomang, gomme ke go bomang moo di sa hwetšagalego?
7 Na o kwešiša therešo ya Beibele? Ge e ba go le bjalo, o šegofaditšwe ka mo go humilego. Ge mongwadi a ngwala puku, gantši o e hlama gore e ipiletše sehlopheng se itšego sa batho. Dipuku tše dingwe di ngwaletšwe batho bao ba rutegilego kudu, tše dingwe di ngwaletšwe bana gomme tše dingwe di ngwaletšwe bao ba lego mešomong e kgethegilego. Gaešita le ge Beibele e hwetšagala gabonolo go bohle, e diretšwe gore e kwešišwe le go thabelwa ke sehlopha se itšego sa batho. Jehofa o e hlametše baikokobetši, batho ba boleta ba mo lefaseng. Batho ba bjalo ba ka kwešiša seo se bolelwago ke Beibele, go sa šetšwe thuto, setšo, maemo goba morafo wa bona. (1 Timotheo 2:3, 4) Ka lehlakoreng le lengwe, go kwešiša therešo ya Beibele ga se gwa newa bao ba se nago tshekamelo e botse, go sa šetšwe gore ba bohlale goba ba rutegile gakaakang. Baikgantši le baikgogomoši ba ka se kgone go kwešiša ditherešo tša Lentšu la Modimo. (Mateo 13:11-15; Luka 10:21; Ditiro 13:48) Ke Modimo feela yo a ka tšweletšago puku e bjalo.
Bahlanka ba Jehofa ba a Rereša
8. Ke ka baka la’ng Jesu e be e le mothofatšo wa therešo?
8 Ka go swana le Jehofa, Dihlatse tša gagwe tšeo di botegago di a rereša. Jesu Kriste e lego Hlatse e kgolo ya Jehofa, o ile a kgonthišetša therešo ka dilo tšeo a bego a di ruta le ka tsela yeo a phetšego le go hwa ka yona. O ile a thekga therešo ya lentšu la Jehofa le dikholofetšo tša gagwe. Ka baka leo, Jesu e be e le mothofatšo wa therešo, bjalo ka ge yena ka noši a boletše.—Johane 14:6; Kutollo 3:14; 19:10.
9. Mangwalo a re’ng mabapi le go bolela therešo?
9 Jesu e be e le “Mo-tlala-kxauxêlô-le-therešô” gomme go be “xò se bofora molomong wa xaxwe.” (Johane 1:14; Jesaya 53:9) Bakriste ba therešo ba latela mohlala woo Jesu a o beilego ka go botša ba bangwe therešo. Paulo o ile a eletša badumedi-gotee le yena ka gore: “Xe Le boledišana Le bolêlê therešô, xobane re dithô seng sa rena.” (Ba-Efeso 4:25) Pejana, moporofeta Sakaria o ngwadile gore: “Botšanang therešô.” (Sakaria 8:16) Bakriste ba a rereša ka gobane ba nyaka go kgahliša Modimo. Jehofa o a rereša gomme o tseba kotsi yeo e tlišwago ke maaka. Ka gona, o letetše ka mo go swanetšego gore bahlanka ba gagwe ba bolele therešo.
10. Ke ka baka la’ng batho ba bolela maaka, gomme ka mafelelo afe a kotsi?
10 Go ba bantši, go bolela maaka go ka bonagala e le tsela e loketšego ya go hwetša mehola e itšego. Batho ba bolela maaka e le gore ba se ke ba otlwa, gore ba holege ka tsela e itšego goba gore ba tumišwe ke ba bangwe. Lega go le bjalo, go bolela maaka ke mokgwa o mobe. Go oketša moo, motho yo a bolelago maaka a ka se amogelwe ke Modimo. (Kutollo 21:8, 27; 22:15) Ge re tsebja ka gore re a rereša, ba bangwe ba dumela seo re se bolelago; ba a re bota. Lega go le bjalo, ge e ba re ka hwetšwa re bolela maaka gatee, ba bangwe ba ka belaela go rereša ga selo le ge e le sefe seo re se bolelago nakong e tlago. Seema sa se-Afrika se re: “Maaka a manyenyane a senya therešo ka moka.” Seema se sengwe se re: “Motho wa go phela ka maaka re ka se ke ra mo kgolwa, gaešita le ge a bolela therešo.”
