Bodumedi bjo Tee bja Therešo bja Bokriste ke Selo sa Kgonthe

JESU KRISTE o ile a hloma bodumedi bjo tee, goba phuthego e tee feela. Phuthego yeo e be e le mmele wa moya, e lego lapa la moya. Ka go rialo re bolela gore e be e le go bokana ga batho bao ba kgethilwego ka moya o mokgethwa wa Modimo​—bao ka moka ba amogelwago ke Modimo e le “bana” ba gagwe.​—Ba-Roma 8:​16, 17; Ba-Galatia 3:⁠26.

Jesu o rutile gore Modimo o be a diriša tsela e tee feela go hlahla batho ba gagwe go ya therešong le bophelong. E le go swantšhetša therešo yeo e bohlokwa, Jesu o ile a bapiša tsela e išago bophelong bjo bo sa felego le tsela ya kgonthe. O itše: “Tsênang ka kxôrô e pitlaxanexo; xobane kxôrô e išaxo tahlexong ké pêtlêkê, le tsela ye e yaxo xôna e phatlaletše; ’me ba ba tsênaxo ka yôna ké ba bantši. Xobane kxôrô e išaxo bophelong e pitlaxane; le tsela ye e yaxo xôna ké e thsêsê; ’me ba ba e bônaxo xa ba nene.”​—Mateo 7:​13, 14; Johane 14:⁠6; Ditiro 4:​11, 12.

Phuthego e Kopantšwego

The New Dictionary of Theology e re, ga se ra swanela go nagana ka phuthego yela ya lekgolong la pele la nywaga e le “lekoko la lefase ka bophara, le le apareditšego le leo le rulagantšwego go swana le ge re bolela ka kereke ya katholika lehono.” Ka baka la’ng? E re: “Ka baka la lebaka le bonolo la gore lekoko le bjalo le le rulagantšwego le la legohle ga se la ka la ba gona.”

Ga go na motho yo a ka ganetšago ka mo go swanetšego therešo ya gore phuthego ya pele ya Bokriste e be e sa swane ka tsela le ge e le efe le ditshepedišo tše di rulagantšwego tša dikereke tšeo re di bonago lehono. Eupša e be e rulagantšwe. Phuthego e nngwe le e nngwe e be e sa dire dilo ka tsela e fapanego le ya tše dingwe. Ka moka ga tšona di be di lemoga bolaodi bja sehlopha se se bušago seo se bego se le Jerusalema. Sehlopha se​ —⁠seo se bego se bopša ke baapostola le banna ba godilego ba phuthego ya Jerusalema​—se ile sa thuša go boloka botee bja diphuthego e le ‘mmele o tee’ wa Kriste.​—Ba-Efeso 4:​4, 11-16; Ditiro 15:​22-31; 16:​4, 5.

Go diregile’ng ka phuthego yeo e tee ya therešo? Na e ile ya fetoga Kereke e matla ya Katholika? Na e ile ya tšwela pele go ba dihlopha tšeo di aroganego tša tshepedišo ya kereke ya Protestanta tšeo re di bonago lehono? Goba na selo se sengwe se ile sa direga?

“Mabêlê” le “Mefoka”

Bakeng sa go hwetša dikarabo, anke re naganišišeng ka seo Jesu Kriste ka boyena a ilego a bolela gore se tla direga. O ka makatšwa ke go tseba gore Jesu o be a letetše gore phuthego ya gagwe e nyamelele le gore o be a tla dumelela boemo bjo bjalo bjo bobe gore bo tšwele pele ka nywaga-kgolo e mentši.

Ge a tswalanya phuthego ya gagwe le “Mmušô wa maxodimo,” o itše: “Mmušô wa maxodimo o swana le motho e a byetšexo peu e botse mo thšemong ya xaxwe. Ya re xe batho ba robetše, lenaba la xaxwe la tla la byala mefoka xare xa mabêlê, ’me la tloxa. Ya re lekxaba xe le xola lè tswala, mefoka le yôna ya bônala. Bahlanka ba tla xo mong wa bôná, ba mmotšiša ba re: Morêna, a xa wa ka wa byala peu e botse thšemong ya xaxo? Byale mefoka e e tšere kae? A fetola a re: Tšeo di dirilwe ke lenaba! Bahlanka ba re: Byale a O rata xe re ka ya ra e kxobêla? Yêna a re: Aowa! Le ka tlo re Lè kxobêla mefoka, la tomola le mabêlê. Lesang di xolê xa mmôxô, xo bê xo tlê punô. Ka lebaka la xo buna ke tlo bolêla le babuni ka re: Thômang ka xo kxobêla mefoka, Le e tlêmê dingata e y’o fišwa; xe e le mabêlê Le a kxobêlê sešexong sa-ka.”​—Mateo 13:​24-⁠30.

