PHIHLELO

Jehofa o re Hlokomela ka Mehla

KA GE GO ANEGA ENELESI MZANGA

E be e le ka 1972. Masogana a lesome, e lego ditho tša Mokgatlo wa Bafsa wa Malawi, ba ile ba thuba legaeng la rena, ba ntšea gomme ba nkgogela tšhemong ya kgaufsi ya moba. Ba ile ba mpetha gomme ba ntlogela moo ke le makgatheng a lehu le bophelo. Dihlatse tša Jehofa tše dintši kua Malawi di ile tša tlaišwa ke ditlhaselo tše šoro tše di swanago le ye. Ke ka baka la’ng di be di tlaišwa? Ke’ng seo se ilego sa di thuša go kgotlelela? Hle ntumelele gore ke go anegele phihlelo ya lapa la-ka.

KE BELEGWE ka December 31, 1921, lapeng la bodumedi. Tate e be e le moruti wa Kereke ya Central African Presbyterian. Ke goletše Nkhoma, e lego torotswana ya kgaufsi le Lilongwe, yeo e lego motse-mošate wa Malawi. Ge ke be ke e-⁠na le nywaga e 15, ke ile ka ba mosadi wa Emmas Mzanga.

Ka letšatši le lengwe mogwera wa tate, yoo le yena e lego moruti, o ile a re etela. O be a lemogile gore Dihlatse tša Jehofa di be di dula kgaufsi le legae la rena gomme a re lemoša gore re se ke ra gwerana le tšona. O ile a re botša gore Dihlatse di tsentšwe batemona le gore ge e ba re be re sa hlokomele le rena re be re ka tsenwa ke batemona. Temošo yeo e ile ya re tšhoša kudu moo re ilego ra hudugela motsaneng o mongwe, moo Emmas a ilego a hwetša mošomo lebenkeleng. Eupša go se go ye kae re ile ra lemoga gore legae la rena le lefsa le lona le be le le kgaufsi le moo go dulago Dihlatse tša Jehofa!

Lega go le bjalo, go se go ye kae, go rata ga Emmas Beibele ka mo go tseneletšego go ile gwa mo tutueletša go bolela le yo mongwe wa Dihlatse. Ka morago ga go hwetša dikarabo tše di kgodišago tša dipotšišo tša gagwe tše dintši, Emmas o ile a amogela taletšo ya Dihlatse ya go ithuta Beibele le yena. Mathomong thuto ya Beibele e be e  swarelwa lebenkeleng leo a bego a šoma go lona, eupša ka morago thuto ya beke le beke e be e swarelwa legaeng la rena. Nako le nako ge Dihlatse tša Jehofa di be di tlile, ke be ke e-⁠tšwa ka ntlong ka gobane ke be ke di boifa. Lega go le bjalo, Emmas o ile a tšwela pele a ithuta Beibele. O ile a kolobetšwa ka April 1951, mo e ka bago ka morago ga dikgwedi tše tshelelago a thomile go ithuta. Lega go le bjalo, ga se a ka a mpotša se ka gobane a be a boifa gore ge nka tseba gona lenyalo la rena le be le tla fela.

Dibeke tša Mathata

Lega go le bjalo, ka letšatši le lengwe, mogwera wa-ka Ellen Kadzalero o ile a mpotša gore monna wa-ka o kolobeditšwe gore e be yo mongwe wa Dihlatse tša Jehofa. Ke ile ka galefa gakaakang! Go tloga letšatšing leo go ya pele, ga se ka ka ka mmolediša goba go mo lokišetša dijo. Ke ile ka ba ka tlogela go mo kgela meetse a go hlapa le go mo rutheletša ona​—e lego mošomo woo ka setšo sa rena o lebelelwago e le mošomo wa basadi bao ba nyetšwego.

