“Le Filwe Fêla; le Lena Fang Fêla”

“LE FILWE fêla; le lena fang fêla.” (Mateo 10:⁠8) Jesu o neile baapostola ba gagwe taelo yeo ge a be a ba roma go yo bolela ditaba tše dibotse. Na baapostola ba ile ba kwa taelo ye? Ee, gomme ba ile ba tšwela pele ba dira bjalo gaešita le ka morago ga ge Jesu a tlogile lefaseng.

Ka mohlala, ge Simone yoo pele e bego e le sedupe a be a bona matla a mohlolo ao moapostola Petro le moapostola Johane ba bego ba e-⁠na le ona, o ile a ithapela go ba lefa gore ba mo nee matla ao. Eupša Petro o ile a sola Simone ka gore: “Thšêlêtê ya xaxo a e y’o lôba naxô’, xe O re neô ya Modimo e rêkwa ka thšêlêtê.”​—Ditiro 8:​18-⁠20.

Moapostola Paulo o ile a bontšha moya wo o swanago le wa Petro. Paulo a ka be a ile a itumelela gore a imetše bana babo ba Bakriste kua Korinthe ka tša ditšhelete. Lega go le bjalo, o ile a šoma ka diatla tša gagwe e le gore a kgone go iphediša. (Ditiro 18:​1-⁠3) Ka go rialo, o be a ka kgona go bolela ka kgodišego gore o boletše ditaba tše dibotse go ba-Korinthe “ka ntle le tefo.”​—1 Ba-Korinthe 4:​12; 9:​18, NW.

Ke mo go nyamišago go bolela gore, ba bantši bao ba ipolelago gore ke balatedi ba Kriste ga se ba bontšha go rata go ‘fa fela’ ka tsela e swanago. Ka kgonthe, baetapele ba bantši ba bodumedi Bojakaneng ba ka ‘ruta feela bakeng sa moputso.’ (Mika 3:​11) Baetapele ba bangwe ba bodumedi ba šetše ba humišitšwe ke tšhelete yeo e kolekilwego mehlapeng ya bona. Ka 1989, moebangedi yo mongwe wa United States o ile a ahlolelwa nywaga e 45 kgolegong. Ka baka la’ng? O be a dutše a “radia bathekgi ba kereke ditolara tše dimilione gomme a diriša tšhelete e nngwe go reka dintlo, dikoloi, go ya maikhutšong, gaešita le go reka ntlwana ya mpša yeo e nago le tshepedišo ya go laola moya wa go tonya le wa go fiša.”​—People’s ­Daily Graphic, October 7, 1989.

Kua Ghana, go ya ka Ghanaian Times ya March 31, 1990, moruti wa Roma Katholika o ile a tšea tšhelete yeo e bego e kolekilwe tirelong e nngwe ya kereke gomme a foša phuthego ka yona. Kuranta e re: “Lebaka la gagwe e be e le gore, ka ge e le batho ba bagolo go be go letetšwe gore ba ntšhe tšhelete e ntši.” Ga se mo go makatšago gore, dikereke tše dintši di bile di leka go kgothaletša megabaru go ditho tša tšona, ka mafolofolo di kgothaletša ditiro tša go petšha le go tsenela mekgatlo e mengwe e le gore di kgone go hwetša tšhelete.

Ka mo go fapanego, Dihlatse tša Jehofa di katanela go ekiša Jesu le barutiwa ba gagwe ba pele. Ga di na baruti bao ba lefšago. Hlatse e nngwe le e nngwe ke modiredi yo a neilwego boikarabelo bja go bolela “ditaba tše tše dibotse tša mmušo” go ba bangwe. (Mateo. 24:​14, NW) Ka go rialo, tša ka godimo ga dimilione tše tshela tša tšona di swaregile ka go iša “meetse a bophelô” ka ntle le tefo bathong. (Kutollo 22:​17) Ka tsela ye, gaešita le bao ba “se naxo sa xo rêka” ba ka holwa ke molaetša wa Beibele. (Jesaya 55:⁠1) Gaešita le ge modiro wa tšona wa lefase ka bophara o lefelelwa ka meneelo ya boithatelo, ga di kgopele tšhelete le ka mohla. E le badiredi ba kgonthe ba Modimo, ga se “bao ba ba retollaxo Lentšu la Modimo,” eupša ba bolela ‘ka go rereša; ba boledišwa ke Modimo.’​—2 Ba-Korinthe 2:⁠17.

 Lega go le bjalo, ke ka baka la’ng Dihlatse tša Jehofa di ikemišeditše go thuša ba bangwe, di dira bjalo ka ditshenyagalelo tša tšona ka noši? Ke’ng seo se di tutuetšago? Na go fa feela go bolela gore di swanetše go dira bjalo ka mo go feletšego ka ntle le go hwetša moputso bakeng sa maiteko a tšona?