Jesu o hlalositše gore e be e le yena “mobyadi.” “Peu e botse” e be e swantšhetša barutiwa ba gagwe ba kgonthe. “Lenaba” la gagwe e be e le Sathane Diabolo. “Mefoka” e be e le Bakriste ba maaka bao ba ilego ba šwahlela ka phuthegong ya pele ya Bokriste. O boletše gore o be a tla dumelela gore “mabêlê” le “mefoka” di gole gotee go ba go fihlela nakong ya “punô,” yeo e bego e tla tla “bofelong bya lebaka leno.” (Mateo 13:​37-43) Tše ka moka di be di bolela’ng?

Phuthego ya Bokriste e a Senywa

Kapejana ka morago ga lehu la baapostola, barutiši ba bahlanogi bao ba tšwago ka gare ga phuthego ba ile ba thoma go e laola. Ba be ba bolela “ditaba tše šele, xore ba xôxê barutiwa ba tloxê le bôná.” (Ditiro 20:​29, 30) Ka baka leo, Bakriste ba bantši ‘ba ile ba hlanogela tumelo.’ Ba ile ba ‘hlala therešo gomme ba boela morago dinonwaneng.’​—1 Timotheo 4:​1-⁠3; 2 Timotheo 4:​3, 4.

 The New Dictionary of Theology e bolela gore lekgolong la bone la nywaga C.E., “Bokriste bja Katholika bo ile bja thoma go tsebja . . . e le bodumedi bja Mmušo wa Roma.” Go be go e-⁠na le go “kopana ga lekoko la bodumedi le la selegae”​—e lego go kopana ga Kereke le Mmušo moo go bego go ganetšwa kudu ke ditumelo tša Bakriste ba pele. (Johane 17:​16; Jakobo 4:⁠4) Mothopo o swanago o bolela gore ge nako e dutše e e-⁠ya, sebopego ka moka le tlhamego ya kereke gotee le ditumelo tša yona tša motheo tše dintši, di ile tša fetošwa kudu “ka tlase ga tutuetšo ya go rata go tseba le go tswakwa mo go lego kotsi kudu ga Testamente ya kgale le mekgwa ya Neoplatonism.” Bjalo ka ge Jesu Kriste a ile a bolela e sa le pele, barutiwa ba gagwe ba kgonthe ba be ba sa bonagale ge Bakriste ba maaka ba dutše ba oketšega.

Batheetši ba Jesu ba be ba tseba kamoo go lego thata ka gona go hlaola mabele a kgonthe go mefoka, e bjalo ka darnel ya mpholo yeo e nago le boya, yeo ge e gola e nago le ponagalo e swanago le ya mabele. Ka gona Jesu o be a swantšhetša gore ka lebakanyana, go be go tla ba thata go hlaola Bakriste ba therešo go ba fapa-fapanego ba maaka. Se ga se bolele gore phuthego ya Bokriste e ile ya se sa ba gona, ka gobane Jesu o ile a holofetša go tšwela pele a hlahla bana babo ba moya “xo fihla bofelong bya lefase.” (Mateo 28:​20) Jesu o ile a bolela gore mabele a be a tla tšwela pele a gola. Gaešita le ge go le bjalo, go theoga le nywaga, Bakriste ba kgonthe​—ba le ka o tee ka o tee goba e le sehlopha​—ka ntle le pelaelo ba ile ba dira se ba ka se kgonago go kgomarela dithuto tša Kriste. Eupša ba be ba se sa bopa mmele wo o ka hlaolwago gabonolo le o bonagalago goba mokgatlo. Go molaleng gore ba be ba sa swane le tshepedišo ye e bonagalago ya bohlanogi yeo go theoga le histori e tlišitšego feela kgobogo le lenyatšo leineng la Jesu Kriste.​—2 Petro 2:​1, 2.

