Kamoo ba Bangwe ba Gopolwago ka Gona

MO E ka bago nywageng e dikete tše tharo e fetilego, Dafida o be a tšhabela Kgoši Saulo wa Isiraele. Dafida o ile a roma banna go Nabala, e lego modiši yo a humilego wa dinku le dipudi, go yo kgopela dijo le meetse. Ge e le gabotse, Nabala o be a swanetše go leboga Dafida le balatedi ba gagwe ka ge ba ile ba šireletša mohlape wa Nabala. Lega go le bjalo, Nabala o ile a gana go ba amogela ka tsela le ge e le efe. O ile a ba a fotlela banna ba Dafida. Nabala o be a raloka ka mollo, ka gobane Dafida e be e se motho yo go ka ralokwago ka yena.​—1 Samuele 25:​5, 8, 10, 11, 14.

Boemo bja kgopolo bja Nabala bo be bo sa dumelelane le setšo sa ka Bohlabela bja Magareng sa go bontšha kamogelo go baeng le batho ba šele. Ka gona, Nabala o ile a itirela leina le le bjang? Pego ya Beibele e bolela gore e be e le yo “mothata, wa mekxwa e mebe” le gona ‘e be e le lešilo.’ Leina la gagwe le bolela “se a lexo sôna” gomme ka kgonthe o ile a le phelela. (1 Samuele 25:​3, 17, 25) Na o tla rata go gopolwa ka tsela yeo? Na o yo bogale le yo thata ge o dirišana le ba bangwe, kudu-kudu ge ba bonagala ba le boemong bja ka tlase go bja gago? Goba na o yo botho, yo a nago le kamogelo le yo a naganelago?

Abigaile​—Mosadi yo Bohlale

Ka baka la go ba ga gagwe yo thata, Nabala o be a le bothateng. Dafida le banna ba gagwe ba 400 ba ile ba tšea ditšhoša tša bona gomme ba tšwela go yo rutela Nabala ba bantši. Abigaile, e lego mosadi wa Nabala, o ile a kwa ka seo se diregilego. O be a tseba gore ntwa e be e le kgaufsi. O be a tla dira’ng? O ile a akgofela go lokiša dijo tše di lekanego le mphago gomme a yo gahlanetša Dafida le banna ba gagwe. Ge a gahlana le bona, o ile a kgopela Dafida gore a se ke a tšholla madi ka ntle le lebaka. Pelo ya Dafida e ile ya phohlela. O ile a theetša dikgopelo tša gagwe gomme a mo šokela. Go se go ye kae ka morago ga ditiragalo tše, Nabala o ile a hwa. Dafida ka go lemoga dika tše dibotse tša Abigaile, o ile a mo tšea gore e be mosadi wa gagwe.​—1 Samuele 25:​14-⁠42.

Ke botumo bofe bjoo Abigaile a ilego a itirela bjona? O be a le “bohlale,” bjalo ka ge Sehebere sa mathomong se hlalosa. Go molaleng gore o be a le bohlale e bile a e-⁠na le kahlolo e botse gomme o be a tseba gore o swanetše go gata mogato bjang le gona neng. O ile a dira dilo ka potego e sa kwanantšhego gore a šireletše monna wa gagwe wa lešilo gotee le lapa la gagwe kotsing. Mafelelong o ile a hwa, eupša a e-⁠na le botumo bjo bobotse bja go ba mosadi yo bohlale.​—1 Samuele 25:⁠3.

Petro o Ile a Tlogela Pego Efe?

A re yeng lekgolong la pele la nywaga C.E. gomme re nagane ka baapostola ba Jesu ba 12. Ka ntle le pelaelo yo mongwe wa bao ba ntšhago sa mafahleng kudu gotee le bao ba tšewago ke maikwelo e be e le Petro, goba Kefase, yoo pele e bego e le morei wa dihlapi kua Galilea. O be a  bonagala e le motho yo mafolofolo yoo a bego a sa tšhabe go bontšha maikwelo a gagwe. Ka mohlala, go ile gwa ba le tiragalo yeo go yona Jesu a ilego a hlapiša barutiwa ba gagwe maoto. Petro o ile a arabela bjang ge e be e le nako ya gagwe ya gore a hlapišwe maoto?