Go Araba Tlhohlo ya Sathane

Bakriste ba therešo lehono ba tutuetšwa kudu ke kganyogo ya go kganyoga go thabiša Jehofa​—e sego ya go nyaka go ikhumiša. Ka go rialo ba kgona go nea karabo ya tlhohlo yeo Sathane Diabolo a e rotošitšego nywaga-kgolong e fetilego. Mabapi le monna wa go loka yo a bitšwago Jobo, Sathane o ile a hlohla Jehofa ka potšišo e rego: “A O re Jobo xe a boifa Modimo, ó dira fêla?” Sathane o ile a bolela gore Jobo o be a hlankela Modimo feela ka gobane A be a mo ageleditše ka legora. Sathane o ile a bolela gore ge Jobo a be a ka amogwa dilo tša gagwe tše di bonagalago, gona Jobo o be a tla hlala Modimo pepeneneng!​—Jobo 1:​7-⁠11.

Bakeng sa go araba tlhohlo ye, Modimo o ile a dumelela Sathane go leka Jobo, ka go bolela gore: “Tšohle tše a naxo natšô, di diatleng tša xaxo.” (Jobo 1:​12) Mafelelo e bile afe? Jobo o ile a hlatsela Sathane e le wa maaka. Go sa šetšwe mathata le ge e le afe ao a ilego a mo wela, Jobo o ile a dula a botega ka go se kwanantšhe. O itše: “Ke tlo hwa kè sešo ka re: Ke molato.”​—Jobo 27:​5, 6.

Barapedi ba therešo lehono ba bontšha boemo bja kgopolo bjo bo swanago le bja Jobo. Tirelo ya bona go Modimo ga e tutuetšwe ke dilo tše di bonagalago.

Mpho ya Modimo ye e sa Lefelelwego ya Botho bjo bo sa Swanelago

Lebaka le lengwe leo ka lona Bakriste ba therešo ba ikemišeditšego go ‘fa fela’ ke ka gobane le bona Modimo o ba ‘file fela.’ Batho ba bohlankeng bja sebe le lehu ka baka la sebe sa rakgolokhukhu wa rena Adama. (Ba-Roma 5:​12) Ka lerato, Jehofa o ile a rulaganyetša gore Morwa wa gagwe a hwe lehu la sehlabelo​—e lego selo seo se ilego sa nyaka Modimo mo gontši kudu. Ka kgonthe batho ga se ba swanelwa ke se. Aowa, ke mpho ye e tšwago go Modimo.​—Ba-Roma 4:⁠4; 5:⁠8; 6:⁠23.

Bjalo ka ge go begilwe go Ba-Roma 3:​23, 24, ka go rialo Paulo o ile a botša Bakriste ba tloditšwego gore: “Ba dirile dibe bohle, ba hlaya letaxô la Modimo. Xe ba lokafala, ké xo fo fiwa ka kxauxêlô [“mpho yeo e sa lefelelwego,” NW] ya xaxwe bà lopolotšwe ke Jesu Kriste.” Bao ba nago le kholofelo ya go phela ka mo go sa felego lefaseng le bona ka mo go swanago ke baamogedi ba “mpho yeo e sa lefelelwego.” Mpho ye e akaretša tokelo ya go bolelwa re le ba lokilego bjalo ka bagwera ba Jehofa.​—Jakobo 2:​23; Kutollo 7:⁠14.

Sehlabelo sa Kriste sa topollo se dira gore gape go kgonege gore Bakriste ka moka ba hlankele e le badiredi ba Modimo. Moapostola Paulo o ngwadile gore: “Ké yôna Ebangedi [sephiri se sekgethwa] ye nna ke lexo motseta wa yôna ka neô ya kxauxêlô ya Modimo, ye ke e filwexo ka tirô ya matla a xaxwe.” (Ba-Efeso 3:​4-⁠7) Ka ge ba bileditšwe go dira bodiredi bjo ba diriša neo yeo e sa ba swanelago goba yeo ba bego ba ka se kgone go e hwetša, badiredi ba kgonthe ba Modimo ba be ba ka se letele gore ba lefše ka dilo tše di bonagalago bakeng sa go abelana le ba bangwe ditaba tša neo ye.

 Bophelo bjo bo sa Felego​—Na ke Tutuetšo ya Boithati?

Ka go rialo, na se se bolela gore Modimo o letetše gore Bakriste ba mo hlankele ka ntle le kholofelo le ge e le efe ya gore ba tla putswa? Aowa, ka gobane moapostola Paulo o boditše badumedi-gotee le yena gore: “Xobane Modimo xa a bebe motho, xa a lebale medirô ya lena, le leratô le Le itapišitšexo ka lôna ’ineng la xaxwe.” (Ba-Hebere 6:​10) Goba gore Jehofa ga a na toka. (Doiteronomio 32:⁠4) Ka mo go fapanego, Jehofa “ba ba Mo nyakaxo ó a ba putsa.” (Ba-Hebere 11:⁠6) Eupša na kholofetšo ya bophelo bjo bo sa felego Paradeiseng ga se tutuetšo ya boithati?​—Luka 23:⁠43.