Ka morago ga go kgotlelela tshwaro ye ka dibeke tše tharo, Emmas ka botho o ile a nkgopela gore ke dule le yena fase, gomme a mpotša lebaka leo ka lona a dirilego phetho ya go ba Hlatse. O ile a bala gotee le go hlalosa mangwalo a mmalwa, a bjalo ka 1 Ba-Korinthe 9:​16. Ke ile ka kgomega kudu maikwelong gomme ka ikwa gore le nna ke be ke swanetše go tšea karolo modirong wa go bolela ka ditaba tše dibotse. Ka gona ke ile ka dira phetho ya go thoma thuto ya Beibele le Dihlatse tša Jehofa. Bošegong bjona bjoo, ke ile ka lokišetša monna wa-ka yo lerato dijo tše bose, e lego seo se ilego sa mo thabiša kudu.

Go Abelana Therešo le ba Lapa Gotee le Bagwera

Ge batswadi ba rena ba be ba e-⁠kwa gore re be re kopanela le Dihlatse tša Jehofa, ba ile ba re lwantšha o šoro. Lapa lešo le ile la re ngwalela lengwalo la go re botša gore re se sa hlwa re le etela. Karabelo ya bona e ile ya re nyamiša, eupša re be re botile kholofetšo ya Jesu ya gore re be re tla ba le bana babo rena gotee le dikgaetšedi le botate gotee le bomma ba bantši ba moya.​—Mateo 19:⁠29.

Ke ile ka tšwela pele ka lebelo thutong ya-ka ya Beibele gomme ka kolobetšwa ka August 1951, e lego dikgwedi tše tharo feela le seripa ka morago ga ge monna wa-ka a kolobeditšwe. Ke ile ka ikwa ke gapeletšega go abela mogwera wa-ka Ellen therešo. Ka lethabo, o ile a amogela taletšo ya-ka ya thuto ya Beibele. Ka May 1952, Ellen o ile a kolobetšwa gomme a fetoga kgaetšedi ya-ka ya moya, e lego seo se ilego sa matlafatša tlemo ya rena ya bogwera. Lehono, re sa dutše re le bagwera ba go ntšhana sa inong.

Ka 1954, Emmas o ile a kgethelwa go yo etela diphuthego e le molebeledi wa tikologo. Ka nako yeo, re be re šetše re e-⁠na le bana ba tshelelago. Nakong yeo, molebeledi wa mosepedi yoo a bego a e-⁠na le bana o be a fetša beke e tee feela a etela diphuthego gomme bekeng e latelago a dula gae le mosadi wa gagwe le bana. Lega go le bjalo, ge Emmas a be a le modirong wa bosepedi, ka dinako tšohle o be a kgonthišetša gore ke swara thuto ya legae ya Beibele. Re be re leka go dira gore go ithuta le bana ba rena e be mo go thabišago. Le gona re be re bolela ka lerato la rena la go rata Jehofa gotee le la go rata therešo e tšwago Lentšung la gagwe ka kgodišego e tšwago pelong, e bile re tšea karolo modirong wa boboledi re le lapa. Lenaneo le la tlwaetšo ya moya le ile la matlafatša tumelo ya bana ba rena gomme le ile la thuša go ba lokišeletša tlaišo yeo ba bego ba le kgaufsi le go lebeletšana le yona.

Tlaišo ya Bodumedi e a Thoma

Ka 1964, Malawi e ile ya ba naga e ipušago. Ge balaodi ba mokgatlo o bušago ba lemoga boema-gare bja rena go tša dipolitiki, ba ile ba leka go re gapeletša go reka karata ya go ba setho sa mokgatlo. * Ka ge nna le Emmas re ile ra gana go dira bjalo,  ditho tša Mokgatlo wa Bafsa di ile tša senya tšhemo ya rena ya mabele​—e lego mothopo o mogolo wa dijo tša rena tša ngwageng o latelago. Ge ditho tša Mokgatlo wa Bafsa di be di rema mabele a rena, di be di opela kopelo e rego: “Go bohle bao ba ganago go reka karata ya Kamuzu [e lego Mopresidente Banda], makeke a tla ja mabele a bona a matala gomme bona batho bao ba be ba tla llišwa ke seo.” Lega go le bjalo, go sa šetšwe go lobja mo ga dijo, ga se ra ka ra itlhoboga. Re ile ra lemoga tlhokomelo ya Jehofa. O ile a re matlafatša ka lerato.​—Ba-Filipi 4:​12, 13.