Petro o ile a re go Jesu: “Morêna, a ke hlatswiwa maoto ke Wene?” Jesu o ile a araba ka gore: “Se ke Xo diraxo sôna, xa O ešo wa se tseba; O tlo se lemoxa ka moraxo.” Petro o ile a araba ka gore: “O ka se kê wa bá wa nthlatswa maoto le neng.” Hlokomela karabelo ya Petro ya go bolela ka go gatelela eupša e le ya go tšewa ke maikwelo. Jesu o ile a arabela bjang?

Jesu o ile a araba ka gore: “Xe ke sa Xo hlatswe, xôna O ka se bê le kabêlô xo Nna.” Simone Petro a re go yena: “Morêna, xôna a e se bê maoto fêla; a e bê le diatla le hlôxô.” Ga bjale Petro o a feteletša! Eupša ka dinako tšohle batho ba be ba tseba boemo bja kgopolo bja Petro. O be a se na boradia goba bohwirihwiri.​—Johane 13:​6-⁠9.

Le gona Petro o gopolwa ka mafokodi a gagwe ao a tlwaelegilego bathong. Ka mohlala, o ile a gana Kriste ka makga a mararo pele ga batho bao ba bego ba mmea molato wa go ba molatedi wa Jesu yo a bego a ahlotšwe wa Natsaretha. Ge Petro a be a lemoga phošo ya gagwe, o ile a lla gabohloko. O be a sa tšhabe go bontšha manyami a gagwe gotee le go itshola. Le gona ke ga bohlokwa gore pego ye ya go gana ga Petro e ile ya ngwalwa ke bangwadi ba Ebangedi​—ka kgonagalo e kgolo ya gore Petro ka boyena a ka ba a ile a ba nea tsebišo ye! O be a ikokobeditše ka mo go lekanego gore a ka dumela diphošo tša gagwe. Na o na le bokwala bjoo?​—Mateo 26:​69-75; Mareka 14:​66-72; Luka 22:​54-62; Johane 18:​15-18, 25-⁠27.

 Dibekeng tše sego kae ka morago ga ge a ganne Kriste, Petro yo a tladitšwego ka moya o mokgethwa o ile a bolela ka mafolofolo le mašaba a ba-Juda ka Pentekoste. Se e be e le sešupo sa kgonthe sa gore Jesu yo a tsošitšwego o be a mo holofela.​—Ditiro 2:​14-⁠21.

Tiragalong e nngwe, Petro o ile a wela molabeng o fapanego. Moapostola Paulo o ile a hlalosa gore pele bana babo ba itšego ba ba-Juda ba ka fihla Antiokia, Petro o be a gwerana le badumedi ba ba-Ntle ka bolokologi. Lega go le bjalo, o ile a ikarola go bona “ka xo boifa ba lebollô” bao ba bego ba sa tšwa go fihla Jerusalema. Paulo o ile a pepentšha go phela ka ditekanyetšo tše pedi ga Petro.​—Ba-Galatia 2:​11-⁠14.

Le gona, ke mang go barutiwa yoo a ilego a bolela ka sebete nakong e thata ge go be go bonagala eka balatedi ba bantši ba Jesu ba be ba ikemišeditše go mo tlogela? Tiragalo e be e le ya nakong ya ge Jesu a be a utolla selo se sengwe se sefsa, sa mabapi le bohlokwa bja go ja nama ya gagwe le go nwa madi a gagwe. O itše: “Xe Le sa je nama ya Morwa-motho la nwa madi a xaxwe, Le ka se bê le bophelô mo teng xa lena.” Balatedi ba bantši ba Jesu ba ba-Juda ba ile ba kgopišega gomme ba re: “Polêlô yé ké e thata; e ka kowa ke mang?” Go ile gwa direga’ng ka morago? “Xo tloxa moo ba bantši ba barutiwa ba xaxwe ba xomêla moraxo, ba se hlwe ba sepela le Yêna.”​—Johane 6:​50-⁠66.