11. Ke ka tsela efe go rereša go sa šupego feela go fo bolela therešo?
11 Go rereša go šupa go feta feela go fo bolela therešo. Ke tsela ya bophelo. E hlalosa gore re bomang. Re dira gore therešo e tsebje bathong e sego feela ka seo re se bolelago eupša gape le ka seo re se dirago. Moapostola Paulo o botšišitše gore: “Byale wene, O rutaxo ba bangwê, O re’ng Ò sa ithute? O iletša xo utswa, wa tla wa utswa. O iletša xo otswa, wa tla wa otswa.” (Ba-Roma 2:21, 22) Ge e ba re tla botša ba bangwe therešo, re swanetše go rereša ditseleng tša rena ka moka. Botumo bja rena bja go rereša le go botega bo tla ba le mafelelo a matla mabapi le kamoo batho ba arabelago ka gona go seo re se rutago.
12, 13. Ke’ng seo mofsa yo mongwe a ilego a se ngwala mabapi le go botega, gomme lebaka la tekanyetšo ya gagwe e phagamego e be e le lefe?
12 Bafsa bao ba lego gare ga bahlanka ba Jehofa le bona ba kwešiša bohlokwa bja go rereša. Jenny yoo ka nako yeo a bego a e-na le nywaga e 13, o ile a ngwala taodišong ya gagwe ya sekolong gore: “Go botega ke selo seo ke se tšeelago godimo kudu. Ka bomadimabe, ga se batho ba bantši bao ba botegago e le ka kgonthe lehono. Ke ikholofetša gore ke tla dula ke botega bophelong bja-ka. Le gona ke tla botega gaešita le ge go bolela therešo go ka se nkhole goba go hola bagwera ba-ka ka yona nako yeo. Ke kgonthišetša gore bagwera ba-ka ke bao ba bolelago therešo gomme ke batho bao ba botegago.”
13 Ge a be a bolela ka taodišo ye, morutiši wa Jenny o itše: “O yo monyenyane kudu gore o ka ba o hlagoletše tekanyetšo e bjalo e matla ya boitshwaro le ya go loka. Ke a tseba gore o tla kgomarela tekanyetšo ya gago ka gobane o na le seka se matla.” Ke’ng seo se bego se ikarabela ka matla a boitshwaro a ngwanenyana yo wa sekolo? Mathomong a taodišo ya gagwe, Jenny o boletše gore bodumedi bja gagwe “bo mmeela ditekanyetšo tša bophelo.” Go šetše go fetile nywaga e šupago ga e sa le Jenny a ngwadile taodišo yeo. Bjalo ka ge morutiši wa gagwe a ile a bolela e sa le pele, Jenny o tšwela pele go bontšha tekanyetšo e phagamego ya boitshwaro bophelong bja gagwe e le yo mongwe wa Dihlatse tša Jehofa.
Bahlanka ba Jehofa ba Utolla Therešo
14. Ke ka baka la’ng bahlanka ba Modimo ba e-na le boikarabelo bjo bogolo ka mo go kgethegilego bja go kgomarela therešo?
14 Go ba gona, ba bangwe ka ntle le Dihlatse tša Jehofa ba ka bolela therešo gomme ba leka go botega. Lega go le bjalo, ka ge re le bahlanka ba Modimo, re na le boikarabelo bjo bogolo ka mo go kgethegilego bja go kgomarela seo e lego therešo. Re neilwe ditherešo tša Beibele—ditherešo tšeo di ka lebišago motho bophelong bjo bo sa felego. Le gona, re na le boikarabelo bja go abelana therešo yeo le ba bangwe. Jesu o itše: “E a filwego tše ntši, go yena go tlo tsongwa tše ntši.” (Luka 12:48, PK) Ka ntle le pelaelo ‘go nyakega mo gontši’ go bao ba šegofaditšwego ka tsebo ya bohlokwa ya go tseba Modimo.