Gare ga mpa ya bošego bjo bongwe ka August 1964, ke be ke le gae ke na le bana feela. Re be re robetše, eupša ke ile ka tsošwa ke modumo woo o bego o le kgojana wa batho ba opelago. E be e le ma-Gulewamkulu, e lego mokgatlo wa ka sephiring wo o bego o boifša wa dibini tša mmino wa setšo tšeo di hlaselago batho gomme tša itira eka ke meoya ya bagologolo bao ba hwilego. Mokgatlo wa Bafsa o be o rometše ma-Gulewamkulu gore a tlo re hlasela. Ke ile ka tsoša bana kapejana gomme pele bahlasedi ba ka fihla legaeng la rena, re ile ra tšhabela sethokgweng.

Ge re le lefelong leo re bego re iphihlile go lona, re ile ra bona seetša se se phadimago. Ma-Gulewamkulu a be a fišitše ntlo ya rena yeo e ruletšwego ka bjang. E ile ya fsa lore-lore, gotee le dilo ka moka tšeo re bego re e-⁠na le tšona. Ge bahlasedi ba tloga maropeng ao a bego a thunya muši a ntlo ya rena, re ile ra kwa ba bolela gore, “Re goleditše Hlatse yela mollo o mobotse gore e ikomoše go ona.” Re ile ra leboga Jehofa gakaakang gore re ile ra kgona go tšhaba re šireletšegile! Ke therešo gore ba be ba sentše ntlo ya rena, eupša ba be ba sa senya boikemišetšo bja rena bja go bota Jehofa go e na le batho.​—Psalme 118:⁠8.

Re ile ra kwa gore ma-Gulewamkulu a dirile selo se se šoro ka mo go swanago go malapa a mangwe a mahlano a Dihlatse tša Jehofa tikologong ya rena. Re be re tletše lethabo le tebogo gakaakang ge bana babo rena ba diphuthegong tša kgaufsi ba be ba tlile go re hlakodiša! Ba ile ba re agela dintlo gomme ba re nea dijo ka dibeke tše mmalwa.

Tlaišo e a Mpefala

Ka September 1967 lesolo la go kgoboketša Dihlatse tša Jehofa ka kgapeletšo le ile la aparetša naga. E le gore ba re hwetše, bafsa ba šoro le ba sehlogo ka mo go feteletšego​—e lego ditho tša Mokgatlo wa Bafsa le wa Malawi Young Pioneers, tšeo di bego di itlhamile ka ditsedi​—ba ile ba tsoma Dihlatse ka ntlo le ntlo. Ge ba di hweditše, banna ba ile ba ithapela go di rekišetša dikarata tša go ba ditho tša mokgatlo wa bopolitiki.

Ge ba fihla legaeng la rena, ba ile ba botšiša ge e ba re e-⁠na le karata ya mokgatlo. Ke ile ka re: “Aowa, ga se ka e reka. Nka se e reke ga bjale, e bile nka se tsoge ke e rekile le ka mohla.” Ba ile ba ntshwara gotee le monna wa-ka gomme ba re iša seteišeneng sa maphodisa sa tikologong, ba se re nee le sebaka sa go ka tšea selo le ge e le sefe. Ge bana ba rena ba banyenyane ba be ba boa gae ba e-⁠tšwa sekolong, ga se ba ka ba re hwetša gomme ba ile ba tshwenyega kudu. Ka mahlatse, morwa wa rena yo mogolo, e lego Daniel, o ile a fihla gae ka moragonyana gomme moagišani o ile a mmotša seo se diregilego. Gatee-tee, o ile a tšea baratho ba gagwe gomme a leba seteišeneng sa maphodisa. Ba fihlile nakong ya ge maphodisa a be a re nametša ka diloring go re iša Lilongwe. Bana ba ile ba sepela le rena.

Kua Lilongwe kgoro-tsheko ya mankekišane e ile ya swarwa ntlong-kgolo ya maphodisa. Bahlankedi ba ile ba re botšiša gore, “Na le tla tšwela pele le le Dihlatse tša Jehofa?” Re ile ra araba ka gore, “Ee!” gaešita le ge karabo yeo e be e bolela le semetseng gore re ahlolelwa nywaga e šupa kgolegong. Go bao ba bego ba lebelelwa e le balaodi ba mokgatlo, kahlolo e be e le nywaga e 14.