Le gatee. Lebaka le lengwe ke gore, kganyogo ya go phela ka mo go sa felego Paradeiseng lefaseng e thomilwe ke Modimo ka boyena. Ke yena a neilego batho ba babedi ba pele tebelelo ye. (Genesi 1:​28; 2:​15-17) Le gona o ile a dira gore tsošološo ya tebelelo ye e kgonege ge Adama le Efa ba be ba e loba bakeng sa ditlogolo tša bona. Ka gona Modimo o ile a holofetša ka Lentšung la gagwe gore “le tšôna dibopya di tlo hunollwa bohlankeng bya thsenyêxô, di be le tokoloxô ya xe bana ba Modimo bà e-⁠ya letaxong.” (Ba-Roma 8:​21) Ka go rialo ke mo go swanetšego ka mo go feletšego bakeng sa Bakriste lehono, ka go swana le Moše wa bogologolo, gore ba lebelele ‘moputsong wo ba tlogo o bona.’ (Ba-Hebere 11:​26) Modimo ga a nee moputso wo e le pipa-molomo. O o nea ka lerato la kgonthe go bao ba mo hlankelago. (2 Ba-Thesalonika 2:​16, 17) Ge re arabela go se, “a re Mo rateng, xobane ó re ratile pele.”​—1 Johane 4:⁠19.

Morero wo o Swanetšego wa go Hlankela Modimo

Lega go le bjalo, Bakriste lehono ba swanetše gore ka dinako tšohle ba hlahlobišiše merero ya bona ka noši ya go hlankela Modimo. Go Johane 6:​10-13, re bala gore Jesu ka mohlolo o ile a fepa lešaba la batho ba ka godimo ga dikete tše hlano. Ka morago, ba bangwe ba ile ba thoma go latela Jesu feela ka mabaka a boithati. Jesu o ile a ba botša gore: “Le nnyaka ka xobane Le lle dinkxwa tšela la hora.” (Johane 6:​26) Nywaga-some e mentši ka morago ba bangwe ba Bakriste ba ineetšego ka mo go swanago ba ile ba nea tirelo go Modimo eupša e le “mamênêmênê.” (Ba-Filipi 1:​17) Ba bangwe bao ‘ba bego ba sa dumelelane le mantšu a a se nago bolwetši a Jesu Kriste’ ba ile ba ba ba nyaka ditsela tša go ikhola segwereng sa bona le Bakriste.​—1 Timotheo 6:​3-⁠5.

Lehono, Mokriste yo a hlankelago feela ka gobane a nyaka go phela ka mo go sa felego Paradeiseng le yena a ka ba a hlankela ka morero wa boithati. Mafelelong, se se ka feleletša ka go wa moyeng. Ka ge tshepedišo ya dilo ya Sathane e bonagala e tšea lebaka le letelele ka mo go bego go sa letelwa, mohlomongwe a ka “lapa,” a nagana gore bofelo bo diegišitšwe. (Ba-Galatia 6:⁠9) A ka ba a thoma go galefa ka baka la boikgafo bja go tlogela dilo tše di bonagalago bjoo a bo dirilego. Jesu o re gopotša gore: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka.” (Mateo 22:​37) Ee, motho yoo lebaka la gagwe le legolo la go hlankela Modimo e lego lerato ga a bee mellwane ya nako tirelong ya gagwe. O ikemišeditše go hlankela Jehofa ka mo go sa felego! (Mika 4:⁠5) Ga a itshole ka baka la boikgafo le ge e le bofe bjo a bo dirilego ge e le mabapi le tirelo ya gagwe go Modimo. (Ba-Hebere 13:​15, 16) Lerato la go rata Modimo le mo tutueletša go etiša dikganyogo tša Modimo pele bophelong bja gagwe.​—Mateo 6:⁠33.

Lehono, barapedi ba therešo ba ka godimo ga dimilione tše tshela ba “ithapa” tirelong ya Jehofa. (Psalme 110:⁠3) Na o gare ga bona? Ge e ba go se bjalo, gona naganišiša ka seo Modimo a se neago: tsebo e sekilego ya therešo; (Johane 17:⁠3) tokologo bohlankeng bja dithuto tša maaka tša bodumedi; (Johane 8:​32) kholofelo ya go phela ka mo go sa felego. (Kutollo 21:​3, 4) Dihlatse tša Jehofa di ka go thuša go ithuta kamoo o ka kgonago go amogela dilo tše ka moka go tšwa go Modimo​—ka ntle le tefo.

Bakriste ba therešo lehono ba tutuetšwa kudu ke kganyogo ya go rata go thabiša Jehofa​—e sego ya go nyaka go ikhumiša

Mpho ya Modimo yeo e sa lefelelwego ya topollo e tutueletša Bakriste go abelana le ba bangwe ditaba tše dibotse ka ntle le tefo