‘Go Tšwelela ga Motho wa Bobe’

Moapostola Paulo o ile a bolela e sa le pele ka selo se sengwe seo se bego se tla swaya tshepedišo ye ya bodumedi bja maaka. O ngwadile gore: “Le se kê la xakišwa ke motho le ka mokxwa ofe, xobane letšatši [la Jehofa] le ka se kê la tla xò sešo xwa tla thlanoxô pele, xe xo sešo xwa tšwêlêla yêna motho wa bobe.” (2 Ba-Thesalonika 2:​2-⁠4) ‘Motho yo wa bobe’ ga se yo mongwe ge e se sehlopha sa baruti seo se iphagamišeditšego boemong bja go buša phuthego ya ‘Bokriste.’ *

Bohlanogi bo thomile mehleng ya moapostola Paulo. Bo ile bja oketšega ka lebelo ka morago ga ge baapostola ba hwile gomme tutuetšo ya bona yeo e šomago e le lepheko e nyameletše. Paulo o boletše gore bo be bo tla hlaolwa ka “matla a Sathane, ka matla-moka a maaká, le ka matete a maaká, le ka mehlôlô ya maaká.” (2 Ba-Thesalonika 2:​6-12) Seo se hlalosa ka mo go nepagetšego gakaakang mediro ya baetapele ba bantši ba bodumedi go theoga le histori!

Ge ba thekga boipolelo bja bona bja gore Roma Katholika ke yona bodumedi bjo tee bja therešo, baetapele ba Katholika ba bolela gore bapišopo ba bona ba na le “kgokagano yeo e neago bophelo le baapostola ba pele ka tlhatlamano yeo e lego gona lehono yeo e boelago morago mathomong a Bokriste.” Ge e le gabotse, boipolelo bjo bja go latelelana ga baapostola ga bo na motheo wa histori goba wa Mangwalo. Ga go na bohlatse bjo bo ka botwago bja gore tshepedišo ya kereke yeo e tšweletšego ka morago ga lehu la baapostola ba Jesu e be e hlahlwa ke moya o mokgethwa wa Modimo.​—Ba-Roma 8:⁠9; Ba-Galatia 5:​19-⁠21.

Le gona go thwe’ng ka dikereke tše dingwe tšeo di ilego tša tšwelela ka lebelo ka morago ga seo se bitšwago Mpshafatšo? Na di ile tša boela mohlaleng wa phuthego ya pele ya Bokriste? Na di ile tša tsošološa bohlweki bja phuthego ya mathomo ya Bokriste? Ke therešo gore ka morago ga Mpshafatšo, Beibele e ile ya hwetšagala go ba bantši bao e lego batho feela ka maleme a bona ka noši. Lega go le bjalo, histori e bontšha gore dikereke tše di ile tša tšwela pele di ruta dithuto tše di fošagetšego. *​—Mateo 15:​7-⁠9.

 Lega go le bjalo, hlokomela se. Jesu Kriste ka kgonthe o ile a bolela e sa le pele gore phuthego e tee ya therešo e be e tla tsošološwa nakong ya seo se bitšwago bofelo bja tshepedišo ya dilo. (Mateo 13:​30, 39) Go phethagala ga boporofeta bja Beibele go bontšha gore mo nakong ye re phela mehleng yeo. (Mateo 24:​3-35) Ka ge seo e le sa therešo, yo mongwe le yo mongwe wa rena o swanetše go botšiša gore, ‘Bodumedi bjoo bjo tee bja therešo bo kae?’ Bo swanetše gore bo hlaolege gabonolo kudu.

Mohlomongwe o ka ba o nagana gore o šetše o hweditše bodumedi bjoo, goba phuthego. Ke ga bohlokwa gore o kgonthišege ka seo. Ka baka la’ng? Ka gobane go swana le lekgolong la pele la nywaga, go na le bodumedi bjo tee feela bja therešo. Na o iphile nako ya go kgonthišetša ge e ba bodumedi bja gago bo dumelelana kgaufsi le mohlala wo o beilwego ke phuthego ya Bokriste ya lekgolong la pele la nywaga le ge e ba bo kgomarela ka potego dithutong tša Jesu Kriste? Ke ka baka la’ng o sa hlahlobišiše se gona bjale? Dihlatse tša Jehofa di tla thabela go go thuša go dira seo.​—Ditiro 17:⁠11.

[Mengwalo ya tlase]

Seswantšho sa Jesu sa mabele le mefoka se re ruta’ng ka phuthego ya therešo?

Na bodumedi bja gago bo bontšha mohlala wo o beilwego ke Bakriste ba lekgolong la pele la nywaga boboleding le go ithuteng?