Go Ithuta Bokgoni bja go ba Šedi

PEGGY o ile a bona morwa wa gagwe a bolela ka tsela e bogale le moratho wa gagwe. O ile a mmotšiša gore: “Na o nagana gore yeo e be e le tsela e kaone ya go bolela le ngwaneno? Bona gore o befetšwe bjang!” Ke ka baka la’ng a ile a bolela seo? O be a leka go ruta morwa wa gagwe bokgoni bja go dira dilo ka šedi le go bontšha go naganela maikwelo a ba bangwe.

Moapostola Paulo o ile a kgothaletša modirišani wa gagwe yo monyenyane Timotheo gore ‘a be botho goba a be šedi go bohle.’ Ka go dira bjalo, Timotheo o be a ka se gobatše maikwelo a ba bangwe. (2 Timotheo 2:​24) Go ba šedi ke eng? O ka kaonefatša bjang ntlheng ye? Le gona o ka thuša bjang ba bangwe go hlagolela bokgoni bjo?

Go ba Šedi ke Eng?

Pukuntšu e hlalosa go ba šedi e le “bokgoni bja go lemoga tsela yeo boemo e lego bjo bo kgomago ka gona gomme wa dira goba wa bolela selo se botho kudu goba seo se swanetšego.” Motho yo a lego šedi a ka kgona go kwešiša maikwelo a batho ba bangwe le go lemoga kamoo mantšu goba ditiro tša gagwe di ba kgomago ka gona. Eupša go dira se ga se feela bokgoni; go akaretša kganyogo ya kgonthe ya go phema go kweša ba bangwe bohloko.

Ka pegong ya Beibele ya mabapi le mohlanka wa Elisa e lego Gehasi, re hwetša mohlala wa motho yo a sego šedi. Mosadi wa mo-Sunema yoo morwa wa gagwe a bego a sa tšwa go hwela ka diatleng tša gagwe o be a tlile go bona Elisa, a nyaka khomotšo. Ge a be a botšišwa gore na dilo ka moka di sepela gabotse, o ile a araba ka gore: “Xo sa thabilwe.” Eupša ge a fihla go moporofeta, “Gehasi a batamêla, a re a mo xomišê.” Ka lehlakoreng le lengwe Elisa o ile a re: “Mo lesê, ó nyamile.”​—2 Dikxoši 4:​17-20, 25-⁠27.

Gehasi o be a ka itshwara bjang ka tsela ye ya go se nagane le ya go se be šedi? Ke therešo gore mosadi yo ga se a ka a bolela maikwelo a gagwe ge a be a botšišwa. Go ba gona, batho ba bantši ga ba bolele maikwelo a bona go motho le ge e le mang. Lega go le bjalo, maikwelo a gagwe a swanetše go ba a be a bonagala ka tsela e itšego. Go bonagala Elisa a ile a a bona, eupša Gehasi ga se a a bona goba o ile a kgetha go a hlokomologa. Se se bontšha gabotse sebaki seo se tlwaelegilego sa go dira dilo ka go se be šedi. Ge motho a tshwenyegile kudu ka bohlokwa bja mošomo wa gagwe, go bonolo gore a palelwe ke go lemoga goba go ba le taba le dinyakwa tša bao a šomago le bona. O swana gabotse le mootledi wa pese yo a bego a tshwenyegile kudu ka go fihla ka nako moo e lego gore ga se a ka a ema e le gore a nametše banamedi.

Go phema gore re se be šedi bjalo ka Gehasi, re swanetše go katanela go ba ba botho bathong, ka gobane ga re tsebe gore ge e le gabotse ba ikwa bjang. Ka mehla re swanetše go dula re phafogetše maswao ao a bontšhago maikwelo a motho gomme re arabele ka mantšu goba ka tiro e botho. O ka kaonefatša bjang bokgoni bja gago tabeng ye?

Go Kwešiša Maikwelo a ba Bangwe

Jesu o be a kgona go kwešiša maikwelo a batho kudu le go lemoga kamoo a ka ba swarago kaone ka gona ka tsela e botho. Nakong e nngwe o be a le dijong ngwakong wa Simone wa Mofarisei ge mosadi “yo e bexo e le modira-dibe” a e-⁠tla go yena. Le gona mo, mosadi yo ga se a bolela selo, eupša go be go e na le mo gontši mo go ka  lemogwago. “A tla à swere sebyana se se naxo le setlôlô. A batamêla dinaong tša Jesu a lla, a kolobiša dinaô tša Jesu ka mexôkxô, a e phomola ka meriri ya hlôxô ya xaxwe; a atla maoto a Jesu, a a tlotša ka setlôlô.” Jesu o ile a lemoga seo se bolelwago ke se ka moka. Le gona, gaešita le ge Simone a se a bolela selo, Jesu o ile a kgona go lemoga gore o be a ipotša gore: “Motho é xe e ka be e le moporofeta, a ka be a tseba se mosadi eo a mo kxwathaxo a lexo sôna, xobane ké modira-dibe.”​—Luka 7:​37-⁠39.