Ka morago ga go fetša bošego ka moka re se ra ja le go robala, maphodisa a ile a re iša Kgolegong ya Maula. Moo disele di be di tletše wa go falala mo re ilego ra ba ra palelwa ke go hwetša lefelo la go robala fase lebatong! Ntlwana ya boithomelo e be e e-⁠na le kgamelo e tee feela go e nngwe le e nngwe ya disele tšeo di bego di tletše kudu. Tekanyo ya dijo le yona e be e le e nyenyane e bile e le dipotsa. Ka morago ga dibeke tše pedi, balaodi ba kgolego ba ile ba lemoga gore re be re le batho ba khutšo gomme ba re dumelela go diriša lapa la ka ntle la go itšhidulla la kgolego. Ka ge re be re kgobokane ka bontši, letšatšing le lengwe le le lengwe re ile ra hwetša dibaka tša go kgothatšana le go nea bohlatse bjo bobotse go bagolegwa ba bangwe. Seo se ilego sa re makatša e bile gore ka morago ga go hlankela kgolegong ka dikgwedi tše tharo, re ile ra  lokollwa ka baka la kgateletšo ya ditšhaba-tšhaba yeo e bego e newa mmušo wa Malawi.

Bahlankedi ba maphodisa ba ile ba re kgothaletša go boela magaeng a rena, eupša gape ba re botša gore Dihlatse tša Jehofa di be di thibetšwe Malawi. Thibelo ye e thomile ka October 20, 1967, go fihla ka August 12, 1993​—mo e nyakilego go ba nywaga e 26. Yeo e be e le nywaga ya mathata, lega go le bjalo ka thušo ya Jehofa re ile ra kgona go boloka boema-gare bja rena bjo bo tiilego.

Go Tsongwa Bjalo ka Diphoofolo

Ka October 1972, molao wa mmušo o ile wa tsoša lephoto le lefsa la tlaišo e šoro. Molao o be o laela gore Dihlatse tša Jehofa ka moka di be di swanetše go rakwa mafelong a tšona a mošomo le gore Dihlatse ka moka tšeo di dulago metsaneng di be di swanetše go rakwa magaeng a tšona. Dihlatse di be di tsongwa bjalo ka diphoofolo.

Ka nako yeo, ngwanabo rena yo mofsa wa Mokriste o ile a tla legaeng la rena ka molaetša wa tšhoganetšo wo o yago go Emmas o rego, ‘Mokgatlo wa Bafsa o rera go go kgaola hlogo, go bea hlogo ya gago koteng, gomme o e iše go babuši ba tikologong.’ Emmas o ile a tloga gae ka pela, eupša a tloga feela ka morago ga ge a dirile dithulaganyo tša gore re mo latele ka pela ka mo go ka kgonegago. Ka go akgofa, ke ile ka botša bana gore ba sepele. Ke moka ge ke be ke le kgaufsi le go sepela, ditho tše lesome tša Mokgatlo wa Bafsa di ile tša tšwelela, di nyaka Emmas. Ba ile ba thuba legaeng la rena eupša ba lemoga gore Emmas o be a sepetše. Ba galefile, banna ba ile ba nkgogela tšhemong ya kgaufsi ya moba, moo ba ilego ba nthaga gomme ba mpetha ka mahlaka a moba. Ke moka ba ntlogela ke le makgatheng a lehu le bophelo. Ka morago ga gore ke phafoge, ke ile ka gogobela gae.

Bošegong bjoo, ka morago ga ge lefsifsi le apareditše, Emmas o ile a bea bophelo bja gagwe kotsing ka go boa gae go tlo nnyaka. Ge a be a nkhwetša ke bethilwe o šoro, Emmas le mogwera wa gagwe yoo a bego a e-⁠na le koloi ba ile ba nthwala ka go neneketša ba ntsenya ka koloing. Ke moka re ile ra ya lapeng la ngwanabo rena kua Lilongwe, moo ke ilego ka fola ka go nanya tlhaselong gomme Emmas a thoma go dira dithulaganyo tša gore re tšhabe nageng.