15. O hwetša lethabo lefe ka go abelana le ba bangwe therešo ya Beibele?
15 Go abela ba bangwe therešo ya Beibele go tliša lethabo. Ka go swana le barutiwa ba Jesu ba lekgolong la pele la nywaga, re tsebatša ditaba tše dibotse—molaetša o ruthetšago pelo wa kholofelo—go bao “ba lapile[go], bà lahlexile wa dinku tše di se naxo modiši” le go bao ba foufaditšwego le go gakantšhwa ke “dithutô tša meôya e mebe.” (Mateo 9:36; 1 Timotheo 4:1) Moapostola Johane o ngwadile gore: “Nna xa ke na lethabô le le fetaxo leo la xe ke e-kwa xore bana ba-ka ba swere tsela ya therešô.” (3 Johane 4) Go botega ga “bana” ba Johane—mohlomongwe bao a ba tsebišitšego therešo—go mo tlišeditše lethabo le legolo. Go a re thabiša ge re bona batho ba arabela Lentšung la Modimo ka tebogo.
16, 17. (a) Ke ka baka la’ng therešo e sa amogelwe ke batho ka moka? (b) Ke lethabo lefe leo o ka bago le lona ge o dutše o tsebatša therešo ya Beibele?
16 Ke mo go kgonthišeditšwego gore ga se batho ka moka bao ba tlago go amogela therešo. Jesu o ile a bolela therešo ka Modimo, gaešita le ge go dira bjalo go be go sa ratege. O ile a botša baganetši ba ba-Juda gore: “Xomme xe ke bolêla therešô, Lè sa ntumele Le dirwa ke’ng? Mo-tšwa-Modimong ó kwa Lentšu la Modimo. Xe lena Le sa kwe, ké ka xobane Lè sa tšwe Modimong.”—Johane 8:46, 47.
17 Ka go swana le Jesu, ga re dika-dike go botša ba bangwe therešo ya bohlokwa mabapi le Jehofa. Ga se ra letela gore batho ka moka ba amogele seo re ba botšago sona, ka gobane ga se ka moka bao ba ilego ba amogela seo Jesu a se boletšego. Lega go le bjalo, re thabišwa ke go tseba gore re dira seo se nepagetšego. Jehofa ka botho bja gagwe bjo lerato o nyaka gore therešo e utollelwe batho. Ka ge ba e-na le therešo, Bakriste ba fetoga barwadi ba seetša lefaseng leo le lego lefsifsing. Ka go dira gore seetša sa therešo se bonege ka mantšu le ka ditiro tša rena, re ka thuša ba bangwe go nea Tatago rena wa legodimong letago. (Mateo 5:14, 16) Re tsebatša phatlalatša gore re gana pono ya Sathane e fošagetšego ka therešo gomme re kgomarela Lentšu la Modimo leo le sekilego le leo le sa tswakwago. Therešo yeo re e tsebago le yeo re e abago e ka tliša tokologo ya kgonthe go bao ba e amogelago.—Johane 8:32.
Phegelelang Tsela ya go Rereša
18. Ke ka baka la’ng le gona ke bjang Jesu a ilego a gaugela Nathanaele?
18 Jesu o be a rata therešo le go e bolela. Nakong ya bodiredi bja gagwe mo lefaseng, o ile a gaugela bao ba bego ba rereša. Jesu o boletše mabapi le Nathanaele gore: “Šó Mo-Isiraele wa makxonthe, a se naxo bomenetša.” (Johane 1:47) Ka morago ga moo, Nathanaele yoo gape a bego a bitšwa ka gore ke Baratolomeo, o ile a kgethwa go ba yo mongwe wa baapostola ba 12. (Mateo 10:2-4) A tokelo e kaakang!
19-21. Ke bjang monna yo e kilego ya ba sefofu a ilego a šegofatšwa ka baka la go bolela ga gagwe therešo ka sebete?