Na o ka akanya ka kotsi yeo e ka bago e diregile ge nkabe Jesu a ile a kgaphela mosadi yo ka thoko, goba ge nkabe a ile a re go Simone: “Wena monna wa go se šetše! Na ga o bone gore mosadi yo o sokologile?” Go e na le moo, ka šedi Jesu o ile a botša Simone seswantšho sa mabapi le monna yo a ilego a lebalela motho yo mongwe sekoloto se segolo gomme yo mongwe a mo lebalela sekoloto se senyenyane kudu. Jesu o ile a botšiša gore: “Ké ofe e a tl’o xo mo rata xa-xolo?” Ka gona, go e na le go bonagala a sola Simone, Jesu o ile a kgona go mo reta ka baka la karabo e nepagetšego yeo Simone a e neilego. Ke moka o ile a thuša Simone ka botho go lemoga maswao a mantši a maikwelo a kgonthe a mosadi yo le go bontšha ga gagwe go sokologa. Jesu o ile a retologela go mosadi yo gomme ka botho a mmontšha gore o kwešišitše maikwelo a gagwe. O ile a mmotša gore o lebaletšwe dibe tša gagwe gomme ka morago ga fao a re: “Tumêlô ya xaxo e Xo phološitše; rola pelo O ikêlê.” Mantšu ao a go bolelwa ka šedi a swanetše go ba a ile a matlafatša gakaakang boikemišetšo bja gagwe bja go dira se se lokilego! (Luka 7:​40-50) Jesu o ile a atlega tabeng ya go ba šedi ka gobane o ile a lemoga kamoo batho ba bego ba ikwa ka gona gomme a arabela ka kwelobohloko.

Go swana le ge Jesu a ile a thuša Simone, le rena re ka ithuta ke moka re thuše ba bangwe go kwešiša tsela ya go bontšha maikwelo ka ponagalo ya sefahlego goba ka boitšhišinyo bja mmele. Ka dinako tše dingwe badiredi bao ba nago le phihlelo ba ka ruta bao ba sa tšwago go thoma go tšea karolo bodireding bja Bokriste bokgoni bjo. Ka morago ga leeto leo ba le dirilego ge ba abelana le ba bangwe ditaba tše dibotse, ba ka ahla-ahla maswao ao a bontšhitšego maikwelo a bao ba kopanego le bona. Na motho yoo o be a e-⁠na le dihlong, a na le dipelaelo, a tenegile goba a swaregile? Tsela e botho kudu ya go mo thuša e ka ba efe? Le gona bagolo ba ka thuša bana babo rena le dikgaetšedi bao ka go se be šedi ba ka bago ba kgopišane. Thušang yo mongwe le yo mongwe go kwešiša maikwelo a yo mongwe. Na o ikwa a kgopišitšwe, a hlokomologilwe goba a sa kwešišwa? Ke bjang botho bo ka mo dirago gore a ikwe a le kaone?

Batswadi ba swanetše go thuša bana ba bona go hlagolela kwelobohloko, ka ge se se tla ba tutueletša go dira dilo ka šedi. Morwa wa Peggy yoo go boletšwego ka yena mathomong, o ile a lemoga sefahlego seo se sa kgahlišego sa moratho wa gagwe, a tsuputše molomo e bile a tletše megokgo, gomme o ile a lemoga bohloko bjoo ngwanabo a bego a bo kwa. O ile a itshola gomme a fetoga, bjalo ka ge mmagwe a be a holofetše seo. Barwa ba Peggy ka bobedi ba ile ba diriša gabotse bokgoni bjoo ba ilego ba ithuta bjona bjaneng gomme ka morago ga nywaga e mentši ba ile ba ba badiri ba barutiwa bao ba tšweletšago dienywa le badiši ka phuthegong ya Bokriste.