Bafaladi Bao ba se Nago Moo ba ka Yago

Morwedi wa rena Dinesi le monna wa gagwe ba be ba e-⁠na le lori e imelago ditone tše hlano. Ba ile ba thwala mootledi yoo pele e bego e le setho sa Malawi Young Pioneers eupša yoo a ilego a re kwela bohloko ka baka la boemo bja rena. O ile a ithapela go thuša rena le Dihlatse tše dingwe. Ka mašego a mmalwa mootledi o be a rwala Dihlatse mafelong ao a rulaganyeditšwego e sa le pele a go iphihla. Ke moka a apare yunifomo ya gagwe ya mokgatlo wa Malawi Young Pioneers gomme a reile lori yeo e rwelego go phatša mapheko a mantši a maphodisa tseleng. O ile a ipea kotsing kudu bakeng sa go thuša Dihlatse tše makgolo go feta mollwaneng wa go tsena ka Zambia.

Ka morago ga dikgwedi tše sego kae, balaodi ba Zambia ba ile ba re bušetša morago Malawi; lega go le bjalo, re be re ka se kgone go boela motsaneng  wa gabo rena. Dilo ka moka tšeo re bego re e-⁠na le tšona tšeo re di tlogetšego di be di utswitšwe. Gaešita le masenke a be a tlošitšwe ntlong ya rena. Ka ge re be re se na moo re ka yago, re ile ra tšhabela Mozambique gomme ra dula kampeng ya bafaladi ya Mlangeni ka nywaga e mebedi le seripa. Lega go le bjalo, ka June 1975, mmušo o mofsa wa Mozambique o ile wa tswalela kampa gomme wa re gapeletša gore re boele Malawi, moo maemo a bego a se a fetoga bakeng sa batho ba Jehofa. Re ile ra gapeletšega go tšhabela Zambia ka lekga la bobedi. Moo re ile ra fihla kampeng ya bafaladi ya Chigumukire.

Dikgwedi tše pedi ka morago molokeloke wa dipese le dilori tša ntwa o ile wa ema kgaufsi le tsela e kgolo, gomme makgolo-kgolo a bahlabani ba Zam­bia bao ba itlhamilego o šoro a ile a šwahlela kampa. Ba ile ba re botša gore re agetšwe dintlo tše dibotse le gore ba be ba re nea dinamelwa tša go re thuša go fihla moo. Re be re tseba gore se ga se therešo. Bahlabani ba ile ba thoma go kgoromeletša batho ka diloring le ka dipeseng, gomme letšhogo le ile la tsena. Bahlabani ba ile ba thoma go thuntšhetša moyeng ka dithunya tša bona tša moretha o itiriša, gomme dikete-kete tša bana babo rena le dikgaetšedi di ile tša phatlalala ka letšhogo.

Tšharakanong yeo, Emmas o ile a wišwa ka phošo gomme a gatakwa, eupša yo mongwe wa bana babo rena o ile a mo thuša go ema. Re be re nagana gore se e be e le mathomo a masetlapelo a magolo. Bafaladi ka moka ba ile ba kitimela morago thokong tša Malawi. Ge re be re sa dutše re le Zam­bia, re ile ra fihla nokeng, gomme bana babo rena ba ile ba dira methaladi e mmalwa ba swarane ka matsogo bakeng sa go thuša bohle go tshela. Lega go le bjalo, ka lehlakoreng le lengwe la noka, re ile ra dikologwa ke bahlabani ba Zambia gomme ba ile ba re bušetša Malawi ka kgapeletšo.

Ge re boetše Malawi gape, re be re sa tsebe gore re tla ya kae. Re ile ra lemoga gore dibokeng tša bopolitiki le dikuranteng, batho ba be ba lemošitšwe gore ba hlokomele batho ba bafsa bao ba gorogago metsaneng ya bona, e le ge ba bolela ka Dihlatse tša Jehofa. Ka gona re ile ra phetha ka go ya motse-mošate, moo re bego re ka se lemogwe kudu go swana le metsaneng. Re ile ra atlega go hira ntlo e nyenyane, gomme Emmas o ile a thoma go etela diphuthego ka sephiring e le molebeledi wa tikologo.

