Dipotšišo tše Tšwago go Babadi

Dikarolong tše dintši tša lefase, ke mo go tlwaelegilego go nea dimpho tša lenyalo. Ke melao efe ya motheo ya Mangwalo yeo re swanetšego go nagana ka yona ge re nea goba go amogela dimpho tše bjalo?

Beibele e amogela go nea dimpho mo go dirwago ka boikemišetšo bjo bo swanetšego le gona ka lebaka la gona. Tabeng ya go nea, Beibele e kgothaletša Bakriste ba therešo gore ba ekiše Monei wa bona yo a neago ka boati, e lego Jehofa. (Jakobo 1:​17) Moapostola Paulo o kgothaleditše Bakriste-gotee le yena gore: “Le se kê le lebala xo dira batho xa-botse le xo ba nea; xobane Modimo ó kxahlwa ke didimo tše byalo.” Ka gona, Bakriste ba kgothaletšwa gore ba be le seatla se se bulegilego.​—Ba-Hebere 13:​16; Luka 6:⁠38.

Go thwe’ng ka go diriša puku ya dimpho tšeo di ka rekwago tša lenyalo, e lego mokgwa wo o tlwaelegilego kua United States? Kua Engelane, e bitšwa lelokelelo la dimpho tšeo di ka rekwago tša lenyalo. Ke mo go tlwaelegilego gore bao ba lego kgaufsi le go nyalana ba ngwadiše lebenkeleng ka go seka-seka dilo tšeo di rekišwago lebenkeleng ke moka ba dira lelokelelo la dilo tšeo ba tlago go rata go di amogela e le dimpho. Ba leloko le bagwera ba bao ba tlago go nyalana ba romelwa lebenkeleng le le swanetšego gore ba yo reka selo seo se lego pukung yeo e nago le lelokelelo la dilo tšeo di ka rekwago bakeng sa bao ba tlago go nyalana. Go ya ka pono e šomago, lelokelelo leo le lego pukung ya dimpho tšeo di ka rekwago tša lenyalo le fokoletša monei nako e ntši ya go hlwa a nyakana le mpho, mola le fokoletša baamogedi mathata a go bušetša dimpho tšeo ba sa di nyakego lebenkeleng.

Taba ya ge e ba bao ba tlago go nyalana ba kganyoga go diriša puku ya lelokelelo la dimpho tšeo di ka rekwago tša lenyalo ke phetho ya motho ka noši. Lega go le bjalo, Mokriste o tla rata go ba šedi gore a pheme mekgwa yeo e ka robago melao ya motheo ya Beibele. Ka mohlala go thwe’ng ge e ba bao ba beeletšanego ba be ba ka kgetha feela dilo tša theko ya godimo kudu? Boemong bjo bo bjalo, bao thulaganyo ya bona ya tirišo ya tšhelete e lekanyeditšwego mohlomongwe ba ka palelwa ke go nea mpho, goba mohlomongwe ba ka nagana gore go se amogele taletšo ya go ba gona lenyalong go tla ba kaone e le gore ba se lewe ke dihlong tša go iša mpho ya theko ya tlase. Mosadi yo mongwe wa Mokriste o ngwadile gore: “Go šetše go le boima kudu. Ke lekile go ba le seatla se bulegilego, eupša morago bjale lethabo leo ke bego ke le hwetša go neeng ga le sa le gona.” E be e tla ba mo go nyamišago gakaakang ge e ba lenyalo le be le ka fetoga mothopo wa manyami!

Ka kgonthe, bao ba neago ga se ba swanela go dirwa gore ba nagane gore bakeng sa gore mpho ya bona e amogelwe, gona e swanetše go rekwa lebenkeleng le itšego goba e be ya theko e itšego. Go feta moo, Jesu Kriste o bontšhitše gore sa bohlokwa kudu mahlong a Modimo ke boemo bja pelo bja monei, e sego theko ya mpho. (Luka 21:​1-⁠4) Ka mo go swanago, mabapi le dimpho tša kgaugelo tšeo di yago go badiidi, moapostola Paulo o ngwadile gore: “E mongwê le e mongwê a nthšê ka mo a kwanexo le pelo ya xaxwe; a se nthšê ka xo belaêla le ka xo xapeletšwa, xobane Mo-nea-à-thabile, Modimo ó a mo rata.”​—2 Ba-Korinthe 9:⁠7.

Ge re bolela go ya ka Beibele, ga go na selo se se fošagetšego ka go itsebiša o le monei wa mpho, mohlomongwe ka go tsenya lengwalwana ka gare ga mpho. Lega go le bjalo, mafelong a mangwe, ke mo go tlwaelegilego go bolela leina la monei go bohle bao ba lego gona. Mokgwa wo o ka baka mathata. Bao ba neago mpho ba ka nyaka gore ba dule ba sa tsebje e le go phema go gogela tlhokomelo e sa nyakegego go bona ka noši. Batho ba bjalo ba dira dilo ka go dumelelana le molao wa motheo wo o hwetšwago go Mateo 6:⁠3, moo Jesu a rego: “Wêna, xe O dira tša kxauxêlô, seatla sa xaxo se sethsadi se se kê sa tseba tše di dirwaxo ke se setona.” Ba bangwe ba ka ikwa gore go nea mpho ke taba ya motho ka noši yeo e swanetšego go dula e le sephiri sa monei le moamogedi. Go feta moo, go bolela maina a banei go ka lebiša go bapetšweng ga dimpho, ‘mo go hlohleletšago moya wa phadišano.’ (Ba-Galatia 5:​26, NW) Bakriste ka kgonthe ba tla nyaka go phema go dira motho le ge e le ofe gore a ikwe a sa dudišega goba a lewa ke dihlong ka go tsebatša maina a banei phatlalatša.​—1 Petro 3:⁠8.

Ee, ka go dira dilo ka go dumelelana le melao ya motheo yeo e hwetšwago ka Lentšung la Modimo, go nea dimpho go tla dula e le mothopo wa lethabo.​—Ditiro 20:​35.