Mo nakong ye e thata, Jesu o ile a retologela go baapostola ba 12 gomme a ba botšiša potšišo e šišinyago kgopolo a re: “Afa le lena xa Le rate xo tloxa?” Petro o ile a araba a re: “Morêna! Re tlo tloxa rè leba xo mang? O na le mantšu a bophelô byo bo sa felexo. Xomme rena re dumetše ra tseba xe O le Kriste Morwa wa Modimo e a phelaxo.”​—Johane 6:​67-⁠69.

Ke botumo bofe bjoo Petro a ilego a bo dira? Motho yo a balago dipego tšeo di lego mabapi le yena o swanetše go kgahlwa kudu ke semelo sa gagwe sa go ba yo a botegago le yo a lebanyago, go botega ga gagwe ka go se kwanantšhe gotee le go rata ga gagwe go dumela mafokodi a gagwe ka noši. A leina le lebotse gakaakang leo a itiretšego lona!

Batho ba ile ba Gopola Jesu ka Eng?

Bodiredi bja Jesu bja lefaseng bo ile bja tšea feela nywaga e meraro le seripa. Lega go le bjalo, o gopolwa bjang ke balatedi ba gagwe? Ka gobane o be a phethagetše, a se na sebe, na o be a se na bogwera le go hloka botho? Na o ile a diriša bolaodi bja gagwe ka tsela e sa swanelago ka gobane a be a tseba gore ke yena Morwa wa Modimo? Na o ile a tšhošetša le go gapeletša barutiwa ba gagwe gore ba mo kwe? Na o be a itšeela godimo moo a bego a sa dire metlae? Na o be a swaregile kudu moo a bego a se na nako bakeng sa ba fokolago le bakeng sa bana? Na o be a tšeela batho ba merafo e mengwe gotee le basadi fase, go swana le kamoo banna ba bego ba dira ka gona nakong yeo? Pego e re botša’ng?

Jesu o be a kgahlegela batho. Go ithuta ka bodiredi bja gagwe go utolla gore ditiragalong tše dintši o ile a fodiša digole le ba babjago. O be a katanela go thuša bao ba bego ba nyaka thušo. O ile a bontšha kgahlego go bana ka go laela barutiwa ba gagwe gore: “Lesang bana ba tlê xo Nna; Le se kê la ba thibêla.” Ke moka Jesu “a ba xokara, a ba bea diatla a ba šexofatša.” Na o ipha nako bakeng sa bana goba na o swaregile kudu moo o sa lemogego gore ba gona?​—Mareka 10:​13-16; Mateo 19:​13-⁠15.

Ge Jesu a be a le lefaseng, ba-Juda ba be ba gateletšwe ka melao ya bodumedi le melao ya motheo yeo e bego e fetela ka kua ga dinyakwa tša Molao. Baetapele ba bona ba bodumedi ba be ba ba imetša ka merwalo e boima, mola bona ka bobona ba be ba sa nyake go swara merwalo yeo le ka monwana o tee. (Mateo 23:⁠4; Luka 11:​46) Jesu o be a fapane le bona gakaakang! O itše: “Tlang xo Nna bohle ba Le lapišitšwexo, ba Le imêlwaxo; Nna ke tlo Le khutšiša.”​—Mateo 11:​28-⁠30.