Go ba Gona Dibokeng tša Phuthego

Ke’ng seo se ilego sa re thuša gore re dule re botega? Diboka tša phuthego! Dikampeng tša bafaladi tša Mozambique le Zambia, re be re e-⁠ba gona ka bolokologi dibokeng tšeo di bego di swarelwa Holong ya Mmušo e itekanetšego yeo e ruletšwego ka bjang. Go bokana bakeng sa diboka kua Malawi go be go le kotsi e bile go le thata​—lega go le bjalo ka mehla e be e le mo go swanetšego ke boiteko. E le go phema go lemogwa, gantši re be re swara diboka bošego-gare mafelong a lego lekatana. E le gore re se ke ra gogela tlhokomelo sebokeng sa rena, re be re sa ope magofsi bakeng sa go leboga seboledi eupša re be re fo fogohla diatla tša rena.

Dikolobetšo di be di swarwa bošego-gare. Morwa wa rena Abiyudi o ile a kolobetšwa tiragalong e bjalo. Ka morago ga polelo ya kolobetšo, yena le ba bangwe bao ba yago kolobetšong ba ile ba hlahlwa lefsifsing go išwa lefelong leo le tletšego mahlaka moo go bego go epilwe molete o sa išego. Ba ile ba kolobeletšwa moo.

Legae la Rena le Lenyenyane e Ile ya ba Lefelo le le Šireletšegilego

Nywageng ya mafelelo ya thibelo ya mmušo, legae la rena kua Lilongwe le ile la dirišwa e le lefelo le le šireletšegilego la go gorošetša dikgatišo. Mangwalo le dipuku tšeo di tšwago ofising ya lekala ya Zambia di be di romelwa legaeng la rena ka sephiring. Bana babo rena bao ba bego ba hlankela e le bo-mmaditsela ba diriša dipaesekela ba be ba e-⁠tla legaeng la rena go tla go tšea mangwalo le dipuku go tšwa Zambia go di romela dikarolong ka moka tša Malawi. Dimakasine tša Morokami tšeo di bego di abja e be e le tše di sesane ka gobane di be di gatišetšwa pampiring yeo e bego e dirišetšwa Dibeibele. Se se ile sa dira gore bo-mmaditsela ba kgone go rwala dimakasine tše dintši ka makga a ipoeleditšego gabedi go feta tšeo ba bego ba ka di rwala ge e ba dimakasine di be di gatišetšwa pampiring e tlwaelegilego. Bo-mmaditsela gape ba be ba aba dimakasine tše dinyenyane tša Morokami, tšeo di bego di e-⁠na le dihlogo tšeo di balwago feela. Go be go le bonolo go fihla makasine o monyenyane ka potleng ya gempe ka gobane o be o dirilwe ka letlakala le letee.

Bo-mmaditsela ba ba ile ba bea tokologo ya bona kotsing ge ba be ba ragela dipaesekela tša bona go phatša sethokgwa, ka dinako tše dingwe lefsifsing  la bošego, ba rwaleletše dikhatepokisi tša dipuku tšeo di thibetšwego dipaesekeleng tša bona. Go sa šetšwe mapheko a maphodisa ditseleng le dikotsi tše dingwe, ba be ba sepela dikhilomithara tše makgolo mehuteng ka moka ya leratadima bakeng sa go fihliša dijo tša moya go bana babo bona. Bo-mmaditsela bao ba rategago ba be ba le sebete gakaakang!

