BAGOELEDI BA MMUŠO BA A BEGA

Mafelelo a Thabišago a go se Fele Pelo le go Phegelela

JESU KRISTE o ile a bolela e sa le pele gore mehleng ya bofelo “lerato la ba bantši le tla fola.” Ka baka la seo, dikarolong tše dintši tša lefase lehono batho ka kakaretšo ga ba thabele ditaba tše dibotse tša Mmušo. Ba bangwe e bile ba lebelela bodumedi ka lenyatšo.​—Mateo 24:​12, 14, NW.

Lega go le bjalo, ka tumelo le ka go se fele pelo bagoeledi ba Mmušo ba lebeletšana le tlhohlo ye ka katlego, bjalo ka ge phihlelo e latelago go tšwa Repabliking ya Czechoslovakia e bontšha.

Dihlatse tše pedi di ile tša bolela le mosadi mojakong woo o tswaletšwego. Ka morago ga nakwana, mojako o ile wa bulega ganyenyane feela, letsogo le ile la tšwa gomme la tšea dimakasine tša Morokami le Phafoga! tšeo Dihlatse di bego di di sepediša. Lentšu le ile la re: “Ke a leboga,” ke moka mojako wa tswalelwa. Dihlatse di ile tša botšišana gore: “Na re swanetše go boa gape?” Yo mongwe wa bona e lego mmulamadibogo goba modiredi wa nako e tletšego, o ile a dira phetho ya go boela gape, eupša selo se se swanago se ile sa direga gape, gomme se se ile sa tšwela pele ka lebaka la ngwaga.

Ka morago ga go phetha ka gore o swanetše go fetoša matseno a gagwe, mmulamadibogo o ile a rapela Jehofa bakeng sa thušo. Nakong e latelago ge a be a sepediša dimakasine, o ile a botšiša mosadi dipotšišo tša bogwera ka gore: “Le tsoga bjang? Na o thabetše go bala dimakasine?” Mathomong, go be go se na karabo, eupša ka morago ga go boela ka makga a sego kae, mosadi o ile a thoma go ba le bogwera. Ka lekga le lengwe o ile a ahlamiša mojako, eupša poledišano e be e le e kopana.

Ka baka la ge mosadi a be a dika-dika go bolela mojako, mmulamadibogo o ile a dira phetho ya go mo ngwalela lengwalo e le gore a hlalose gore ke ka baka la’ng a mo etela le go ithapela go mo swarela thuto ya legae ya Beibele. Mafelelong, ka morago ga boiteko bja go se fele pelo ka lebaka la ngwaga le seripa, mmulamadibogo o ile a atlega go thomeng thuto ya Beibele le mong wa ntlo. O be a maketše eupša o ile a kgothatšega ge mafelelong mosadi yoo a be a mmotša gore: “Ke ile ka dumela go Modimo ga e sa le go tloga nakong ya ge o thoma go ntlišetša dimakasine.”

Ka kgonthe, go se fele pelo le go phegelela di ka tliša mafelelo a thabišago modirong wa go bolela ka Mmušo le wa go dira barutiwa.​—Mateo 28:​19, 20.