Batho ba be ba lapologa ge ba be ba gwerana le Jesu. Ga se a ka a tšhošetša barutiwa ba gagwe, moo e lego gore ba be ba tšhaba go ntšha sa mafahleng. Ge e le gabotse, o be a botšiša dipotšišo tšeo di bego di ba kgothaletša go tšweletša maikwelo a bona ntle le go tšhoga. (Mareka 8:​27-29) Balebeledi ba Bakriste ba swanetše go ipotšiša gore: ‘Na ke na le tutuetšo e swanago go  barapedi-gotee le nna? Na bagolo ba bangwe ba tloga ba mpotša seo ba se dumelago goba na ba dika-dika go dira bjalo?’ Ke mo go lapološago gakaakang ge balebeledi e le ba batamelegago, ba theetšago ba bangwe e bile e le ba dulago ba itumelelanyago le maemo! Go se leka-lekane go fo nyefiša dipoledišano tše lebanyago le tša bolokologi.

Gaešita le ge Jesu e be e le Morwa wa Modimo, ga se a ka a diriša matla a gagwe goba bolaodi bja gagwe gampe. Go e na le moo, o ile a boledišana le batheetši ba gagwe. Seo e bile sa therešo ge Bafarisei ba be ba leka go mo hlalefetša ka potšišo e rego: “A xo re loketše xo nthšetša Kesara mothšêlô, xoba xa xo a re lokêla?” Jesu o ile a ba botša gore ba mmontšhe tšhelete gomme a ba botšiša gore: “Ké sa mang seswanthšô sé, le leina lé?” Ba ile ba araba ka gore: “Ké tša Kesara.” Ke moka yena a re go bona: “Xôna nthšetšang Kesara tše e lexo tsa Kesara; Modimo Le Mo nthšetšê tše e lexo tša Modimo.” (Mateo 22:​15-21) Go diriša tlhaologanyo go be go lekane.

Na Jesu o be a e-⁠na le metlae? Babadi ba bangwe ba ka kwa go ba le metlae mo go itšego ge ba bala karolo yeo go yona Jesu a itšego go be go le bonolo gore kgomo e tsene ka lešobana la nalete go e na le gore mohumi a tsene Mmušong wa Modimo. (Mateo 19:​23, 24) Kgopolo yona ye ya gore kgomo e leke go tsena ka lešobana la nalete ya kgonthe e be e feteleditšwe. Mohlala o mongwe wa pheteletšo e bjalo ke wa gore motho a bone lehlokwana leihlong la ngwanabo mola a sa bone kota yeo e lego leihlong la gagwe. (Luka 6:​41, 42) Ka kgonthe, Jesu e be e se motho yo a kgalemago ka thata. O be a le borutho e bile a na le bogwera. Go Bakriste lehono, go ba le metlae go ka imolla motho dinakong tša kgateletšego.

Kwelobohloko ya Jesu go Basadi

Basadi ba be ba ikwa bjang ge Jesu a le gona? Ka kgonthe o be a e-⁠na le balatedi ba bantši bao ba botegago ba basadi, go akaretša le mmagwe, e lego Maria. (Luka 8:​1-⁠3; 23:​55, 56; 24:​9, 10) Basadi ba be ba ikwa ba lokologile go batamela Jesu go fihla bokgoleng bja gore tiragalong e nngwe mosadi ‘yo a bego a tsebja e le modiradibe’ o ile a mo hlapiša maoto ka megokgo ya gagwe gomme a a tlotša ka setlolo. (Luka 7:​37, 38) Mosadi yo mongwe yoo a ilego a tlaišwa ke ngope ka nywaga e mentši, o ile a kgorometša lešaba gore a sware kobo ya Jesu e le gore a fole. Jesu o ile a reta tumelo ya gagwe. (Mateo 9:​20-22) Ee, basadi ba ile ba hwetša Jesu e le yo a batamelegago.

Tiragalong e nngwe, Jesu o ile a bolela le mosadi wa mo-Samaria sedibeng. O be a maketše kudu moo a ilego a bolela gore: “O re’ng O le Mo-Juda wa nkxopêla meetse, kè le mosadi wa Mo-Samaria?” Ba-Juda ba be ba sa dirišane le ba-Samaria. Jesu o ile a tšwela pele go mo ruta therešo ya mabapi le ‘mothopo wo o tšwago meetse a išago bophelong bjo bo sa felego.’ O be a  le bonolo go basadi. Ga se a ka a ikwa a hlohlwa.​—Johane 4:​7-⁠15.