Jehofa o Hlokomela Bahlologadi

Ka December 1992, ge Emmas a be a nea polelo ketelong ya tikologo o ile a hwa lehlakore. Ka morago, o ile a se sa hlwa a kgona go bolela. Ka morago ga nako o ile a hwa lehlakore ka lekga la bobedi moo go ilego gwa dira gore lehlakore le lengwe la mmele wa gagwe le hwe ditho. Gaešita le ge go lebeletšana le go lahlegelwa ke bophelo bja gagwe bjo bobotse go be go le thata go yena, thekgo e lerato yeo a ilego a e hwetša phuthegong ya rena e ile ya fokotša manyami a-⁠ka. Ke ile ka kgona go hlokomela monna wa-ka ka gae go ba go fihlela a e-⁠hwa ka November 1994, a e-⁠na le nywaga e 76. Re be re nyalane ka nywaga e 57, gomme Emmas o ile a bona ge thibelo e tlošwa pele a e-⁠hwa. Eupša ke sa dutše ke llišwa ke go lahlegelwa ke mogwera wa-ka yo a botegago.

Ka morago ga gore ke be mohlogadi, mokgonyana wa-ka o ile a tšea boikarabelo bja go hlokomela e sego feela mosadi wa gagwe le bana ba bahlano eupša gotee le nna. Ka manyami, ka morago ga bolwetši bjo bokopana, o ile a hwa ka August 2000. Morwedi wa-ka o be a tla hwetša bjang dijo le madulo bakeng sa rena? Le gona mo, ke ile ka bona gore Jehofa o a re hlokomela le gore ka kgonthe “ké Yêna tata-xo-dišuana, le moahloledi wa bahloloxadi.” (Psalme 68:⁠5) Jehofa ka bahlanka ba gagwe ba lefaseng, o ile a re nea ntlo e mpsha e botse. Seo se diregile bjang? Ge bana babo rena le dikgaetšedi ba phuthegong ya rena ba be ba bona boemo bja rena bjo bo nyamišago, ba ile ba re agela ntlo ka dibeke tše hlano feela! Bana babo rena bao ba tšwago diphuthegong tše dingwe bao bego e le baagi ba ile ba tla go thuša. Lerato le botho tšeo di bontšhitšwego ke Dihlatse tše ka moka di ile tša re makatša ka gobane ntlo yeo di re agetšego yona e be e le botse go feta dintlo tšeo bontši bja bona ba bego ba dula go tšona. Lerato leo le bontšhitšwego ke phuthego e ile ya ba bohlatse bjo bobotse tikologong ya rena. Ge ke e-⁠ya go robala bošego, ke ikwa eka ke Paradeiseng! Ee, ntlo ya rena e mpsha e botse e dirilwe ka ditena le samente, eupša bjalo ka ge ba bangwe ba boletše, ke ntlo yeo e agilwego ka lerato e le ka kgonthe.​—Ba-Galatia 6:⁠10.

Tlhokomelo ya Jehofa e Tšwelago Pele

Gaešita le ge ka dinako tše dingwe ke be ke le kgaufsi le go swarwa ke kgateletšego e tseneletšego, Jehofa o be a le botho go nna. Ba šupago go bana ba-ka ba senyane ba sa dutše ba phela, gomme leloko la gešo ga bjale le na le ditho tše 123. Ke leboga gakaakang gore ba bantši ba bona ba hlankela Jehofa ka potego!

Lehono, ke e-⁠na le nywaga e 82, ke tletše lethabo ge ke bona seo moya wa Modimo o se fihleletšego kua Malawi. Nywageng e mene feela e fetilego, ke bone palo ya Diholo tša Mmušo e oketšega go tloga go e tee go fihla go tša ka godimo ga 600. Le gona ga bjale re na le ofisi e mpsha ya lekala kua Lilongwe, gomme re thabela go sepetšwa ga dijo tše di matlafatšago tša moya ka ntle le thibelo. Ke tloga ke nagana gore ke bone go phethagatšwa ga kholofetšo ya Modimo yeo e hwetšwago go Jesaya 54:​17, moo re kgonthišetšwago gore: “Xobane marumô ka moka a rulêlwaxo xo lwa naxô’, a ka se kxône selo.” Ka morago ga go hlankela Jehofa ka nywaga ya ka godimo ga e 50, ke kgodišegile gore ditekong le ge e le dife tšeo re ka lebeletšanago le tšona, Jehofa ka mehla o a re hlokomela.

Monna wa-ka, Emmas, o kolobeditšwe ka April 1951

Sehlopha sa bo-mmaditsela ba sebete

Ntlo yeo e agilwego ka lerato