Bontšha Gore o a Kwešiša

Go ba šedi go bohlokwa kudu ge e ba o e-⁠na le pelaelo ka motho yo mongwe. O ka theoša seriti sa gagwe gabonolo. Ka mehla ke mo gobotse go thoma ka go nea theto e swanetšego. Go e na le go mo swaya diphošo, lebiša tlhokomelo go rarolleng bothata. Hlalosa kamoo boitshwaro bja gagwe bo go kgomago ka gona gomme o bolele ka go lebanya seo o tla ratago go se bona se fetogile. Ke moka ikemišetše go theetša. Mohlomongwe ga se wa mo kwešiša gabotse.

 Batho ba rata go bona gore o kwešiša pono ya bona gaešita le ge o sa dumelelane le yona. Jesu o ile a bolela ka šedi, a bontšha gore o kwešišitše bothata bja Mareta. O itše: “Mareta! Mareta! O a belaêla, O itapiša ka tše ntši.” (Luka 10:​41) Ka mo go swanago, ge motho a bolela ka bothata bjo itšego, tsela ya go ba šedi ya go bontšha gore o a kwešiša ke go boeletša ka mantšu a gago bothata goba selo seo a belaelago ka sona go e na le go mo nea tharollo pele o ka kwa bothata. Ye ke tsela e botho ya go bontšha gore o a kwešiša.

Tseba Seo o sa Swanelago go se Bolela

Ge Mohumagadi Esitere a be a nyaka go kgopela monna wa gagwe gore a se sa tšwela pele ka leano la Hamani la go fediša ba-Juda, o ile a rulaganya ditaba ka šedi e le gore monna wa gagwe a be boemong bjo bobotse. Ke feela ka nako yeo moo a ilego a mmotša taba ye e nyakago šedi. Eupša le rena re ka ithuta selo se itšego ka go lemoga seo a sego a se bolela. Ka šedi, o ile a se bolele ka go tšea ga monna wa gagwe karolo boikarabelong bja leano la bobe.​—Esitere 5:​1-⁠8; 7:​1, 2; 8:⁠5.

Ka mo go swanago, ge o etela monna yo a sa dumelego wa kgaetšedi wa Mokriste, ke ka baka la’ng o sa thome ka go mmotšiša ka šedi dilo tšeo a di ratago go e na le gore o mmontšhe Beibele kapejana? Ge motho yo re sa mo tsebego a e-⁠tla Holong ya Mmušo a ikaparetše feela goba motho yo mongwe a boa gape ka morago ga nako e telele, mo amogele ka borutho go e na le go bolela ka diaparo tša gagwe goba ka go se be gona ga gagwe. Le gona ge o lemoga gore motho yo a sa tšwago go thoma go thabela o na le pono e fošagetšego, go ka ba kaone gore o se ke wa mo phošolla di sa tloga fase. (Johane 16:​12) Go ba šedi go akaretša go bontšha botho ka go tseba seo o sa swanelago go se bolela.

Mantšu ao a Fodišago

Go ithuta bokgoni bja go bolela mantšu ka šedi go tla go thuša go thabela ditswalano tše thabišago le ba bangwe, gaešita le ge motho yo mongwe a se a kwešiša maikemišetšo a gago gabotse gomme a befetšwe e bile a galefile. Ka mohlala, ge banna ba kua Efuraimi ‘ba be ba leka go omanya’ Gideoni, karabo ya gagwe ya go ba šedi e ile ya akaretša tlhaloso ya seo ge e le gabotse se bego se diragetše le kahlolo ya kgonthe ya seo banna ba Efuraimi ba bego ba se fihleletše. Se e be e le go ba šedi ka gobane o ile a lemoga lebaka leo ka lona ba bego ba befetšwe gomme boikokobetšo bja gagwe bo ile bja dira gore ba ikwe kaone.​—Baahlodi 8:​1-⁠3; Diema 16:⁠24.

Ka mehla leka go ela hloko kamoo mantšu a gago a tlago go kgoma batho ba bangwe ka gona. Go dira boiteko bja go ba šedi go tla go thuša go ba le lethabo leo le hlalositšwego go Diema 15:​23: “Monna ó thabêla phetolô ya molomo w’axwe, ka kxonthe lentšu la xo tla lebakeng la xôna, ké lôna le le botse.”

Batswadi ba ka ruta bana ba bona go kwela ba bangwe bohloko

Badiredi ba Bakriste bao ba nago le phihlelo ba ka ruta bao ba sa tšwago go thoma go kopanela go ba šedi