Jesu o gopolwa ka dika tša gagwe tše dintši tša botho, go akaretša le moya wa gagwe wa go ithapa. E be e le yena seswantšho sa lerato la Modimo. Jesu o bea mohlala bakeng sa bohle bao ba nyakago go ba balatedi ba gagwe. O latela mohlala wa gagwe kgaufsi gakaaka’ng?​—1 Ba-Korinthe 13:​4-⁠8; 1 Petro 2:⁠21.

Bakriste ba Mehleng Yeno ba Gopolwa Bjang?

Mehleng yeno, Bakriste ba dikete bao ba botegago ba hwile, ba bantši ka baka la botšofadi, ba bangwe e le ba bafsa kudu. Eupša ba tlogetše botumo bjo bobotse. Ba bangwe, ba swanago le Crystal, yo a hwilego ka baka la botšofadi, ba gopolwa ka lerato la bona le go ba le bogwera ka tlhago. Ba bangwe, ba swanago le Dirk yo a hwilego nywageng ya gagwe ya bo-40, ba gopolwa ka tshekamelo ya lethabo le moya wa go rata go thuša.

Ke moka go na le taba ya José yo a tšwago Sepania. Morago kua ka bo-1960, ge modiro wa boboledi wa Dihlatse tša Jehofa o be o thibetšwe nageng yeo, José o be a nyetše gomme a e-⁠na le barwedi ba bararo ba banyenyane. O be a e-⁠na le mošomo o šireletšegilego kua Barcelona. Eupša ka nako yeo, go be go nyakega bagolo ba Bakriste bao ba gotšego ka tsebo ka borwa bja Sepania. José o ile a tlogela modiro wa gagwe wo o šireletšegilego gomme a hudugela Málaga le lapa la gagwe. Ba ile ba swanela ke go phela dinakong tše thata tša tša boiphedišo, ka dinako tše dingwe ba dula ba se na mošomo.

Lega go le bjalo, José o be a tsebja ka tumelo ya gagwe, mohlala wo o ka botwago bodireding le tsela ya mohlala yeo a godišitšego barwedi ba gagwe ka yona, tšeo a ilego a di fihlelela ka thušo ya mosadi wa gagwe yo a bego a mo thekga kudu, e lego Carmela. Ge go be go nyakega motho wa go rulaganya dikopano tša Bokriste tša tikologong, José ka mehla o be a itira yo a hwetšagalago. Ka manyami, ge a be a le nywageng ya gagwe ya bo-50, o ile a hlaselwa ke bolwetši bjo bošoro bjoo bo ilego bja mmolaya. Lega go le bjalo, o tlogetše botumo bja go ba yo a ka botwago, mogolo yo a šomago ka thata le molekane yo lerato gotee le tate.

Ka gona o tla gopolwa bjang? Ge nkabe o hwile maabane, batho nkabe ba re’ng ka wena lehono? Ye ke potšišo yeo e ka re kgothaletšago ka moka gore re kaonefatše tsela ya rena ya go dira dilo.

Re ka dira’ng bakeng sa go aga botumo bjo bobotse? Ka mehla re ka kaonefatša go bontšheng dienywa tša moya​—tše bjalo ka lerato, go se fele pelo, botho, bonolo le boitshwaro. (Ba-Galatia 5:​22, 23) Ee, ka kgonthe “’Ina le botse le phala makhura a mabotse; ’tšatši la xo hwa le phala la xo tswalwa.”​—Mmoledi 7:⁠1; Mateo 7:⁠12.

Abigaile o gopolwa ka bohlale bja gagwe

Petro o gopolwa ka semelo sa gagwe sa go tšewa ke maikwelo eupša a botega

Jesu o ile a ipha nako le bana