Na go na le ‘Bodumedi bjo Tee Feela bja Therešo’?

“GO SWANA le ge go e-⁠na le Kriste o tee, ka gona go na le mmele o tee wa Kriste le Monyadiwa o tee wa Kriste: ‘E lego Kereke e tee ya Katholika ya baapostola.’”​—Dominus Iesus.

Ke kamoo mokadinale wa Roma Katholika Joseph Ratzinger a ilego a tsebatša thuto ya kereke ya gagwe ya gore go na le bodumedi bjo tee feela bja therešo. O itše bodumedi bjoo ke “Kereke e tee ya Kriste e lego Kereke ya Katholika.”

“Ga se Dikereke ka Kgopolo ya Kgonthe”

Gaešita le ge Mopapa John Paul II a ile a phegelela gore lengwalo la Dominus Iesus le be le “se na boikgodišo malebana le madumedi a mangwe goba go a nyatša,” baetapele ba kereke ya Protestanta ba ile ba arabela ka go tia go lona. Ka mohlala, Sebokeng-kakaretšo sa Presbyterian kua Belfast, Northern Ireland, ka June 2001, mohlankedi yo mongwe o ile a bolela gore lengwalo le be le tšweleditšwe ke “sehlopha se matla sa baarogi sa Kereke ya Roma Katholika . . . seo se bego se tšhošitšwe kudu ke moya wa go bolela ka bolokologi woo o bego o tšweleditšwe ke lekgotla la bobedi la Vatican.”

Robin Eames, e lego Mopišopo-mogolo wa Kereke ya Ireland, o boletše gore o be a tla “nyama kudu” ge e ba lengwalo le e be e le “tsela ya mathomong ya go nagana ya Kereke ya Katholika pele ga ge go ka swarwa lekgotla la bobedi la Vatican.” Ge a be a bolela ka boipolelo bja lekgotla la Vatican bja gore dikereke tšeo di ganago dithuto tše itšego tša Katholika “ga se Dikereke ka kgopolo ya kgonthe,” Eames o itše: “Ao go nna e be e ka ba mantšu a hlabago.”

Ke’ng seo se hlohleleditšego gore go ngwalwe Dominus Iesus? Go bonagala thulaganyo ya taolo ya roma Katholika e be e šarakantšwe ke seo se bego se bitšwa kgopolo ye e ithekgilego ka batho ya bodumedi. Go ya ka The Irish Times, “go tšwelela ga lekoko la ditlogo tše di fapa-fapanego tša thuta-tumelo​—leo ge e le gabotse le bolelago gore madumedi ga a fapane . . . go ile gwa tshwenya Mokadinale Ratzinger kudu.” Go bonagala pono ye e ile ya tutuetša seo a ilego a se bolela mabapi le bodumedi bjo tee bja therešo.

Na ke ga Bohlokwa Gore o wa Bodumedi Bofe?

Ee, go ba bangwe, “kgopolo ye e ithekgilego ka batho ya bodumedi” goba “lekoko la ditlogo tše di fapa-fapanego tša thuta-tumelo” e bonagala e le ye e kwagalago kudu le ye e gogelago go feta tšhišinyo le ge e le efe ya gore go na le bodumedi bjo tee feela bja therešo. Go bona, bodumedi e swanetše go ba taba ya kgetho ya motho ka noši ka mo go feletšego. Ba bolela gore, ‘se se šalago ke gore ga se ga bohlokwa gore o wa bodumedi bofe.’

Yeo e ka bonagala e le kgopolo e bulegilego  kudu​—gaešita le ge mafelelo a mangwe a yona e bile go arogana ga bodumedi ka dikereke tše fapanego tše dikete-kete. Ba bantši ba bolela gore ‘phapano e bjalo e lego bodumeding e fo ba mantšu a kwagalago a gore motho o na le tokologo.’ Lega go le bjalo, go ya ka mongwadi Steve Bruce, “kgopolo [e bjalo] e bulegilego ya bodumedi” ge e le gabotse ga e fapane le “go se be le taba ga bodumedi.”​—A House Divided: Protestantism, Schism, and Secularization.

Ka gona, pono e nepagetšego ke efe? Na go na le bodumedi bjo tee feela bja therešo? Na ke bja Kereke ya Roma Katholika feela? Na madumedi a mangwe a amogelwa ke Modimo ka tsela e swanago? Ka ge dipotšišo tše di akaretša tswalano ya rena le Mmopi wa rena, ka kgonthe ke ga bohlokwa go tseba pono ya gagwe tabeng ye. Re ka dira seo bjang? Ka go hlahloba Lentšu la Modimo le le buduletšwego, e lego Beibele. (Ditiro 17:​11; 2 Timotheo 3:​16, 17) Anke re naganišišeng ka seo e tlago go se bolela tabeng ye ya bodumedi bjo tee bja therešo.