Na o Tšeela Godimo Badumedi-gotee le Wena ba Tšofetšego?

GE BATHO ba Isiraeleng ya bogologolo ba be ba le tswalanong ya kgwerano le Modimo, ba be ba laetšwe gore: “Xe O lebana le hlôxô e pududu o êmê; sefahloxô sa mokxalabyê O se hlomphê; xomme O boifê Modimo wa xaxo.” (Lefitiko 19:​32) Ka gona, go hlompha bao ba tšofetšego e be e le tirelo e kgethwa, gomme go be go tswalanywa le go ikokobeletša Modimo. Gaešita le ge Bakriste lehono ba se sa le ka tlase ga Molao wa Moše, o re gopotša gore Jehofa o lebelela batho ba tšofetšego bao ba mo hlankelago e le ba bohlokwa le ba rategago. (Diema 16:​31; Ba-Hebere 7:​18) Na re na le pono e swanago le ya Jehofa? Na re tšeela bana babo rena le dikgaetšedi ba tšofetšego ba Bakriste godimo?

O Ile a Tšeela Mogwera wa Gagwe yo a Tšofetšego Godimo

Pego e nngwe ya Beibele yeo e gatelelago go bontšha tlhompho go bao ba tšofetšego e hwetšwa ka pukung ya Dikgoši tša Bobedi. E na le tlhaloso ya kamoo moporofeta Eliya a ilego a hlatlangwa ke moporofeta Elisa yo mofsa. Nagana ka seo se ilego sa direga letšatšing la mafelelo la Eliya e le moporofeta mmušong wa meloko e lesome ya Isiraele.

Letšatšing leo, moporofeta yo a tšofetšego o be a laetšwe ke Jehofa go tšea leeto la go tloga Giligala go ya Bethele, go tloga Bethele go ya Jeriko le go tloga Jeriko go ya Nokeng ya Jorodane. (2 Dikxoši 2:​1, 2, 4, 6) Leetong leo la mo e ka bago dikhilomithara tše 50, Eliya o ile a kgopela Elisa ka makga a mararo gore a tlogele go mo šala morago. Lega go le bjalo, go fo swana le ge nywaga-kgolong pejana Ruthe yo mofsa a ile a gana go tlogela Naomi, Elisa le yena o ile a gana go tlogela moporofeta yo a tšofetšego. (Ruthe 1:​16, 17) Elisa o ile a bolela ka makga a mararo gore: “Ka bophelô bya Morêna, le ka bophelô bya xaxo, nka se ke ka bá ka Xo tloxêla.” (2 Dikxoši 2:​2, 4, 6) Ka nako yeo, Elisa o be a šetše a thušitše Eliya ka nywaga e ka bago e tshelelago. Lega go le bjalo, o be a kganyoga go hlankela le Eliya ka nako e telele ka mo go kgonegago. Ge e le gabotse pego e tlaleletša ka gore: “Ba re ba sa tšama bà boledišana, ba thšoxa . . . Eliya a rotoxela lexodimong.” (Temana 11) Eliya le Elisa ba be ba boledišana go ba go fihla motsotsong wa mafelelo wa bodiredi bja Eliya kua Isiraele. Go be go bonagala moporofeta yo mofsa a fagahlela go monya mantšu a mantši ka mo go kgonegago a tlhahlo le kgothatšo a tšwago go moporofeta yo a tšofetšego le yo a nago le phihlelo e ntši. Go molaleng gore o ile a tšeela mogwera wa gagwe yo a tšofetšego godimo.

 ‘E le Bo-tate le Bo-mma’

Ga go thata go bona lebaka leo ka lona Elisa a bego a rata moporofeta yo a tšofetšego bjalo ka mogwera​—e bile e le tatagwe wa moya. (2 Dikxoši 2:​12) Pejana ga ge kabelo ya Eliya e ka fela kua Isiraele, o ile a botša Elisa gore: “Kxopêla se nkaxo Xo dirêla sôna, kè sešo ka tlošwa xo wene.” (Temana 9) Ka gona Eliya o ile a bontšha go tshwenyega ka boemo bja moya bja mohlatlami wa gagwe le go tšwela pele ga modiro wa Modimo go ba go fihla bofelong.

Lehono, ke mo go ruthetšago pelo go lemoga go tshwenyega mo go swanago ga bo-tate le ga bo-mma mo go bontšhwago ke bana babo rena le dikgaetšedi ba tšofetšego ba Bakriste ge ba abelana le ba bafsa tsebo ya bona gotee le bohlale ka go rata. Ka mohlala, baithapi ba nako e telele bao ba hlankelago diofising tša lekala tša Dihlatse tša Jehofa ba thuša ditho tše difsa tša lapa la Bethele ka go rata gore di be le bokgoni bjo di bo nyakago bakeng sa go dira tirelo ya tšona. Ka mo go swanago, balebeledi ba basepedi le basadi ba bona bao ba bego ba dutše ba etela diphuthego ka nywaga e mentši ba abelana diphihlelo tša bona tše dintši le bao ba tlwaeletšwago go hlankela e le badiredi ba basepedi. Go feta moo, diphuthegong tša Dihlatse tša Jehofa go dikologa lefase, go na le bana babo rena le dikgaetšedi bao ba bego ba dutše ba hlankela Jehofa ka go botega ka nywaga-some e mentši le bao ka lethabo ba abelanago le ditho tše difsa tša phuthego bohlale bja bona bjo bo šomago gotee le diphihlelo.​—Diema 2:⁠7; Ba-Filipi 3:​17; Tito 2:​3-⁠5.

Go tshwenyega mo go tšwago pelong moo go bontšhwago ke Bakriste ba ba tšofetšego ba rategago go dira gore go hlompha batho ba bjalo ba tšofetšego e be mo go thabišago e le ka kgonthe. Ka gona, re nyaka go ekiša mohlala wa Elisa ka go tšeela godimo badumedi-gotee le rena ba tšofetšego. Bjalo ka ge moapostola Paulo a re gopotša, anke re tšweleng pele go swara ‘bakgalabje bjalo ka ge eka ke bo-tatago rena’ gomme ‘bakgekolo bjalo ka ge eka ke bo-mmago rena.’ (1 Timotheo 5:​1, 2) Ka go dira bjalo, re tla thuša gore phuthego ya Bokriste e šome ka tsela e swanetšego gotee le go tšwela pele lefaseng ka bophara.

Elisa o be a kganyoga go hlankela le Eliya ka nako e telele ka mo go kgonegago

Ba bafsa ba holwa kudu ke Bakriste ba tšofetšego