19 Kgaolo ka moka ka pukung ya Beibele ya Johane e anega pego ya monna yo mongwe yo a botegago yo a ilego a šegofatšwa ke Jesu. Ga re tsebe leina la gagwe. Seo re se tsebago ke gore e be e le mokgopedi yo a bego a belegwe e le sefofu. Batho ba ile ba makala ge Jesu a be a mo foufolla. Ditaba tša phodišo ye ya mohlolo di ile tša fihla ditsebeng tša ba bangwe ba Bafarisei, bahloi ba therešo bao ba bego ba kwane ka gore motho yo mongwe le yo mongwe yo a bontšhago tumelo go Jesu o be a swanetše go rakwa sinagogeng. Ka go tseba leano la bona, batswadi bao ba boifago ba monna yo e kilego ya ba sefofu ba ile ba botša Bafarisei maaka, ba bolela gore ga ba tsebe gore go tlile bjang gore morwa wa bona a bone goba ga ba tsebe gore ke mang a dirilego seo.—Johane 9:1-23.
20 Monna yo a fodišitšwego o ile a biletšwa gape pele ga Bafarisei. A se na taba le ditla-morago le ge e le dife, o ile a bolela therešo ka sebete. O ile a hlalosa kamoo a ilego a fodišwa ka gona le gore ke Jesu yo a dirilego seo. A makaditšwe ke gore banna ba ba phagamego le bao ba rutegilego ba be ba sa dumele gore Jesu o be a e-tšwa go Modimo, monna yo a fodišitšwego o ile a ba kgothaletša ka go se boife go dumela taba ye e lego molaleng: “Xe motho eo e ka be e se wa Modimo, a ka be a s’a kxôna xo dira selô.” Ka ge ba be ba se na mabaka a go iphahlelela, Bafarisei ba ile ba latofatša monna yo ka gore o hloka tlhompho gomme ba mo ntšhetša ka ntle.—Johane 9:24-34.
21 Ge Jesu a kwele ka se, ka lerato o ile a fetša nako a nyaka monna yoo. Ka morago ga go mo hwetša, o ile a agelela tumelong yeo monna yo e kilego ya ba sefofu a e bontšhitšego. Ka bolokologi Jesu o ile a itsebiša gore ke yena Mesia. Monna yoo o ile a šegofatšwa gakaakang ka baka la go bolela therešo! Ka kgonthe kgaugelo ya Modimo e go bao ba bolelago therešo.—Johane 9:35-37.
22. Ke ka baka la’ng re swanetše go phegelela tsela ya go rereša?
22 Go bolela therešo ke mokgwa woo re swanetšego go o tšeela godimo. Ke ga bohlokwa go hlameng le go bolokeng ditswalano tše dibotse le batho gotee le Modimo. Go rereša ke go ba yo a lokologilego, wa kgonthe, yo a batamelegago le yo a botegago gomme go dira gore re amogelwe ke Jehofa. (Psalme 15:1, 2) Go se rereše go bolela go ba le bofora, go se botwe le go bolela maaka gomme go tliša go se amogelwe ke Jehofa. (Diema 6:16-19) Ka gona, ikemišetšeng go phegelela tsela ya go rereša. Ka kgonthe, e le gore re ekiše Modimo wa therešo, re swanetše go tseba therešo, re bolele therešo gomme re phele ka go dumelelana le therešo.
Ka ge ba neilwe therešo ya Beibele, Bakriste ba e abela ba bangwe ka mafolofolo
Monna wa sefofu yo a fodišitšwego ke Jesu o ile a šegofatšwa kudu ka baka la go bolela therešo
O be o tla Araba Bjang?
• Ke ka baka la’ng re ka leboga gore re tseba therešo?
• Re ka ekiša Jehofa bjang ka go rereša?
• Go abela ba bangwe therešo ya Beibele go na le mehola efe?
• Ke ka baka la’ng go phegelela tsela ya therešo go le bohlokwa?